Jobo Naa Lumbekile Libizo la Jehova

“Ku lumbekwe Libizo la [Muñaa] Bupilo!”—JOBO 1:21.

1. Ki mañi ya ngiwa kuli naa ñozi buka ya Jobo, mi naa i ñozi lili?

MUSHE naa li wa lilimo za buhulu ze bato eza 40 ha naa sabile mwa Egepita kabakala Faro ya naa bata ku mu bulaya mi a yo yaha mwa naha ya Midiani. (Lik. 7:23, 29) Halaa nako ya naa pilile mwa naha yeo, mwendi naa utwile ka za miliko ya Jobo, ya naa pila fakaufi mwa naha ya Uzi. Hamulaho wa lilimo, muta Mushe ni sicaba sa Isilaele ne ba li bukaufi ni naha ya Uzi kwa mafelelezo a musipili wa bona wa mwa lihalaupa, Mushe mwendi naa utwile ze nee ezahezi kwa mafelelezo a bupilo bwa Jobo. Ka ku ya ka litaba za Sijuda za kwaikale, Mushe naa ñozi buka ya Jobo hamulaho wa lifu la Jobo.

2. Buka ya Jobo i tiisa cwañi tumelo ya batanga ba Jehova kacenu?

² Buka ya Jobo i tiisa tumelo ya batanga ba Mulimu kacenu. Ka linzila lifi? Likande la Jobo li lu tusa ku utwisisa likezahalo za butokwa hahulu ze nee ezahezi mwa lihalimu mi li bonisa taba ye tuna ka ku fitisisa ye ama bubusi bwa Mulimu fahalimu a pupo kamukana. Hape li lu tusa ku utwisisa hahulu se ku talusa ku tiiseza mwa busepahali, mi li lu tusa ku utwisisa libaka Jehova fokuñwi haa tuhelelanga batanga ba hae ku nyanda. Fahalimu a zeo, buka ya Jobo i bonisa kuli Satani Diabulosi ki yena Mulwanisi yo mutuna wa Jehova ni sila sa batu. Buka yeo hape i bonisa kuli batu ba ba si ka petahala sina Jobo ba kona ku zwelapili ku sepahala ku Jehova niha ba likiwa hahulu. Ha lu nyakisiseñi ze ñwi za likezahalo ze talusizwe mwa buka ya Jobo.

Jobo U Likwa ki Satani

3. Lu zibañi ka za Jobo, mi ki kabakalañi Satani ha naa mu lwanisize?

³ Jobo naa li muuna ya fumile, ya naa ile libubo, mi naa li toho ya lubasi ya naa na ni mikwa ye minde. Kaniti naa li muelezi ya kutekeha ya naa tusanga babotana. Taba ya butokwa hahulu kikuli Jobo naa saba Mulimu. Jobo u taluswa kuli ki muuna ya “n’a lukile hahulu, ne li mutu ya sepahala, ya saba Mulimu, mi n’a ipulukile kwa bumaswe kaufela.” Nto ye nee tisize kuli Satani a lwanise Jobo nee si bufumu bwa hae kamba libubo la hae, kono neeli busepahali bwa hae ku Mulimu.—Jobo 1:1; 29:7-16; 31:1.

4. Busepahali bu talusañi?

⁴ Kwa makalelo, likande la buka ya Jobo li talusa za mukopano wa kwa lihalimu ko ne a iponahalisize mangeloi fapilaa Jehova. Satani ni yena naa li teñi, mi naa tamile Jobo litaba. (Mu bale Jobo 1:6-11.) Nihaike Satani naa bulezi ka za maluwo a Jobo, naa isize hahulu pilu kwa ku kakanya busepahali bwa Jobo. Linzwi la “busepahali” li talusa ku ba ya lukile, ya sa nyazahali, ya si na mulatu. Ka ku ya ka Bibele, ku sepahala kwa batu ku talusa ku ineela ku Jehova ka pilu kaufela.

