‘Lu Tise Nubu ya Muñaa Bupilo’

MU BONISANGA cwañi buitumelo haiba mutu yo muñwi u mi ezize ka sishemo? Ha mu nyakisise mo ne ba boniselize buitumelo bwa bona bazamaisi ba ndwa mwa Isilaele hamulaho wa ku lwana ni Mamidiani. Ndwa yeo ne i lwanilwe hamulaho wa sibi se ne ba ezize Maisilaele ka ku lapela Baale-Peori. Mulimu naa ba tusize ku tula ndwa, mi ze ne ba hapile ne li abezwi masole ba 12,000 ni Maisilaele ba bañwi kaufela. Ka ku ya ka taelo ya Jehova, masole ne ba ngile kalulo ye ñwi kwa kabelo ya bona ni ku i fa baprisita, mi Maisilaele ba bañwi ni bona ba nga kalulo ye bato swana kwa kabelo ya bona ni ku i fa Malivi.—Num. 31:1-5, 25-30.

Nihakulicwalo, bazamaisi ba ndwa ne ba bata ku fa linubu ze ñata. Ne ba bulelezi Mushe kuli: “Batanga ba hao ba balile baana ba ndwa ba ba ne ba laulwa ki luna, kuli ne li ba bakai; mi ha ku si ka tokwahala mutu.” Kacwalo, ba tahisa nubu ya Jehova ya gauda ni likabiso ze fapana-fapana.  Likabiso za gauda kaufela ze ne filwe ne li eza bukiti bo bu fitelela 190 kg.—Num. 31:49-54.

Ni kacenu batu ba bañata ba susuezwanga ku bonisa buitumelo ku Jehova kabakala lika za ba ezelize. Kono haki batanga feela ba Mulimu ba ba ineezi ba ba bonisanga buitumelo bo bu cwalo. Ha mu nyakisise mutala wa muzamaisi wa mbasi yo muñwi ya naa isanga batu ni ku yo ba nga kwa sitediyamu ko ne ku ezezwa mukopano wa macaba, mwa muleneñi wa Bologna o mwa naha ya Italy ka silimo sa 2009. Bakeñisa kuli naa li muzamaisi ya wile pilu ni ya na ni tokomelo, be ne ba kwelanga mwa mbasi ya hae ne ba mu ñolezi kadi ya ku itumela ku yena ni ku mu fa mali a buitumelo hamohocwalo ni buka ya Bibele I Lutañi Luli? Ha se ba mu file lika zeo, muzamaisi yo a li: “Ni ka amuhela kadi ni buka, kono ni mi kutiseza mali kakuli ni bata ku mi fa ona sina nubu ilikuli mu zwelepili ku eza musebezi o mu sweli ku eza. Nihaike kuli ha ni yo muñwi wa Lipaki za Jehova, ni bata ku mi fa nubu ye kakuli ni iponezi kuli mu ezanga lika ka lilato.”

Nzila ye ñwi ye mu kona ku bonisa ka yona buitumelo ku Jehova kabakala za mi ezelize, ki ku fa linubu ze ka tusa mwa musebezi wa mwa lifasi kaufela wa Lipaki za Jehova. (Mat. 24:14) Linzila ze ba fananga ka zona ba bañwi li bonisizwe mwa mbokisi ye zamaelela ni taba ye.

[Mbokisi fa likepe 20]

MO BA FANELANGA BA BAÑWI

LINUBU ZA MUSEBEZI WA MWA LIFASI KAUFELA

Ba bañata ba bulukanga mali a ku beya mwa tumbokisi twa linubu to tu ñozwi kuli “Musebezi wa Mwa Lifasi Kaufela.”

