Mu Ikataze ku Bata Mbuyoti ya Jehova
Mu Ikataze ku Bata Mbuyoti ya Jehova
“[Mulimu] ki Yena ya fa ba ba mu bata mupuzo.”—MAHEB. 11:6.
1, 2. (a) Batu ba bañata ba batanga cwañi limbuyoti za Mulimu? (b) Ki kabakalañi ha lu swanela ku bata hahulu mbuyoti ya Jehova?
BATU ba bañata ba bulelelanga ba ba ezelize ze nde kuli: “Mulimu a mi fuyole.” Ba bahulu ba bulapeli bo bu shutana-shutana ba fuyolanga batu, lifolofolo, ni lika ze sa pili. Batu ba bañwi ba kona ku ya kwa libaka ze ñwi za bulapeli ka sepo ya kuli ba yo fiwa mbuyoti. Mi babuabui ba litaba za naha ba kupanga kuli Mulimu a fuyole naha ya habo bona. Kana mu nahana kuli likupo ze cwalo za swanela? Kana za alabiwanga? Ki bo mañi luli ba ba fiwanga mbuyoti ya Mulimu, mi ki kabakalañi?
2 Jehova naa polofitile kuli mwa mazazi a maungulelo, naa ka ba ni batu ba ba kenile, ba ba lata kozo ili ba ba zwa mwa macaba kaufela. Batu bao ne ba ka kutaza taba ye nde ya Mubuso ku isa kwa mafelelezo a lifasi niha ne ba ka toiwa ni ku nyandiswa. (Isa. 2:2-4; Mat. 24:14; Sin. 7:9, 14) Luna ba ba amuhezi buikalabelo bwa ku ba ba bañwi ba batu bao lu bata mbuyoti ya Mulimu mi lwa i tokwa kakuli ha lu si na yona za luna ha li koni ku konda. (Samu 127:1) Kono lu kona ku fumana cwañi mbuyoti ya Mulimu?
Limbuyoti li Fiwa ku ba ba Utwa
3. Kambe Maisilaele ne ba ipeile ku utwa, ki nto mañi ye ne ba ka fumana?
3 Mu bale Liproverbia 10:6, 7. Nakonyana pili sicaba sa Isilaele si si ka kena kale mwa Naha ya Sepiso, Jehova naa bonisize kuli ne ba ka pila mwa mbombolelwa ni ku silelezwa ki yena ha ne ba ka utwa linzwi la hae. (Deut. 28:1, 2) Kaniti luli, limbuyoti za Jehova ne li ka ba fahalimu a ba ba utwa.
4. Ku utwa ka buniti ku talusañi?
4 Maisilaele ne ba swanela ku ipeya ku utwa ka mukwa ufi? Mulao wa Mulimu ne u bulezi kuli Mulimu naa ka swaba batu ba hae ha ne ba ka palelwa ku mu sebeleza “ka tabo ni ka pilu ye munati.” (Mu bale Deuteronoma 28:45-47.) Jehova ha bati kuli lu mu utwe ka ku latelela feela milao ye tomilwe, sina mo li kona ku ezeza lifolofolo kamba badimona. (Mare. 1:27; Jak. 3:3) Ku utwa Mulimu ka buniti, ki sisupo sa kuli lwa mu lata. Lu tabela ku eza cwalo kakuli lu na ni tumelo ya kuli litaelo za Jehova ha li na bukiti ni kuli “ki Yena ya fa ba ba mu bata mupuzo.”—Maheb. 11:6; 1 Joa. 5:3.