5. Satani naa buleziñi ka za Jobo?

⁵ Satani naa ize Jobo naa sebeleza Mulimu kabakala buitati. Satani naa tamelelize Jobo kuli naa ka sepahala feela ku Jehova, Mulimu ha naa ka zwelapili ku mu fuyola ni ku mu sileleza. Kuli a alabe Satani kabakala kañi ya naa zusize, Jehova a tuhelela Satani ku lwanisa muuna yo ya sepahala. Kabakaleo, Jobo a utwa kuli limunanu za hae li uzwizwe kamba ku bulaiwa, balisana ba hae ba bulailwe,  ni kuli bana ba hae ba ba lishumi ba shwile, mi zeo kaufela za ezahala mwa lizazi li li liñwi. (Jobo 1:13-19) Kana twaniso ya Satani ne i palelwisize Jobo ku tiiseza mwa busepahali bwa hae? Taba ye ñozwi ka moya o kenile i talusa mwa naa ngezi bumai bwa hae Jobo kuli: “[Muñaa] Bupilo n’a ni file, mi cwale [Muñaa] Bupilo u ni amuhile; ku lumbekwe Libizo la [Muñaa] Bupilo!”—Jobo 1:21.

6. (a) Ki nto mañi ye nee ezahezi kwa mukopano o muñwi wa kwa lihalimu? (b) Satani naa nahana bo mañi ha naa kakanyize busepahali bwa Jobo ku Jehova?

⁶ Hamulaho wa fo, kwa ba ni mukopano o muñwi kwa lihalimu. Satani hape a tameleza Jobo, a li: “Litalo ka litalo! Mutu s’a sweli kaufela wa si fana, kuli a pilise bupilo bwa hae! Kono u otolole lizoho la hao, mi u swale fa masapo a hae ni fa nama ya mubili wa hae; fohe, u ka bona kana a si ke a ku nyefula inz’a li fapil’a hao.” Mu lemuhe kuli Satani naa tameleza ni ba bañwi. Ka ku bulela kuli, ‘Mutu sa sweli kaufela wa si fana,’ Diabulosi naa kakanya busepahali bwa “mutu” kaufela ya lapela Jehova, isike feela busepahali bwa Jobo. Mi cwale Mulimu a tuhelela Satani ku nata Jobo ka butuku bo bu maswe. (Jobo 2:1-8) Kono miliko ya Jobo ne i si ka felela feela fo.

Lu Kona ku Itutañi Kwa Moya wa Jobo?

7. Jobo naa katalizwe cwañi ki musalaa hae ni bapoti ba hae?

⁷ Kwa makalelo a manyando a Jobo, musalaa hae naa utwile butuku sina yena. U lukela ku ba ya naa tomohile pilu kabakala lifu la bana ba hae ni ku sinyehelwa ki bufumu bwa lubasi lwa hae. U lukela ku ba ya naa utwile butuku ku bona muunaa hae inze a kula butuku bo bu maswe. A li ku Jobo: “Kiñi ha u sa tiiseza mwa ku sepahala kwa hao? U kute Mulimu, mi u shwe!” Mi kwa taha baana ba balalu—bo Elifazi, Bilidadi, ni Zofari—ba ne ba tilo lika ku omba-omba Jobo. Kono ba bulela litaba za buhata mi ba ba feela “baomba-ombi ba ba swabisa.” Ka mutala, Bilidadi naa talusize kuli bana ba Jobo ne ba fosize mi ne ba swanelwa ki se ne si ba tahezi. Elifazi naa akalelize kuli manyando a naa tahezi Jobo neeli koto ya libi za naa ezize kwamulaho. Mane Elifazi naa kakanyize ka za haiba ba ba tundamena ku sepahala ba na ni tuso ni ye kana ku Mulimu! (Jobo 2:9, 11; 4:8; 8:4; 16:2; 22:2, 3) Jobo naa tiiselize mwa ku sepahala kwa hae niha naa katalizwe hahulu cwalo. Ki niti, naa fosize ha naa “tiisa niti kuli h’a na mulatu ku Mulimu.” (Jobo 32:2) Nihakulicwalo, naa zwezipili ku sepahala mwa miinelo yeo kaufela.

