Lizazi la Jehova li ka Patululañi?

“Lizazi la Mulena li ka taha sina lisholi; . . . lifasi li ka celela hamoho ni misebezi ya mwateñi.”—2 PIT. 3:10.

1, 2. (a) Muinelo wa cwale wa lifasi o maswe u ka fela cwañi? (b) Lu ka nyakisisa lipuzo lifi?

MUINELO wa lifasi wa cwale o maswe u tahile kabakala taba ya buhata ya kuli batu ba kona ku ipusa hande ku si na Jehova. (Samu 2:2, 3) Kana taba ye tomilwe fa buhata ya kona ku ina ku ya ku ile? Batili! Nihakulicwalo, ha lu koni ku libelela kuli lifasi la Satani li ka fela ili lona. Kono li ka sinyiwa ki Mulimu ka nako ya tomile ni ka nzila ya hae. Mulimu u ka bonisa ku luka kwa katulo ya hae ni lilato la hae ha ka sinya lifasi le li maswe le.—Samu 92:7; Liprov. 2:21, 22.

² Muapositola Pitrosi naa ñozi kuli: “Lizazi la Mulena li ka taha sina lisholi; ka lona, lihalimu li ka fela ka musunga, mi lika li ka shengunuka ka buhali bwa mulilo; lifasi li ka celela hamoho ni misebezi ya mwateñi.” (2 Pit. 3:10) “Lihalimu” ni “lifasi” le li bulezwi mwa timana mo li talusañi? Ki lifi “lika” ze ka shengunuka? Mi Pitrosi naa talusañi ha naa bulezi kuli “lifasi li ka celela hamoho ni misebezi ya mwateñi”? Ku ziba likalabo za lipuzo ze ku ka lu tusa ku itukiseza lika ze sabisa ze tuha li ezahala.

Lihalimu ni Lifasi le li ka Fela

3. Ki lifi “lihalimu” le li bulezwi kwa 2 Pitrosi 3:10, mi li ka fela cwañi?

³ Linzwi la “lihalimu” ha li itusiswa ka swanisezo mwa Bibele hañata li talusanga mibuso ye beilwe fahalimu a babusiwa ba yona. (Isa. 14:13, 14; Sin. 21:1, 2) “Lihalimu [le] li ka fela” li yemela puso ya butu ye busa batu ba ba maswe. Ku bonahala kuli ku fela kwa lona “ka musunga”—kamba “ka lilata le li tuna sina la mushika o sabisa,” ku likana ni mo i bulelela Bibele ye ñwi—ku talusa kuli li ka sinyiwa kapili-pili.

4. “Lifasi” ki nto mañi, mi li ka sinyiwa cwañi?

⁴ “Lifasi” li yemela batu ba ba ikauhanyize ku Mulimu. Lifasi le li cwalo ne li bile teñi mwa miteñi ya Nuwe, mi ne li sinyizwe ki Muunda ka taelo ya Mulimu. “Lihalimu la cwale, ni lifasi la cwale, li bulukezwi mulilo ki Linzwi lona leo; li bulukezwi lizazi la Katulo ni ku yunda kwa banyefuli.” (2 Pit. 3:7) Muunda ne u yundisize banyefuli kaufela ka nako i liñwi, kono sinyeho ye taha i ka ezahala hanyinyani-hanyinyani ka nako ya “ñalelwa ye tuna.” (Sin. 7:14) Kwa makalelo a ñalelwa ye tuna, Mulimu u ka tahisa kuli babusi ba lifasi le ba sinye “Babilona yo mutuna,” ili ku bonisa kuli lihule leo la bulapeli la nyazahala fapilaa hae. (Sin. 17:5, 16; 18:8) Mi kwa mafelelezo a ñalelwa ye tuna, ili ka nako ya ndwa ya Armagedoni, Jehova u ka sinyeleza lifasi la Satani.—Sin. 16:14, 16; 19:19-21.

“Lika li ka Shengunuka”

5. Lika za swanisezo li kopanyelezañi?

⁵ Ki lifi “lika” ze “ka shengunuka”? “Lika” za naa bulela Pitrosi ki linto ze susueza batu kuli ba be ni mikwa, mibonelo,  linzila, ni milelo ye si ya bumulimu. “Lika” zeo li kopanyeleza “moya wa lifasi” o “sebeza mwa bana ba ba ikanyisa.” (1 Makor. 2:12; mu bale Maefese 2:1-3.) “Moya” wo u yambile lifasi la Satani kaufela. Mi u susueza batu ku nahana, ku lela, ku bulela, ni ku eza lika ka nzila ye bonisa mo u inezi muhupulo wa Satani, yena muipanguli ya li “muñaa maata a inzi mwa sibaka sa mbyumbyulu.”

