Ba ba Lukile ba ka Lumbeka Jehova Kamita
Ba ba Lukile ba ka Lumbeka Jehova Kamita
“Ya lukile, u ka hupulwa ku ya ku ile . . . Ku luka kwa hae ku ina kamita.” —SAMU 112:6, 9.
1. (a) Batu ba ba lukile mwa meeto a Mulimu ba libelezi nako ye cwañi ya kwapili ye tabisa? (b) Ki puzo ifi ye buzizwe?
BATU kaufela ba ba lukile mwa meeto a Mulimu ba libelezi nako ye nde ya kwapili! Kamita ba ka tabela ku ituta ze ñata ka za tulemeno to tunde twa Jehova. Ba ka lumbeka hahulu Mulimu ha ba nze ba zwelapili ku ituta ze ñata ka za misebezi ya hae ya pupo. Nto ye ñwi ya butokwa ye tokwahala ku mutu ya bata ku pila mwa nako ya kwapili ye tabisa hahulu yeo, ki ku “luka,” ko ku bulezwi hahulu mwa Samu 112. Kono Mulimu ya kenile, ya lukile, yena Jehova, u kona ku nga cwañi batu ba baezalibi kuli ba lukile? Niha lu lika ka taata ku eza ze lukile, lwa ezanga mafosisa, mi fokuñwi lu ezanga mafosisa a matuna.—Maro. 3:23; Jak. 3:2.
2. Ki limakazo lifi ze peli za naa ezize Jehova kabakala lilato?
2 Ka lilato, Jehova naa lukisize nzila ya ku tusa batu ba baezalibi kuli ba be ba ba lukile mwa meeto a hae. Naa ezize cwañi cwalo? Pili naa ezize makazo ya ku shimbululela bupilo bwa Mwanaa hae wa kwa lihalimu ya latwa mwa mba ya mwalyanjo ilikuli a pepiwe sina mutu ya petehile. (Luka 1:30-35) Mi cwale lila za Jesu ha se li mu bulaile, Jehova a eza makazo ye ñwi hape. Mulimu naa zuselize Jesu kwa bupilo sina mutu wa moya ya maata.—1 Pit. 3:18.
3. Ki kabakalañi Mulimu ha naa latile ku fa Mwanaa hae mupuzo wa bupilo bwa kwa lihalimu?
3 Jehova naa file Jesu nto ye ñwi sina mupuzo, ya naa si na yona Mwanaa hae yo pili a si ka taha kale fa lifasi—ili bupilo bo bu sa koni ku fela bwa kwa lihalimu. (Maheb. 7:15-17, 28) Jehova naa ezize cwalo kabakala kuli Jesu naa tiiselize ku sepahala ha naa li mwa miliko ye mituna. Kacwalo Jesu naa file Ndatahe kalabo ye nde hahulu, ye petehile kuli a alabe Satani ya naa bulezi buhata bwa kuli batu ba sebeleza Mulimu ka milelo ya buitati, isiñi ka lilato le li sa feli.—Liprov. 27:11.
4. (a) Ha saa kutezi kwa lihalimu, Jesu naa lu ezelizeñi, mi Jehova naa ezize cwañi? (b) Mu ikutwa cwañi ka za mi ezelize Jehova ni Jesu?
4 Mwa lihalimu, Jesu naa ezize lika ze ñwi. Naa ‘tahile fapilaa Mulimu ka luna’ ka teko ya “mali a mubili wa hae.” Ka sishemo, Ndataa luna ya lilato ya kwa lihalimu naa amuhezi nubu ya butokwa ya Jesu sina “sitabelo se si lifa libi za luna.” Kacwalo, bakeñisa ‘maikuto a luna aa kenisizwe,’ lwa kona ku “sebeleza Mulimu-Ya-Pila.” Taba yeo i lu fa libaka la ku lumelelana ni manzwi a makalelo a kwa Samu 112, aa li: “A mu lumbeke [Muñaa] Bupilo.”—Maheb. 9:12-14, 24; 1 Joa. 2:2.
5. (a) Lu swanela ku ezañi kuli lu be ba ba lukile mwa meeto a Mulimu? (b) Samu 111 i lumelelana cwañi ni Samu 112?
