Ku Bonisa Sishemo mwa Lifasi Le Li Situhu

M UNNA yo muñwi ya pila mwa naha ya Burundi u kala ku kula hahulu malaria. U tokwa ku isiwa kwa sipatela kapili-pili. Kono u ka iswa cwañi? Ha ku na mota ye li teñi ye kona ku mu isa. Hañihañi balikani ba hae ba batuna ba babeli ba to mu tusa. Ba mu pepa fa njinga mi ba zamaya musipili o katalisa hahulu wa malundu ka lihora ze keta-lizoho. Ba yo mu kwelisa mbasi ye ka mu isa kwa sipatela se si li bukaufi. Hamulaho wa mazazi a sikai, wa ikutwa hande.

Mwa kalulo ye ñwi ya lifasi, hamulaho wa ñuli ya Katrina, ye ne lengile sikuli sa United States mwa August 2005, sikwata sa baitateli ba fumana ndu ye sinyehile bakeñisa ku welwa ki likota. Baitateli bao ha ba zibani ni muñ’a ndu yeo, ba tanda lizazi mutumbi ba nze ba pumaka likota zeo ka saha ni ku zwisa manyalala. Muñ’a ndu yeo u talusa kuli: “Ni itumela hahulu kwa [batu] ba.”

Babihi ba makande ba bulelanga hahulu za likezo ze situhu. Nihakulicwalo, batu zazi ni zazi ba ezanga lika ze bonisa mufelañeke ni sishemo nihaike hañata ha li bulelwangi hahulu. Niteñi batu kaufela ba tokwa ku boniswa lilato ni sishemo. Lu tokwa hahulu ku boniswa sishemo! Manzwi a cwalo a bulelwanga hahulu mwa nako ya Ngilisimusi, mi batu ba bañata ba bulelanga ni ku opela za kuli: ‘Kozo i be teñi mwa lifasi; batu ba shemubwe.’—Luka 2:14.

Ku t’ata ku bonisa sishemo mwa lifasi le ili mo batu ba bañata ha ba na silikani mi ha ba  iyakatwi ba bañwi. Batu ba bañata ba lumela kuli ku ba ni situhu ni kutokwa makeke ku tusa mutu ku kondisa mwa bupilo. Ba bañwi ba bonahala kuli ba lumela tuto ya kuli ku ba mutu ya situhu ki ko kunde ku fita ku ba ya sishemo. Mukwañuli ni buikuhumuso li palelwisa batu ku ba ni sishemo.

Kabakaleo, batu ba bañata ba batanga za bona pili, mane ha ba na taba kuli ba filikanya batu ba bañwi. Hañata banna ba ba winanga mwa lipapali, ba ba si na sishemo ba ngiwa kuli ki bona “banna sakata.” Babusi ba bañwi ba bupolitiki ba ezanga cwalo ni bona.

Kacwalo, lu swanela ku ipuza kuli: Ki kabakalañi ha lu swanela ku ba ni sishemo? Kana sishemo sa kona ku tusa mutu ku eza lika ze nde? Mi ki sika mañi se si ka lu tusa ku bonisa sishemo? Lipuzo zeo li ka alabiwa mwa taba ye tatama.

[Mbokisi fa likepe 3]

•Kana mutu ya bonisa sishemo ki mufokoli?

•Kana mutu ya na ni sishemo wa susueza?

•Ki linzila mañi ze nde ze lu kona ku bonisa ka zona sishemo?