Ba Tatulula Butata ka Butali

MICAHA ba balalu ba kwa Central Africa ne ba bata ku yo fumaneha kwa mukopano wa sikiliti o no ezezwa kwa sibaka se siñwi mwa naha ya bona. Ne ba ka ya cwañi kwa mukopano wo? Ku zwa ko ne ba ina ku ya kwa sibaka sa mukopano ne li musipili wa likilomita ze bato ba 90. Mukwakwa ne li wa liluli mi ne ba si na nzila. Micaha bao ba lumelelana ku kalima linjinga ze talu kono ba palelwa ku fumana ze tiile.

Eluda yo muñwi wa mwa puteho ya bona a lemuha butata bwa bona, mi a ba kalima njinga ya hae ye ne supezi kono ili ye tiile. Eluda yo a ba taluseza mwa na kile a ezeza yena ni ba bañwi kuli ba yo fumaneha kwa mukopano wa sikiliti. A akaleza kuli ba itusise njinga i liñwi yeo. Ku eza cwalo ne ku ka tatulula butata, kono hape ne ba tokwa ku lumelelana mwa ku zamaela. Batu ba balalu ne ba ka kona ku itusisa cwañi njinga i liñwi?

Kuli ba sabe lizazi, mizwale bao ba pakela ni ku longa libyana za bona fa njinga. Wa pili a pahama njinja ni ku itangeta, mi ba babeli ba mu latelela mwamulaho inze ba kwaloka. Mucaha yo ha sa cobile limita ze bato ba 500, a yema ni ku yendeka njinja yeo fa kota. Kono n’a na ni ku siya njinja yeo fo ba kona ku i bona mizwale ba bañwi kuli mutu u sili a si ke a i pamula. Kihona a zwelapili ku zamaya ka mahutu.

Micaha ba babeli ha ba fita fo ku inzi njinga, yo muñwi wa bona a i zulama ni ku kala ku coba mi yo muñwi yena a zwelapili ku zamaya limita ze bato ba 500 nako ya hae ya ku coba i si ka fita kale. Kabakala buitukiso ni tundamo ya bona, micaha ba balalu bao ne ba konile ku fukuza kwa musipili wa bona wa likilomita ze 90 ka ku zamaya fela likilomita ze bato ba 60. Bo luli ne li buikatazo bo bunde. Ne ba zo kopana ni mizwale ni likaizeli ba bona ba Sikreste mi ba ikola mukopano. (Deut. 31:12) Kana silimo se ni mina mu ka eza mo mu konela kaufela kuli mu yo fumaneha kwa mukopano wa sikiliti o ka ezezwa mwa sibaka sa mina?