5 Kuli lu be ba ba ba lukile mwa meeto a Mulimu, lu swanela ku zwelapili ku ba ni tumelo mwa mali a Jesu a naa suluzwi. Ha lu swaneli ku tuhelela lizazi ku fita lu sa itumeli ku Jehova kabakala ku lu lata hahulu. (Joa. 3:16) Hape lu tokwa ku tiiseza mwa ku ituta Linzwi la Mulimu ni ku eza mo lu konela kaufela ku pila ka ku lumelelana ni ze lu ituta. Mwa Samu 112 ku na ni likelezo ze nde ze kona ku tusa batu kaufela ba ba bata ku ba ni lizwalo le li kenile fapilaa Mulimu. Samu ye i lumelelana ni Samu 111. Lisamu ze peli zeo li kalisa ka pulelo ye li “A mu lumbeke [Muñaa] Bupilo,” kamba “Alleluya!” *
Se Si Tisa Tabo
6. “Mutu” ya saba Mulimu ya talusizwe kwa Samu 112 u fuyolwa cwañi?
6 “U fiwa mbuyoti mutu ya saba [Muñaa] Bupilo, ya tabela litaelo za hae hahulu. Lusika lwa hae lu ka ba mata mwa lifasi, mi baikulu ba ya lukile ba ka fuyolwa.” (Samu 112:1, 2) Muapositola Paulusi naa susuelizwe ki moya wa Mulimu kuli a itusise Samu 112:9 kwa Bakreste ba mwa linako za baapositola. (Mu bale 2 Makorinte 9:8, 9.) Samu yeo i talusa moo balateleli ba Kreste kacenu ba kona ku bela ni mbuyoti, kamba tabo.
7. Ki kabakalañi batanga ba Mulimu ha ba tokwa ku ba ni sabo ya ku eza ze mu swabisa, mi mu lukela ku nga cwañi litaelo za Mulimu?
7 Sina mo ku boniselizwe kwa Samu 112:1, Bakreste ba niti bao ba fumana tabo ye tuna ha ba nze ba “saba [Muñaa] Bupilo.” Sabo yeo ya ku eza ze swabisa Mulimu i ba tusa ku hanyeza moya wa lifasi la Satani. Ba ‘tabela hahulu’ ku ituta Linzwi la Mulimu ni ku mamela litaelo za hae. Litaelo zeo li kopanyeleza ku mamela taelo ya ku shaela taba ye nde ya Mubuso mwa lifasi kaufela. Ba ikataza ku luta batu ba macaba kaufela kuli ba be balutiwa ni ku lemusa ba ba maswe ka za lizazi la Mulimu la katulo le li taha.—Ezek. 3:17, 18; Mat. 28:19, 20.
8. (a) Batu ba Mulimu ba ba ineezi kacenu ba filwe mupuzo mañi kabakala tukufalelo ya bona? (b) Ki limbuyoti mañi ze ba libelezi ba ba na ni sepo ya ku pila fa lifasi?
8 Kabakala kuli ba mamela litaelo ze cwalo, batanga ba Mulimu fa lifasi kacenu se ba fitelela 7 milioni. Ki mañi ya kona ku hana kuli batu ba hae ba fetuhile ba ba “mata mwa lifasi”? (Joa. 10:16; Sin. 7:9, 14) Hape ba ka “fuyolwa” luli Mulimu haa ka peta mulelo wa hae! Ka sikwata, ba ba na ni sepo ya ku pila fa lifasi ba ka silelezwa mwa “ñalelwa ye tuna” ye taha kuli ba be bona “lifasi le linca” mo “ku yahile Ku Luka.” Hamulaho wa nako, ba ba ka punyuha Armagedoni ba ka “fuyolwa” hahulu. Ba ka itukiseza ku amuhela bo lule-lule ba ba ba ka zusiwa. Yeo ki sepo ye tabisa luli! Kwa nalule-lule, ba ba ‘tabela hahulu’ litaelo za Mulimu ba ka ba ba ba petehile mi ba ka ikola “tukuluho ya kanya ya bana ba Mulimu” ku ya ku ile.—2 Pit. 3:13; Maro. 8:21.
