Batu Kaufela Ba Kona ku Fumana Likute Le Li Ba Swanela

“Lu lukela ku fetula lifasi ku li bisa le linde, mo ku na ni likute la butu.”—KI MWA NA BULELEZI PREZIDENTI WA AMERICA HARRY TRUMAN, KWA SAN FRANCISCO, CALIFORNIA, MWA U.S.A., KA LA 25 APRIL 1945.

SINA mo ne ba ikutwezi ba bañata hamulaho wa ndwa ya lifasi ya bubeli, Prezidenti Truman na kozwi kuli batu ne ba swanela ku ituta ku ze ne ezahezi ni ku fetula lifasi ku li bisa sibaka mwa kutekiwa mañi ni mañi. Ka bumai lika ha li si ka zamaya cwalo kacenu. “Likute la butu” li swalelezi ku kutela mwamulaho kakuli musimululi wa butata bo hasi kamunu kono ki sila yo mutuna wa batu.

Musimululi wa Butata

Bibele i biza sila yo kuli ki Satani Diabulosi, sibupiwa se si maswe sa moya, ya lwanisize swanelo ya bubusi bwa Mulimu ku zwa kwa simuluho. Ku zwa Satani fa bulelela ni Eva mwa simu ya Edeni, mulelo wa hae kikuli a yaulule batu kuli ba lisele ku sebeleza Mubupi wa bona. (Genese 3:1-5) Mu hupule fela bumaswe bo ne ba kopani ni bona bo Adama ni Eva kabakala ku utwa kelezo ya  Diabulosi! Kabakala ku loba mulao wa Mulimu wa ku sa ca kwa kota, nto ya pili ye maswe ye ne ezahezi ku bona ki ya kuli mwa sibeli sa bona ‘ba ipata, ba saba pata ya Muñ’a Bupilo Mulimu.’ Ne ba ipateziñi? Adama na itumelezi kuli: “Ni sabile, kakuli ni mapunu; mi ni ipatile.” (Genese 3:8-10) Silikani sa Adama ni Ndat’ahe wa kwa lihalimu ne si cincize mi ni yena na kalile ku iponela mu sili. Na ikutwile ku swaba ni kutokwa tukuluho ya ku ambola ni Jehova.

Diabulosi na tokwelañi ku felisa likute la na ikutwa ku ba ni lona Adama? Libaka kikuli mutu na bupilwe ka siswaniso sa Mulimu, mi Satani u tabela ku bona mutu ha eza lika ze sa benyisi hande kanya ya Mulimu. (Genese 1:27; Maroma 3:23) Sisupo se, si lu tusa ku utwisisa libaka likezo za ku kokobezana ha li atile kwa batu. Satani ki yena “mulimu wa lifasi le,” mi u fuzelezi moya wa hae wo ka “nako, ye ka yona, mutu u na ni mata fahalimu a yo muñwi, ku mu eza maswe.” (2 Makorinte 4:4; Muekelesia 8:9; 1 John 5:19) Kana seo si talusa kuli likute sakata la butu li yongelezi?

Jehova U Kuteka Batu Ba Bupile

Ha mu hupule hape mo ne ku inezi mwa simu ya Edeni pili bo Adama ni Eva ba si ka eza kale sibi. Ne ba na ni lico ze ñata, musebezi o tabisa, mi ne ba ka pila bupilo bo bunde ku ya ku ile, bona ni bana ba bona. (Genese 1:28) Bupilo bwa bona kaufela ne bu bonisa mulelo wa Mulimu o lilato ni o bubekisa batu.

Kana mubonelo wa Jehova wa ku bonisa likute kwa batu ne u cincize bo Adama ni Eva ha ne ba ezize sibi? Kutokwa. Jehova na bonisize kutwisiso ya hae bakeñisa maswabi a ne ba utwa kabakala kutokwa litino. Jehova ka lilato a ba lukiseza “likubo za matalo” ku fita matali a kota ya feiga a ne ba ikapesize. (Genese 3:7, 21) Kona kuli Mulimu na ba bubekile ku fita ku ba siya honacwalo mwa maswabi a bona.

