Jehova U Iyakatwa Hahulu Batanga ba Hae ba Basupali

“Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae.”—MAHEB. 6:10.

1, 2. (a) Ku bona mutu wa milili ye misweu ku kona ku mi hupulisañi? (b) Jehova u nga cwañi Bakreste ba basupali?

HA MU bonanga basupali ba ba na ni milili ye misweu mwa puteho, kana ha mu hupulangi taba ye mwa buka ya Daniele mwa Bibele? Mwa pono ya na file Daniele, Jehova Mulimu na iponahalize ku ba wa milili ye misweu. Daniele na ñozi kuli: “Na talima ku fitela ha ku bewa mabona. Cwale, Yo Muhulu wa Mazazi a ina. Siapalo sa hae ne li se sisweu sina litwa, milili ya kwa toho ya hae n’e li ye misweu sina boya bwa ngu, bo bu kenile.”—Dan. 7:9.

² Hañata boya bwa ngu ha bu kenile ki bo busweu. Kacwalo, Mulimu ha bulelwa kuli u na ni milili ye misweu mi ki “Yo Muhulu wa Mazazi,” taluso ki kuli h’a na makalelo, u na ni butali bo butuna, mi ka mabaka ao lu swanela ku mu kuteka hahulu. Kacwalo Yo Muhulu wa Mazazi, yena Jehova, u nga cwañi banna ni basali ba basupali ili ba ba sepahala? Linzwi la Mulimu li bulela kuli “milili ye li pululu, ki mushukwe wa ku kutekiwa, u fumanwa mwa mizamao ye lukile.” (Liprov. 16:31) Kaniti, muta Mukreste ya sepahala a fita fa ku ba ni milili ye li pululu kamba limbi, u banga ya buheha mwa meto a Mulimu. Kana mu nga mizwale ni likaizeli ba mina ba basupali sina mwa ba ngela Jehova?

Ki Kabakalañi Ha Ba Li ba Butokwa Hahulu?

3. Ki kabakalañi ha lu nga Bakreste ba basupali ku ba ba butokwa hahulu?

³ Ba bañwi ba batanga ba Mulimu ba basupali ki mizwale ba ba sebeza mwa Sitopa Se Si Etelela sa Lipaki za Jehova, baokameli ba maeto ni mizwale ba ne ba banga baokameli ba maeto, mapaina ba ba na ni tukufalelo, ni bahasanyi ba Mubuso ba ba hulile kwa moya—mizwale ni likaizeli ba ba sebeza ka busepahali mwa liputeho za luna. Mwendi ku na ni ba bañwi be mu ziba ba se ba kutalize taba ye nde ka tukufalelo ka lilimo-limo ili bao mitala ya bona ye minde i susumelize mikulwani ni ku ba tusa ku hula hande. Bakreste ba bañwi ba basupali ba bile ni buikalabelo bo buñata bo butuna mi ba tiyezi nyandiso kabakala ku kutaza taba ye nde. Jehova hamoho ni “mutanga ya sepahala, ya na ni kutwisiso” ba itebuha hahulu ze ba petile Bakreste bao mane ni ze ba sa peta mwa musebezi wa Mubuso kacenu.—Mat. 24:45.

4. Ki kabakalañi ha lu swanela ku kuteka Bakreste ba basupali ni ku ba lapelela?

⁴ Bakreste ba ba supezi bao ba swanela ku itebuhiwa ni ku kutekiwa ki batanga ba bañwi ba Jehova Mulimu. Mane Mulao wa Mulimu wa na file ku Mushe u bonisa kuli ha lu iyakatwa ni ku kuteka basupali lu bonisa kuli lwa saba Jehova. (Liv. 19:32) Kamita lu swanela ku lapelelanga mizwale ni likaizeli ba ba sepahala bao ni ku itumela ku Mulimu kwa misebezi ya bona ye lilato. Muapositola Paulusi na lapelezi Bakreste ba bañwi, ba bahulu ni banana.—Mu bale 1 Matesalonika 1:2, 3.

