Linzwi la Jehova ki le li Pila

Ze Zwile Mubano mwa Buka ya Sinulo—II

KI LIKA mañi ze ka ezahala kwapili ku ba ba lapela Jehova Mulimu ni ku ba ba sa mu lapeli? Ki lika mañi ze ka tahela Satani ni badimona ba hae kwapili? Ki limbuyoti mañi ze ba ka ikola batu ba ba ipeya ku utwa mwahalaa Puso ya Kreste ya Lilimo ze Sikiti? Likalabo kwa lipuzo ze ni lipuzo ze ñwi za butokwa li patuluzwi kwa Sinulo 13:1–22:21. * Likauhanyo ze li bulela ka za lipono ze 9 za mafelelezo ku ze 16 za na amuhezi muapositola Joani bukaufi ni mafelelezo a linako za baapositola.

Joani u ñola kuli: “U na ni mbuyoti ya bala, ni ba ba utwa litaba za bupolofita bo, ni ba ba buluka ze ñozwi mwateñi.” (Sin. 1:3; 22:7) Ku bala ni ku mamela ze lu ituta mwa buka ya Sinulo ku kona ku susumeza lipilu za luna, ku tiisa tumelo ya luna ku Mulimu ni ku Mwanaa hae, Jesu Kreste, ni ku lu fa sepo ye nde ya za kwapili. *—Maheb. 4:12.

LINKWANA ZE 7 ZA BUHALI BWA MULIMU ZA SULULWA

(Sin. 13:1–16:21)

Sinulo 11:18 i li: “Macaba n’a halifile; mi buhali bwa [Mulimu] bu tahile, mi nako i tile ya ku . . . yundisa ba ba shandaula lifasi.” Ka ku bonisa libaka buhali bwa Mulimu ha bu tahile, pono ya bu 8 i bonisa musebezi wa “sibatana se si . . . na ni manaka a lishumi, ni litoho ze 7.”—Sin. 13:1.

Mwa pono ya bu 9, Joani u bona “Ngunyana a yemi fa lilundu la Sioni” a na ni “batu ba ba eza 144,000.” Bona bao ki “ba ba liuluzwi mwahal’a batu.” (Sin. 14:1, 4) Ku zwa fo, mangeloi a zibahaza litemuso. Mwa pono ye tatama, Joani u bona “mangeloi a 7 a’ sweli likozi ze 7.” Ku bonahala kuli Jehova ka sibili ki yena ya laela mangeloi ao ku sululela mwa likalulo ze shutana-shutana za lifasi la Satani “linkwana ze 7 za buhali bwa Mulimu.” Mwa linkwana zeo ku na ni lizibahazo ni litemuso za likatulo za ka eza Mulimu. (Sin. 15:1; 16:1) Lipono ze, ze peli li talusa ka butungi likatulo ze ñwi za Mubuso ze ama bumai bwa bulalu ni ku lizwa kwa tolombita ya bu 7.—Sin. 11:14, 15.

Lipuzo Za mwa Mañolo Za Alabiwa:

13:8—“Buka ya bupilo ya Ngunyana” ki nto mañi? Ki buka ya swanisezo ye na ni feela mabizo a ba ba busa ni Jesu Kreste mwa Mubuso wa hae wa kwa lihalimu. I kopanyeleza ni mabizo a Bakreste ba ba tozizwe ba ba sa li teñi fa lifasi, ba ba na ni sepo ya ku yo pila kwa lihalimu.

13:11-13—Sibatana se si na ni manaka a mabeli si bulela cwañi inge drakoni mi si wisa cwañi mulilo kwa lihalimu? Sibatana sa manaka a mabeli si yemela linaha ze maata hahulu ze sebelisana za Britain ni United States. Taba ya kuli sibatana seo si bulela inge drakoni i bonisa kuli si itusisa mifumbo, maata, ni lindwa kuli si hapeleze batu ku amuhela puso ya sona. Si wisa mulilo kwa lihalimu ka ku ikeza inge mupolofita wa niti, mi si eza cwalo ka ku ipapata kuli ne si fenyize limpi ze maswe mwa lindwa za lifasi ze peli ze nee lwanilwe mwa lilimo za ma 1900 ni kuli ne si komile Lipuso za Celelano (Communism).

 16:17—“Moya” mo ku sululelwa nkwana ya bu 7 ki nto mañi? “Moya” wo u yemela mihupulo ya Satani, “ili moya [kamba munahanelo] o nz’o sebeza mwa bana ba ba ikanyisa.” Moya o bulaya wo u buyelwa ki lifasi kaufela la Satani le li maswe.—Maef. 2:2.