Ku Itusisa Hande Maluwo
9, 10. Bakreste ba niti ba itusisize cwañi bufumu bwa bona bwa kwa moya, mi ku luka kwa bona ku ka bonahala kamita ka mukwa ufi?
9 “Bufumu ni maluwo li mwa ndu ya hae, niti ya hae i bonahala kamita. Liseli li bonisa mutu ya lukile, mwa lififi, ya na ni musa, ni mukekecima, ya sepahala.” (Samu 112:3, 4) Mwa linako za Bibele, batanga ba bañwi ba Mulimu ne ba zibahala ka maluwo a bona. Mi ka mubulelelo o muñwi, batu ba ba lumelelwa ki Mulimu kaniti ba ba fumile, nihaike kuli ku fuma kwa bona hasi kwa ku luwa lika. Niti kikuli, buñata bwa ba ba keta ku ikokobeza fapilaa Mulimu ba kana ba ba babotana ni ku kendiwa, sina mo ne ku bezi mwa miteñi ya Jesu. (Luka 4:18; 7:22; Joa. 7:49) Kono ibe kuli mutu u na ni maluwo a mañata kamba a manyinyani kwa neku la mubili, u sa kona ku ba ni maluwo kwa neku la moya.—Mat. 6:20; 1 Tim. 6:18, 19; mu bale Jakobo 2:5.
10 Bakreste ba ba tozizwe ni balikani ba bona ha ba ipulukeli feela maluwo a bona a kwa moya. Kono ba ‘bonisize’ liseli mwa lifasi la Satani le li na ni lififi sina ‘liseli mo li boniseza mutu ya lukile.’ Ba eza cwalo ka ku tusa ba bañwi ku fumana tuso kwa bufumu bwa kwa moya, ili butali bwa Mulimu ni zibo ya hae. Balwanisi niha ba likile ku yemisa musebezi wa ku kutaza Mubuso, ba palezwi ku eza cwalo. Kono siselo sa musebezi o lukile wo si ka “bonahala kamita.” Batanga ba Mulimu ba kona ku ba ni sepo ya ku pila ku ya ku ile, kamba ku “bonahala kamita,” ka ku tiiseza mwa ku luka muta ba likiwa.
11, 12. Batu ba Mulimu ba itusisa maluwo a bona ka linzila lifi?
11 Batu ba Mulimu, ili sitopa sa mutanga se si tozizwe ni ba ba li “buñata bo butuna,” ba bonisize kuli ba na ni moya wa bufani ka ku fana maluwo a bona. Samu 112:9 i li: “U hasize, u file babotana.” Bakreste ba niti kacenu ba fanga Bakreste ba bañwi lituso mi mane ba li fanga ni batu ba ba yahile ni bona ba ba tokwile. Hape ba itusisanga maluwo a bona kuli ba tuse ba ba tezwi ki likozi. Sina mwa naa boniselize Jesu, ku eza cwalo ku tahisa tabo.—Mu bale Likezo 20:35; 2 Makorinte 9:7.
12 Hape mu nahane ka za mali aa itusiswa kwa ku hatisa magazini ye mwa lipuo ze 172, mi buñata bwa lipuo ze li bulelwa ki batu ba ba si bafumi. Hape mu nahane ka za taba ya kuli magazini ye i fumaneha ni mwa lipuo ze shutana-shutana za bo susu, ni mwa muñolo wa libofu.