5. Lu kona ku tusiwa cwañi ka ku swalisana ni balapeli ba Jehova ba basupali?

⁵ Hape, ba mwa puteho kaufela ba kona ku fumana tuso ka ku swalisana ni Bakreste ba basupali. Balapeli ba Jehova ba basupali ba na ni zibo ye butokwa hahulu ye ba fumani ka ku ituta, ku talimela mo ba ezeza lika ba bañwi, ni  ku zwelela ku ze ba ipumani ku zona. Ba itutile ku ba ni pilu-telele ni makeke, mi ku luta ba bañwi ze ba itutile ku ba fa tabo. (Samu 71:18) Ba banca, mu be ni butali mi mu ikungele kwa zibo yeo sina fela mo mu kona ku kela mezi a mwa siliba se si tungile.—Liprov. 20:5.

6. Mu kona ku bonisa cwañi basupali kuli mu b’a nga ku ba ba butokwa luli?

⁶ Kana mwa bonisanga basupali kuli mu b’a nga ka butokwa sina mwa ba ngela Jehova? Nzila ye ñwi ye mu kona ku eza cwalo ka yona ki ka ku ba bulelela mo mu ba latela bakeñisa busepahali bwa bona ni mo mu itebuhela maikuto a bona. Hape, ha mu utwa likelezo za bona kamba ku latelela liakalezo ze ba mi fa, mu bonisa kuli mu ba kuteka ku zwelela kwa pilu. Bakreste ba basupali ba bañata ba sa kona ku hupula kelezo ye nde ye ba kile ba fiwa ki basupali ba ba sepahala ni mo ba tuselizwe mwa bupilo ka ku latelela kelezo yeo. *

Mu Bonise Lilato la Mina ka Likezo

7. Jehova u file buikalabelo bwa ku babalela basupali sihulu ku bomañi?

⁷ Mulimu u file buikalabelo bwa ku babalela basupali kwa mabasi a bona. (Mu bale 1 Timotea 5:4, 8.) Jehova wa tabelanga ba mwa lubasi ha peta buikalabelo bwa bona bwa ku babalela bahabo bona ba basupali, ili ku bonisa kuli ba iyakatwa basupali sina mw’a iyakatwela bona. Mulimu wa tusanga ni ku fuyaula mabasi a eza cwalo kabakala buikatazo ni buitomboli bwa ona. *

8. Ki kabakalañi ba mwa puteho ha ba swanela ku iyakatwa Bakreste ba basupali?

⁸ Jehova hape wa tabelanga mizwale ni likaizeli mwa liputeho ha ba tusa basupali ba ba sepahala ba ba mwa butokwi ili ba ba si na bahabo bona ba ba li balumeli kamba ba ba itatela ku ba tusa. (1 Tim. 5:3, 5, 9, 10) Ba mwa puteho ha ba eza cwalo, ba bonisa kuli ba na ni ‘maikuto a li mañwi, mukekecima ni musa’ kwa basupali. (1 Pit. 3:8) Paulusi u bonisa hande buiyakato bwa bona kwa basupali ba mwa puteho ha talusa kuli silama si li siñwi sa mubili ha si  utwa butuku “lilama kaufela li utwa butuku ni sona.” (1 Makor. 12:26) Ha lu bonisa basupali mukekecima ka likezo za luna lu latelela sikuka se si mwa kelezo ya Paulusi ye li: “Mu lwalisane milwalo, mi mu pete cwalo mulao wa Kreste.”—Magal. 6:2.

9. Ki milwalo ifi ya kona ku ba ni yona mutu kabakala busupali?

⁹ Ki milwalo mañi ye ba na ni yona basupali? Ba bañata ba katala ka bubebe. Ba kona ku ikutwa kuli ha ba koni nihaiba ku eza misebezi ye bunolo ye cwale ka ku yo bonana ni dokota, ku ñola, ku kenisa ndu, kamba ku lukisa lico. Bakeñisa kuli takazo ya ku ca ni ku nwa i zamayanga i fela mutu ha nze a hula, ba kona ku nahana kuli ha ba sa tokwa ku ca kamba ku nwa hahulu lino. Ba kona ku ikutwa cwalo ni ha ku taha kwa lico za kwa moya. Ba kona ku fumana tata ku teeleza kwa mikopano ya puteho kabakala meto ni lizebe za bona ze supezi, mi nihaiba fela ku itukisa kuli ba ye kwa mikopano ya Sikreste ku kona ku ba botehisa hahulu. Kacwalo ba bañwi ba kona ku tusa cwañi basupali bao?

