“Mu Hanele Diabulosi” Sina mwa Na Ezelize Jesu
“Mu Hanele Diabulosi” Sina mwa Na Ezelize Jesu
“Mu hanele Diabulosi, mi u ka saba ku mina.”—JAK. 4:7.
1. Jesu na ziba kuli na ka kopana ni twaniso mañi fa lifasi, mi ki lika mañi ze ne ka zwa mwateñi?
JESU KRESTE na ziba kuli na ka lwaniswa ki Diabulosi. Taba yeo i iponahalela hande mwa manzwi a na bulezi Mulimu ku noha, ili manzwi a na talusezwa mufetuheli wa kwa moya ya maswe ya na i itusisa yona. Mulimu na ize: “Ni ka beya toyano mwahal’a mina, ni wena ni musali [kalulo ya kwa lihalimu ya kopano ya Jehova ye swana sina musali], ni mwahal’a peu ya hao ni peu ya musali; peu yeo [Jesu Kreste] i ka ku pyata toho, wena u i lume fa lisito.” (Gen. 3:14, 15; Sin. 12:9) Ku lumiwa kwa lisito kwa Jesu ne ku talusa kuli na ka holofazwa ka nakonyana fela ka ku bulaiwa ka nako ya na ka ba fa lifasi, kakuli Jehova na ka mu zuseza kwa kanya ya lihalimu. Kono ku pyatiwa toho kwa noha ne ku talusa kuli Diabulosi na ka bulaelelelwa.—Mu bale Likezo 2:31, 32; Maheberu 2:14.
2. Ki kabakalañi Jehova ha n’a na ni buikolwiso bwa kuli Jesu na ka kona ku hanela Diabulosi?
2 Jehova n’a na ni buikolwiso bwa kuli Jesu na ka peta musebezi wa na lumezwi ka ku tala ni ku hanela Diabulosi ka nako ya na ka ba fa lifasi. Ki kabakalañi Jehova ha na ikolwisa hahulu cwalo? Ki kabakala kuli Jehova na sa bupile Jesu mwa lihalimu lilimo na lilimo kwamulaho, na pilile ni yena ka nako yeo kaufela, mi na ziba kuli Mwan’a hae yo ya na “mu sebeleza” ili “mweli ku ze bupilwe kamukana” na ipeile ku mu utwa mi na sepahala. (Liprov. 8:22-31; Makolo. 1:15) Kacwalo, Mulimu ha na lumile Jesu fa lifasi ni ku lumeleza Diabulosi ku mu lika mane ku fitela lifu, n’a na ni buikolwiso bwa kuli Mwan’a Hae wa libanda yo na ka kona ku hanela Diabulosi.—Joa. 3:16.
Jehova Wa Bukeleza Batanga ba Hae
3. Diabulosi u nga cwañi batanga ba Jehova?
3 Jesu na bizize Diabulosi kuli ki “mulena wa lifasi le” mi na lemusize balutiwa ba Hae kuli ne ba ka nyandiswa sina mwa na nyandiselizwe. (Joa. 12:31; 15:20) Lifasi le, le li lapalezi mwatas’a Satani Diabulosi li toya Bakreste ba niti bakeñisa kuli ba sebeleza Jehova mi ki bakutazi ba ku luka. (Mat. 24:9; 1 Joa. 5:19) Diabulosi sihulu u lwanisa bomasiyaleti ba ba tozizwe ba ba ka busa hamoho ni Kreste mwa Mubuso wa hae wa kwa lihalimu. Satani hape u lwanisa Lipaki za Jehova ba bañata ba ba na ni sepo ya ku pila ku ya ku ile mwa paradaisi fa lifasi. Linzwi la Mulimu li lu lemusa kuli: “Diabulosi, sila sa mina u nz’a zamaya sina tau ye lila ye bata ye i ka ca.”—1 Pit. 5:8.
