Lipuzo Ze Zwa kwa Babali

Ki kabakalañi Deuteronoma 31:2 mwa Bibele ya New World Translation ha i bulela kuli Mushe ‘na si ka lumelezwa ku ya ni ku kuta’ sina mueteleli wa Isilaele, hailifo Libibele ze ñwi zona li bulela kuli n’a sa koni ku eza cwalo?

Nihaike kuli linzwi la Siheberu le li itusisizwe mwa timana ye li kona ku tolokiwa ka linzila ze peli, mo li tolokezwi mwa Libibele ze ñwi za Sikuwa ku bonisa inge kuli kwa mafelelezo a bupilo bwa hae, Mushe na fetuhile sianga, kuli n’a si na m’ata a ku peta misebezi ya hae ya buzamaisi. Ka mutala, Bibele ya The New English Bible i bulela kuli Mushe na ize: “Se ni li wa myaha ye 120, mi ha ni sa kona ku zamaya ka mo ni tokwela.” Ni Bibele ya The New American Bible i bulela kuli: “Ha ni . . . sa kona ku itamaela ka mo ni latela.”

Kono Deuteronoma 34:7 i bonisa kuli nihaike kuli Mushe na s’a supezi, na si ka fetuha sianga. I bala cwana i li: “Nako y’a shwa, Mushe n’a na ni myaha ye eza 120; meto a hae n’a si ka unsufala, mi mata a hae n’a si ka kuyuka.” Kacwalo Mushe n’a sa na ni m’ata a ku kona ku etelela sicaba, kono Jehova ki yena ya na si ka lela kuli Mushe a zwelepili ku etelela sicaba. Se si paka cwalo ki manzwi a na zwezipili ku bulela Mushe, a kuli: “[Muñ’a] Bupilo u ni tobosize, a li: Ha u na ku sila Jordani.” Ku bonahala kuli Jehova na kutela manzwi a n’a bulezi kwa mezi a Meriba.—Numere 20:9-12.

Mushe na pilile bupilo bo bu telele bo bu ipitezi, bo bu kona ku alulwa mwa likalulo ze talu. Na pilile lilimo ze 40 mwa Egepita a nz’a “lutwa butali kaufela bwa Maegepita; mi n’a na ni mata mwa ku bulela, ni mwa misebezi.” (Likezo 7:20-22) Ku zwa f’o a yo pila lilimo ze ñwi ze 40 mwa naha ya Midiani. Teñi ko, na izo ituta ku ba ni tulemeno twa kwa moya to ne tu tokwahala kuli a etelele batu ba Jehova. Mi ka lilimo ze 40 za mafelelezo Mushe na etelezi ni ku zamaisa Maisilaele. Kono cwale Jehova na atuzi kuli ya ka etelela sicaba ha si ka sila Nuka ya Jordani ni ku kena mwa Naha ya Sepiso ki Joshua isike Mushe.—Deuteronoma 31:3.

Kacwalo manzwi a kwa Deuteronoma 31:2 mwa Bibele ya New World Translation a nepahalile. Mushe na ka tuhela ku etelela Isilaele, isi kabakala kutokwa m’ata, kono kabakala kuli Jehova na si ka mu lumeleza ku eza cwalo.