Kana Mwa Hupula?

Kana mu ikozi ku bala limagazini za cwanoñu fa za Tora ya ku Libelela? Mu bone haiba mwa kona ku alaba lipuzo ze latelela:

• Ki kabakalañi “Testamente ya Kale” ha i sa li ya butokwa?

Musimululi wa yona hasi mulimu ya lunya, kono ki Mulimu ya lilato, yena Jehova. Jesu ni balateleli ba hae ba pili ne ba zwezipili ku ama kwa Mañolo a Siheberu. Mañolo ao a lwezi litaba za butokwa ze bonisa mwa ku pilela mi a fa sepo ye nde ya bupilo bwa kwapili.—9/1, makepe 4-7.

• Nako ye fitile ku zwa fela fo ba ezeza sibi bo Adama ni Eva i bonisizeñi?

Nako ye fitile i bonisize kuli Satani ki lihata—bo Adama ni Eva hamohocwalo ni baikulu ba bona ba bañata-ñata ba shwile. Nako ye fitile i bonisize kuli batu ha ba koni ku kondisa ha ba ipangula ku Mulimu ni kuli ha ba na tukelo kamba mane m’ata a ku ipusa.—9/15, makepe 6-7.

• Ki kabakalañi Jakobo ha na si ka nyaziwa kabakal’a ku ipumisa ku ba Isau?

Jakobo ki yena ya na swanela ku fuyaulwa ki ndat’ahe bakeñisa kuli na lekile tukelo ya ku ba mweli ku muhulwan’a hae Isau. Isaka ha na lemuhile kuli na sa fuyauzi Jakobo, na si ka bata ku cinca. Mi kambe kuli Mulimu na sa bati kuli Jakobo a fuyaulwe, na ka be a ezize se siñwi.—10/1, likepe 31.

• Ku ba ni lizwalo kwa luna ku bonisa cwañi kuli tuto ya ku ipilaula ha i si ka nepahala?

Moya wa ku itombola ku tusa ba bañwi u atile hahulu kwa batu kaufela, ku si na taba kuli ku eza cwalo ku kona ku ba kenya mwa kozi. Moya wa buitomboli wo ne u si ke wa ba teñi kambe batu ne ba li inge lifolofolo ze lika ka t’ata ku ipilisa.—10/15, likepe 20.

• Ki kabakalañi ha lu kona ku bulela kuli Mulimu wa ikokobeza, mi u bonisa cwañi kalemeno ka?

Mulimu ha na mifokolo sina luna, ka ku ba Muambakani ni Mubupi wa luna. Kono 2 Samuele 22:36 i bonisa kuli Mulimu wa ikokobeza kakuli u isezanga pilu batu-tu fela ba ba mu sebeleza, mi u ba ezanga ka sishemo. Niha inzi kwa lihalimu, Mulimu ka buikokobezo wa tusanga batu ba ba mu saba fa lifasi-mubu.—11/1, makepe 4-5.

• Mañetana a ikale a bonisañi ka za litaba za mwa Bibele?

Sikwata sa bapumbuli se ne si batisisa litaba za Samaria ne si fumani mañetana fo ku bonisizwe mabizo a 7 a lusika lo lu taluswa kwa Joshua 17:1-6. Mañetana a fumanwi mwa Aradi a bonisa buniti bwa litaba za mwa Bibele ka za masika a baprisita ni za libizo la Mulimu. Mañetana a kwa Lakishi a bonisa matata e ne ba talimani ni ona Majuda ka nako ye ba hapiwa ki Mababilona.—11/15, makepe 12-14.

• Ki bupaki bufi bo bu bonisa kuli Luka ki yena ya na ñozi buka ya Likezo?

Buka ya Evangeli ya Luka ni ya Likezo za Baapositola li ñolezwi ku Teofile, ili ku bonisa kuli Luka ki yena ya na ñozi libuka ze peli zeo. Lipulelo ze itusisizwe mwa buka ya Likezo ze cwale ka “lwa,” ni “luna,” li bonisa kuli Luka na iponezi litaba za na ñozi. (Likezo 16:8-15)—11/15, likepe 18.

• Mukreste u swanela ku nga cwañi musebezi wa ku zuma ni ku yamba?

Ku zwa fela mwa miteñi ya Nuwe, Mulimu na lumelelize batu ku bulaya lifolofolo kuli ba ce. Kono ne ba laezwi kuli ba sululele mali a zona fafasi ili ku bonisa kuli ne ba lemuha kuli bupilo bwa lifolofolo ki bwa butokwa kakuli ne bu simuluha ku Mulimu. Bakreste ha ba swaneli ku bulaya lifolofolo ka mulelo wa ku lika fela ku bona nji ba kona ku eza cwalo, kamba ka mulelo fela wa ku bapala kamba kabakala lunya. Ki kwa butokwa ku kuteka milao ya Sesare ni mazwalo a ba bañwi. (Maroma 14:13)—12/1, likepe 31.