4. Ki sifi se si bonisa kuli batu ba Mulimu ba konile ku hanela Diabulosi mwa miteñi ya luna?
4 Ka ku ba kopano ye tusiwa ki Jehova Mulimu, lu sweli lwa hanela Diabulosi. Mu nyakisise litaba ze ezahalile ze: Mwa lilimo ze 100 ze felile, milonga ye miñwi ya buhateleli ili ye situhu ni ye zibahala hahulu mwa litaba ze ezahezi, i likile ku yundisa Lipaki za Jehova. Kono palo ya Lipaki i zwelapili ku ekezeha, mane cwale se ibato eza 7,000,000 mwa liputeho ze fitelela 100,000 mwa lifasi kaufela. Milonga ya buhateleli ye situhu ye nyandisize batu ba Jehova ki yona ye yundile!
5. Isaya 54:17 i talelelizwe cwañi kwa batanga ba Jehova?
5 Mulimu ha na bulela kwa kopano ya Isilaele wa ikale ye ne swana sina musal’a hae, na sepisize kuli: “Ha ku na silwaniso se si ezezwa wena se si ka konda; mi wa lilimi kaufela le li ka ku zekisa, u ka mu beya mulatu. Se, ki sanda sa batanga ba [Muñ’a] Bupilo, ni litukelo za bona ze zwa ku Na.” (Isa. 54:11, 17) Sepiso yeo i talelelizwe kwa batu ba Jehova mwa lifasi kaufela mwa “mazazi a maungulelo” a. (2 Tim. 3:1-5, 13) Lu zwelapili ku hanela Diabulosi, mi ha ku na silwaniso sa lika ku itusisa kuli a yundise batu ba Mulimu se si ka konda, kakuli Jehova wa lu lwanela.—Samu 118:6, 7.
6. Bupolofita bwa Daniele bu lu talusezañi ka za se si ka ezahala kwa puso ya Diabulosi kwapili?
6 Mafelelezo a lifasi le a sweli ku atumela hahulu ha ka fita, lipuso za Satani kaufela zona li ka yundiswa. Ka ketelelo ya moya wa Mulimu, mupolofita Daniele na polofitile kuli: “Mwa mazazi a malena ao [a mwa nako ya luna], Mulimu wa mwa lihalimu u ka tahisa mubuso [mwa lihalimu] o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela [ye li teñi cwale]; kono ona u ka ba teñi kamita ni ku ya ku ile.” (Dan. 2:44) Taba yeo ha i ka ezahala, puso ya Satani hamoho ni puso ya batu ba ba si ka petahala ha li sa na ku ba teñi. Lifasi la Diabulosi kaufela lona li ka sinyiwa ku ya ku ile, mi Mubuso wa Mulimu u ka busa lifasi kaufela ku si na twaniso ni ye kana.—Mu bale 2 Pitrosi 3:7, 13.
7. Lu ziba cwañi kuli batanga ba Jehova ka butu ba kona ku hanela Diabulosi?
7 Ha lu kakanyi ni hanyinyani kuli kopano ya Jehova i ka bukelezwa ni ku zwelapili ku tiya kwa moya. (Mu bale Samu 125:1, 2.) Luna bo? Bibele i lu bulelela kuli lwa kona ku hanela Diabulosi sina fela mwa na ezelize Jesu. Kaniti, bupolofita bwa na file Kreste ka muapositola Joani bu bonisa kuli ku si na taba ni twaniso ya Satani, “buñata bo butuna” bwa batu ba ba na ni sepo ya ku pila fa lifasi bu ka punyuha mafelelezo a lifasi le. Mañolo a bonisa kuli batu bao ba huwa kuli: “Ku pilisa ki kwa Mulimu wa luna ya inzi mwa Lubona, ni kwa Ngunyana [yena Jesu Kreste]!” (Sin. 7:9-14) Ba ba tozizwe ba taluswa kuli ba tula Satani, mi ni balikani ba bona ba “lingu ze ñwi” ba sweli ba mu hanela. (Joa. 10:16; Sin. 12:10, 11) Kono ku eza cwalo ku tokwa buikatazo bo butuna ni ku lapela ka t’ata ku Mulimu kuli a lu “lamulele ku ya maswe.”—Mat. 6:13.