Ze Lu Ituta:

13:1-4, 18. “Sibatana” se si swanisezwa ki milonga ya batu, “si omboka mwa liwate,” fo kikuli, si zwa mwa macaba aa na ni mifilifili. (Isa. 17:12, 13; Dan. 7:2-8, 17) Sibatana seo, se si tomilwe ni ku fiwa maata ki Satani, si na ni nombolo ya 666, ye bonisa ku sa petahala kwa sona ko kutuna. Ku ziba sibatana seo ku lu tusa ku sa si latelela inze lu si komoka ni ku sa si lapela, inge mo ba ezeza batu ba bañata.—Joa. 12:31; 15:19.

13:16, 17. Niha lu tahelwa ki matata ha lu nze lu eza misebezi ya ka zazi ni zazi, ye cwale ka “ku leka ni ku lekisa,” ha lu lukeli ku hapelezwa ku tuhelela sibatana ku zamaisa bupilo bwa luna. Ku amuhela ‘nombolo ya sibatana fa lizoho la luna kamba fa pata ya luna,’ ku swana ni ku si tuhelela ku zamaisa likezo za luna kamba mihupulo ya luna.

14:6, 7. Mushaa wa lingeloi u lu luta kuli lu lukela ku zibahaza ka putako taba ye nde ya Mubuso wa Mulimu o tomilwe. Lu lukela ku tusa baituti ba luna ba Bibele ku ba ni sabo ya ku saba Mulimu ni ku lumbeka Jehova.

14:14-20. “Lukau lwa lifasi,” ili lukau lwa batu ba ba ka piliswa, ha lu ka kutulwa, lingeloi li ka “nepela mwa silubelo se situna sa buhali bwa Mulimu” lukau lwa “sisansa sa veine ya lifasi.” Ku zwa fo, sisansa sa veine—yona milonga ye maswe ya Satani ye busa fahalimu a batu ni “likoyowela” za muselo wa yona ze maswe—si ka sinyiwa ku sinyelezwa. Lu lukela ku itiisa kuli lu si ke lwa kukuezwa ki sisansa sa veine ya lifasi.

16:13-16. ‘Mioya ye masila’ i yemela litaba za badimona za buhata ze tahisa kuli malena a lifasi a si ke a biulwa ki ku sululwa kwa linkwana ze 7 za buhali bwa Mulimu kono a susuezwa ku hanyeza Jehova.—Mat. 24:42, 44.

16:21. Lifasi le ha li nze li ya kwa ku fela, likatulo za Jehova fahalimu a muinelo wa lifasi le li maswe la Satani li kona ku zibahazwa hahulu ka ku nonga, mwendi ili ze swanisezwa ki mezi a kangezi. Nihakulicwalo, batu ba bañata ba ka zwelapili ku nyefula Mulimu.

MULENA YA TUZI WA BUSA

(Sin. 17:1–22:21)

“Babilona yo mutuna,” yona kopano ya lifasi ya bulapeli kamukana bwa buhata, ki kalulo ye nyenyisa ya lifasi la Satani le li maswe. Pono ya bu 11 i mu talusa sina musali ya li “lihule le lituna le li inzi fa mezi a mañata.” U ka sinyelezwa ki “manaka a lishumi” a sibatana sa pahami. (Sin. 17:1, 3, 5, 16) Pono ye tatama i bapisa musali wa lihule yo ni “munzi o mutuna,” mi i zibahaza ku wa kwa hae ni ku susueza batu ba Mulimu kuli ba “zwe ku yena” kapili. Ku wa kwa hae ku lilwa ki ba bañata. Kono mwa lihalimu ku na ni tabo kabakala “linyalo la Ngunyana.” (Sin. 18:4, 9, 10, 15-19; 19:7) Mwa pono ya bu 13, mupahami wa “pizi ye sweu” u ya kwa ku lwanisa macaba. U felisa lifasi la Satani.—Sin. 19:11-16.

Ku cwañi ka za “noha ya kale, ye i li Diabulosi ni Satani”? U ka kunupelwa lili “mwa lisa la mulilo”? Yeo ki ye ñwi ya litaba ze mwa pono ya bu 14. (Sin. 20:2, 10) Lipono ze peli za mafelelezo li bonisa ka bukuswani mo bu ka bela bupilo mwahalaa Lilimo ze Sikiti. “Sinulo” ha i nze i ya kwa ku fela, Joani u bona ‘nuka ya mezi a bupilo ye zwa mwahali a patelo,’ mi mutu kaufela “ya shwile linyolwa” u fiwa memo ye nde luli.—Sin. 1:1; 22:1, 2, 17.

