Mu Hule mwa Zibo ye Nepahezi ka ku “Tukufalelwa”

BATANGA ba Jehova kaufela ba bata ku amuhelwa ki yena. Kuli Mulimu a lu katelwe, lu lika ka tata ku tiisa tumelo ya luna ni ku mu sebeleza ka tukufalelo. Kono muapositola Paulusi u lu taluseza kozi ye ñwi ye kona ku lu tahela ili ye ne ba ipumani ku yona Majuda ba bañwi mwa miteñi ya hae. Na ize: “Ba tukufalezwi za Mulimu, kono isi ka ku utwiseza.” (Maro. 10:2) Kaniti, ku ba fela ni maikuto a kuli lu na ni tumelo ni kuli lu sweli lwa lapela Mulimu ha ku si ka likana. Lu tokwa ku ba ni zibo ye nepahezi ya ku ziba Mubupi wa luna ni tato ya hae.

Ku le liñwi la mañolo a hae, Paulusi na bonisize kuli lu tokwa ku tukufalelwa ku fumana zibo kuli lu be ni muzamao o tabisa Mulimu. Na lapelezi balateleli ba Kreste kuli ba “tale zibo” ya tato ya Mulimu ilikuli ba “zamaye ka mukwa o swanela Mulena” Jehova, kuli a ba “katelwe kai ni kai” ha ba nze ba beya “miselo mwa misebezi ye minde kaufela” ni ku “hula ka zibo ya Mulimu.” (Makolo. 1:9, 10) Ki kabakalañi ha lu tokwa hahulu “zibo ya Mulimu” ye nepahezi? Mi ki kabakalañi ha lu swanela ku hula mwa zibo yeo?

Fo I Tomile Tumelo

Tumelo ya luna i tomile fa zibo ye nepahezi ya ku ziba Mulimu ni tato ya hae ka mo i patululezwi mwa Bibele. Ha lu si na zibo yeo, tumelo ya luna ku Jehova i kona ku swana sina ndu ye yahilwe fa mushabati, ili ye kona ku wa ka bunolo. Paulusi u lu susueza ku sebeleza Mulimu ka “m’ata a luna a ku nahana” ni ku ‘shemunwa mwa kutwisiso ya luna.’ (Maro. 12:1, 2, NW) Ku itutanga Bibele kamita ku ka lu tusa ku eza cwalo.

Bo Ewa, ba ba li mapaina ba kamita kwa Poland, ba itumelela kuli: “Kambe ne ni sa itutangi Linzwi la Mulimu kamita, ne ni si ke na zwelapili ku hula mwa zibo ye nepahezi ya Jehova. Ze ni zibahaza sina Mukreste ne li ka ni bolomoka hanyinyani-hanyinyani, tumelo ya ka ku Jehova ne i ka fokola—mi ze ne ka ezahala kikuli bulikani bwa ka ni Jehova ne bu ka sinyeha.” Haike zeo li si ke za ezahala ku luna! Mu nyakisise mutala wa munna ya na zwezipili ku hula mwa zibo ye nepahezi ya Jehova ili ya na shemubilwe ki Mulimu kabakala ku eza cwalo.

“Hasi Mo Ni Latela Mulao wa Hao!”

Mwa Samu ya bu 119, Bibele i bonisa mwa na ikutwela walisamu ka za milao, likelezo, litemuso, ni likatulo ze lukile za Jehova. Walisamu na ñozi kuli: “Ni ka tabela litaelo za hao. . . . Likelezo za hao, zona, ki tabo ya ka.” Hape na ñozi kuli: “Hasi mo ni latela mulao wa hao! Na u nahana musihali kaufela.”—Samu 119:16, 24, 47, 48, 77, 97.

Manzwi a ku “tabela” ni ku “nahana” a bonisa kuli walisamu na kengeelanga Linzwi la Mulimu, mi mane na tabela ku eza cwalo. Manzwi ao a bonisa hande walisamu mwa na latela ku ituta mulao wa Mulimu. Lilato leo ne si fela maikuto a n’a na ni ona mwa pilu. Kono n’a na ni takazo ye tuna ya ku “nahana” mulao kuli a utwisise hahulu manzwi a Jehova. Lwa iponela hande kuli na bata luli ku ziba Mulimu ni tato ya Hae ka ku nepahala.