Ku Utwela Ba Bañwi Butuku ni ku Eza Lika ka ku Luka
13. Ki bo mañi ba ba tomile mutala o munde ku feleleza wa bufani, mi lu kona ku ba likanyisa cwañi?
13 “U fiwa mbuyoti ya utwela ba ba maibile butuku, ya ba kalimanga.” (Samu 112:5) Mwendi mu lemuhile kuli batu ba ba tusanga ba bañwi hasi kamita ba utwelanga ba bañwi butuku. Ba bañwi ba fanga ka mulelo wa ku bonisa kuli ba na ni maluwo a mañata ku fita ba bañwi kamba ba fanga ka ku bilaela. Ne mu si ke mwa tabela ku fiwa tuso ki batu ba ba cwalo. Kono kwa tabisa luli ku fiwa tuso ki mutu ya na ni musa. Jehova ki yena ya tomile mutala o ipitezi wa ku ba Mufani ya musa, ili ya tabile. (Jak. 1:5, 17) Jesu Kreste naa likanyisize hande mutala wa Ndatahe wa ku utwela batu butuku. (Mare. 1:40-42) Kacwalo kuli lu be ba ba lukile mwa meeto a Mulimu, lu fana ka tabo ni ka musa, sihulu mwa sebelezo ya mwa simu ha lu tusa batu ku ziba za Jehova.
14. Ki lifi linzila ze ñwi ze lu kona ku ‘zamaisa ka zona misebezi ya luna ka ku luka’?
14 “U zamaisa misebezi ya hae ka ku luka.” (Samu 112:5, NW) Sina mo ne ku polofitezwi, sitopa sa sikombwa se si sepahala si babalela tutu ya Mulena ka ku ya ka katulo ye lukile ya Jehova. (Mu bale Luka 12:42-44.) Taba yeo i bonahala ka ketelelo ye tomile fa Mañolo ye fiwa kwa maeluda ba ba talimanga litaba ze ama libi ze tuna mwa puteho. Nzila ye lukile ye si eza lika ka yona sitopa sa mutanga hape i bonahala ka ketelelo ye tomile fa Bibele ye fiwa ki sitopa sa mutanga ka mo li swanela ku zamaisezwa liputeho kaufela, mahae a balumiwa, ni mahae a Betele. Maeluda hasi bona feela ba ba swanela ku eza lika ka ku luka, kono ni Bakreste ba bañwi ba swanela ku eza cwalo ka mo ba sebelisanela ni mo ba ezeza batu ba ba si balumeli, ku beya cwalo ni mwa litaba za lipisinisi.—Mu bale Mika 6:8, 11.
Limbuyoti za Batu Ba Ba Lukile
15, 16. (a) Litaba ze maswe za lifasi li ama cwañi batu ba ba lukile? (b) Batanga ba Mulimu ba ikatulezi ku zwelapili ku ezañi?
15 “Kakuli h’a na ku tilimunwa ni hanyinyani; ya lukile, u ka hupulwa ku ya ku ile. H’a na ku saba taba ye maswe; pilu ya hae i tiile, i sepile [Muñaa] Bupilo. Pilu ya hae i tiile hande, h’a na ku saba se siñwi; u ka bona lila za hae ha li swaba.” (Samu 112:6-8) Kwa li ku simwa ku be ni litaba ze maswe ze swana ni ze utwahala kacenu, ili ze cwale ka lindwa, likezo ze sabisa za businyi, matuku a manca ni a kale aa sa feli, bukebenga, bunjebwe, ni ku silafazwa kwa lifasi. Batu ba ba lukile mwa meeto a Mulimu ba amiwa ki lipiho ze maswe zeo, kono ha ba ikalelwi mo li ka bela lika kwapili. Lipilu za bona li “tiile” ha ba nze ba talimela kwapili ka sepo, inze ba ziba kuli lifasi la Mulimu le li lukile, le linca li fakaufi. Haiba kozi i ezahala, ba kona ku itiisa mwa kozi yeo kakuli ba sepile kuli Jehova u ka ba tusa. Haa tuhelelangi batu ba hae ba ba lukile ku “tilimunwa ni hanyinyani”—u ba fanga tuso ni maata a ku itiisa.—Mafil. 4:13.
