Kasizana ka Pilu ye Fana

CWANOÑU fa, kasizana ka lilimo ze 9 ka kwa Brazil, ne ka abile masheleñi e ne ka bulukile mwa likalulo ze peli—madola a 18 ni madola a 25. Ka beya madola a 18 mwa kambokisi ka linubu ka kwa Ndu ya Mubuso ilikuli pene yeo i tuse kwa ku lifela lisinyehelo za puteho. Mi ka lumela madola a 25 hamoho ni liñolo le li kuswani kwa ofisi ya mutai wa Lipaki za Jehova. Liñolo la kona ne li bala kuli: “Ni fa nubu ye kuli i tuse kwa musebezi wa mwa lifasi kaufela. Ni bata ku tusa mizwale ni likaizeli ba bañata mwa lifasi kuli ba kutaze taba ye nde. Ni fa nubu ye bakeñisa lilato la ka le lituna ku Jehova.”

Bashemi ba kasizana kao ne ba ka lutile butokwa bwa ku abananga mwa musebezi wa ku kutaza Mubuso. Hape ne ba ka lutile butokwa bwa ku ‘kuteka Muñaa Bupilo ka tutu ya kona.’ (Liprov. 3:9) Haike kaufela luna lu likanyise kasizana kao ka ku ba ni takazo ye tuna ya ku tusa musebezi wa Mubuso mwa silalanda sa luna ni mwa lifasi kaufela!