Hasamulaho mwa miteñi ya sicaba sa Isilaele, Jehova na bonisize mufelañeke kwa lindiala, limbelwa, ni bazwahule—zona likwata za batu ba ne ba nyandiswanga hañata. (Samu 72:13) Ka mutala, ha ne ku kutulwa bubeke, litolwana za olive, ni masimu a likota za veine, Maisilaele ne ba taluselizwe ku sa kutela lico ze ne siyalezi. Kono Mulimu na ba laezi kuli lico zeo li “tuhelelwe mutu wa muenyi, ni kuzana, ni mbelwa.” (Deuteronoma 24:19-21) Milao ye ha ne i mamezwi ne i felisize mukumbeleti mi ne i fumanisize batu musebezi o kutekehisa mane nihaiba zona linjebwe ze feza.

Jesu Na Kuteka Ba Bañwi

Jesu Kreste, Mwan’a Mulimu, ha n’a li fa lifasi-mubu, na bonahezi kuli na tabela ku pahamisa ba bañwi. Ka mutala, nako ye ñwi ha na li mwa Galilea, na atumezwi ki munna ya na tezi mbingwa. Ka ku ya ka Mulao wa Mushe, kuli ba bañwi ba si ke ba yambukelwa ki mbingwa, mutu ya kula mbingwa na lukela ku huweleza kuli: “Masila! Masila!” (Livitike 13:45) Kono munna yo na si ka huweleza cwalo ha na  atumezi Jesu. Kono yena a wela fafasi ka pata ni ku kupa Jesu kuli: “Mulena, ha u lata, u na ni mata a ku ni folisa.” (Luka 5:12) Jesu na ezize cwañi? Na si ka kalimela munna yo kuli na lobile Mulao wa Mushe, mi hape na si ka icanganisa fela kamba ku mu shengoka. Kono na bubekile munna wa mbingwa yo ka ku mu swala ni ku bulela kuli: “Na lata, u fole.”—Luka 5:13.

Ka linako ze ñwi, Jesu na itusisize m’ata a hae a ku folisa a sa ngunyuti mukuli—fokuñwi mane na folisanga batu ba ne ba li kwahule ni yena. Kono Jesu ka nako ye na iketezi fela ku swala munna yo ya na kula mbingwa. (Mateu 15:21-28; Mareka 10:51, 52; Luka 7:1-10) ‘Munna yo na tezi mbingwa,’ mi kona kuli ku si na kakanyo ne se ku fitile lilimo ze ñata a sa ngunyutwi ki mutu yo muñwi. U swanela ku ba ya na ikutwile hande hahulu ha na ngunyutilwe ki mutu hamulaho wa nako ye telele! Munna yo sa na tokwa fela luli ne li ku foliswa mbingwa ya hae. Kono mufolisezo wa Jesu ku si na ku kakanya ne u tusize munna yo ka nzila ye ñwi—na ikutwile ku kutekeha. Kana lwa kolwa kuli mwa lifasi le, likute le li cwalo la konwa ku boniswa ku ba bañwi? Haiba lwa lumela cwalo, puzo ki ya kuli, ki ifi nzila ye lu kona ku eza ka yona cwalo?

Mulao Wo Pahamisa Ba Bañwi

Jesu na file taelo ye ye ngiwa ki ba bañata kuli ki yona ye tamanisa hahulu bulikani bwa batu: “Linto kamukana ze mu lata kuli batu ba mi ezeze, mu ba ezeze zona ni mina.” (Mateu 7:12) Mulao wa mupilelo wo u susueza mutu ku kuteka ba bañwi, ka sepo ya kuli ni bona ba ka mu kuteka.

Ze ezahalile li paka kuli ku latelela mulao wo ha ku iteli fela ka sipepo kakuli mane likezo za batu ka sipepo li lwanisana ni mulao wo. Munna yo muñwi yo lu ka biza Harold u li: “Na  mane ne ni ikolanga ku kokobeza ba bañwi. Ka manzwi a sikai fela, batu ne ba siyala inze ba filikani, mwa maswabi, mane ni ku lila fokuñwi.” Kono ne ku ezahezi nto ye ñwi ye ne tisize kuli Harold a tuhele mukwa wo. Harold u li: “Na kala ku etelwa ki Lipaki za Jehova ba ba fitana-fitana. Ha ni iheta kwamulaho, ni ikutwa bumaswe ha ni nahana ze ñwi za lika ze ne ni bulezi ni mo ne ni ezezanga Lipaki fokuñwi. Kono ne ba si ka zwafa, mi hanyinyani-hanyinyani, manzwi a Mulimu a kala ku ni fita kwa pilu mi a ni tusa ku cinca.” La kacenu le, Harold u sebeza sina muokameli mwa puteho ya Sikreste.