Kaniti, walisamu na lata Linzwi la Mulimu ku zwelela kwa pilu ya hae. Lwa kona ku ipuza kuli: ‘Kana luli ni na na lata Linzwi la Mulimu? Kana na tabelanga ku bala Bibele zazi ni zazi ni ku nahanisisa ze ni bala? Kana luli na ikatazanga ku bala Bibele ni ku lapela ku Mulimu ni si ka kala  kale ku i bala?’ Haiba kalabo ya luna kwa lipuzo zeo ki eni, fohe mu zibe lu sweli lwa “hula ka zibo ya Mulimu” ye nepahezi.

Bo Ewa ba li: “Ni sa likanga ku bolosola muitutelo wa ka nako ni nako. Ku zwa fela fo ni amuhelela broshuwa ya ‘Bona Naha ye Nde,’ ni itusisanga yona ibat’o ba fo ni itutela kaufela. Ni likanga ka mo ni konela kaufela ku batisisa mwa buka ya Insight on the Scriptures ni mwa libuka ze ñwi kuli ni utwisise ze ni ituta.”

Mu nyakisise mutala o muñwi wa bo Wojciech ni bo musal’a bona bo Małgorzata. Sibeli sa bona ba na ni buikalabelo bo butuna bwa ku babalela lubasi. Ba konanga cwañi ku ituta Bibele ka butu niha ba patehile cwalo? Ba li: “Yo muñwi ni yo muñwi wa luna u likanga ka tata ku fumana nako ya ku ituta Linzwi la Mulimu. Mi ka nako ya tuto ya lubasi ni mwa lingambolo za luna za ka zazi ni zazi, lu buhisananga litaba ze ne lu ikozi kamba ze ne lu susuelize ha ne lu ituta lu nosi.” Ku banga ni tuto ya ka butu ya ka butungi ku ba tahiseza tabo ye tuna mi ku ba tusa ku “hula ka zibo ya Mulimu” ye nepahezi.

Mu Tabele ku Amuhela Ze Mu Ituta

Ka ku ba Bakreste, lwa ziba kuli tato ya Mulimu kikuli “batu kamukana ba piliswe, mi ba fite fa zibo ya ku ziba niti.” (1 Tim. 2:3, 4) Kacwalo ki kwa butokwa hahulu ku balanga Bibele ni ku lika ka tata kuli lu “utwiseze” ze lu bala. (Mat. 15:10) Nzila ye ñwi ye kona ku lu tusa ku eza cwalo ka yona ki ku amuhela ze lu ituta. Ki mona mo ne ba ezelize Bakreste ba kwa Berea muta Paulusi na ba bulelezi taba ye nde. Lu bala kuli: “Ba amuhela Linzwi ka ku li tukufalelwa, mi ba batisisa mwa Mañolo, ka mazazi kaufela, ba lemuhe litaba ze ba bulelelwa kana ki mo li inezi.”—Lik. 17:11.

Kana mu sweli ku likanyisa mutala wa ba kwa Berea ka ku ba ni tukufalelo ni ku ambuka ku nahana litaba li sili ze sa swaneli ha mu nze mu ituta Bibele? Mukreste wa kona ku ikataza ku likanyisa ba kwa Berea ku si na taba kuli mwendi kwamulaho na sa tabelangi ku ituta. Hape, batu ba bañwi ba tuhelanga ku bala ni ku ituta hahulu ha ba nze ba hula, kono Mukreste ha swaneli ku latelela mukwa wo. Mañi ni mañi wa kona ku ambuka lika ze kona ku mu yaulula ku si na taba ni lilimo za na ni. Ha mu nze mu bala, mu like ku fumana litaba ze mu kona ku ikambota ni ba bañwi. Ka mutala, mwa kona ku itomela sikonkwani sa ku talusezanga ba ku mina kamba mulikan’a mina mwa puteho litaba ze mu itutile. Ku eza cwalo ku ka mi tusa ku sa libala litaba zeo mi mu ka susueza ba bañwi.

