Kana Mwa Yemela Puso ya Jehova?

“Mu bulelele macaba, mu li: [Muñ’a] Bupilo wa busa.”—SAMU 96:10.

1, 2. (a) Ne ku ezahezi nto mañi ya butokwa ibata iba ka October 29 C.E.? (b) Kezahalo yeo ne i ka ama cwañi Jesu?

I BATA i ba ka October 29 C.E. ne ku ezahezi nto ya butokwa hahulu ye samba ku ba i ezahale mwa lifasi. Mateu, muñoli wa buka ya Evangeli u biha kuli: “Jesu h’a kolobelizwe, a pakisa ku zwa mwa mezi; mi ka nako i liñwi, lihalimu la kwaluluhela yena; [Joani mukolobezi] a bona Moya o swana sina nkwilimba u t’o ina fahalimw’a [Jesu]. Mi kwa utwahala linzwi le li zwa kwa lihalimu, le li li: Yo ki mwan’a ka ya latiwa, ye ni katelwa.” Taba ye ki ye ñwi ya litaba li sikai ze ne ñozwi ki bañoli kaufela ba bane ba libuka za Evangeli.—Mateu 3:16, 17; Mareka 1:9-11; Luka 3:21, 22; Joani 1:32-34.

² Moya o kenile ha ne u sululezwi fa toho ya Jesu, seo ne li sisupo sa kuli ne li yena Mutoziwa, ili linzwi le li talusa Mesiya kamba Kreste. (Joani 1:33) Ka nako yeo peu ye ne sepisizwe ne i zibahalile cwale. Jesu ya n’a tile ku Joani Mukolobezi ne li yena ya n’a ka lumiwa fa lisito ki Satani, mi ne li yena ya n’a ka pyata toho ya sila se situna sa Jehova ni sa puso ya Mulimu. (Genese 3:15) Ku zwa ka yona nako yeo, Jesu n’a lemuhile kuli n’a swanela ku sebeza ka t’ata kuli a taleleze mulelo wa Jehova o ama puso ya Hae ni Mubuso.

3. Jesu n’a itukiselize cwañi musebezi wa n’a filwe wa ku yemela puso ya Jehova?

³ Kuli a itukiseze musebezi wa n’a filwe, “Jesu ha n’a tezi Moya o Kenile, a kuta kwa Jordani, mi a iswa ki Moya mwa lihalaupa.” (Luka 4:1; Mareka 1:12) Ha n’a li mwa lihalaupa, Jesu n’a konile ku yeya hahulu ka za taba ya n’a zusize Satani ya bubusi bwa Mulimu ni ka za musebezi wa n’a ka eza kuli a yemele puso ya Jehova. Taba ya puso ya Jehova i ama libupiwa kaufela ze butali, ze kwa lihalimu hamohocwalo ni ze fa lifasi-mubu. Kacwalo lu swanela ku nyakisisa bupilo bwa busepahali bwa n’a pilile Jesu ni ku bona ze lu swanela ku eza kuli ni luna lu bonise kuli lwa yemela puso ya Jehova.—Jobo 1:6-12; 2:2-6.

Satani Ha Lwanisa Puso ya Jehova

4. Ki lika mañi za n’a ezize Satani ze ne bonisa kuli n’a lwanisa luli bubusi bwa Jehova?

⁴ Niti kikuli Satani n’a iponezi litaba kaufela ze se lu bulezi. Mi kapili-pili, a taseza “peu” ya musal’a Mulimu. (Genese 3:15) Satani a lika Jesu halalu, inz’a mu taluseza kuli a eze  lika ze ne twi ne li ka mu tusa, ku fita ku eza lika za n’a mu laezi Ndat’ahe. Muliko wa bulalu ne u ama hahulu taba ya bubusi. Satani ha sa bonisize Jesu “mibuso kamukana ya lifasi, ni kanya ya yona,” a mu bulelela kuli: “Zeo kamukana ni ka ku fa zona, ha u wa ka mañwele, wa ni kubamela.” Bakeñisa kuli Jesu n’a ziba hande kuli Diabulosi n’a busa luli “mibuso kamukana ya lifasi,” a bonisa kwa n’a yemi mwa taba ya bubusi ka ku alaba Diabulosi kuli: “Zwa Satani, kakuli ku ñozwi kuli: Kubamela Mulena Mulimu wa hao, mi u sebeleze Yena a nosi.”—Mateu 4:8-10.

