Kana Mwa Tusa Mwa ku Tahisa Kuli Mikopano Ya Sikreste I be ye Yahisa?

“Ha mu kopana, . . . linto kaufela li ezwe ka ku yahisa.”—1 MAKOR. 14:26.

1. Ka ku ya ka 1 Makorinte kauhanyo ya 14, ki ufi mulelo o mutuna wa mikopano ya Sikreste?

‘MIKOPANO ya kacenu ne li ye yahisa luli!’ Kana mu kile mwa bulela manzwi a swana sina ao hasamulaho wa mikopano kwa Ndu ya Mubuso? Kaniti, mu kile mwa bulela cwalo! Mikopano ya Sikreste ya lu tiisanga luli, mi taba yeo ha i komokisi. Ka ku swana ni mo ne ku inezi mwa miteñi ya Bakreste ba makalelo, mulelo o mutuna wa mikopano ya luna ki wa ku tiisa batu kaufela ba ba fumaneha teñi. Mu lemuhe ka mo muapositola Paulusi naa koñomekezi mulelo wo wa mikopano ya Sikreste mwa liñolo la pili la naa ñolezi Makorinte. Mwa kauhanyo mukatumbi ya 14, u kuta-kutela ku bulela kuli kalulo ni kalulo ye fiwa kwa mikopano i swanela ku ba ni mulelo u li muñwi—ona wa ku “yahisa” puteho.—Mu bale 1 Makorinte 14:3, 12, 26. *

2. (a) Ki nto mañi ye tahisanga kuli lu be ni mikopano ye yahisa? (b) Ki puzo ifi ye lu ka nyakisisa?

² Lwa ziba kuli moya wa Mulimu ki ona sihulu o tahisanga kuli mikopano i be ye yahisa, kamba ku tiisa. Ki lona libaka ha lu kalisanga  mikopano ya puteho ka ku lapela ku Jehova, mi mwa tapelo yeo lu kupanga Ndataa luna wa kwa lihalimu kuli a fuyole mikopano ya luna ka moya wa hae o kenile. Kono lwa ziba kuli mañi ni mañi mwa puteho wa kona ku tusa ku tahisa kuli mikopano i be ye yahisa hahulu. Kacwalo, ki lika mañi ze lu kona ku eza kuli mikopano ye lu ezezanga kwa Mandu A Mubuso ka sunda ni sunda i bange ye katulusa ni ye tiisa?

3. Mikopano ya Sikreste ki ya butokwa cwañi?

³ Kuli lu fumane kalabo, lu ka nyakisisa likalulo za mikopano ya luna ze ba swanela ku hupulanga ba ba i zamaisa. Hape lu ka nyakisisa ka mo puteho mukatumbi i kona ku tuseza kuli ba ba fumanehanga kwa mikopano ba tiiswange. Taba yeo ki ya butokwa kakuli mikopano ya luna ki ye kenile. Kaniti, ku fumanehanga kwa mikopano ni ku banga ni kabelo ku yona ki likalulo za butokwa za bulapeli bwa luna ku Jehova.—Samu 26:12; 111:1; Isa. 66:22, 23.

Mukopano O Lukiselizwe ku Ituta Bibele

4, 5. Mulelo wa Tawala ya Mulibeleli ki ufi?

⁴ Kaufelaa luna lu bata ku fumananga tuso kwa Tuto ya Tawala ya Mulibeleli ya sunda ni sunda. Kacwalo, kuli lu utwisise hande mulelo o mutuna wa mukopano wo, ha lu nyakisiseñi ze ñwi za licinceho ze ezizwe kwa magazini ya Tawala ya Mulibeleli ni kwa litaba ze itutiwanga sunda ni sunda.

⁵ Ku kala ka hatiso ya Lipaki ya Tawala ya Mulibeleli, ya January 15, 2008, nto ye ñwi ya butokwa ne i ekelizwe fa likepe la pili. Kana mu i lemuhile? Ha mu talimisise fa likepe la pili la magazini ye mu sweli. Fa likepe leo, ili kwatasaa tawala ye bonisizwe, mu ka fumana Bibele ye apuzwi. Nto yeo i koñomeka libaka ha lu banga ni Tuto ya Tawala ya Mulibeleli. Libaka leo ki ku ituta Bibele ka tuso ya magazini ye. Kaniti, kwa Tuto ya Tawala ya Mulibeleli ya sunda ni sunda, Linzwi la Mulimu la ‘taluswanga,’ mi sina mo ne ku bezi mwa miteñi ya Nehemia, lwa tusiwanga ku li ‘utwisisa.’—Neh. 8:8; Isa. 54:13.