Ka kweli ni kweli, liputeho li lumelanga mali ao kwa ofisi ya Lipaki za Jehova ye sebeleza liputeho zeo. Linubu za mali ze fiwa ka ku itatela hape za konwa ku lumelwa kwa Watch Tower Society, Attention Treasury, P. O. Box 33459, 10101 Lusaka, kamba kwa ofisi ya mutai ya Lipaki za Jehova ye sebeleza naha ya mina. (Linubu za ku itatela ze bulezwi kwatasi ni zona li swanelwa ku lumelwa kwa ofisi ya Lipaki za Jehova ye sebeleza naha ya mina.) Macheke aa lumelwa kwa keyala ye fahalimu a swanela ku bonisa kuli mali a ñozwi ao a fiwe “Watch Tower Society.” Lika ze pangilwe fa macwe a butokwa ni zona za kona ku fiwa sina nubu. Liñolo le li talusa ka bukuswani kuli lika zeo li filwe sina mpo li lukela ku tahelela hamoho ni linubu zeo.

TUKISO YA LINUBU ZA TUMELELANO

Mwa kona ku kalima Watch Tower Bible and Tract Society of Pennsylvania mali, ilikuli a itusiswe mwa lifasi kaufela. Kono ha mu ka a bata mwa kona ku a kupa mi mu ka a kutisezwa.

MILELO YA KU FANA

Kwandaa ku fa linubu za mali, ku na ni mifelo ye miñwi ya ku tusa ka yona sebelezo ya Mubuso mwa lifasi kaufela. Mifelo yeo i kopanyeleza:

Insurance: Batu ba bañwi ba kona ku lukisa kuli hamulaho wa lifu la bona, mali e ne ba bulukanga kwa likampani ze ñwi kamba mali a bona a penshini a fiwe Watch Tower Bible and Tract Society of Pennsylvania.

Liakaunti za Kwa Panga: Akaunti ya kwa panga, mapampili a mali a kalimilwe panga, kamba mali a penshini a bulukisanga mutu kwa panga a konwa ku fiwa Watch Tower Bible and Tract Society of Pennsylvania kuli i itusise ona, kamba mutu wa kona ku lukisa kuli mali ao a fiwe Watch Tower Bible and Tract Society of Pennsylvania ha ka shwa, ili tukiso ya eza ka ku latelela milao ya panga yeo.

Ma-Stock ni Ma-Bond: Ma-stock ni ma-bond a konwa ku fiwa Watch Tower Bible and Tract Society of Pennsylvania sina mpo, kamba muñaa ona wa kona ku eza tukiso ya kuli a fiwe Watch Tower Bible and Tract Society of Pennsylvania ha ka timela.

Miyaho ni Ndao: Miyaho ni ndao ze konwa ku lekiswa za konwa ku fiwa sina mpo, mi haiba mufi u sa pila mwa miyaho yeo, wa kona ku zwelapili ku pila mwateñi ku fitela a shwa.

Gift Annuity: Gift annuity ki tukiso ya kona ku itusisa mutu ku fa mpo ya mali a mañata kwa kopano ye itusiswa ki Lipaki za Jehova kamba ku i fa lika ze ñwi ze kona ku tisa mali a mañata. Mi kabakala mpo yeo ya file, kopano i ka mu fanga mali e i lumelelani ni yena ka silimo ni silimo ku fitela a timela.

Ma-Will ni Ma-Trust: Tutu kamba mali za konwa ku fiwa Watch Tower Bible and Tract Society of Pennsylvania ka ku itusisa will ye ñozwi ka mulao (pampili ye bonisa mwa batela mutu kuli libyana za hae li abelwe ha sa shwile), kamba kwa konwa ku ezwa tumelelano ye ñwi (trust agreement) ye bonisa kuli Watch Tower Bible and Tract Society of Pennsylvania i fiwange se siñwi. Trust ye tusa kopano ya bulapeli i kona ku tahisa kuli ba ba ezize tumelelano yeo ba si ke ba telanga mitelo ye miñwi.

Sina ka mo i taluseza pulelo ya kuli “milelo ya ku fana,” linubu ze cwalo li tokwa kuli mufani a lele hande. Mu buze ofisi ya mutai ye sebeleza naha ya mina mu si ka itusisa kale tukiso ya linubu za tumelelano kamba tukiso ya milelo ya ku fana.