5. Ku sepa lisepiso za Jehova ne ku ka tusa cwañi mutu ku mamela mulao o bulezwi kwa Deuteronoma 15:7, 8?
5 Ha mu nyakisise mo Maisilaele ne ba ka boniseza moya o cwalo wa ku utwa ka ku latelela mulao o bulezwi kwa Deuteronoma 15:7, 8. (Mu bale.) Ku mamela mulao wo ka silati ne ku ka kona ku tusa hanyinyani babotana, kono kana ne ku ka tahisa kutwano mwahalaa batu ba Mulimu? Sa butokwa ni ku fita kikuli, kana ku utwa ko ku cwalo ne ku ka bonisa kuli ne ba na ni tumelo ya kuli Jehova wa kona ku babalela batanga ba hae, mi kana ne ba ka bonisa kuli ba itebuha kolo yeo ya ku likanyisa bufani bwa hae? Ku tokwa! Mulimu naa lemuhanga pilu ya mutu ya fana luli mi naa sepisize ku fuyola mutu yo mwa misebezi ya hae kaufela. (Deut. 15:10) Ku ba ni tumelo mwa sepiso yeo ne ku ka susueza mutu ku eza ka busepahali mi ne ku ka mu fumanisa limbuyoti ze ñata.—Liprov. 28:20.
6. Liñolo la Maheberu 11:6 li lu fa sepo ifi?
6 Kwandaa ku ba ni tumelo ku Jehova sina Mulimu ya fanga batanga ba hae mupuzo, liñolo la Maheberu 11:6 li bonisa nto ye ñwi ye lu lukela ku eza kuli lu fuyolwe ki Mulimu. Mu lemuhe kuli Jehova u fuyolanga ba ba “mu bata.” Linzwi la Sigerike le li itusisizwe mwa timana ye li bonisa kuli ki ku mu bata ka ku ikataza hahulu. Manzwi ao a swanela ku lu kolwisa kuli lu ka fuyolwa luli haiba lu eza cwalo! Ya lu fuyola ki Mulimu a nosi wa niti “ya sa koni ku puma.” (Tite 1:2) Halaa linako ze fitile, Mulimu u bonisize kuli lisepiso za hae za sepahala luli. Manzwi a hae ha palangi; a talelezwanga kamita. (Isa. 55:11) Kacwalo lwa kona ku ba ni sepo ye tezi ya kuli haiba lu bonisa tumelo ya niti, u ka lu fa mupuzo.
7. Lu kona cwañi ku ipumanela mbuyoti ka “lusika” lwa Abrahama?
7 Jesu Kreste ki yena ya naa bile kalulo ya pili ya “lusika” lwa Abrahama. Bakreste ba ba tozizwe ki bona kalulo ya bubeli ya “lusika” lo ne lu sepisizwe lo. Ba filwe musebezi wa ku ‘bulela ze nde za hae Yena ya ba bizize ku zwa mwa lififi, ni ku kena mwa liseli la hae le li komokisa.’ (Magal. 3:7-9, 14, 16, 26-29; 1 Pit. 2:9) Ha lu koni ku ba ni bulikani bo bunde ni Jehova haiba lu sa lateleli batu ba ketile Jesu kuli ba babalele maluo a hae. Ne lu si ke lwa utwisisa hande ze lu bala mwa Linzwi la Mulimu kamba ku ziba mo lu kona ku li sebeliseza ha ne lu si ke lwa tusiwa ki “mutanga ya sepahala, ya na ni kutwisiso.” (Mat. 24:45-47) Haiba lu sebelisa lika ze lu ituta mwa Mañolo, lwa kona ku ipumanela mbuyoti ya Mulimu.
Mu Ise Hahulu Pilu Kwa ku Eza Tato ya Mulimu
8, 9. Toho ya lusika Jakobo naa ikatalize cwañi ku eza ka ku likana ni tato ya Mulimu?
8 Taba ya kuli lu tokwa ku ikataza hahulu kuli lu fuyolwe ki Mulimu i lu hupulisa Jakobo ya naa li toho ya lusika. Jakobo naa sa zibi mo ne i ka talelelezwa sepiso ya Mulimu ku Abrahama, kono naa lumela kuli Jehova naa ka atisa hahulu lusika lwa kukwaa hae Abrahama, mi lusika lo ne lu ka ba sicaba se situna. Kacwalo, ka 1781 B.C.E., Jakobo a ya kwa Karani ku yo bata musali. Naa sa bati feela musali yo munde ya naa ka ba mulikanaa hae, kono naa bata musali ya naa tiile mwa ku lapela Jehova ili ya naa ka babalela hande bana ba hae.