5. Ki ufi musebezi o t’ata wa n’a na ni ku eza Jesu?

⁵ Bupilo bwa Jesu ne bu bonisize hande kuli ku yemela bubusi bwa Jehova ki wona o no li mulelo wa butokwa hahulu ku yena. Jesu n’a ziba hande kuli n’a na ni ku pila ka busepahali ku fitela a bulaiwa ki Satani, ku likana ni mo ne ku polofitezwi kuli “peu” ya musali ne i ka lumiwa fa lisito kuli ku bonahale kuli Jehova ki yena mubusi ya swanela. (Mateu 16:21; 17:12) Hape n’a na ni ku kutaza taba ya kuli Mubuso wa Mulimu ki sona siitusiso sa ketile Jehova kuli a kokobeze Satani wa muipanguli ni ku kutisa kozo mwa pupo kaufela. (Mateu 6:9, 10) Jesu n’a ezizeñi kuli a pete musebezi o t’ata wo?

“Mubuso wa Mulimu U Sutelezi Fakaufi”

6. Jesu n’a bonisize cwañi kuli Mulimu u ka itusisa Mubuso kuli a “felise misebezi ya Diabulosi”?

⁶ Ka ku kala, “Jesu a ya kwa Galilea inz’a bulela Evangeli ya Mulimu, a li: Linako li felile, ni mubuso wa Mulimu u sutelezi fakaufi.” (Mareka 1:14, 15) Mane n’a ize: “Ni swanezi ku y’o bulelela ni minzi ye miñwi taba ye munati ya mubuso wa Mulimu; kakuli ki sona se ni lumezwi.” (Luka 4:18-21, 43) Jesu n’a zamaile mwa naha kaufela, “a nz’a luta batu, a bulela Evangeli ya mubuso wa Mulimu.” (Luka 8:1) Jesu hape n’a ezize limakazo ze ñata, n’a fepile undi wa nyangela, ku kuzisa liñungwa, ku folisa bakuli, ni ku zusa bafu. Ka limakazo zeo, Jesu n’a file bupaki bwa kuli Mulimu wa kona ku felisa bumaswe ni manyando ze tisizwe ki bukwenuheli bwa mwa Edeni ili ku ‘felisa misebezi ya Diabulosi.’—1 Joani 3:8.

7. Jesu n’a taluselize balateleli ba hae ku ezañi, mi ne ku bile cwañi hamulaho?

⁷ Kuli taba ye nde ya Mubuso i kutazwe ka mo ne ku tokwahalela, Jesu n’a onga-ongile batu ba ba sepahala ni ku ba luta musebezi wo. Pili n’a ketile baapositola ba hae ba 12 mi “a ba luma ku y’o bulela mubuso wa Mulimu.” (Luka 9:1, 2) Hamulaho kihona a luma ba bañwi ba 70 kuli ba yo shaela taba ya kuli: “Mubuso wa Mulimu u sutelezi fakaufi ni mina.” (Luka 10:1, 8, 9) Bao ha ne ba kutile ni ku to bulelela Jesu ze ne ba petile mwa musebezi wa Mubuso wa ku kutaza, Jesu a ba bulelela kuli: “Ne ni talima Satani inz’a wa kwa lihalimu sina mulilo wa pula.”—Luka 10:17, 18.

