Mu Tukufalelwe Bulapeli Bwa Niti

“Lukau ki lo lutuna luli, kono ba ba kutula ki ba banyinyani.”—MAT. 9:37.

1. Ku talusañi ku eza lika ka putako?

MU NAHANE kuli mu isa musali ya zuhezwi ki mba kwa sipatela. Mu ka eza cwañi? Mu ka akufa hahulu. Kamba mwendi ku na ni mutu ye mu yo katanyeza kuli mu eze nto ya butokwa ni yena. Mu ka eza cwañi? Mu ka zamaya ka ku akufa. Kaniti, haiba ku na ni musebezi o mu swanela ku eza mi nako i sweli ya cibilika, mwa kalelwanga. Mwa mubili wa mina ku kalanga ku zamaya tumezi to tu mi matafaza, mi mu ezanga musebezi wo kapili ni ka taata. Yeo ki yona putako!

2. Ki ufi musebezi o ba swanela ku eza Bakreste ba niti ka putako?

² Musebezi o ba swanela ku eza ka putako Bakreste ba niti kacenu ki ku kutaza taba ye nde ya Mubuso ni ku tusa batu ba macaba kaufela ku ba balutiwa. (Mat. 24:14; 28:19, 20) Mareka naa kutezi ku bulela manzwi a Jesu ha naa ñozi kuli musebezi wo u tokwa ku ezwa “pili,” ili ku talusa kuli mafelelezo a si ka taha kale. (Mare. 13:10) Mi nto yeo ya swanela. Jesu naa ize: “Lukau ki lo lutuna luli, kono ba ba kutula ki ba banyinyani.” Lukau lu swanelwa ku beiwa mwa matuli kapili, nako i si ka fela kale.—Mat. 9:37.

3. Bakeñisa kuli musebezi wa ku kutaza u tokwa ku ezwa ka putako, mizwale ni likaizeli ba bañata ba ngile mihato ifi?

³ Musebezi wa ku kutaza ki wa butokwa hahulu ku luna kacenu, kacwalo lu swanela ku ikataza hahulu ku u eza. Kwa tabisa kuli mizwale ni likaizeli ba bañata ba sweli ku eza ona cwalo. Ba bañwi ba ikatulezi ku pila bupilo bo bu bunolo ilikuli ba eze sebelezo ya nako kaufela sina mapaina kamba balumiwa kamba ku yo sebeleza fa lihae la Betele. Ba patehile hahulu. Mwendi ba ezize buitomboli bo bu shutana-shutana, mi ba talimana ni butata bo bu fitana-fitana. Nihakulicwalo, ba fuyolwa hahulu ki Jehova. Lu tabile hahulu kabakala musebezi o ba eza. (Mu bale Luka 18:28-30.) Ba bañwi ba ba sa koni ku eza sebelezo ya nako kaufela, ba ezanga musebezi o pilisa wo ka mo ba konela kaufela, mi ku eza cwalo ku kopanyeleza ku tusa bana ba luna kuli ba to piliswa.—Deut. 6:6, 7.

4. Ki kabakalañi ba bañwi ha ba kana ba tuhela ku lemuha butokwa bwa linako ze lu pila ku zona?

⁴ Sina mo lu se lu bonezi, ku eza nto ka putako ku ama ku eza nto yeo kapili, nako i si ka fela kale. Lu pila mwa nako ya maungulelo, mi ku na ni bupaki bo buñata bwa mwa Mañolo ni bwa mwa litaba ze ezahezi bo bu bonisa buniti bwa taba yeo. (Mat. 24:3, 33; 2 Tim. 3:1-5) Nihakulicwalo, ha ku na mutu ya ziba nako luli ye a ka taha mafelelezo. Jesu ha naa talusa ka za ‘sisupo’ sa “ku fela kwa lifasi,” naa ize: “Haili ka za lizazi leo ni za nako yeo, ha ku na ya li ziba; mane ni mangeloi a kwa lihalimu ha li zibi, nihaiba Mwana, konji Ndate a li nosi.” (Mat. 24:36) Kabakaleo, ba bañwi ku kana ku ba bela taata ku zwelapili ku lemuha butokwa bwa nako ye lu pila ku yona, sihulu haiba ba ezize cwalo ka nako ye telele. (Liprov. 13:12) Kana fokuñwi mwa ikutwanga cwalo? Ki lika mañi ze kona ku lu tusa kuli lu tukufalelwe musebezi wa lu file Jehova Mulimu ni Jesu Kreste kacenu, ili ku u nga sina musebezi o tokwa ku ezwa ka putako?