9 Lwa ziba kuli Jakobo naa kopani ni wahabo yena Rahele. Naa latile Rahele mi naa lumezi ku sebeleza ndatahe, Labani, ka lilimo ze supile ilikuli Rahele a be musalaa hae. Likande leo haki likande feela le li lu taluseza za lilato. Kaniti, Jakobo naa ziba sepiso ya naa file Mulimu ya Maata Ote ku kukwaa hae, Abrahama, ni ku ndatahe, Isaka. (Gen. 18:18; 22:17, 18; 26:3-5, 24, 25) Mi Isaka ni yena naa ize ku mwanaa hae Jakobo: “Mulimu Ya-Maata-Kaufela a ku fuyole, a ku tahiseze lusika, a ku atise, kuli u fetuhe macaba a mañata. A ku fe mbuyoti ya Abrahama, wena ni lusika lwa hao; kuli u luwe naha yo li mwenyi ku yona, yeo Mulimu a i file Abrahama.” (Gen. 28:3, 4) Kacwalo, buikatazo bwa naa ezize Jakobo bwa ku bata musali ya swanela ni ku ba ni lubasi ne bu bonisize kuli naa sepile manzwi a Jehova.
10. Ki kabakalañi Jehova ha naa fuyozi Jakobo, ku likana ni kupo ya hae?
10 Jakobo naa sa bateli lubasi lwa hae sifumu. Naa isize pilu ya hae kwa sepiso ya Jehova ye ne ama lusika lwa hae. Mi naa nyolezwi ku bona tato ya Jehova ha i petiwa. Jakobo naa ikatalize ku eza mwa naa konela kaufela kuli a fuyolwe ki Mulimu ku si na taba ni matata. Naa zwezipili ku ba ni moya o cwalo ni mwa busupali, mi Jehova naa mu fuyozi.—Mu bale Genese 32:24-29.
11. Lu lukela ku eza buikatazo bufi ka ku lumelelana ni tato ya Mulimu ye patuluzwi mwa Linzwi la hae?
11 Sina Jakobo, ni luna ha lu zibi lika kaufela ze ama mo u talelelezwa mulelo wa Jehova. Kono ka ku ituta Linzwi la Mulimu, lu lemuha lika ze ñwi ze ama “lizazi” la Jehova ze lu libelela kuli li ka ezahala. (2 Pit. 3:10, 17) Ka mutala, ha lu zibi luli fo li ka tahela lizazi leo, kono lwa ziba kuli li fakaufi. Lwa lumela se li bulela Linzwi la Mulimu kuli haiba lu paka ka ku tala mwa nako ye kuswani ye siyezi, lu ka ipilisa ni ku pilisa ba ba lu utwa.—1 Tim. 4:16.
12. Ki buikolwiso mañi bo lu kona ku ba ni bona?
12 Lwa ziba kuli mafelelezo a kona ku taha ka nako ifi kamba ifi; Jehova ha tokwi ku libelela ku fitela lu paka ku mañi ni mañi mwa lifasi. (Mat. 10:23) Mi hape lu lutiwa mwa ku petela hande musebezi wa luna wa ku kutaza. Ka tumelo, lu ikataza ku eza musebezi wo ka mo lu konela kaufela, ka ku itusisa lika zote ze lu na ni zona. Kana batu ba bañata mwa libaka mo lu kutaleza ba ka amuhela lushango lwa luna? Ha lu koni ku zibela cimo. (Mu bale Muekelesia 11:5, 6.) Luna lu swanela feela ku kutaza inze lu na ni sepo ya kuli Jehova u ka lu fuyola. (1 Makor. 3:6, 7) Lwa kona ku kolwa kuli wa bona buikatazo bwa luna, mi u ka lu fa zamaiso ye lu tokwa ka moya wa hae o kenile.—Samu 32:8.