8. Bupilo bwa Jesu ne bu bonisizeñi ku si na kakanyo?

⁸ Jesu n’a belekile ka t’ata ka nako kaufela mwa musebezi wa ku paka za Mubuso. N’a belekile musihali ni busihu, mi mane n’a si na nihaiba lika ze ñwi za butokwa za mwa bupilo. N’a bulezi kuli: “Bo-luwawa ba na ni misima, ni linyunywani za lihalimu li na ni liyaleto; kono Mwan’a mutu h’a na mo a ka samela toho fateñi.” (Luka 9:58; Mareka 6:31; Joani 4:31-34) Nakonyana pili a si ka shwa kale, Jesu n’a bulezi fapil’a Ponse Pilato kuli: “Ki sona se ni pepezwi, ni se ni tezi mwa lifasi: kuli ni t’o paka niti.” (Joani 18:37) Za n’a ezize Jesu mwa bupilo bwa hae kaufela li bonisa kuli n’a si ka tela fela ku to ba muluti yo mutuna kamba ku to eza fela limakazo kamba nihaiba fela ku to shwa lifu la sitabelo, kono li bonisa kuli n’a tezi ku to yemela puso ya Jehova ni ku to paka niti ya kuli Mulimu wa kona ku taleleza tato ya hae ka Mubuso.—Joani 14:6.

 “Ku Petehile”

9. Satani n’a kwanisize cwañi ku luma “peu” ya musal’a Mulimu fa lisito?

⁹ Misebezi kaufela ya Mubuso ya n’a ezize Jesu ne i si ka tabisa Satani Diabulosi, yena Sila. Satani n’a kuta-kutezi ku bata ku lika ku bulaya “peu” ya musal’a Mulimu ka ku itusisa “peu” ya hae ya fa lifasi ili milonga ni bulapeli. Ku zwa nako ya pepwa fa lifasi ku isa nako ya lifu la hae, Jesu n’a zumiwa ki Satani ni bayemeli ba hae. Mi nako ya kuli Mwan’a mutu cwale a fiwe mwa mazoho a Sila kuli si mu lume fa lisito ne i tile ka 33 C.E. (Mateu 20:18, 19; Luka 18:31-33) Litaba za Evangeli li bonisa hande ka m’o Satani n’a itusiselize batu—ili Judasi Isikariota, baprisita ba bahulu, bañoli, Bafalisi, ni Maroma—ilikuli Jesu a atulwe ni kuli a shwe lifu le li butuku fa kota ya linyando.—Likezo 2:22, 23.

10. Ki nto mañi ya butokwa hahulu ya n’a petile Jesu ka nako y’a shwa fa kota ya linyando?

¹⁰ Ki lika mañi ze taha mwa munahano wa mina ha mu nahana za mwa n’a nyandezi Jesu ka nako ye telele fa kota ya linyando ni za lifu le li butuku la n’a shwile? Mwendi lifu leo li mi hupulisa za sitabelo sa tiululo sa n’a file Jesu ka lilato kwa batu ba ba na ni sibi. (Mateu 20:28; Joani 15:13) Mwendi mu komokiswa ki lilato le lituna la n’a bonisize Jehova ha n’a file sitabelo seo. (Joani 3:16) Kamba mwendi mu ikutwa inge mwa n’a ikutwezi lisole la Muroma le ne li bulezi kuli: “Luli, yo, ne li Mwan’a Mulimu.” (Mateu 27:54) Haiba ki cwalo, u zibe mu eza hande. Niteñi, mu hupule kuli manzwi a mafelelezo a n’a bulezi Jesu fa kota ya linyando, ne li a kuli: “Ku petehile.” (Joani 19:30) Ne ku petahalileñi? Ki niti kuli Jesu n’a petile lika ze ñata mwa bupilo bwa hae ni fa lifu la hae, kono mulelo luli o mutuna wa n’a tezi ku to peta fa lifasi ne li ku to yemela taba ya bubusi bwa Jehova. Mi ka ku ba yena “peu,” ne ku polofitilwe kuli n’a ka nyandiswa hahulu ki Satani ilikuli libizo la Jehova li bubekwe. (Isaya 53:3-7) Misebezi yeo kaufela ne li ye t’ata ku i eza, kono Jesu n’a i petile ka ku tala kaufela yona. N’a ezize musebezi o mutuna luli!