6. (a) Ki cinceho ifi ye ne ezizwe kwa Tuto ya Tawala ya Mulibeleli? (b) Ki lika mañi ze lu swanela ku hupula ka za mañolo a bonisizwe kuli “mu bale”?

⁶ Bakeñisa kuli Bibele ki yona ye lu itutanga, ne ku ezizwe cinceho kwa Tuto ya Tawala ya Mulibeleli. Mañolo a mañwi a mwa litaba ze itutiwanga a bonisizwe kuli “mu bale.” Kaufelaa luna lu susuezwa ku apula Libibele za luna ni ku zamaelela ni ya bala mañolo ao ka nako ya mikopano. (Lik. 17:11) Ki kabakalañi? Ha lu iponela likelezo za Mulimu mwa Bibele ya luna, likelezo zeo za lu fitanga kwa lipilu. (Maheb. 4:12) Kacwalo, pili mañolo ao a si ka balwa kale ka ku tumusa, ya zamaisa mukopano u swanela ku fa ba ba putehile nako ya kuli ba apule mañolo ao ni ku zamaelela ni ya a bala.

Lu na ni Nako ye Ñata ya ku Bulela za Tumelo ya Luna

7. Ki kolo ifi ye lu na ni yona ka nako ya Tuto ya Tawala ya Mulibeleli?

⁷ Cinceho ye ñwi ye ne ezizwe kwa litaba ze mwa Tawala ya Mulibeleli ze itutiwanga kwa puteho i ama butelele bwa zona. Mwa lilimonyana ze sa zo fela, litaba zeo li kusufalizwe. Kacwalo, ka nako ya Tuto ya Tawala ya Mulibeleli, nako ye nyinyani i itusiswa kwa ku bala maparagilafu ilikuli nako ye ñata i itusiswe kwa ku alaba. Ba bañata mwa puteho se ba na ni kolo ya ku bulela za tumelo ya bona ka ku alaba lipuzo ze ñozwi, ka ku talusa mo lu kona ku sebeliseza mañolo, ka ku kandeka ka bukuswani ze ezahezi ze bonisa bunde bwa ku latelela likuka za Bibele, ni ka linzila ze ñwi. Maswaniso ni ona a swanelwa ku nyakisiswanga.—Mu bale Samu 22:22; 35:18; 40:9.

8, 9. Ki ufi musebezi wa muzamaisi wa Tuto ya Tawala ya Mulibeleli?

 ⁸ Kono nako ye ekezehile yeo ya ku fa likalabo i kona ku ba teñi haiba ba ba alaba ba fa likalabo ze kuswani mi ni ya zamaisa mukopano a tokolomoha ku bulelanga hañata-ñata ka nako ya Tuto ya Tawala ya Mulibeleli. Kacwalo, ki lika mañi ze kona ku tusa ya zamaisa kuli a si ke a bulelanga hahulu hamulaho wa likalabo ze fiwa ki ba ba putehile ilikuli bote ba yahiwe ki mukopano wo?

⁹ Kuli lu fumane kalabo, ha lu nyakisiseñi mutala wo. Tuto ya Tawala ya Mulibeleli ye zamaisizwe hande i swana sina simu ye nde ya lipalisa ze buheha. Sina feela simu ye tuna ha i na ni lipalisa ze ñata ze fapana-fapana, Tuto ya Tawala ya Mulibeleli ni yona i na ni likalabo ze fapana-fapana. Mi sina lipalisa ze mwa simu ha li na ni mibala ye fapana ni butuna bo bu shutana-shutana, likalabo ze fiwanga ka nako ya mukopano ni zona za shutananga ka butelele bwa zona ni ka mo li felwanga. Cwale musebezi wa ya zamaisa ki ufi? Litaluso za hae za ka siwela li swana sina mubala o tala o bonahala fa ni fale mwa simu  ya lipalisa. Mubala wo ha u bohanali hahulu ka buñata, kono u tusa kuli simu i bonahale hande. Ka ku swana, ya zamaisa u swanela ku hupula kuli musebezi wa hae haki ku bulela hahulu ka ku kuta-kutela, kono ki ku tusa puteho kuli i fe likalabo za milumbeko. Kacwalo, likalabo ze shutana-shutana ze fiwa ki puteho ni manzwinyana a bulela muzamaisi fa ni fale, ha li kopanyiwa hande, li ka tabisa ba ba putehile kaufela sina simu ya lipalisa ye buheha.