Mutala O Petehile wa mwa ku Hanela Diabulosi
8. Ki ifi tiko ya pili ye ñozwi ya na itusisize Diabulosi kwa ku lika Jesu mwa lihalaupa, mi Kreste na alabile cwañi?
8 Diabulosi na likile ku palelwisa Jesu ku sepahala ku Mulimu. Mwa lihalaupa, Satani na likile Jesu ka mulelo wa kuli Jesu a fulalele Jehova. Kono Jesu na tomile mutala o petehile wa mwa ku hanela Satani. Hamulaho wa ku itima lico ka mazazi a 40 ni masihu a 40, Jesu u lukela ku ba ya na lapile luli. Satani a li ku yena: ‘Haiba ki wena Mwan’a Mulimu, u bulelele macwe a, kuli a fetuhe buhobe.’ Jesu na hanile ku itusisa m’ata a na mu file Mulimu ka buitati. Kono na bulezi kuli: “Mutu h’a na ku pila buhobe fela, kono u ka pila ni ona manzwi kaufela a’ zwa mwa mulomo wa Mulimu.”—Mat. 4:1-4; Deut. 8:3.
9. Ki kabakalañi ha lu swanela ku hanyeza Diabulosi kuli a si ke a lu lika ka litakazo za luna za nama?
9 Diabulosi kacenu u lika batanga ba Jehova ka litakazo za bona za nama. Kacwalo, lu swanela ku ikatulela ku hanyeza miliko ya buhule ye atile hahulu mwa lifasi le la muzamao o maswe. Linzwi la Mulimu li bulela kuli: “Kana ha mu zibi kuli ba ba sa ezi ka ku luka, ha ba na ku ca sanda sa mubuso wa Mulimu? Mu si ke mwa ipuma: Ni mahule, ni ba ba lapela milimu, ni babuki, ni ba ba lumela ku ezwa musali, ni ba sodoma . . . ha ba na ku luwa sanda sa mubuso wa Mulimu.” (1 Makor. 6:9, 10) Kacwalo, kwa iponahalela hande kuli batu ba ba eza mikwa ye maswe ili ba ba sa lati ku cinca ha ba na ku kena mwa lifasi le linca la Mulimu.
10. Ku likana ni Mateu 4:5, 6, ki ufi muliko o muñwi wa na itusisize Satani kuli a palelwise Jesu ku sepahala?
10 Muliko o muñwi wa na likilwe ka ona Jesu mwa lihalaupa u taluswa cwana mwa Mañolo: “Diabulosi a mu isa mwa munzi o ketilwe, a mu beya fa muongola wa Tempele, a li: Haiba ki wena Mwan’a Mulimu, wela fafasi; kakuli ku ñozwi kuli: U ka laela mangeloi a hae, mi a ka ku teela mazoho, kuli liutu la hao li si ke la kubwa ki licwe.” (Mat. 4:5, 6) Fo ne li kuli Jesu a bonise bupaki bo butuna bwa kuli luli na li Mesia. Kono niti kikuli, ku eza cwalo ne ku ka fosahala, mi neikaba ku ikutwisisa, ili kezo ya na si ke a tabela Mulimu. Jesu hape a buluka busepahali bwa hae ku Jehova mi a alaba ka ku ama kwa liñolo. A li: “Ku ñozwi hape kuli: U si ke wa lika Mulena Mulimu wa hao.”—Mat. 4:7; Deut. 6:16.
11. Satani u kona ku lu lika cwañi, mi ki lifi ze kona ku zwa mwateñi?
11 Satani u kona ku lu shamiliketa kuli lu like Jehova. Ka mukwa ufi? U kona ku lu tahiseza takazo ya ku bata tumbo ya lifasi le. Hape u kona ku lu susueza ku likanyisa mitinelo ya lifasi kamba ku ikenya mwa mifuta ya ku itabisa ka yona ye sa swalehi hande. Kono haiba lu keshebisa kelezo ya Bibele ni ku likanyisa lifasi, kana lwa kona ku libelela kuli mangeloi a ka lu sileleza kwa matata e lu ka ipumana ku ona? Mulena Davida niha na bakezi libi za hae za ku fosa ni Bati-Sheba ni ku bulaisa munn’a hae, na si ka silelezwa kwa matata a na tisizwe ki likezo za hae. (2 Sam. 12:9-12) Lu si ke lwa lika Jehova ka linzila ze sa swaneli, inge cwalo ka ku ikeza silikani ni lifasi.—Mu bale Jakobo 4:4; 1 Joani 2:15-17.