Mo Mu Kona ku Tuseza

10. Maeluda ba kona ku ezañi ilikuli ba tuse basupali?

¹⁰ Mwa liputeho ze ñata, basupali ba babalelwa hande hahulu. Mizwale ni likaizeli ba ba lilato ba tusanga basupali ka ku yo ba lekela lika ze ba tokwa, ku ba tatehela, ni ku ba keniseza ndu. Ba tusanga basupali ku ituta, ku itukiseza ku ya kwa mikopano ni ku zwelapili ku yanga mwa bukombwa. Lipaki ba mikulwani ba tusanga basupali ka tanansipoti. Basupali ha ba sa koni ku zamaya, ku ezwanga litukiso za kuli ba teeleze kwa mikopano fa luwaile inze ba li kwa ndu ya bona kamba ku ba beela mikopano fa tepu. Maeluda ba likanga ka t’ata ku eza litukiso za ku tusa basupali ba mwa puteho. *

11. Mu taluse mo lubasi lo lu ñwi ne lu tuselize muzwale wa musupali.

¹¹ Bakreste ka butu ni bona ba kona ku bonisa lilato ni moya wa bufani. Ka mutala, hasamulaho wa lifu la musal’a hae, muzwale yo muñwi wa musupali na palezwi ku zwelapili ku lifela ndu bakeñisa kuli na tuhezi ku fumana penshini ya na amuhelanga musal’a hae. Muzwale yo ni musal’a hae ne ba itutanga Bibele ni lubasi lo lu ñwi, ili ndate, me, ni bana ba basizana ba babeli. Lubasi lo ne lu na ni ndu ye tuna, mi lwa fa muzwale yo mizuzu ye mibeli kuli a ine mwateñi. Ka lilimo ze 15 ne ba ikola ku canga hamoho, ku seha hamoho, ni ku bonisana lilato la Sikreste. Banana ne ba tusizwe hahulu ki tumelo ya muzwale yo ni za na ipumani ku zona, mi ni yena na tusizwe ki swalisano ye nde yeo. Muzwale wa musupali yo na pilile ni lubasi lo ku fitela ha timela inze a na ni lilimo ze 89. Lubasi lo, lu sa itumelanga ku Mulimu kwa limbuyoti ze ñata ze lu fumani bakeñisa ku swalisana ni muzwale yo. Ba mwa lubasi lo ha ba si ka “latehelwa ki mupuzo” wa bona kakuli ba tusize mulutiwa wa Jesu Kreste sina bona.—Mat. 10:42. *

12. Ki lika mañi ze mu kona ku eza ze bonisa kuli mwa iyakatwa mizwale ni likaizeli ba mina ba basupali?

¹² Mwendi ha mu koni ku tusa muzwale yo muñwi kamba kaizeli wa musupali sina mo ne lu ezelize lubasi lo, kono mwendi mwa kona ku tusa basupali ku fumanehanga kwa mikopano ni ku yanga mwa sebelezo ya mwa simu. Hape mwa kona ku ba memanga kwa ndu ya mina ni ku ya ni bona ha mu ya kwa ku itabisa. Mwa kona ku ba potelanga, sihulu ha ba kula kamba ha ba sa koni ku zamaya. Fahalimw’a zeo kaufela, mwa kona ku ba kuteka kabakala kuli ki ba bahulu mi mwa swanela ku eza cwalo. Mi ibile fela ba sa nahana hande, Bakreste ba basupali ba swanela ku buziwanga pili ku si ka ezwa kale keto ifi kamba ifi ye ba ama. Nihaiba basupali  ba se ba lembwalile hahulu ba kona ku ziba haiba ba sa kutekiwa kamba cwañi.