“Lu Tiseze Mulimu Sitabelo sa Milumbeko”

10. Bakreste ba makalelo ne ba nganga cwañi mikopano ya puteho?

¹⁰ Za naa bulezi Paulusi ka za mikopano ya Sikreste kwa 1 Makorinte 14:26-33 li lu tusa ku utwisisa hande ka mo mikopano yeo ne i zamaisezwanga mwa miteñi ya baapositola. Caziba yo muñwi wa litaba ze ama Bibele naa ñozi cwana ka za litimana zeo: “Nto ye lemuseha hahulu ka za mo ne i ezezwanga sebelezo mwa Keleke ya makalelo i lukela ku ba kuli, ibato ba mañi ni mañi ya naa yanga kwateñi naa ikutwanga kuli u na ni tohonolo ni swanelo ya ku bulela se siñwi mwa sebelezo yeo. Mutu naa sa yangi kwateñi ka mulelo wa ku yo teeleza feela; naa yanga kuli a yo fa se siñwi, isi feela ku amuhela.” Kaniti, Bakreste ba makalelo ne ba nganga mikopano ya puteho kuli ne i ba fa kolo ya ku bulela za tumelo ya bona.—Maro. 10:10.

11. (a) Ki lika mañi ze tusa hahulu kuli mikopano i be ye yahisa, mi ki kabakalañi? (b) Ki liakalezo lifi ze lu kona ku itusisa kuli lu no alabanga hande hahulu kwa mikopano? (Mu bone litaluso za kwatasi.)

¹¹ Ha lu bulela za tumelo ya luna kwa mikopano lu tusa hahulu mwa ku “yahisa” puteho. Kaniti, ku si na taba kuli mu kalile kale ku fumanehanga kwa mikopano, mu sa ikolanga ku teeleza kwa likalabo za mizwale ni likaizeli ba luna. Lwa susumezwanga ha lu utwa mulumeli ka luna ya sepahala, ili ya supezi a fa kalabo; lwa tiiswanga ha lu utwa manzwi a eluda ya lilato a bonisa kuli u na ni temuho; mi lwa menyanga ha lu utwa mwanana a fa kalabo ya hae ye bonisa kuli wa lata Jehova luli. Kwa iponelwa hande kuli kaufelaa luna ha lu alaba, lu tusa kuli mikopano ya Sikreste i be ye yahisa. *

12. (a) Lu kona ku itutañi kwa mutala wa Mushe ni wa Jeremia? (b) Ku lapela ku lu tusa cwañi kuli lu fange likalabo?

¹² Kono ku alaba ku kona ku ba taata hahulu ku ba ba na ni maswabi. Haiba mu na ni butata bo bu cwalo, mu hupule kuli haki mina feela. Mane nihaiba batanga ba Jehova ba ba sepahala ba ba cwale ka Mushe ni Jeremia ne ba bulezi kuli ne ba sa koni ku bulela fa nyangela. (Ex. 4:10; Jer. 1:6) Kono sina Jehova mwa naa tuselize batanga ba hae ba kwakale bao ku mu lumbeka mwa nyangela, ni mina u ka mi tusa kuli mu fe sitabelo sa milumbeko. (Mu bale Maheberu 13:15.) Mu kona ku tusiwa cwañi ki Jehova kuli mu si ke mwa sabanga ku alaba? Nto ya pili kikuli mu itukisezange hande mikopano. Ku zwa fo, mu si ka ya kale kwa Ndu ya Mubuso, mu lapele ku Jehova mi mu mu kupe ka taata kuli a mi tuse ku ba ni bundume bwa ku yo alaba. (Mafil. 4:6) Bakeñisa kuli kupo ya mina i lumelelana ni tato ya Jehova, mwa kona ku ba ni sepo ya kuli u ka alaba tapelo ya mina.—1 Joa. 5:14; Liprov. 15:29.

 Mikopano ye ‘lu Yahisa, ye lu Kutaza, ni ku lu Tiisa Lipilu’

13. (a) Mikopano ya luna i swanela ku tusa cwañi ba ba putehile? (b) Ki puzo ifi ya butokwa ye ba swanela ku nahanisisa maeluda?

