Batu Mo Ba Batela za Mulimu

MWA ngambolo ya hae ye zibahala ya fa lilundu, Jesu n’a ize: “Tabo ki ya ba ba lemuha butokwi bwa bona bwa kwa moya.” (Mateu 5:3, NW) Mwendi ni mina mwa lumela cwalo. Batu kai ni kai ba lemuhile kuli ba tokwa Mulimu mwa bupilo bwa bona mi ba nga kuli haiba ba ziba za hae ba ka ba ni tabo. Kono cwale ku lata za Mulimu ku talusañi luli?

Buka ye ñwi i talusa kuli ku lata za Mulimu ku talusa ku tabela za bulapeli ni ku ba mutu wa kwa moya. Kuli mu utwisise hande taba yeo, ha mu nahane mutala wo: Mutu ya ziba ku eza hande pisinisi u bizwa kuli ki wa lipisinisi. Ka ku swana, mutu ya tabela za bulapeli kamba za kwa moya ki ya lata za Mulimu.

Mutu u kona ku lata cwañi he za Mulimu? Nihaike kuli ibat’o ba bulapeli kaufela bu ipapata ku luta za Mulimu, litaelo ze bu fa batu ka za mwa ku batela Mulimu ha li lumelelani. Ka mutala, ba keleke ya Protestanti ba ipapata kuli ka ku fumanehanga kwa lisebelezo za bona, mutu u ka tiya kwa moya. Ba keleke ya Katolika ba ipapata kuli ka ku fumaneha kwa Misa, ba ka sutelela ku Mulimu. Mabuddha ba nga kuli ka ku yeyanga ka nako ye telele ba ka ba ni liseli la ku ziba Mulimu. Mahindu bona ba nahana kuli ka ku itima lika, ba ka ziba Mulimu. Kana litumelo zeo kaufela ze bulezwi za kona ku tusa mutu ku ziba Mulimu luli? Kana ku na ni nihaiba i liñwi ku zona zeo?

Ba bañata ba hana. Bona ba nga kuli ku lata za Mulimu ki “ku ba fela ni tumelo,” fo kikuli, ku lumela fela ku mulimu ku si na ku yanga kwa keleke. Ba bañwi ba ikutwa kuli ku lata za Mulimu ha ku ami bulapeli kono ki takazo ya ku bata kozo ya mwa pilu ni ya ku pila ka tabo. Ba ñañelela kuli ba ba bata ku ziba za Mulimu ha ba tokwi ku yanga kwa keleke. Kono se ba tokwa fela ki ku itekula mwa pilu. Muñoli yo muñwi n’a bulezi kuli, kuli mutu a be ya tabile, ha tokwi ku ya kwa keleke kamba ku lumela lituto ze ñwi. N’a ize tabo i itingile ka mwa boniseza mutu lilato ku ba bañwi, mwa ngela lika ze mwa lifasi, ni mwa ezeza batu ba pila ni bona.

Kwa iponahaza hande kuli batu mo ba batela Mulimu kwa shutana hahulu. Libuka ze ñata li bulela kuli li luta za Mulimu, kono hañata babali ba zona ha ba fumanangi teñi se siñwi mi mane li ba lyanganisanga fela. Niteñi, ku na ni buka i liñwi ye na ni litaelo ze utwahala ka za mwa ku batela Mulimu. Buka ye i bonisa hande-ndende kuli i tahile ka moya wa Mulimu. (2 Timotea 3:16) Ha lu boneñi se i bulela buka ye, yona Bibele, ka za ku lata za Mulimu ni za kwa moya ni butokwa bwa ku eza cwalo.