Mu Bate Moya O Kenile
13, 14. Moya o kenile wa Mulimu u konisize batanga ba hae ku petañi?
13 Lu swanela ku ezañi haiba lu ikutwa kuli ha lu koni ku kutaza kamba ku eza musebezi o muñwi o lu filwe? Lu swanela ku kupa Jehova kuli a lu fe moya wa hae o kenile ilikuli u lu tuse ku bolosola buikoneli bufi kamba bufi bo lu na ni bona mwa sebelezo ya hae. (Mu bale Luka 11:13.) Moya wa Mulimu wa kona ku tusa batu kuli ba pete musebezi o ba filwe ku si na taba ni yeloseli ye ne ba na ni yona kamba miinelo ye ne ba li ku yona sapili. Ka mutala, hamulaho feela wa Mututo wa ku zwa mwa Egepita, moya wa Mulimu ne u konisize batu be ne ba li balisana ni batanga ku tula lila za bona ku si na taba ni kuli ne ba si na yeloseli mwa ndwa. (Ex. 17:8-13) Mi hamulahonyana wa fo, moya o swana wo ne u tusize bo Bezaleele ni Oholiabi ku latelela milalo ye minde hahulu ya tabernakele, ye ne zwa ku Mulimu.—Ex. 31:2-6; 35:30-35.
14 Moya o maata wo, ne u tusize batanga ba Mulimu ba mwa miteñi ya luna ku eza misebezi ye ne tokwahala mwa kopano ha ne ba boni kuli ne ba tokwa ku kalisa ku ihatisezanga libuka. Muzwale R. J. Martin ya naa li muokameli wa fakitori ka nako yeo, naa ñozi liñolo le ne li talusize ze ne se petilwe ka 1927. Naa ize: “Ka nako ye swanela, Mulena a kwalula sikwalo; mi lwa leka mushini o mutuna o hatisa, nihaike kuli ne lu sa zibi mo no pangezwi ni mwa ku u sebeliseza. Kono Mulena wa ziba mwa ku tuseza batu ba ba ifanile ku mu sebeleza. . . . Halaa lisunda li sikai feela, ne lu konile ku sebelisa hande mushini wo; mi u sa sebeza, u peta musebezi o ne ba sa zibi nihaiba bapangi ba ona kuli ne u ka petwa ki ona.” Jehova u zwezipili ku fuyola buikatazo bo bu cwalo ku to fita ni la kacenu le.
15. Liñolo la Maroma 8:11 li kona ku susueza cwañi ba ba li mwa muliko?
15 Moya wa Jehova u sebeza ka linzila ze shutana-shutana. Moya wo u sa konwa ku fiwa batanga ba Mulimu, mi u ba tusa ku tula matata. Lu kona ku eza cwañi haiba lu ikutwa kuli lu komiwa ki muliko? Lwa kona ku tiiswa ki manzwi a Paulusi a ñozwi kwa Maroma 7:21, 25 ni 8:11. Kaniti, “Moya wa ya zusize Jesu kwa bafu” wa kona ku lu tusa, ili ku lu fa maata a ku hanyeza litakazo za nama. Manzwi a mwa litimana zeo naa ñolezwi Bakreste ba ba tozizwe ka moya, kono sikuka se si mwateñi si sebeza ni kwa batanga kaufela ba Mulimu. Kaufelaa luna lwa kona ku fumana bupilo ka ku bonisa tumelo ku Kreste, ka ku ikataza ku bulaya litakazo ze maswe, ni ka ku latelela zamaiso ya moya.