Jehova Ha Na ku Libala Misebezi ya Mina

13. Ki kabakalañi ku isa pilu kwa maikuto a Bakreste ba basupali ha ku li kwa butokwa?

¹³ Ku isa pilu kwa maikuto a basupali ki kwa butokwa. Hañata basupali ba ikutwanga ku zwafa bakeñisa ku palelwa ku eza lika ze ñwi ze ne ba ezanga ha ne ba sa li mikulwani ni ha ne ba sa na ni buikangulo bo bunde. Ka mutala, kaizeli ya sebelelize Jehova ka lilimo ze bat’o ba 50 ili ya na bile paina wa kamita, na kenezwi ki butuku bo ne bu mu fokolisize kwa mubili mi a kala ku fumana tata ku fumanehanga kwa mikopano. Ha na nahana za na petanga kale mwa bukombwa ni za peta kacenu kabakala mapalelwi a hae a kalisa ku lila. A inyongamena, mi inze a lila a li, “Ha ku na ze se ni eza.”

14. Batanga ba Jehova ba basupali ba kona ku fumana susuezo mañi mwa lisamu?

¹⁴ Haiba mu basupali, kana se mu kile mwa ikutwa ku zwafa ka nzila yeo? Kamba kana ku na ni linako fo mu ikutwanga kuli Jehova ha sa na taba ni mina? Mwendi walisamu ni yena na ikutwile cwalo ha sa supezi kakuli na kupile Jehova kuli: “U si ke wa ni hana mwa nako ya busupali bwa ka; niha ni felelwa ki mata, u si ke wa ni tuhela. . . . Niha ni ka supala, mi toho i ize pululu, Mulimu u si ke wa ni tuhela.” (Samu 71:9, 18) Fo hasi kuli Jehova na bata ku yumba simulamu muñoli wa samu yeo, mi ni mina ha na ku mi yumba simulamu. Mwa samu ye ñwi Davida na bonisize kuli na sepile kuli Mulimu na ka mu tusa. (Mu bale Samu 68:19.) Haiba mu Bakreste ba basupali ba ba sepahala, mu ikolwise kuli Jehova u inzi ni mina mi u ka zwelapili ku mi tiisa zazi ni zazi.

15. Ki lika mañi ze kona ku tusa basupali ku zwelapili ku ba ni sepo ya kwapili?

¹⁵ Mina Lipaki za Jehova ba basupali, Mulimu wa ziba hande ze mu ezize kaufela kwamulaho ni ze mu eza cwale mwa ku mu kanyisa. Bibele ili: “Mulimu hasi ya si ka luka, kuli a libale misebezi ya mina, ni lilato le mu bonisize kwa Libizo la hae.” (Maheb. 6:10) Kacwalo mu si ke mwa ba ni mubonelo o fosahalile wa kuli ha mu sa li ba butokwa ku Jehova kabakala busupali. Mu like ka t’ata ku yolisa mihupulo ya ku zwafa kamba ya ku felelwa ki sepo ka mihupulo ye minde. Mu nyakalale kabakala limbuyoti ze mu fumani ni sepo ya mina ya kwapili! Mubupi u ize u ka lu ‘fa ze sepisa kwapili’—ili lika ze lu tokwa hahulu. (Jer. 29:11, 12; Lik. 17:31; 1 Tim. 6:19) Mu hupulange sepo ye mu na ni, mu bone teñi kuli pilu ni minahano ya mina ki ye minca nako kaufela, mi mu si ke mwa keshebisa butokwa bwa mina mwa puteho! *

16. Ki kabakalañi muzwale yo muñwi wa musupali ha na ikutwile kuli ha sa swanela ku sebeza sina eluda, kono sitopa sa maeluda ne si mu susuelize cwañi?