Ha mu ituta, mu likanyise Ezira, mutang’a Mulimu wa kwaikale ya na “isize pilu ya hae kwa ku bata mulao wa [Muñ’a] Bupilo.” (Ezira 7:10) Mu kona ku eza cwañi cwalo? Mu fumane sibaka se si kuzize mo mu kona ku itutela hande. Ku zwa fo, mu lapele ku Jehova kuli a mi etelele ni ku mi fa butali. (Jak. 1:5) Mu ipuze kuli, ‘Ki lika mañi ze ni libelela ku ituta?’ Ha mu nze mu bala, mu like ku lemuha lisupo ze tuna. Mwa kona ku no ñolanga lisupo zeo kamba ku swaya litaba ze ñwi mwa hatiso ye mu bala ze mu bata hahulu ku hupula. Mu nahanisise mo mu kona ku itusiseza litaba ze mu bala mwa bukombwa, ha mu eza likatulo, kamba ha mu susueza balumeli ba bañwi. Ha mu fita kwa mafelelezo a tuto ya mina, mu lundulule ka  bukuswani ze mu balile. Ku eza cwalo ku ka mi tusa ku hupula ze mu itutile.

Bo Ewa ba talusa mo ba itutelanga, ba li: “Ha ni balanga Bibele ni itusisanga tutaku to tu libisa kwa litimana ze ñwi, buka ya Watch Tower Publications Index, ni Watchtower Library ya fa CD-ROM. Ni ñolanga lisupo ka mulelo wa kuli ite ni itusise zona mwa bukombwa.”

Ba bañwi ne ba ikolanga ku ituta hahulu litaba za Mulimu ka lilimo-limo, inze ba nahanisisa ze ba bala. (Liprov. 2:1-5) Niteñi, ba na ni buikalabelo bo buñata mi ku ba belanga tata ku fumana nako ya ku ituta. Haiba mu mwa muinelo wo, ki licinceho mañi ze mu kona ku eza kwa tomahanyo ya mina kuli mu fumane nako?

Ni Kona ku Fumana Cwañi Nako?

Mwendi mwa lumela kuli ku fumana nako ya ku eza lika ze mu tabela ku bunolo hahulu. Ba bañata ba fumani kuli mukwa o ba tusa ku ikola ku ituta, ki ku itomela sikonkwani se ba kona ku peta, inge cwalo ku bala Bibele mukatumbi. Ki niti kuli ku kona ku bonahala tata ku bala litaba za masika ze telele-telele ze mwa Bibele, litaba ze talusa ka butungi mo ne i inezi tempele ya kwakale, kamba bupolofita bo bu tatezani bo bu bonahala kuli ha bu ami bupilo bwa kacenu. Kono mu like ku itusisa linzila ze ka mi tusa ku kwanisa sikonkwani sa mina. Ka mutala, pili mu si ka kala kale ku ituta taba ye ñwi ye bonahala ku ba tata mwa Bibele, mwa kona ku bala litaba ze ñwi ze bonisa lika ze ne ezahala ka nako ye ne ñolwa taba yeo kamba ze bonisa mo i mi tuseza. Litaba ze cwalo za fumaneha mwa buka ya “Liñolo Kamukana Li Tahile ka Moya wa Mulimu mi Li Na ni Tuso,” ye hatisizwe mwa lipuo ze bat’o ba 50.

Ku beyanga mwa pono litaba ze mu bala kwa kona ku mi tusa ku ikola hahulu ku bala Bibele. Ku eza cwalo ku kona ku mi tusa ku bona batu be mu bala za bona ni lika ze ezahala. Ku itusisa liakalezo li sikai fela ze filwe ze, ku ka mi tusa ku ikola hahulu ku ituta mi mu ka tusiwa ki litaba ze mu bala. Ku ka mi susueza ku lika ka tata ku fumananga nako ya ku ituta. Mi ku ka mi bela bunolo ku ba ni mukwa wa ku balanga Bibele zazi ni zazi.