 Mu Hupule Mutala wa Naa lu Tomezi Jesu

5. Jesu naa bonisize cwañi kuli naa eza musebezi wa ku kutaza ka putako?

⁵ Jesu Kreste ki yena ya naa tomile mutala o munde hahulu wa ku eza sebelezo ya hae ku Mulimu ka putako. Le liñwi la mabaka ha naa ezize cwalo kikuli naa na ni musebezi o muñata wa naa tokwa ku eza mwa lilimo feela ze talu ni licika. Nihakulicwalo, Jesu naa petile lika ze ñata mwa bulapeli bwa niti ku fita mutu ufi kamba ufi. Naa zibahalize libizo la Ndatahe ni mulelo wa hae, naa kutalize taba ye nde ya Mubuso, naa patuluzi buipi ni lituto za buhata za baeteleli ba bulapeli, mi mane naa yemezi ku luka kwa bubusi bwa Jehova ku isa kwa lifu. Naa pazuzi naha inzaa luta batu, ku ba tusa, ni ku ba folisa. (Mat. 9:35) Ha ku na mutu ya kile a eza musebezi o mutuna cwalo mwa nako ye kuswani sina mwa naa ezelize Jesu. Kaniti, Jesu naa sebelize ka taata.—Joa. 18:37.

6. Jesu naa isize mamelelo kwa ku ezañi?

⁶ Ki kabakalañi Jesu ha naa sebelize ka taata mwa musebezi wa hae? Ka ku bala mwa bupolofita bwa Daniele, Jesu naa ziba nako ye ne siyezi kuli a pete musebezi wa hae ku likana ni tomahanyo ya Jehova. (Dan. 9:2) Kacwalo, sina mo lu lemuhezi, musebezi wa hae wa fa lifasi no ka fela “fahali a sunda,” kamba hamulaho wa lilimo ze talu ni licika. Nakonyana ku zwa fa naa kenezi Jesu mwa Jerusalema ka tulo ili kwa makalelo a maliha a 33 C.E., naa ize: “Nako i tile ye Mwanaa mutu a ka lumbwa ka yona.” (Joa. 12:23) Jesu naa ziba kuli lifu la hae ne li sutelezi, kono leo ne si lona libaka le lituna la naa sebelelize ka taata. Naa itusisize kolo ya naa na ni kaufela ku eza tato ya Ndatahe ni ku bonisa lilato kwa batu sina yena. Lilato leo ne li mu susumelize ku tusa batu ku ba balutiwa, ni ku ba luma kuli ba yo kutaza. Naa ba lutile cwalo ilikuli ba eze musebezi wa naa kalisize ni ku eza misebezi ye mituna ku fita ya naa ezize.—Mu bale Joani 14:12.

7, 8. Balutiwa ne ba hupuziñi ha ne ba boni Jesu inzaa kenisa tempele, mi ki kabakalañi Jesu ha naa ezize cwalo?

⁷ Nto ye ñwi ya naa ezize Jesu ne i bonisize hande-nde-nde kuli naa na ni tukufalelo. Ne li kwa makalelo a musebezi wa hae ili ka nako ya Paseka ya 30 C.E. Jesu ni balutiwa ba hae ne ba ile kwa Jerusalema mi ba bona “ba ba lekisa likomu ni lingu ni linkwilimba, ni ba ba cinca mali, ba inzi” mwa tempele. Jesu naa ezizeñi, mi za naa ezize ne li hupulisize balutiwa ba hae nto mañi?—Mu bale Joani 2:13-17.

