Ku Sebeleza Mulimu ka ‘Pilu I Liñwi, ni Moya U Li Muñwi’

MAJUDA ni baproselite ba beile balutiwa ba Jesu Kreste mwahal’a bona. Ku ezahala Mukiti wa Pentekonta, mi baenyi bao, ba tile kwa Jerusalema ku zwelela kwa Roma ye kwa wiko ni kwa Parta ye kwa upa. Mwahal’a bona ku utwahala kuli ku bulelwa lipuo ze ñata. Kono balutiwa ba Jesu ba ba ambolisana ni bona ki Magalilea. Baenyi ba bañwi ba ne ba komokisizwe ki zibo ya baapositola ya ku bulela lipuo ze ñwi, ba buza kuli: “Kikuliñi ha lu ba utwa ba bulela puo ya mutu ni mutu wa luna, y’a pepezwi ku yona?”—Lik. 2:8.

Muapositola Pitrosi a yema ni ku talusa  libaka la makazo yeo ye ne ba iponela. Kapili-pili sikwata seo sa amuhela lushango lo. Buñata bwa batu ba banca ba kolobezwa! (Lik. 2:41) Puteho niha i hula kapili cwalo, i zwelapili ku swalisana. Luka, muñoli wa Bibele u li: “Buñata bwa ba ba lumezi ne bu li pilu i liñwi, ni moya [u] li muñwi.”—Lik. 4:32.

Buñata bwa batu ba ne ba kolobelizwe fa Pentekonta ya 33 C.E. ne ba bata ku siyala mwa Jerusalema ka nako ye telele kuli ba itute ze ñata ka za bulapeli bwa bona bo bunca. Kono ha ne ba taha kwa Jerusalema ne ba sa hupuli kuli ba ka to ina kwateñi nako ye telele. Kacwalo, kwa eziwa koleko ya mali ka swalelele. Balumeli ba bañwi ba lekisa tutu ya bona ka ku itatela ni ku tisa mali kwa baapositola kuli a abelwe batu bao ba ne ba tokwa tuso. (Lik. 2:42-47) Balumeli bao ne ba bonisize moya wa lilato ni bufani luli!

Bakreste ba niti ba bonisanga kamita moya o cwalo wa lilato ni bufani. Puteho ya Sikreste kacenu i zwelapili ku sebeleza Jehova ka swalisano ili ka “pilu i liñwi, ni moya [u] li muñwi fela.” Bakreste ba fana nako, m’ata, ni mali a bona kuli ba kutaze taba ye nde ni ku zwisezapili za Mubuso wa Mulimu.—Mu bone taba ye li,  “Linzila Zeo Ba Bañwi Ba Iketela ku Fana ka Zona.”

[Mbokisi fa likepe 6]

 LINZILA ZEO BA BAÑWI BA IKETELA KU FANA KA ZONA

LINUBU ZA MUSEBEZI WA MWA LIFASI KAUFELA

Ba bañata ba bulukanga mali a ku beya mwa tumbokisi twa linubu to tu ñozwi kuli “Musebezi wa mwa Lifasi Kaufela.”

Kweli ni kweli, liputeho li lumelanga mali ao kwa ofisi ya Lipaki za Jehova ya mwa naha ya zona. Linubu za mali ze fiwa ka ku itatela hape za kona ku lumelwa kwa Watch Tower Bible and Tract Society of Pennsylvania, Box 33459, Lusaka 10101. Macheke a lumelwa kwa keyala ye fahalimu a swanela ku bonisa kuli mali a ñozwi a fiwe kwa “Watch Tower.” Lika ze ñwi za butokwa za kona ku fiwa sina nubu ni zona. Liñolo le li talusa ka bukuswani kuli lika zeo ki nubu ya ka ku itatela li lukela ku tahelela ni linubu zeo.