Mutala wa Harold u paka kuli “Linzwi la Mulimu ki le li pila, mi li na ni mata; kwa buhali li fita lilumo le li lozizwe kafa ni kafa, mi li punya ku y’o fita kwa makauhanelo a moya ni pilu, ni kwa makopanelo a masapo, ni kwa mooko; mi li na ni bubebe mwa ku atula maikuto ni mihupulo ya mwa pilu.” (Maheberu 4:12) Linzwi la Mulimu li na ni m’ata a ku fita mutu kwa pilu ni ku cinca munahano ni mikwa ya hae. Kuli lu bonise likute ku ba bañwi, lu tokwa ku ba ni takazo ye zwelela kwa pilu luli ya ku bata ku ba tusa isiñi ku ba tunka, ni ku ba bubeka ku fita ku ba shubula.—Likezo 20:35; Maroma 12:10.

Batu Ba ka Kutelwa ki Likute Le Li Ba Swanela

Takazo ye swana yeo ki yona ye susumeza Lipaki za Jehova ku bulelela ba bañwi ka za sepo ye nde ya Bibele. (Likezo 5:42) Ha ku na nzila ye nde ya ku bonisa ka yona likute ku mutu yo muñwi ye fita ku mu bulelela “litaba ze nde” za Bibele. (Isaya 52:7) “Litaba ze nde” zeo li kopanyeleza ni ku apala “mutu yo munca,” ya ka toola “litakazo ze maswe” za ku kokobeza ba bañwi. (Makolose 3:5-10) Hape li kopanyeleza ni mulelo wa Jehova wa kuli ona cwale-cwale fa a zwise miinelo ni mikwa ye feza likute la butu, hamohocwalo ni ku tanyela mushamiliketi wa lika zeo, yena Satani Diabulosi. (Daniele 2:44; Mateu 6:9, 10; Sinulo 20:1, 2, 10) Konji ka nako yeo, lifasi ha “li ka tala zibo ya [Muñ’a] Bupilo,” kihona batu ba ka kutelwa ki likute le li ba swanela.—Isaya 11:9.

Lu mi mema kuli mu itute ka za sepiso ye tabisa yeo. Ka ku swalisana ni Lipaki za Jehova, mu ka itemuhela isali mina kuli ku sebelisa likuka za Bibele ku bonisa likute ku ba bañwi. Mi mu ka fita ni fa ku ziba ka mo Mubuso wa Mulimu ona cwale-cwale fa u ka ‘fetulela lifasi ku li bisa le linde, mo ku na ni likute la butu,’ le li si ke la yonga ni kamuta.

[Mbokisi/Siswaniso se si fa likepe 6]

Ku Sepahala Kuli Ba Kutekehe

Fa ndwa ya lifasi ya bubeli, Lipaki za Jehova ba ba fitelela 2,000 ne ba isizwe kwa minganda ya tukufazo ya ba Nazi kabakala bulapeli bwa bona. Lipaki bao ne ba sepahalile luli, mi bo Gemma La Guardia Gluck ba ne ba tamezwi kwa Ravensbrück ba bulela za taba yeo mwa buka ya bona ye twi My Story: “Ka nako ye ñwi ba Gestapo ne ba zibisize kuli Muituti wa Bibele kaufela ya na ka lisela bulapeli bwa hae ni ku nyatela pampili ye bonisa cwalo na ka lukululwa mi na si ke a nyandiswa hape.” Haili ka za bani ba ne ba hanile ku nyatela pampili yeo, ne ba ñozi kuli: “Ne ba tabela ku zwelapili ku nyanda ku fitela lifasi le linca li taha.” Ne ba ezelizeñi cwalo? Bo Magdalena, ba ba bulezwi mwa taba ye felile, ba se ba matela kwa mafelelezo a lilimo za bo ma 80, ba talusa kuli: “Nto ya butokwa ne li ku sepahala ku Jehova ku fita ku fumana tukuluho ka linzila ze ñwi. Kuli lu kutekehe ne lu tokwa ku sepahala.” *

[Litaluso za kwatasi]

[Siswaniso se si fa likepe 5]

Jesu na kuteka ba na folisa

[Siswaniso se si fa likepe 7]

Lipaki za Jehova ba kuteka ba bañwi ka ku ba bulelela “litaba ze nde” za Bibele