¹³ Paulusi u talusa kuli mulelo wa butokwa wa mikopano ya puteho ki wa kuli ba ba putehile ba ‘yahiswe, ku kutazwa, ni ku tiiswa lipilu.’ * (1 Makor. 14:3) Maeluda kacenu ba kona ku eza cwañi kuli likalulo za bona za fa mikopano li yahisange mizwale ni likaizeli ba bona ni ku ba omba-omba? Kuli lu fumane kalabo, ha lu nyakeñi mukopano wa naa zamaisize Jesu ha mano zuswa kwa bafu.

14. (a) Ki lika mañi ze ne ezahezi pili Jesu a si ka eza kale mukopano? (b) Ki kabakalañi baapositola ha ne ba ikutwile ku angulukelwa ‘Jesu ha naa sutelezi ni ku bulela’ ku bona?

¹⁴ Pili, mu lemuhe ze ne ezahezi pili Jesu a si ka eza kale mukopano wo. Nakonyana pili Jesu a si ka bulawa kale, baapositola ‘ne ba mu hasanezi mi ba saba,’ mi sina mo ne ku polofitezwi, ba “hasanyiwa, yo kafa, yo kafa.” (Mare. 14:50; Joa. 16:32) Ku zwa fo, ha sa zusizwe kwa bafu, Jesu naa memezi baapositola ba hae be ne ba swabile kwa mukopano o ipitezi. * Kacwalo, “ba ya kwa Galilea, fa lilundu le ne ba laezwi ki Jesu.” Ha se ba fitile kwateñi, “Jesu a sutelela, a ba bulelela” litaba. (Mat. 28:10, 16, 18) Mu nahane feela mo baapositola ne ba ikutwezi ku angulukelwa Jesu ha naa bulezi ni bona! Ki lika mañi za naa bulezi?

15. (a) Ki lika mañi za naa bulezi Jesu, kono ki lika mañi za naa si ka ambola? (b) Mukopano wo, no amile cwañi baapositola?

¹⁵ Jesu naa ungekile mukopano ka ku fa zibiso ye li: “Ni filwe bulena kaufela.” Hamulaho, a ba fa musebezi wo: “Mu ye cwale, mu lute macaba.” Kwa mafelelezo, a ba sepisa kuli: “Ni inzi ni mina ka mazazi kaufela.” (Mat. 28:18-20) Kono kana mu lemuhile sa naa si ka eza Jesu? Naa si ka omanya baapositola ba hae; mi naa si ka bulela manzwi a bonisa ku sa ba sepa kamba ku ba utwisa hahulu maswabi ka ku bulela ka za bufokoli bo ne ba bile ni bona ka nakonyana. Kono naa ba bonisize kuli ne ba latwa ki yena ni Ndatahe ha naa ba file musebezi o mutuna. Muezezo wa Jesu no amile cwañi baapositola? Ne ba yahilwe hahulu, ni ku susuezwa, ni ku tiiswa lipilu kuli mane hasamulaho wa nako ku zwa fa mukopano wo, ne ba zwezipili “ku luta batu, ni ku bulela” taba ye nde.—Lik. 5:42.

16. Maeluda kacenu ba likanyisanga cwañi Jesu ha ba zamaisa mikopano ye katulusa?

¹⁶ Maeluda kacenu ba likanyisa Jesu ka ku nga mikopano sina kolo ya ku kolwisa balumeli ka bona ka za lilato le li sa feli la na ni lona Jehova kwa batu ba hae. (Maro. 8:38, 39) Kacwalo, maeluda ha ba fa likalulo za bona ka nako ya mikopano, ba isanga pilu kwa bunde bwa mizwale ba bona, isi mifokolo ya bona. Ha ba bonisangi moya wa ku sa sepa mizwale ba bona. Kono mwa lingambolo za bona, ba bonisanga kuli ba nga balumeli ka bona sina batu ba ba lata Jehova ni ba ba lata ku eza se si lukile. (1 Mates. 4:1, 9-12) Nihakulicwalo, fokuñwi maeluda ba tokwanga ku eleza puteho mukatumbi, kono haiba ki batu feela ba sikai ba ba tokwa ku sikululwa, maeluda ba ka eza hande ku eleza batu ba ba cwalo kwa mukunda. (Magal. 6:1; 2 Tim. 2:24-26) Maeluda ha ba fa ngambolo mwa puteho, ba likanga ku babaza puteho ka nako kaufela ye swanela. (Isa. 32:2) Ba ikatazanga ku bulela ka mukwa o tahisa kuli ba ba putehile kaufela ba katuluswe ni ku tiiswa hamulaho wa mikopano.—Mat. 11:28; Lik. 15:32.