Lipuzo Za mwa Mañolo Za Alabiwa:

17:16; 18:9, 10—“Malen’a lifasi” a lilelañi nto ye a sinyize ona ka sibili? Buitati ki bona bo bu tisa kuli malena bao ba tuwe sililo. Hamulaho wa ku sinyiwa kwa Babilona yo Mutuna,  ku bonahala kuli malena ba lifasi ba ka lemuha mwa naa ba tuseza. Naa tahisize kuli likezo za bona ze maswe li bonahale inge ze lukile. Babilona yo Mutuna hape naa ba tusize ku kenya ba banca busole kuli ba lwane mwa lindwa za bona. Mi hape naa ba tusize hahulu ka ku tahisa kuli batu ba ipeye kwatasaa bona.

19:12—Ki kabakalañi ha ku si na mutu yo muñwi ya ziba libizo la Jesu le li si ka bulelwa kwandaa yena? Ku bonahala kuli libizo le, li yemela situlo ni misebezi ye ipitezi, ze cwale ka ze bulezwi kwa Isaya 9:6, za ikola Jesu mwa lizazi la Mulena. Ha ku na mutu yo muñwi ya ziba libizo leo kwandaa yena kakuli misebezi yeo i ezwa ki yena feela mi ki yena feela ya kona ku utwisisa mo ku utwahalela ku ba ni situlo se si pahami se si cwalo. Nihakulicwalo, Jesu u ikola ye miñwi ya misebezi yeo ni ba sitopa sa munyaliwa wa hae, mi kacwalo u eza inge ya ‘ba ñola libizo leo la hae le linca.’—Sin. 3:12.

19:14—Ki bo mañi ba ba ka pahama lipizi ni Jesu ka nako ya Armagedoni? “Limpi ze kwa lihalimu” ze ka sebelisana ni Jesu mwa ndwa ya Mulimu li ka kopanyeleza mangeloi hamoho cwalo ni batoziwa ba ba tuzi, ili ba ba filwe kale mupuzo wa bona wa kwa lihalimu.—Mat. 25:31, 32; Sin. 2:26, 27.

20:11-15—Ki mabizo a bo mañi aa ñolwa mwa “buka ya bupilo”? Buka yeo i na ni mabizo a bote ba ba ka fiwa bupilo bo bu sa feli—Bakreste ba ba tozizwe, buñata bo butuna, ni batanga ba Mulimu ba ba sepahala ba ba ka zuswa ka nako ya ‘ku zuha kwa ba ba lukile.’ (Lik. 24:15; Sin. 2:10; 7:9) Mabizo a ba ba ka zuswa ka nako ya ‘ku zuha kwa ba ba si ka luka’ a ka ñolwa feela mwa “buka ya bupilo” haiba ba mamela “ze ñozwi mwa libuka” za litaelo ze ka apulwa mwahalaa Lilimo ze Sikiti. Kono fo, ha ku talusi kuli mabizo a ñozwi haa koni ku takulwa. Mabizo a ba ba tozizwe a ka ñolelelwa ha ba ka bonisa busepahali bwa bona ku isa kwa lifu. (Sin. 3:5) Mabizo a ba ba fiwa bupilo fa lifasi a ka inelela mwa buka ha ba ka sepahala mwa tiko ya mafelelezo kwa mafelelezo a Lilimo ze Sikiti.—Sin. 20:7, 8.

Ze Lu Ituta:

17:3, 5, 7, 16. “Butali bo bu zwa kwahalimu” bu lu tusa ku utwisisa “likunutu za musali ni za sibatana [se si fubelu] s’a pahami.” (Jak. 3:17) Sibatana sa swanisezo seo pili ne si banga Kopano ya League mi hasamulaho wa ku fela kwa kopano yeo, sa to ba Kopano ya Bamacaba (UN). Ku utwisisa kunutu yeo ku lukela ku lu susumeza ku tukufalelwa ku zibahaza taba ye nde ya Mubuso wa Mulimu ni ku shaela lizazi la katulo ya Jehova.

21:1-6. Lwa kona ku ba ni sepo ye tiile ya kuli limbuyoti ze polofitilwe ze u ka tahisa Mubuso li ka ezahala luli. Ki kabakalañi ha lu kona ku sepa cwalo? Kakuli ka za limbuyoti zeo, ku bulezwi kuli: “Ku petahalile”!

22:1, 17. “Nuka ya mezi a bupilo” i yemela litukiso za Jehova za ku felisa sibi ni lifu kwa batu ba ba ipeya ku utwa. Mezinyana a litukiso zeo a fumaneha ka nako ya cwale. Haike lu amuhele ka buitebuho memo ya ku taha ni ku to ‘nga feela kwa mezi a bupilo’ ni ku fitisa memo yeo ku ba bañwi!

[Litaluso za kwatasi]

[Siswaniso se si fa likepe 5]

Batu ba ba ipeya ku utwa ba ka ikola limbuyoti ze nde hahulu mwa puso ya Mubuso!