⁸ Za naa ezize Jesu ni za naa bulezi ka nako yeo ne li hupulisize balutiwa za bupolofita bo bu mwa samu ye ñwi ya Davida, bo bu li: “Ni ciwa ki ku tukufalelwa Ndu ya hao.” (Samu 69:9) Ki kabakalañi ha ne ba hupuzi bupolofita bo? Kakuli muhato wa naa ngile Jesu ne u kona ku mu kenya mwa kozi ye tuna. Esi  mane ba bahulu ba tempele, ili baprisita, bañoli, ni ba bañwi cwalo, ki bona be ne ba zamaisa lipisinisi ze swabisa ze ne ezezwa mwa tempele. Ka ku patulula mulelo wa bona o maswe ni ku u palelwisa ku zwelapili, Jesu naa ikezize sila sa ba bahulu ba bulapeli ba mwa miteñi yeo. Balutiwa ne ba itemuhezi hande kuli Jesu naa ‘tukufalelwa ndu ya Mulimu,’ kamba ku tukufalelwa bulapeli bwa niti. Kono tukufalelo ki nto mañi?

Tukufalelo ki Nto Mañi?

9. Ku tukufalelwa ku talusañi?

⁹ Ku tukufalelwa ku talusa ku eza nto ye ñwi ka ku shukelwa hahulu, ka mafulofulo, kamba ka ciseho. Kaniti, manzwi ao kaufela a konwa ku itusiswa ku talusa ka mo Jesu naa ezelize musebezi wa hae. Kacwalo, Bibele ya Silozi ya 1984 i toloka timana yeo cwana: “Lilato la ka kwa Tempele ya hao li tuka sina mulilo mwa pilu ya ka.” Ki lona libaka balutiwa ha ne ba hupuzi manzwi a Davida ha ne ba boni za naa ezize Jesu mwa tempele. Kono ki nto mañi ye ne tisize kuli lilato la Jesu kwa tempele li tuke sina mulilo mwa pilu ya hae ni ku mu susumeza ku i kenisa?

10. Ka ku ka ya ka Bibele, “ku tukufalelwa” ku talusañi?

¹⁰ Linzwi la “ku tukufalelwa” le li mwa samu ya Davida li zwa kwa linzwi la Siheberu le li tolokiwanga hañata kuli “ku fufaba” kamba “lifufa” mwa litimana ze ñwi za Bibele. (Mu bale Exoda 20:5; 34:14; Joshua 24:19.) Buka ye ñwi ye talusa manzwi a mwa Bibele i bulela kuli linzwi leo hañata li itusiswanga kwa batu ba ba li mwa linyalo. Sina bo muuna ni musali ha ba bonisanga lifufa mwa linyalo la bona, Mulimu ni yena u fufabelanga batu ba ba li ba hae tota, mi u bata kuli ba lapele feela yena. Kacwalo, ka ku ya ka Bibele, ku tukufalelwa ha ku talusi feela ku ba ni ciseho kamba mafulofulo, sina mo ba bonisezanga batu ba ba lata hahulu lipapali ze ñwi cwalo. Tukufalelo ya naa na ni yona Davida ne li ya kuli ku si ke kwa ba ni ya itikanya ni Mulimu kamba kuli libizo la Hae li si ke la nyefulwa. Tukufalelo ye cwalo i kona ku susumeza mutu ku sileleza libubo la mutu yo muñwi kamba ku yemela mutu yo ha nyefulwa.

11. Ki nto mañi ye ne susumelize Jesu ku eza musebezi wa hae ka ku tukufalelwa?

¹¹ Balutiwa ba Jesu ne ba nepile ha ne ba hupuzi manzwi a Davida muta ne ba boni kezo ya naa ezize Jesu mwa tempele. Jesu naa ikatalize hahulu isi feela ka libaka la kuli nako ya naa tokwa ku eza musebezi wa hae ne i na ni maciñekelo kono naa ezize cwalo kabakala ku tukufalelwa—kamba ku fufabela—libizo la Ndatahe ni bulapeli bo bu kenile. Ha naa boni mo libizo la Mulimu ne li nyefulelwa, naa bile ni tukufalelo, kamba lifufa, mi naa ngile muhato wa ku kenisa libizo la Ndatahe. Jesu ha naa boni batu be ne ba nyandiswa ni ku hatelelwa ki ba bahulu ba bulapeli, tukufalelo ya hae ne i mu susumelize ku tusa batu bao ni ku zwapaula baeteleli ba bulapeli bao ba ba situhu.—Mat. 9:36; 23:2, 4, 27, 28, 33.