11. Ki sika mañi sa ka eza Jesu kuli a taleleze ka ku tala bupolofita bo ne bu bulezwi mwa Edeni?

¹¹ Kabakala tumelo ya hae ni ku sepahala kwa hae, Jesu n’a zusizwe kwa bafu, isi sina mutu, kono sina “moya o pilisa.” (1 Makorinte 15:45; 1 Pitrosi 3:18) Jehova n’a sepisize Mwan’a hae ya n’a tuzi kuli: “U ni ine ku la ka la bulyo, ku isa ha ni eza lila za hao Sipula sa f’a hatela mautu a hao.” (Samu 110:1) “Lila” zeo ki Satani, yena sila se situna, ni ba bañwi kamukana ba ba li kalulo ya “peu” ya hae. Ka ku ba yena Mulena wa Mubuso wa Jehova, Jesu Kreste u ka etelela ba ba ka sinya lila kaufela ze mwa lihalimu ni fa lifasi. (Sinulo 12:7-9; 19:11-16; 20:1-3, 10) Kihona cwale bupolofita bo bu kwa Genese 3:15 bu ka talelezwa ka ku tala mi kihona hape ku ka talelezwa kupo ya mwa tapelo ya n’a lutile Jesu balateleli ba hae, ye li: “Ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.”—Mateu 6:10; Mafilipi 2:8-11.

Mutala wa ku Latelela

12, 13. (a) Ki lika mañi ze zwa mwa ku kutaza taba ye nde ya Mubuso ze lu iponela kacenu? (b) Lu swanela ku ipuza lipuzo mañi haiba lu bata ku hata mwa n’a hatile Kreste?

¹² Kacenu, taba ye nde ya Mubuso i sweli ku  kutazwa mwa linaha ze ñata, sina mwa n’a polofitezi Jesu. (Mateu 24:14) Mi kabakaleo, bolule-lule ba batu ba ineezi ku Mulimu mi ba mu sebeleza. Ba tabiswa ki limbuyoti ze u ka tisa Mubuso. Ba nyolelwa ku pila ku ya ku ile ka kozo ni buiketo mwa paradaisi fa lifasi, mi ba tabela ku bulelela ba bañwi ka za sepo yeo. (Samu 37:11; 2 Pitrosi 3:13) Kana mu ba bañwi ba bashaeli bao ba Mubuso? Haiba ki cwalo, u zibe mu eza hande. Kono ku na ni nto ye ñwi hape ya swanela ku nahanisisa mañi ni mañi wa luna.

¹³ Muapositola Pitrosi n’a ñozi kuli: “Kreste ni yena u utwile butuku bakeñisa mina, a mi siyela mutala, kuli mu hate mw’a n’a hatile.” (1 Pitrosi 2:21) Mu lemuhe kuli mwa liñolo le, Pitrosi n’a bulela za manyando a Jesu, isi za tukufalelo ya Jesu ya ku kutaza kamba za buikoneli bwa hae bwa ku luta. Bakeñisa kuli Pitrosi n’a iponezi hande za n’a fitile ku zona Jesu, n’a zibile hande mwa n’a nyandezi Jesu kuli a ipeye kwatas’a puso ya ndat’ahe ni ku bonisa kuli Satani luli ki lihata. Kacwalo, lu kona ku hata cwañi mwa n’a hatile Jesu? Lu swanela ku ipuza kuli: ‘Kana ni itukiselize ku nyanda kuli ni yemele ni ku bubanisa puso ya Jehova? Kana mupilelo wa ka ni bukombwa bwa ka li bonisa kuli puso ya Jehova ki yona nto ya butokwa mwa bupilo bwa ka?’—Makolose 3:17.