¹⁶ Mu nyakisise mutala wa bo Johan ba lilimo ze 80 kono ili ba ba babalela bo musal’a bona bo Sannie ba ba lembwalile. * Likaizeli ba yapananga ku tusa bo Sannie ilikuli bo Johan ba fumane kolo ya ku ya kwa mikopano ni mwa bukombwa. Kono cwanoñu fa, bo Johan ne ba fitile fa ku katala kabakala muinelo wo mi ba ikutwa kuli ha ba sa swanela ku sebeza sina eluda mwa puteho. Bo Johan ne ba bulezi cwana inze ba enga-enga mioko: “Tuso ya ku ba eluda ki ifi? Ha ku sa na ze ni peta mwa puteho.” Maeluda ba bañwi ba taluseza bo Johan kuli yeloseli ya bona ni zibo ya bona mwa ku eza likatulo ki za butokwa hahulu. Ba ba susueza  ku zwelapili ku sebeza sina eluda ni ko ne ba sa koni ku peta ze ñata hahulu. Ka susuezo yeo, bo Johan ba sa sebeza sina eluda mi ba fa tuso ye nde kwa puteho.

Jehova Wa Iyakatwa Bona Luli

17. Bibele i sepisañi Bakreste ba basupali?

¹⁷ Mañolo a bonisa hande kuli basupali ba kona ku zwelapili ku beya miselo ya kwa moya ku si na taba ni matata a tiswa ki busupali. Walisamu na ize: “Ba ba calilwe mwa Ndu ya [Muñ’a] Bupilo, ba ka konda . . . Ba beye miselo ni mwa bucembele bo butuna bwa bona, inze ba tezi mezi ni butala.” (Samu 92:13, 14) Muapositola Paulusi ili yo mwendi n’a na ni butuku mwa mubili, na si ka ‘zwafa; mutu wa hae wa kwande niha n’a ya a sinyeha.’—Mu bale 2 Makorinte 4:16-18.

18. Ki kabakalañi basupali be lu lapela ni bona ni ba ba sweli ku ba babalela ha ba tokwa tuso ya ba bañwi?

¹⁸ Mitala ye miñata ya mwa linako za luna i bonisa kuli basupali ba kona ku zwelapili ku ‘beya miselo.’ Kono nihaiba basupali ba ba babalelwa hande ki bahabo bona ba kona ku fumana t’ata ku tiyela matata a tiswa ki mapongo ni busupali. Ba babaleli ni bona ba kona ku fita fa ku topwela. Puteho i na ni tohonolo ni buikalabelo bwa ku bonisa lilato ka likezo kwa basupali ni ba ba sweli ku ba babalela. (Magal. 6:10) Tuso ye cwalo i bonisa kuli ha lu ba talusezi fela kuli “mu y’o futumalelwa mi mu kule lico” lu sa ngi muhato wa ku ba tusa.—Jak. 2:15-17.

19. Ki kabakalañi basupali ba Sikreste ba ba sepahala ha ba na ni sepo ya kwapili?

¹⁹ Busupali bwa kona ku ama buikoneli bwa Mukreste ka linzila ze ñwi, kono Jehova ha tuheli ku lata batanga ba hae ba ba sepahala kabakala kuli ki kale ba supala. Bakreste ba ba sepahala ba kaufela bona ki ba butokwa hahulu ku yena, mi ha na ku ba tuhela. (Samu 37:28; Isa. 46:4) Jehova u ka ba tiisa ni ku ba zamaisa mwa busupali bwa bona kaufela.—Samu 48:14.

[Litaluso za kwatasi]

Mu Kona ku Alaba Cwañi?

• Ki kabakalañi ha mu nga basupali ba Sikreste ba ba sepahala ku ba ba butokwa hahulu?

• Lu kona ku bonisa cwañi kuli lwa iyakatwa basupali be lu lapela ni bona?

• Ki lika mañi ze kona ku tusa batanga ba Jehova ba basupali ku ba ni sepo?

[Lipuzo za Tuto]

[Maswaniso a fa likepe 18]

Ba mwa puteho ba itebuha hahulu basupali