6. Moya wa lifasi u iponahaza cwañi?

⁶ Kacwalo, batu ba ba yambuzi moya wa lifasi ba tuhelela mihupulo ya bona ni lipilu za bona ku zamaiswa ki Satani, mi ka ku eza cwalo ba likanyisa mihupulo ya hae ni mubonelo wa hae. Kabakaleo, ba eza se ba lata ba sa isezi pilu kwa tato ya Mulimu. Ba eza lika ka buitati, ba bonisa moya wa bufetuheli, mi ba latelela “takazo ya nama, ni takazo ya meeto” ba sa iswali.—Mu bale 1 Joani 2:15-17.

7. Ki kabakalañi ha lu swanela ‘ku babalela lipilu za luna’?

⁷ Kacwalo, ki kwa butokwa kuli lu ‘babalele lipilu za luna’ ka ku sebelisa butali bo bu zwa ku Mulimu ha lu keta balikani, litaba za ku bala, za ku itabisa ka zona, ni litaba ze lu bona fa Intaneti. (Liprov. 4:23) Muapositola Paulusi naa ñozi kuli: “Mu tokomele, mutu a si ke a mi swasa ka tuto ya butali, ni ka ku mi shemba ka ze si na tuso, a mi ise ka litaba ze ba fanana batu ka mulomo, ni ka lituto za lifasi za makalelo, isi ka Kreste.” (Makolo. 2:8) Temuso yeo ki ya butokwa hahulu lizazi la Jehova ha li nze li atumela, kakuli buhali bo butuna bwa “mulilo” wa lizazi leo bu ka shengunukisa “lika” kaufela ze mwa lifasi la Satani, ili ku bonisa kuli ha li koni ku tiyela buhali bwa Mulimu bo bu cisa. Taba yeo i lu hupulisa manzwi a kwa Malaki 4:1, a li: “Lizazi la taha, le li cisa sina mulilo wa ondo; mi baikuhumusi kaufela ni nyangela ye eza bumaswe, ba ka ba sina matakala; lizazi le li taha, li ka ba ciseleza.”

“Lifasi li ka Celela Hamoho ni Misebezi ya Mwateñi”

8. Lifasi ni misebezi ya mwateñi li ka “celela” ka mukwa ufi?

⁸ Pitrosi naa talusañi ha naa ñozi kuli “lifasi li ka celela hamoho ni misebezi ya mwateñi”? Linzwi le li tolokilwe kuli ku “celela” hape li konwa ku tolokwa kuli “ku patulula” kamba “ku beya fa ngandaleza.” Pitrosi naa talusa kuli ka nako ya ñalelwa ye tuna, lizazi la Jehova li ka beya lifasi la Satani fa ngandaleza, ili ku li bonahaza kuli li lwanisa Jehova ni Mubuso wa Hae ni kuli li swanelwa ku sinyiwa. Bupolofita bo bu kwa Isaya 26:21 ne bu bulezi ka za nako yeo kuli: “Muñaa Bupilo sa funduka mwa sibaka sa hae, kuli a kutiseze ba ba yahile mwa lifasi ka tikanyo ya bumaswe bwa bona; lifasi li ka patulula mali a naa li kolobisize, mi ha li sa na ku pata ba ba bulailwe ba lona.”

9. (a) Ki lika mañi ze lu swanela ku ambuka, mi ki kabakalañi? (b) Ki nto mañi ye lu swanela ku ba ni yona, mi ki kabakalañi?

⁹ Ka lizazi la Jehova, batu ba ba zamaiswa ki moya o maswe wa lifasi ba ka bonisa mo ba inezi luli, mane ba ka bulayana. Mane mwendi linzila ze ñata za lindwa ze ba itabisanga ka zona batu kacenu li tahisa kuli ba itukiseze nako yeo ‘ba ka yemisa mazoho ku itwanisa.’ (Zak. 14:13) Kacwalo, ki kwa butokwa hahulu kuli lu ambuke lika kaufela—mafilimu, libuka, lipapali za fa kompyuta, ni ze ñwi cwalo—ze kona ku tahisa kuli lu be ni mikwa ya toile Mulimu, ye cwale ka buikuhumuso ni ku lata lindwa! (2 Sam. 22:28; Samu 11:5) Kono lu be ni muselo wa moya o kenile wa Mulimu, kakuli muselo wo u ka lu tusa ku banduka  kwa mulilo wa swanisezo wa lizazi la Jehova.—Magal. 5:22, 23.

“Lihalimu le Linca, ni Lifasi le Linca”

10, 11. “Lihalimu le linca” ni “lifasi le linca” ki lika mañi?