Liakalezo ze filwe zeo li kona ku tusa mañi ni mañi wa luna, kono lubasi lo lu patehile lu kona ku tusiwa cwañi? Kiñi ha mu sa lukisi ku ina hamoho  sina lubasi ni ku ambolisana mo i kona ku mi tuseza tuto ya lubasi? Mwendi ba bañwi mwa lubasi ba ka kona ku fa liakalezo ze nde, ze cwale ka ku pakelanga zazi ni zazi kamba fa mazazi a mañwi kuli mu nyakisise litimana ze ñwi mwa Bibele. Kamba mwendi ku ambolisana k’o ku ka mi tusa ku lemuha kuli mu tokwa ku eza licinceho kwa tomahanyo ya lubasi. Ka mutala, mabasi a mañwi a fumani tuso ka ku nyakisisanga liñolo la zazi kamba ku bala Bibele hasamulaho wa ku ca hamoho. Pili ba bañwi ba si ka kala kale ku zwisa mikeke fa tafule kamba ba si ka ya kale ko kuñwi, lubasi lu nyakisisanga Mañolo kamba ku bala Bibele ka mizuzu ye 10 kamba 15. Kwa makalelo ku kona ku bonahala tatanyana ku ezanga cwalo, kono hamulaho wa nakonyana ba mwa lubasi ba kona ku twaela tukiso yeo ni ku i tabela hahulu.

Bo Wojciech ni bo Małgorzata ba talusa ze tusize lubasi lwa bona, ba li: “Kale ne lu sinyanga nako ya luna ku eza lika ze si za butokwa. Kacwalo, lu ezize katulo ya ku kusufaza kwa nako ye ne lu tandanga ku luma mashango fa Intaneti. Hape lu kusufalize kwa nako ye lu itabisanga mi lu tomile lizazi ni nako ya ku itutanga ka butungi.” Kaniti lubasi lo ha lu inyazi kabakala licinceho ze lu ezize, mi ni mina hamoho ni lubasi lwa mina mwa kona ku tusiwa ki tukiso yeo.

Ku Hula mwa Zibo ye Nepahezi ku Fumanisa Limbuyoti!

Ku ituta Linzwi la Mulimu ka butungi kwa kona ku beya “miselo mwa misebezi ye minde kaufela.” (Makolo. 1:10) Ha mu nze mu beya miselo mwa bupilo bwa mina, ku zwelapili kwa mina ku ka lemuhiwa ki batu kaufela. Mu ka ba batu ba kwa moya ba ba utwisisa hande lituto za Bibele. Ka ku shutana ni mo ba ezezanga batu ba ba si na zibo, mu ka ezanga liketo ze nde mi mu ka kona ku tusa hande ba bañwi. Mi sa butokwa ni ku fita kikuli mu ka sutelela hahulu ku Jehova. Mu ka itebuha hahulu tulemeno twa hae, mi buitebuho bwa mina bu ka bonahala ka mo mu taluseza ba bañwi za Mulimu.—1 Tim. 4:15; Jak. 4:8.

Ku si na taba ni buhulu bwa mina kamba yeloseli ye mu na ni, mu like ka tata ku zwelapili ku tabela Linzwi la Mulimu ni ku ituta lona ka butungi kuli mu li utwisise. Mu kolwe kuli Jehova ha na ku libala buikatazo bwa mina. (Maheb. 6:10) Mi u ka mi kapweka limbuyoti.

[Mbokisi fa likepe 13]

HAIBA LU ZWELAPILI KU HULA “KA ZIBO” YE NEPAHEZI . . .

Lu ka tiisa tumelo ya luna ku Mulimu mi lu ka zamaya ka mukwa o swanela Jehova.—Makolo. 1:9, 10

Lu ka ba ni kutwisiso, ili ye ka lu tusa ku eza likatulo ze nde.—Samu 119:99

Lu ka tabela hahulu ku tusa ba bañwi ku sutelela ku Jehova.—Mat. 28:19, 20

[Maswaniso a fa likepe 14]

Ku kona ku ba tata ku fumana sibaka se si swanela mo mu kona ku itutela hande, kono ku eza cwalo kwa tusa

[Siswaniso se si fa likepe 15]

Mabasi a mañwi a balanga Bibele hasamulaho wa ku ca