Lu Swanela ku Zibelañi Antikreste?

Kwaikale, muapositola Joani ya n’a susumelizwe ki moya wa Mulimu n’a ñozi kuli: “Mu utwile kuli antikreste wa ta.” (1 Joani 2:18) Manzwi ao a hapa mamelelo luli! Batu ba kaliketite ku alakanya taluso ya manzwi ao ka lilimo-limo. Antikreste yo ki mañi? U taha lili? U ka ezañi ha ka taha?

MWAHAL’A linako ze felile, batu ba bañata ne ba tamelelizwe ku ba antikreste. Batu bao ba kopanyeleza Majuda, mapapa ba Katolika, ni babusi ba Siroma. Ka mutala, Mulena Frederick II (ya n’a pilile ka 1194 ku isa ka 1250) ha n’a hanile ku ikenya mwa ndwa ya ku lwanela keleke, Papa Gregory IX a mu tameleza ku ba antikreste mi a mu leleka mwa keleke. Innocent IV, ya n’a yolile Gregory, n’a mu lelekile hape mwa keleke. Kabakaleo, Frederick a zibahaza Innocent kuli ki antikreste.

Muapositola Joani ki yena fela muñoli wa Bibele ya n’a itusisize linzwi la “antikreste.” Linzwi leo li fumaneha haketalizoho mwa mañolo a hae a mabeli. Litimana mo ku fumaneha linzwi leo li bonisizwe mwa kakwenda fa likepe le li tatama. Ka ku bala litimana zeo, lwa kona ku bona kuli antikreste ki mupumi ya tukufalezwi ku sinya silikani sa na ni mutu ni Kreste ni Mulimu. Kacwalo, muapositola n’a susuelize Bakreste ka yena kuli: “Balatiwa, mu si ke mwa lumela mioya kaufela; kono mu like mioya ku ziba kana i zwa ku Mulimu. Kakuli bapolofita ba buhata ba bañata ba tile mwa lifasi.”—1 Joani 4:1.

Jesu ni yena n’a lemusize ka za bapumi, kamba bapolofita ba buhata, kuli: “Ba taha ku mina ba apezi kubo ya ngu, kono mwahali ki litongwani ze pamula. Mu ka ba ziba ka miselo [kamba misebezi] ya bona.” (Mateu 7:15, 16) Kana Jesu ni yena n’a lemusa balateleli ba hae ka za antikreste? Ha lu nyakisiseñi mo lu kona ku zibela mupumi yo ya sabisa.