 Mikopano ya lu Tiisanga Lipilu

17. (a) Ki kabakalañi ha ku li kwa butokwa hahulu cwale kuli mikopano ya luna i be ye tiisa? (b) Ki lika mañi ze mu kona ku eza mina kasibili kuli mikopano i be ye yahisa? (Mu bone mbokisi ye li, “Linzila ze Lishumi ze Kona ku Tahisa Kuli Mikopano I mi Yahise ni ku Yahisa ba Bañwi.”)

¹⁷ Matata a mwa lifasi la Satani ha nzaa ekezeha, lu swanela ku bona teñi kuli mikopano ya luna ya Sikreste ya lu tiisa lipilu kaufelaa luna. (1 Mates. 5:11) Kaizeli yo muñwi ya naa tiyezi muliko o mutuna hamoho ni muunaa hae lilimo ze ñata kwamulaho, u talusa kuli: “Ku ba kwa Ndu ya Mubuso ne ku swana inge ku ba mwa mazoho a Jehova. Ka nako ye ne lu banga kwateñi inze lu li mwahalaa mizwale ni likaizeli ba luna, ne lu ikutwanga kuli ne lu kona ku lwalisa Jehova mulwalo wa luna, mi ne lu ikutwanga ku angulukelwa.” (Samu 55:22) Haike batu kaufela ba ba fumanehanga kwa mikopano ya luna ba ikutwange ku susuezwa ni ku tiiswa lipilu. Kuli ku be cwalo, kaufelaa luna lu zweleñipili ku tusa mwa ku tahisa kuli mikopano ya luna ya Sikreste i be ye yahisa.

[Litaluso za kwatasi]

Mu Kona ku Alaba Cwañi?

• Mikopano ya Sikreste ki ya butokwa cwañi?

• Ki kabakalañi likalabo ze fiwanga kwa mikopano ha li ‘yahisanga’ puteho?

• Ki lika mañi ze lu kona ku ituta kwa mukopano wa naa bile ni ona Jesu ni balutiwa ba hae?

[Lipuzo za Tuto]

[Mbokisi/Maswaniso a fa likepe 22]

LINZILA ZE LISHUMI ZE KONA KU TAHISA KULI MIKOPANO I MI YAHISE NI KU YAHISA BA BAÑWI

Mu itukisezange cimo. Haiba mu itukiseza cimo litaba ze ka yo itutiwa kwa Ndu ya Mubuso, mu ka ikola hahulu mikopano mi ze bulelwa kwa mikopano li ka mu fita kwa pilu.

Mu fumanehange kamita. Bakeñisa kuli kwa susuezanga ha ku na ni batu ba bañata kwa mikopano, mu swanela ku fumanehanga kwateñi kamita.

Mu itahanelange. Haiba mu itahanela ku fita, mwa kona ku swalisana ni ba bañwi mwa ku opela pina ya ku kwalula ni ku teeleza kwa tapelo, ili likalulo za bulapeli bwa luna ku Jehova.

Mu shimbange ze tokwahala. Mu shimbange Bibele ya mina ni lihatiso ze ka itusiswa kwa mikopano ilikuli mu zamaelele ni ba bañwi ni kuli mu utwisise lika ze itutiwa.

Mu tokolomohange lika ze kona ku mi lyanganisa. Ka mutala, mu balange tuñusa twa fa luwaile lwa mina hamulaho wa mikopano, isi ka nako ya mikopano. Ka ku eza cwalo, mu ka bonisa kuli ha mu ezi lika za mina ka nako ye sa swaneli.

Mu bange ni kabelo. Batu ba bañata ha ba alaba, ba bañata ba susuezwa ni ku yahiswa ki likalabo ze shutana-shutana ze bonisa tumelo ya bona.

Mu alabange ka bukuswani. Ku eza cwalo ku tusa batu ba bañata kuli ni bona ba alabe.

Mu talelezange likalulo ze mu fiwa. Ha mu filwe kalulo mwa Sikolo sa Bukombwa sa Teokratiki kamba mwa Mukopano wa Sebelezo, mu itukisezange hande kalulo yeo, mu i lundulule, mi mu ikataze ku yo i taleleza.

Mu babazange ba ba bile ni kabelo. Mu itumelange ku ba ba bile ni kabelo mwa mukopano kamba ba ba alabile.

Mu ambolange ni ba bañwi. Ku lumelisananga ni ku ambolisana pili mikopano i si ka kalisa kale ni hasamulaho, ku tahisanga kuli ba ba tilo kopana ba be ni tabo ni kuli ba tusiwe.