¹⁰ Mu bale 2 Pitrosi 3:13. “Lihalimu le linca” ki Mubuso wa Mulimu wa kwa lihalimu o no tomilwe ka 1914 muta “linako za bamacaba” ne li felile. (Luka 21:24) Mulena wa Mubuso wo ki Kreste Jesu mi u ka busa ni ba 144,000. Ba bañata ku ba 144,000 bao se ba filwe kale mupuzo wa bona wa kwa lihalimu. Mwa buka ya Sinulo, baketiwa bao ba boniswa kuli ki “munzi o kenile, Jerusalema yo munca, [ya] taha ku zwa kwa lihalimu ku Mulimu, [a] itukisize sina munyaliwa ha ikabiselize muunaa hae.” (Sin. 21:1, 2, 22-24) Sina feela mulonga wa Isilaele wa ikale ha ne u li mwa Jerusalema, Jerusalema yo Munca ni Munyali wa hae ki bona ba ba li mulonga wa muinelo o munca. Munzi wo wa kwa lihalimu u ka “taha ku zwa kwa lihalimu” ka ku kalisa ku zamaisa litaba kaufela za fa lifasi.

¹¹ “Lifasi le linca” ki batu ba ba ka pila fa lifasi ba ba bonisize kuli ba lata ku ipeya kwatasaa Mubuso wa Mulimu. Paradaisi ya moya ye ba ikola batu ba Mulimu kacenu i ka ikoliwa ka ku tala mwa “lifasi le li sa taha” le linde. (Maheb. 2:5) Lu tokwa ku ezañi kuli ite lu pile mwa muinelo o munca wo?

Mu Itukiseze Lizazi le Lituna la Jehova

12. Ki kabakalañi batu ha ba ka mbemukiswa ki ku taha kwa lizazi la Jehova?

¹² Paulusi ni Pitrosi ne ba polofitile kuli lizazi la Jehova li ka taha ka sipundumukela—“sina lisholi.” (Mu bale 1 Matesalonika 5:1, 2.) Nihaiba Bakreste ba niti ba ba libelezi lizazi leo ba ka komoka mo li ka tahela ka sipundumukela. (Mat. 24:44) Kono lifasi ha li na ku komoka feela lizazi leo ha li ka taha. Paulusi naa ñozi kuli: “Batu [ba ba ikauhanyize ku Jehova], nako ye ba ka li: Kozo ni buiketo! ki yona nako ye ba ka tulukelwa ki sinyehelo, sina butuku bwa lupepo ha bu tahela ya itwezi; mi ha ba na ku banduka.”—1 Mates. 5:3.

13. Lu tokwa ku ezañi kuli muhuwo wa kuli “Kozo ni buiketo!” u si ke wa lu puma?

¹³ Muhuwo wa kuli “Kozo ni buiketo!” u ka ba taba ye ñwi ya buhata ye zwa kwa badimona; kono ha u na ku puma batanga ba Jehova. Paulusi naa ñozi kuli: “Ha mu sa li yo mwa lififi, kuli lizazi leo li mi tulukele sina lisholi. Kakuli mina kamukana mu bana ba liseli, mu bana ba musihali.” (1 Mates. 5:4, 5) Kacwalo ha lu ineñi mwa liseli, lu li kwahule ni lififi la lifasi la Satani. Ka za baluti ba buhata mwa puteho ya Sikreste, Pitrosi naa ñozi kuli: “Balatiwa, ha mu lemusizwe litaba zeo pili, mu tone; kakuli ha mu ka hohiwa ni mina ki bupumi bwa ba ba maswe bao, mu ka suhana mwa wa mwa ku tiya kwa mina.”—2 Pit. 3:17.

14, 15. (a) Jehova u lu kuteka cwañi? (b) Ki manzwi afi a tahile ka moya o kenile e lu swanela ku iseza hahulu pilu?

 ¹⁴ Mu lemuhe kuli Jehova ha lu buleleli feela kuli lu “tone.” Kono u lu kuteka ka ku lu ‘lemusa litaba zeo pili,’ ili ka ku lu zibisa ze ka ezahala kwapili.

¹⁵ Kono ka bumai, ba bañwi ba keshebisize likupuliso za kuli lu tone kamba mane ku li sheununa. Ba kona ku bulela kuli: ‘Se lu utwile kupuliso ye swana yeo ka lilimo-limo.’ Nihakulicwalo, batu bao ba swanela ku hupula kuli ha ba bulela cwalo, ha ba kakanyi feela sitopa sa mutanga ya sepahala, kono hape ba kakanya Jehova ni Mwanaa hae. Jehova naa ize lu “talimele” lizazi leo, kamba ku li libelela. (Hab. 2:3) Jesu ni yena na ize: “Mu libelele . . . kakuli ha mu zibi lizazi la ka taha Mulenaa mina.” (Mat. 24:42) Mi Pitrosi naa ñozi kuli: “Mu lukela ku pila ka mizamao ye kenile hahulu, ni ka bulapeli; inze mu libelezi ni ku akufisa lizazi la Mulimu.” (2 Pit. 3:11, 12) Mutanga ya sepahala ni Sitopa se si Etelela ha ba na ku keshebisa manzwi a butokwa ao ni kamuta!