12. Ki muliko mañi o talusizwe kwa Mateu 4:8, 9, mi Mwan’a Mulimu na ezizeñi?
12 Muliko o muñwi hape wa na itusisize Diabulosi mwa lihalaupa ne u ama ku fa Jesu m’ata a bubusi. Satani na bonisize Jesu mibuso kamukana ya lifasi ni kanya ya yona mi a li: “Zeo kamukana ni ka ku fa zona, ha u wa ka mañwele, wa ni kubamela.” (Mat. 4:8, 9) Ao luli ne li mano a maswe a na itusisa Satani kuli a lapelwe sina Jehova ni ku pepeza Jesu kuli a foseze Mulimu! Bakeñisa ku nahananga hahulu za ku lapelwa, lingeloi leo le ne li sepahala sapili ne li ezize sibi mi ne li fetuhile ku ba muliki ya maswe hahulu kabakala litakazo za lona, mi la ba Satani Diabulosi. (Jak. 1:14, 15) Kono ka ku fapahana hahulu ni lingeloi leo, Jesu na ikatulezi ku zwelapili ku sepahala ku Ndat’ahe wa kwa lihalimu mi kona libaka ha na ize: ‘Zwa Satani, kakuli ku ñozwi kuli: Kubamela Mulena Mulimu wa hao, mi u sebeleze Yena a nosi.’ Kacwalo, Jesu hape na hanezi Diabulosi ka ku utwahala hande, ku si na ku zina-zina. Mwan’a Mulimu na sa lati ku ba wa lifasi la Satani mi na si ke a lapela ya maswe!—Mat. 4:10; Deut. 6:13; 10:20.
“Mu Hanele Diabulosi, mi U Ka Saba ku Mina”
13, 14. (a) Ka ku bonisa Jesu mibuso kamukana ya lifasi, Diabulosi na fañi Jesu? (b) Satani u lu kukueza cwañi kuli a lu sinye?
13 Ka ku bonisa Jesu mibuso kamukana ya lifasi, Diabulosi na mu fa m’ata a matuna hahulu a na si ka fiwa kale mutu ufi kamba ufi. Satani na hupuzi kuli Jesu na ka likwa ka bunolo ka lika za na iponela ka meto ni kuli na ka tabela ku ba mubusi ya m’ata ka ku fitisisa wa lifasi. Diabulosi kacenu ha lu liki ka ku lu fa mibuso, kono u lika ku sinya lipilu za luna ka ku itusisa meto, lizebe, ni minahano ya luna.
14 Diabulosi ki yena ya busa lifasi le. Kacwalo ki yena ya zamaisa ni mitai ya makande ya mwa lifasi. Kabakaleo, ha lu komoki ku bona kuli mafilimu, lipina ni libuka za lifasi li tezi fela buhule ni mifilifili. Babapazi ba lika mwa lifasi ba lu susueza ku leka lika ze ñata-ñata ze lu sa tokwi. Zeo ki linzila ze ñwi za lu lika ka zona Diabulosi kuli lu be ni lilato la bufumu kabakala ku lakaza lika ze lu iponela ka meto, ze lu teeleza ku zona, ni ze lu nahana. Kono ha lu hana ku buha, ku bala, ni ku teeleza kwa lika ze lwanisana ni Mañolo, fo lu swana sina Jesu ya na ize: “Zwa Satani”! Lu likanyisa Jesu ka ku hana lika ze maswe ze mwa lifasi la Satani ka ku tiya ni ka ku sa zina-zina. Nzila ye ñwi ye lu bonisa ka yona kuli ha lu ba lifasi ki mo lu itibahaleza ka bundume sina Lipaki za Jehova ni balateleli ba Kreste kwa mubeleko, kwa sikolo, mwa silalanda se lu pila, ni ku bahabo luna.—Mu bale Mareka 8:38.