14, 15. (a) Jesu n’a ezize cwañi ha n’a filwe liakalezo ze maswe ni ha ne ba bata ku mu keta ku ba mulena, mi ki kabakalañi ha n’a ezize cwalo? (b) Ki taba mañi ye lu swanela ku hupulanga kamita? (Mu bone ni taba ye li “Mu Yeme kwa Lineku la Jehova.”)

¹⁴ Zazi ni zazi, lu tahelwanga ki litiko mi lu tokwanga ku eza liketo, ze tuna ni ze nyinyani. Lu kona ku ziba cwañi mwa ku ezeza ha lu li mwa miinelo ye cwalo? Ka mutala, lu ezangañi ha lu talimana ni tiko ya ku loba mulao wa Mulimu? Pitrosi ha n’a bulelezi Jesu kuli a ikutwele butuku, Jesu n’a ezizeñi? Jesu n’a ize: “Zwa ku na, Satani, u sitataliso ku na; kakuli ha u utwi za Mulimu, konji za batu fela.” (Mateu 16:21-23) Kamba ku cwañi haiba lu fiwa musebezi o fumanisa mali  kamba lu huliswa fa musebezi kuli mane lu palelwa ku eza lika za kwa moya, kana lu ka likanyisa mwa n’a ezelize Jesu? Jesu ha n’a lemuhile kuli batu ba ne ba boni limakazo za hae “ne ba bata ku mu swala kuli ba mu eze mulena,” n’a balehile kapili-pili.—Joani 6:15.

¹⁵ Ki kabakalañi Jesu ha n’a ngile mihato ye cwalo ka linako zeo ni ze ñwi? Kakuli n’a lemuhile hande-ndende kuli ne ku na ni nto ye ñwi ya butokwa hahulu ye ne fita ku ikutwela butuku kamba ku ipumanela libubo. N’a bata ku eza tato ya Ndat’ahe ni ku yemela puso ya Jehova ku si na taba ni ze ne ka zwa mwateñi. (Mateu 26:50-54) Jesu n’a hupulanga kamita taba ya bubusi bwa Jehova. Kacwalo, haiba lu sa hupuli kamita taba ya bubusi bwa Jehova, ku ka ba bunolo ku fosa kamba ku palelwa ku sebeleza Mulimu. Kabakalañi? Kakuli lu kona ku swasiwa ka bunolo mwa liteo za Satani, yena ya ziba hahulu ku fetula ze maswe ku li bisa ze nde, sina mwa n’a ezelize ha n’a likile Eva.—2 Makorinte 11:14; 1 Timotea 2:14.

16. Ki ufi o swanela ku ba mulelo wa luna o mutuna ha lu nze lu tusa ba bañwi?

¹⁶ Ha lu li mwa bukombwa, lu ambolanga ni batu ka za lipilaelo za bona ni ku ba bonisa likalabo za mwa Bibele. Ka ku eza cwalo, lu susueza batu ku ituta Bibele. Kono nihakulicwalo mulelo wa luna o mutuna haki ku tusa fela batu ku ziba litaba za mwa Bibele kamba ku ba taluseza fela limbuyoti ze ka tiswa ki Mubuso wa Mulimu. Lu swanela ku ba tusa ku utwisisa hande taba ya bubusi bwa Jehova. Kana batu bao ba tabela ku ba Bakreste ba niti ni ku lwala kota ya bona ya linyando ni ku itombola bupilo bwa bona kabakala Mubuso? (Mareka 8:34) Kana ba tabela ku swalisana ni batu ba ba yemela puso ya Jehova ilikuli ba bonise kuli Satani ki lihata mi ki musawani? (Liproverbia 27:11) Lu na ni tohonolo ya ku yemela puso ya Jehova ni ya ku tusa ba bañwi kuli ba eze cwalo.—1 Timotea 4:16.