8. Ki ufi mutala o munde wa naa tomile Elihu kwa baelezi kacenu?

⁸ Ku zwa fo, lu bala ka za Elihu, mi ni yena naa tile ku to potela Jobo. Elihu pili naa teelelize kwa litaba za naa bulezi Jobo ni balikani ba hae ba balalu. Nihaike naa li mwanana kwa baana ba bane bao, Elihu naa bonisize butali bo ne bu fita bwa bona. Naa ambozi ni Jobo ka likute.  Elihu naa babalize Jobo kabakala ku luka kwa hae. Kono hape naa bulezi kuli Jobo naa isize hahulu pilu kwa ku iponahaza kuli naa si na mulatu. Mi a kolwisa Jobo kuli ku sebeleza Mulimu ka busepahali hasi kwa mbango. (Mu bale Jobo 36:1, 11.) Wo luli ki mutala o munde ku ba ba tokwa ku eleza ba bañwi kacenu! Elihu naa na ni pilu-telele, naa teelelize ka tokomelo, naa babalize Jobo ha naa ezize hande, mi naa file likelezo ze yahisa.—Jobo 32:6; 33:32.

9. Jehova naa tusize cwañi Jobo?

⁹ Kwa mafelelezo, Jobo a potelwa ki Jehova! Bibele i li: “[Muñaa] Bupilo kih’a alaba Jobo, a inzi mwa liñungwa.” Ka ku mu buzaka lipuzo, Jehova a eleza Jobo ka musa ilikuli a kone ku lukisa mihupulo ya hae. Jobo naa lumezi ku kalimelwa ka ku lata, a itumelela kuli: “Na, ni nto ye nyinyani fela . . . Na inyaza, mwa maluli ni mwa mulola.” Mi Jehova ha saa bulezi ni Jobo, a nyaza balikani ba Jobo ba balalu kakuli ne ba si ka bulela “ka mukwa o lukile.” Jobo naa na ni ku ba lapelela. Cwale “[Muñaa] Bupilo a lukulula Jobo ku ze mu tamile, h’a s’a lapelezi balikani ba hae. [Muñaa] Bupilo a fa Jobo habeli ku z’a n’a luwile pili.”—Jobo 38:1; 40:4; 42:6-10.

Jehova lu mu Lata Hahulu Cwañi?

10. Ki kabakalañi Jehova ha naa si ka tuhelela feela Satani kamba ku mu sinya?

¹⁰ Jehova ki Mubupi ni Mubusi wa pupo kamukana. Ki kabakalañi ha naa si ka tuhelela feela litamelezo za Satani? Kakuli Mulimu naa ziba kuli ku tuhelela feela Satani kamba ku mu sinya ne ku si ke kwa tatulula taba ya nee zusizwe. Diabulosi naa bulezi kuli Jobo, muuna ya naa lukile hahulu, naa si ke a zwelapili ku sepahala ku Jehova ha naa ka amuhiwa bufumu bwa hae. Jobo naa tundamezi ku sepahala niha naa likilwe. Cwale Satani a bulela kuli mutu ufi kamba ufi u ka fulalela Mulimu haa ka nyanda. Jobo naa nyandile, kono naa si ka tuhela ku sepahala. Kacwalo, taba ya Jobo ya naa sepahala niha naa si ya petehile ne i bonisize kuli Satani ki lihata. Balapeli ba bañwi ba Mulimu bo?

11. Jesu naa bonisize cwañi hande kuli Satani ki lihata?

¹¹ Mutanga kaufela wa Mulimu ya tiiseza mwa busepahali bwa hae ku si na taba ni za tahisa Satani ku yena u bonisa kuli litamilikezo za sila seo se si situhu ki za buhata. Jesu naa tile fa lifasi mi naa bonisize hande kuli Satani ki lihata. Jesu naa li ya petehile, sina ndataa luna wa pili, Adama. Ku sepahala kwa Jesu ku fitela a shwa ne ku bonisize hande kuli Satani ki lihata mi litamilikezo za hae ki za buhata.—Sin. 12:10.