16 Batu ba ba lukile ba Mulimu hape ba tokwa ku itiisa kwa sitoyo ni buhata bo bu hasanywa ki balwanisi, kono seo hasi na ku tuhelisa Bakreste ba niti ku kutaza. Batanga ba Mulimu ba zwelapili ku tiya ni ku sa nyanganyiswa mwa musebezi wa ba file Jehova—wona wa ku kutaza taba ye nde ya Mubuso ni ku luta batu kaufela ba ba amuhela taba ye nde kuli ba be balutiwa. Ha ku na kakanyo ya kuli ba ba lukile ba ka lwaniswa hahulu lifasi le ha li nze li ya kwa ku fela. Sitoyo seo si ka fita fa makateñi muta Satani Diabulosi, yena Gogo wa Magogo, a ka lwanisa batu ba Mulimu mwa lifasi kaufela. Mi cwale kwa mafelelezo lu ka ‘bona lila za luna’ ha li ka fenyiwa ka ku tala. Ikaba nako ye tabisa luli ku bona libizo la Jehova inze li keniselezwa!—Ezek. 38:18, 22, 23.
‘Ku Huliswa ni ku Kutekiwa’
17. Ya lukile u ka ‘huliswa ni ku kutekiwa’ ka mukwa ufi?
17 Ku ka tabisa luli ku lumbeka Jehova hamoho, lu sa lwaniswi ki Diabulosi ni lifasi la hae! Batu kaufela ba ba tiiseza ku ba ba ba lukile mwa meeto a Mulimu ba ka lumbeka Jehova ka tabo ku ya ku ile. Ha ba na ku swaba kamba ku tulwa, kakuli Jehova hape u sepisize kuli ya lukile wa hae ‘u ka huliswa ni ku kutekiwa.’ (Samu 112:9) Ya lukile wa Jehova u ka huliswa ni ku kutekiwa haa ka bona ku wa kwa balwanisi kaufela ba ba lwanisa bubusi bwa Jehova.
18. Manzwi a mafelelezo a Samu 112 a ka talelezwa cwañi?
18 “Ya maswe u ka bona zeo, a swabe, u ka kweca meno, a yongelele. Se ba sepile ba ba maswe si ka ba sa mbango.” (Samu 112:10) Kaufela ba ba zwelapili ku lwanisa batu ba Mulimu ba tuha ba ‘yongelela’ ni muna ni sitoyo sa bona. Takazo ya bona ya ku bata ku felisa musebezi wa luna i ka yonga hamoho ni bona mwa nako ya “ñalelwa ye tuna” ye taha.—Mat. 24:21.
19. Ki sepo ifi ye lu kona ku ba ni yona?
19 Kana mu ka ba mwahalaa ba ba ka punyuha inze ba tabile ka nako ya tulo ye tuna yeo? Kamba haiba mu timela kabakala mapongo kamba busupali pili lifasi la Satani li si ka fela kale, kana mu ka ba mwahalaa “ba ba lukile” ba ba ka zusiwa? (Lik. 24:15) Mu kona ku alaba kuli ee haiba mu zwelapili ku ba ni tumelo mwa sitabelo se si liulula sa Jesu ni ku likanyisa Jehova, sina mo ba ezeza ba ba yemelwa ki “mutu” ya lukile ya talusizwe kwa Samu 112. (Mu bale Maefese 5:1, 2.) Jehova u ka bona teñi kuli ku “hupulwa” kwa batu ba ba cwalo ha ku na ku fela, ni likezo za bona ha li na ku libalwa. Ba ka hupulwa ni ku latiwa ki Jehova kamita ni mita.—Samu 112:3, 6, 9.
[Litaluso za kwatasi]
^ para. 5 Se si bonisa kuli lisamu ze peli ze za lumelelana ki mo li ñolezwi ni litaba ze ku zona. Tulemeno twa Mulimu to tu lumbaetitwe mwa Samu 111 tu swana ni tulemeno to tu bulezwi ki “mutu” ya naa saba Mulimu ya ñozi Samu 112, sina mo lu kona ku bonela ka ku bapanya Samu 111:3, 4 ni Samu 112:3, 4.
[Lipuzo za Tuto]
[Siswaniso se si fa likepe 25]
Kuli lu be ba ba lukile fapilaa Mulimu, lu tokwa ku ba ni tumelo mwa sitabelo sa mali a Jesu
[Siswaniso se si fa likepe 26]
Linubu ze fiwa ka ku itatela za kona ku itusiswa mwa musebezi wa ku tusa ba ba wezwi ki likozi ni ku hasanywa kwa libuka ze tomile fa Bibele