16. Lu swanela ku ezañi kuli lu fiwe moya o kenile wa Mulimu?
16 Kana lwa kona ku sepa kuli Mulimu u ka lu fa moya wa hae lu sa ezi se siñwi? Batili. Lu swanela ku u lapelela, mi hape lu swanela ku ituta Linzwi la Mulimu ka tukufalelo. (Liprov. 2:1-6) Hape moya wa Mulimu u inzi fahalimwaa puteho ya Sikreste. Ka ku fumanehanga kwa mikopano kamita, lu bonisa kuli lu bata ku ‘utwa seo moya u si bulelela’ liputeho. (Sin. 3:6) Hape, lu swanela ku eza ze lu ituta. Liñolo la Liproverbia 1:23 li lu eleza kuli: “Mu bake, ha ni mi kalimela cwalo; a mu bone, ni ka mi sululela moya wa ka.” Kaniti, Mulimu u fanga moya wa hae o kenile ku “ba ba mu utwa” sina mubusi.—Lik. 5:32.
17. Mu fe mutala o bonisa mo lu konwa ku fuyolelwa ki Mulimu haiba lu ikataza.
17 Nihaike kuli lu tokwa ku ikataza hahulu kuli lu fuyolwe ki Mulimu, mu hupule kuli ku sebeza feela ka taata haki kona ko ku tahisize lika ze nde ze ñata za file Jehova kwa batu ba hae. Taba yeo i konwa ku bapiswa ni ku ca lico. Ha lu zibi ze ezahalanga kaufela mwa mibili ya luna ha lu ca lico. Se lu ziba feela kikuli lu swanela ku ca ni kuli ha lu ca lico ze tiisa mibili ya luna, lu ka ikangula hande ni ku fita. Nihakulicwalo, Mulimu ki yena ya lu fanga lico mi u bupile mibili ya luna ka nzila ya kuli i konwe ku fepiwa ki lico ni ku matafazwa ki zona. Ka mukwa o swana, Jehova u lu taluseza ze lu swanela ku eza kuli lu fumane bupilo bo bu sa feli, mi u lu fa tuso ye lu tokwa kuli lu pete lika zeo. Kwa iponelwa hande kuli Jehova ki yena ya lu tusa hahulu mi ki yena ya swanelwa ku lumbwa. Nihakulicwalo, kuli lu fuyolwe ki yena lu swanela ku sebelisana ni yena ka ku eza tato ya hae.—Hag. 2:18, 19.
18. Mu ka tundamena ku ezañi, mi ki kabakalañi?
18 Kacwalo, mu ikataze ku eza ka mo mu konela kaufela kuli mu pete musebezi o mu filwe. Mu kupange Jehova kuli a mi tuse. (Mare. 11:23, 24) Ha mu nze mu eza cwalo, mu be ni buikolwiso bwa kuli “ya kupa wa fiwa.” (Mat. 7:8) Ba ba tozizwe ka moya ba ka fiwa “kuwani ya bulena ya Bupilo” kwa lihalimu. (Jak. 1:12) “Lingu ze ñwi” za Kreste, ili ze ikataza hahulu kuli li fiwe mbuyoti ka lusika lwa Abrahama, li ka ba ni tabo Jesu ha ka li ku zona: “A mu tahe, mina ba ba fuyozwi ki Ndate, mu yole mubuso o no lukiselizwe mina haisamba lifasi li tomwa.” (Joa. 10:16; Mat. 25:34) Kaniti luli, “ba ba fuyolwa ki Muñaa Bupilo ba ka yola sanda sa naha . . . ni ku yaha mwateñi ku ya ku ile.”—Samu 37:22, 29.
Kana Mwa Kona ku Talusa?
• Ku utwa ka buniti ku talusañi?
• Lu tokwa ku ezañi kuli lu fumane mbuyoti ya Mulimu?
• Lu swanela ku ezañi kuli lu fiwe moya o kenile wa Mulimu, mi moya wo u kona ku lu tusa cwañi?
[Lipuzo za Tuto]
[Maswaniso a fa likepe 9]
Jakobo naa mangani ni lingeloi kuli a fiwe mbuyoti ya Jehova.
Kana ni mina mwa ikatazanga?
[Siswaniso se si fa likepe 10]
Moya o kenile wa Mulimu ne u tusize Bezaleele ni Oholiabi ku eza hande hahulu musebezi o ne ba filwe