12. Mutanga kaufela wa Jehova u na ni kolo ni buikalabelo bufi?

¹² Nihakulicwalo, Satani u sa zwelapili ku lika balapeli ba Jehova. Kaufela luna lu na ni kolo ni buikalabelo bwa ku bonisa ka busepahali bwa luna kuli lu sebeleza Jehova kabakala kuli lwa mu lata—isi kabakala buitati. Lu ikutwa cwañi ka za buikalabelo bo? Lu ikutwa kuli ki tohonolo ku sepahala ku Jehova. Hape lu omba-ombiwa ka ku ziba kuli Jehova u lu fa maata kuli lu itiise mi sina mo ne ku bezi ku Jobo, Haa na ku lu tuhelela ku likwa ki ze lu fita.—1 Makor. 10:13.

Satani—Mulwanisi ya Ikuhumusa ni Mukwenuheli

13. Ki litaba lifi ze i patulula buka ya Jobo ka za Satani?

¹³ Mañolo a Siheberu a tolongosha likezo za Satani ze swabisa za ku lwanisa Jehova ni ku yembulula batu. Mwa Mañolo a Sigerike a  Sikreste ku na ni litaba ze ñwi ze ñata ka za Satani mwa lwaniseza Jehova, mi mwa buka ya Sinulo, lu ituta ka za ku bubaniswa kwa puso ye pahami ya Jehova ni ku sinyiwa kwa Satani. Buka ya Jobo i ekeza kwa zibo ya luna ya ku ziba ka za buipanguli bwa Satani. Satani ha naa li teñi kwa mikopano ya kwa lihalimu, nee si ka mulelo wa ku lumbeka Jehova. Diabulosi naa na ni moya o lunya ni mulelo o maswe-maswe. Ha saa tamelelize Jobo ni ku tuhelelwa kuli a mu like, “Satani a zwa fapil’a [Muñaa] Bupilo.”—Jobo 1:12; 2:7.

14. Satani naa bonisize moya o cwañi ku Jobo?

¹⁴ Kacwalo, buka ya Jobo i zibahaza Satani kuli ki sila se si situhu sa batu. Ne ku fitile nako ye lu sa zibi butelele bwa yona mwahalaa mukopano wa kwa lihalimu o bulezwi kwa Jobo 1:6 ni o bulezwi kwa Jobo 2:1, mi mwa nako yeo Jobo naa likilwe maswe. Busepahali bwa Jobo ne bu konisize Jehova ku bulelela Satani kuli: “[Jobo] yena u tiiselize mwa bunde bwa hae, niha u ni susuwelize kuli ni mu lwanise, mi ni mu bulaye ku si na libaka.” Kono Satani naa si ka itumelela kuli litamilikezo za hae neeli za buhata. Mane a kupa kuli Jobo a likiwe hape ha situhu. Kacwalo, Diabulosi naa likile Jobo mwa nako ya naa fumile ni mwa nako ya naa li mubotana. Ku si na kakanyo, Satani haa na makeke kwa babotana kamba ku ba ba ziyelehile. U toile batu ba ba sepahala. (Jobo 2:3-5) Nihakulicwalo, busepahali bwa Jobo ne bu bonisize kuli Satani ki lihata.

15. Bakwenuheli ba kacenu ba swana cwañi ni Satani?

¹⁵ Satani naa li yena mutu wa pili ya naa fetuhile mukwenuheli. Bakwenuheli ba kacenu ba bonisanga mikwa ye swana ni ya Diabulosi. Ba kona ku ba ni moya wa ku nyaza-nyaza mizwale ni likaizeli mwa liputeho, maeluda, kamba Sitopa se si Etelela. Bakwenuheli ba bañwi ba hanelela kuli libizo la Mulimu la Jehova ha li swaneli ku itusiswa. Ha ba lati ku ituta ka za Jehova kamba ku mu sebeleza. Sina ndataa bona, yena Satani, ba lika ku felisa tumelo ya batu ba ba sepahala. (Joa. 8:44) Leo ki lona libaka batanga ba Jehova ha ba sa lati ku kopana ni bona ka nzila ifi kamba ifi!—2 Joa. 10, 11.