Mulimu Ha Ka Ba “Linto Kamukana kwa Batu Kamukana”

17, 18. Ki nako mañi ye nde ye lu ka libelela haiba lu yemela puso ya Jehova?

¹⁷ Ha lu nze lu lika ka t’ata ku yemela puso ya Jehova ka mupilelo ni ka bukombwa bwa luna, lwa kona ku libelela nako muta Jesu Kreste a ka “beya mubuso mwa mata a Mulimu Ndate.” Zeo li ka ezahala lili? Muapositola Paulusi u talusa kuli: “H’a sa felisize bulena kaufela, ni mibuso kaufela, ni mata kaufela. Kakuli u swanezi ku busa ku isa f’a ka beela lila za hae kaufela mwatas’a mautu a hae. . . . Fohe ni yena Mwana u ka beiwa mwa mata a Hae, Yena ya beile linto kaufela mwatas’a hae, ilikuli Mulimu a be linto kamukana kwa batu kamukana.”—1 Makorinte 15:24, 25, 28.

¹⁸ Mulimu ha ka ba “linto kamukana kwa batu kamukana,” yeo ikaba nako ye tabisa hahulu luli! Mubuso u kabe u petile mulelo o ne u tomezwi. Lila kaufela ze ne lwanisa puso ya Jehova li kabe li yundisizwe. Mwa lihalimu ni mwa lifasi ku ka ba ni kozo ni swalisano. Ka ku ya ka manzwi a walisamu, pupo kaufela i ka opela kuli: “Mu fe [Muñ’a] Bupilo kanya ye lukela Libizo la hae . . . Mu bulelele macaba, mu li: [Muñ’a] Bupilo wa busa.”—Samu 96:8, 10.

Kana Mwa Kona ku Alaba?

• Jesu n’a bonisize cwañi kuli n’a iyakatwa hahulu taba ya ku yemela puso ya Jehova?

• Ki ifi nto ya butokwa hahulu ya n’a petile Jesu ka bukombwa bwa hae ni ka lifu la hae?

• Lu kona ku hata cwañi mwa n’a hatile Jesu kuli lu bonise kuli lu yemela puso ya Jehova?

[Lipuzo za Tuto]

[Mbokisi/Maswaniso a fa likepe 29]

MU YEME KWA LINEKU LA JEHOVA

Sina mizwale ba bañata ba kwa naha ya Korea ni kwa libaka ze ñwi ha ba ziba, Bakreste ha ba talimana ni miliko ye mituna mwa bupilo, ki kwa butokwa ku no hupulanga libaka ha ba tahelwanga ki miliko yeo.

Yo muñwi wa Lipaki za Jehova ya n’a tamilwe ka nako ya puso ya ba Soviet n’a bulezi kuli: “Ne lu itiisize kabakala kuli ne lu utwisisize hande taba ye ne zusizwe mwa simu ya Edeni, yona taba ya tukelo ya Mulimu ya ku busa. . . . Ne lu ziba kuli ne lu na ni kolo ya ku yemela bubusi bwa Jehova. . . . Zibo yeo ne i lu tiisize mi ne i lu konisize ku zwelapili ku sepahala.”

Paki yo muñwi n’a talusize se ne si mu tusize ni ku tusa Lipaki ba bañwi ha ne ba li mwa tolongo. N’a bulezi kuli: “Jehova n’a lu tusize. Ku si na taba ni matata, ne lu zwezipili ku lapela Jehova. Ne lu susuezananga ka ku hupulisana kuli ne lu ketile ku yema kwa lineku la Jehova mwa taba ya bubusi.”

[Siswaniso se si fa likepe 26]

Jesu n’a yemezi cwañi puso ya Jehova ha n’a likilwe ki Satani?

[Siswaniso se si fa likepe 28]

Ki ifi nto ya butokwa ya n’a petile Jesu ka lifu la hae?