15. Ki kabakalañi ku hanela Satani ha ku tokwa kuli lu zwelepili ku tona?
15 A mano palelwa lwa bulalu ku tahisa kuli Jesu a foseze Mulimu, “Diabulosi a mu lisela.” (Mat. 4:11) Kono Satani na sa bati ku itulela ku lika Jesu, kakuli lu talusezwa kuli: “Cwale Diabulosi, h’a felize ku mu lika kaufela, a zwa ku yena, ku isa kwa nako ye ñwi.” (Luka 4:13) Ha lu hanela Diabulosi ka ku tula muliko wa hae lu swanela ku itumela ku Jehova. Kono hape lu swanela ku zwelapili ku itinga ku Jehova kuli a lu tuse, kakuli Diabulosi u ka kuta ku to lu lika ka nako ye ñwi hape—mwendi ili nako fo lu sa libeleli ku likiwa. Kacwalo, lu swanela ku ba ba ba tona ka nako kaufela, inze lu tundamena ku sebeleza Jehova ku si na taba ni miliko ye lu na ni ku talimana ni yona.
16. Ki m’ata afi a matuna hahulu a lu fa Jehova, mi ki kabakalañi ha lu swanela ku a kupa ka tapelo?
16 Kuli lu fumane tuso ya ku hanela Diabulosi, lu swanela ku kupa ka tapelo ku Mulimu m’ata a matuna ka ku fitisisa mwa pupo kaufela—ona moya o kenile wa Mulimu—mi lu ka u fiwa. Moya wo u ka lu tusa ku eza lika ze ne lu si ke lwa kona ku eza ka m’ata a luna fela. Jesu na kolwisize balateleli ba hae kuli moya o kenile wa kona ku fumanwa ha na ize: “Mbali mina ba ba [si ka petahala mi ka mukwa o cwalo ba ba] na ni lunya, mu ziba ku fa bana ba mina lika ze nde, Ndate ya kwa lihalimu u ka mi fita hahulu mwa ku fa Moya o Kenile ku ba ba u kupa ku yena.” (Luka 11:13) Haike lu zweleñipili ku kupa moya o kenile ku Jehova mwa tapelo. Ka ku tusiwa ki m’ata a matuna hahulu ao, lu ka kona ku hanela Diabulosi, mi lu ka tula. Kwand’a ku lapelanga fela kamita ni ka pilu kaufela, lu swanela ku swala lilwaniso kaufela za moya za lu file Mulimu “kuli lu kone ku tiya kwa lunya lwa Diabulosi” kamba tushambwe twa hae.—Maef. 6:11-18.
17. Ki tabo mañi ye ne tusize Jesu ku hanela Diabulosi?
17 Ku na ni nto ye ñwi hape ye ne tusize Jesu ku hanela Diabulosi, mi ya kona ku lu tusa ni luna. Bibele ili: “Kabakala tabo y’a n’a beezwi kwapili, Jesu a itiisa kwa kota ya linyando, a sa tokomeli lishwau la yona; mane a y’o ina ku la bulyo la lubona lwa Mulimu.” (Maheb. 12:2, NW) Ni luna lwa kona ku ba ni tabo ye swana ka ku yemela bubusi bwa Jehova, ku kuteka libizo la hae le li kenile, ni ku ba ni sepo ye tiile ya bupilo bo bu sa feli ka nako kaufela. Lu ka taba luli muta Satani a sinyiwa ku sinyelelezwa hamoho ni misebezi ya hae kaufela ni ‘ba ba ishuwa ha ba luwa naha, ni ku ikola kozo ye tuna.’ (Samu 37:11) Kacwalo, mu zwelepili ku hanela Diabulosi sina mwa na ezelize Jesu.—Mu bale Jakobo 4:7, 8.
Mu Kona ku Alaba Cwañi?
• Ki bupaki mañi bo bu bonisa kuli Jehova wa bukeleza batu ba hae?
• Jesu na tomile cwañi mutala wa mwa ku hanela Satani?
• Mu kona ku hanela Diabulosi ka linzila lifi?
[Lipuzo za Tuto]
[Siswaniso se si fa likepe 29]
Ku ikeza silikani ni lifasi ki ku ikeza sila sa Mulimu
[Siswaniso se si fa likepe 31]
Jesu na hanile mibuso kamukana ya lifasi ya na sepisa ku mu fa Satani