Jobo Naa Lumbekile Libizo la Jehova

16. Jobo naa bonisize moya o cwañi ku Jehova?

¹⁶ Jobo naa itusisize libizo la Jehova ni ku li lumbeka. Niha naa swabile hahulu kabakala ku utwa kuli bana ba hae ba timezi, Jobo naa si ka beya Mulimu mulatu. Jobo naa bulezi ka mafosisa kuli Mulimu ki yena ya naa tisize kuli a sinyehelwe, kono nihakulicwalo naa lumbekile libizo la Jehova. Ku a mañwi a manzwi a hae a butali, Jobo naa ize: “Ku saba [Muñaa] Bupilo ki bona butali; mi ku kauhana ni bumaswe ki yona ngana.”—Jobo 28:28.

17. Ki nto mañi ye nee tusize Jobo ku tiiseza mwa ku sepahala kwa hae?

¹⁷ Ki nto mañi ye nee tusize Jobo ku tiiseza mwa ku sepahala kwa hae? Kaniti, Jobo naa  isweli bulikani ni Jehova a si ka tahelwa kale ki likozi. Nihaike ha lu na bupaki bo bu bonisa kuli naa ziba kuli Satani naa lwanisize Jehova, Jobo naa tiiselize mwa ku sepahala. Naa ize: “Ha ni na ku tuhela busepahali bwa ka ku fitela ni shwa!” (Jobo 27:5, NW) Jobo naa konile cwañi ku ba ni bulikani bo bu tiile cwalo ni Mulimu? Ku si na ku kakanya, naa lata hahulu za naa utwile ka za Mulimu mwa naa sebelisanezi ni bokululu ba hae bo Abrahama, Isaka, ni Jakobo. Mi ka ku talimisisa ze bupilwe, Jobo naa konile ku lemuha tulemeno twa Jehova to tuñata.—Mu bale Jobo 12:7-9, 13, 16.

18. (a) Jobo naa bonisize cwañi buineelo bwa hae ku Jehova? (b) Lu latelela mutala wa Jobo ka linzila lifi?

¹⁸ Za naa itutile Jobo ne li tisize kuli a be ni takazo ya ku tabisa Jehova. Kabakala ku ikutwa kuli mwendi bana ba hae ne ba ezize nto ye ñwi ye sa tabisi Mulimu kamba “ku nyefula Mulimu mwa lipilu za bona,” Jobo naa tahisanga matabelo a ku cisa. (Jobo 1:5) Niha naa likilwe hahulu, Jobo naa bulezi ze nde ka za Jehova. (Jobo 10:12) Wo ki mutala o munde luli! Ni luna lu swanela ku ituta zibo ye nepahezi ka za Jehova ni milelo ya hae. Lu na ni lika ze nde ze lu tusa ku tiisa bulikani bwa luna ni Jehova, ze cwale ka ku ituta, ku fumaneha kwa mikopano, ku lapela, ni ku zibahaza taba ye nde. Hape lu eza ka mo lu konela kaufela ku zibahaza libizo la Jehova. Mi sina busepahali bwa Jobo ha ne bu tabisize Jehova, busepahali bwa batanga ba Mulimu kacenu bu tabisa pilu ya Jehova. Yeo ki yona taba ye lu ka nyakisisa mwa tuto ye tatama.

Kana Mwa Hupula?

• Ki kabakalañi Satani ha naa nyamatalile Jobo?

• Jobo naa itiisize kwa miliko mañi, mi naa ezize cwañi ka za yona?

• Ki lika mañi ze ka lu tusa ku tiiseza mwa busepahali bwa luna sina mwa naa ezelize Jobo?

• Lu itutañi ka za Satani mwa buka ya Jobo?

[Lipuzo za Tuto]

[Siswaniso se si fa likepe 4]

Likande la Jobo li lu hupulisa taba ye tuna ka ku fitisisa ye ama bubusi bwa Mulimu fahalimu a pupo kamukana

[Siswaniso se si fa likepe 6]

Busepahali bwa mina bu kona ku likwa mwa miinelo ye cwañi?