16. Ki moya ufi o lu swanela ku ambuka, mi ki kabakalañi?

¹⁶ Kaniti, ki ‘mutanga ya maswe’ ya bulela kuli Mulena wa liyeha. (Mat. 24:48) Mutanga ya maswe yo ki yo muñwi wa sikwata sa batu ba ba talusizwe kwa 2 Pitrosi 3:3, 4. Pitrosi naa ñozi kuli “mwa mazazi a maungulelo, ku ka taha basheununi . . . ba ba zamaya ka litakazo za bona” ili ba ba sheununa batu ba ba libelela lizazi la Jehova. Mwa sibaka sa ku isa pilu ku za Mubuso, basheununi bao ba isanga hahulu pilu ku za bona ni litakazo za bona za buitati. Haike lu si ke lwa ba ni moya o cwalo wa ku sa utwa ili o lubeta! Kono lu “lemuhe kuli, ku iswala kwa Mulena, ki ku piliswa kwa batu.” Mi lu lemuha cwalo ka ku tukufalelwa musebezi wa ku kutaza Mubuso ni ku luta batu kuli ba be balutiwa ni ka ku sa iyakatwa hahulu linako za itomezi Jehova Mulimu.—2 Pit. 3:15; mu bale Likezo 1:6, 7.

Mu Sepe Mulimu ya Pilisa

17. Bakreste ba ba sepahala ne ba ezizeñi ku likana ni kelezo ya Jesu ya kuli ba sabe mwa Jerusalema, mi ki kabakalañi?

¹⁷ Limpi za Maroma ha ne li ambekile Judea ka 66 C.E., Bakreste ba ba sepahala ne ba utwile kelezo ya Jesu ya kuli ba sabe mwa munzi wa Jerusalema limpi zeo ha li se li kutezi habo zona. (Luka 21:20-23) Ki kabakalañi ha ne ba ngile muhato kapili-pili? Ku si na ku kakanya, ne ba tokomezi temuso ya Jesu. Kaniti, ne ba ziba kuli ne ba  ka talimana ni butata kabakala muhato o ne ba ka nga, sina mwa naa ba lemuselize Kreste. Kono hape ne ba ziba kuli Jehova naa si ke a siya batu ba hae ba ba sepahala.—Samu 55:22.

18. Manzwi a Jesu a kwa Luka 21:25-28, a ama cwañi mubonelo wa mina wa ku taha kwa ñalelwa ye tuna?

¹⁸ Ni luna lu swanela ku sepa Jehova ka ku tala, kakuli ki yena feela ya ka lu pilisa muta lifasi le li tulukelwa ki ñalelwa ye tuna ka ku fitisisa. Ñalelwa ye tuna ha i se i kalisize kono pili Jehova a si ka atula kale lifasi kaufela, “batu ba ka omelela kabakala ku saba ni ku libelela ze ka ta mwa lifasi.” Kono lila za Mulimu ha li ka ngangama ka sabo, batanga ba Jehova ba ba sepahala bona ha ba na ku saba. Ba ka nyakalala kakuli ba ka ziba kuli ku piliswa kwa bona ku fakaufi.—Mu bale Luka 21:25-28.

19. Lu ka nyakisisañi mwa taba ye tatama?

¹⁹ Kaniti, batu ba ba ikambusize kwa lifasi ni kwa “lika” ze ku lona ba libelezi nako ye tabisa ya kwapili! Nihakulicwalo, haiba lu bata ku fumana bupilo, lu swanela ku eza lika ze ñwi kwandaa ku ambuka feela ze maswe, sina mo i boniseza taba ye tatama. Lu swanela ku ba ni tulemeno to tu tabisa Jehova ni ku eza misebezi ye kateleha ku yena.—2 Pit. 3:11.

Kana Mwa Kona ku Talusa?

• ‘Lihalimu ni lifasi’ la kacenu li yemelañi?

• “Lika” li yemelañi?

• “Lihalimu le linca, ni lifasi le linca” li yemelañi?

• Ki kabakalañi ha lu sepile Mulimu ka ku tala?

[Lipuzo za Tuto]

[Siswaniso se si fa likepe 5]

Mu kona cwañi ‘ku babalela pilu ya mina’ ni ku ikambusa kwa lifasi?

[Siswaniso se si fa likepe 6]

Lu bonisa cwañi kuli lu lemuha kuli “ku iswala kwa Mulena, ki ku piliswa kwa batu”?