TUKISO YA LINUBU ZA KA TUMELELANO

Mali a kona ku beiwa mwa pabalelo ya Watch Tower Society kuli a itusiswe mwa lifasi kaufela. Nihakulicwalo mutu ya fa nubu wa kona ku kutisezwa mali a hae haiba a’ kupa. Haiba mu bata litaba ze ñwi, shangwe mu ñolele kwa “Treasurer’s Office” (Ofisi ya Mubuluki wa Sikwama) ka ku itusisa keyala ye bonisizwe.

MILELO YA KU FANA

Kwand’a linubu za mali ze fiwa luli, ku na ni mifelo ye miñwi ya ku tusa ka yona sebelezo ya Mubuso mwa lifasi kaufela. Yeo i kopanyeleza:

Mali a Silelezo: Batu ba bañwi ba kona ku lukisa kuli hamulaho wa lifu la bona, mali a ne ba bulukanga kwa likampani ze ñwi kamba mali a bona a penshini a fiwe kwa Watch Tower Society.

Liakaunti za kwa Panga: Mali a bulukiswa mwa panga, mapampili a mali a bulukisizwe, kamba mali a fiwa mutu ya tuhela musebezi a kona ku beiwa mwa pabalelo ya Watch Tower Society kamba kuli a fiwe Watch Tower Society fa lifu la mutu, ka ku ya ka ze i tokwa panga yeo.

Ma-Stock ni Ma-Bond: Ma-stock ni ma-bond a kona ku fiwa kwa Watch Tower Society sina mpo luli.

Miyaho ya ka Butu ni Ndao: Miyaho ya ka butu kamba ndao ye kona ku lekiswa ya kona ku fiwa luli sina mpo, kamba haiba ki ndu mwa pila mufi y’o, wa kona ku zwelapili ku pila mwateñi ku fitela a shwa. Mu ñolele kwa ofisi ya mutai mwa naha ya habo mina pili mu si ka ñolisa kale za ku fa muyaho kamba mubu wa mina.

Ma-Will ni ma-Trust: Tutu kamba mali a kona ku fiwa kwa Watch Tower Society ka ku itusisa will (pampili ye bonisa mw’a batela mutu kuli libyana za hae li abelwe ha s’a shwile) ye ñozwi ka mulao, kamba Watch Tower Society ya kona ku kalimiwa nto ye ñwi kuli i itusise yona, ili ye bizwa trust. Trust ye fiwa kwa kopano ya bulapeli i kona ku tahisa kuli mutu a si ke a telela lika ze ñwi.

Sina ka mo i taluseza pulelo ya kuli “milelo ya ku fana,” linubu ze cwalo li tokwa hahulu kuli mufani a nahanisise hande. Kuli batu ba ba bata ku fana linubu kwa musebezi wa Lipaki za Jehova wa mwa lifasi kaufela ba tusiwe, ku lukisizwe broshuwa ya mwa Sikuwa ni mwa si-Spanish ye na ni toho ya taba ye li Charitable Planning to Benefit Kingdom Service Worldwide. Broshuwa yeo ne i ñozwi kuli i fe litaba ka za linzila ze ñata za mo li kona ku felwa linubu ibe cwale kamba mutu ha sa timezi. Ba bañata ha se ba balile broshuwa yeo ni ku nyaka milao ya naha ya bona kamba ku buza baelezi ba za mutelo, se ba konile ku tusa kwa musebezi wa bulapeli ni wa ku tusa batu o ba eza Lipaki za Jehova mwa lifasi kaufela ni ku hulisa lituso za bona za mutelo ha ba nze ba eza cwalo. Haiba mu bata broshuwa ye, mwa kona ku i kupa kwa Ofisi ya Milelo ya ku Fana.

Kuli mu utwe ze ñata, mwa kona ku buza ba Ofisi Ya Milelo ya Ku Fana, ka ku ñola kamba ka luwaile, kwa keyala ye bonisizwe kwatasi kamba mwa kona ku ñolela ofisi ya Lipaki za Jehova ya mwa naha ya mina.

Treasurer’s Office

Watch Tower Bible and Tract Society of Pennsylvania

Box 33459, Lusaka 10101

Telephone: (021) 1 272062