Mu Tukufalelwe Bulapeli Bwa Niti

12, 13. Ba bahulu ba bulapeli bo bu twi ki bwa Sikreste ba ezizeñi ku amana ni (a) libizo la Mulimu? (b) Mubuso wa Mulimu?

¹² Kacenu, moya o ba bonisa batu ba bulapeli ni likezo za bona li swana ni ze ne ba bonisize batu ba mwa miteñi ya Jesu, mi mane mwendi li bile ze maswe ni ku fita. Ka mutala, mu hupule kuli Jesu ha naa lutile balateleli ba hae mwa ku lapelela, nto ya pili ya naa bulezi ne i ama libizo la Mulimu. Naa ize: “Libizo la hao a li be le li kenile.” (Mat. 6:9) Kana ba bahulu ba bulapeli, sihulu ba bulapeli bo bu twi ki bwa Sikreste, ba lutanga batu kuli ba zibe libizo la Mulimu ni ku li kenisa kamba ku li kuteka? Batili, kakuli mane ba sinya libizo la Mulimu ka ku luta lituto za buhata ze cwale ka tuto ya Silalu, ku sa shwa kwa moyo, ni lihele, ili lituto ze tahisa kuli batu ba bone kuli Mulimu ha konwi ku zibwa, ku taata ku mu utwisisa, ni kuli ki ya lunya ni ya situhu. Hape  ba shwaulisize Mulimu ka likezo za bona ze swabisa ni ka buipi bwa bona. (Mu bale Maroma 2:21-24.) Fahalimu a zeo, ba likile ka mo ba konela kaufela ku pata libizo la Mulimu, mane ni ku li zwisa mwa litoloko za bona za Bibele. Ka ku eza cwalo, ba palelwisa batu ku sutelela ku Mulimu ni ku ba ni bulikani ni yena.—Jak. 4:7, 8.

¹³ Jesu hape naa lutile balutiwa ba hae ku lapelela Mubuso wa Mulimu kuli: “Ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.” (Mat. 6:10) Nihaike kuli ba bahulu ba bulapeli bo bu twi ki bwa Sikreste ba kuta-kutelanga ku lapela tapelo yeo, ba susuezanga batu ku yemela mibuso ya butu ni likopano ze ñwi za butu. Fahalimu a zeo, ba shwaulanga batu ba ba ikataza ku kutaza Mubuso ni ku u paka. Kacwalo, batu ba bañata ba ba ipapata ku ba Bakreste ha ba ambolangi ka za Mubuso wa Mulimu, mi ha ba na tumelo ku ona.

14. Ba bahulu ba bulapeli bo bu twi ki bwa Sikreste ba fetuzi cwañi Linzwi la Mulimu ku ba le li si na tuso?

¹⁴ Jesu ha naa lapela ku Mulimu, naa bulezi ka ku utwahala hande kuli: “Linzwi la hao ki yona niti.” (Joa. 17:17) Mi a si ka kutela kale kwa lihalimu, naa bonisize kuli naa ka keta “mutanga ya sepahala, ya na ni kutwisiso” kuli a fange batu ba hae lico za moya. (Mat. 24:45) Nihaike kuli ba bahulu ba bulapeli bo bu twi ki bwa Sikreste ba ipapata kuli ba luta batu Linzwi la Mulimu, kana ba ezize ka busepahali musebezi wa naa ba file Mulena? Batili. Mane ba bulelanga kuli ze ñozwi mwa Bibele ki matangu feela. Mwa sibaka sa ku fa mutapi wa bona lico za moya kuli ba u omba-ombe ni ku u fa zibo, ba bulelelanga mutapi wa bona mihupulo ya butu. Mi hape ba fetuzi lukuka za Mulimu ku ba ze si na tuso kuli ba si ke ba sitatalisa balateleli ba bona ba ba ikutwa kuli ba na ni muzamao o munde, niha ba ezanga lika ze maswe.—2 Tim. 4:3, 4.

15. Mu ikutwa cwañi ka za lika kaufela ze ba ezize ba bahulu ba bulapeli mwa libizo la Mulimu?

¹⁵ Batu ba bañata ba lipilu ze na ni niti ba swabile kamba ba tuhezi ku lumela ku Mulimu ni Bibele kabakala lika kaufela ze maswe ze ezizwe mwa libizo la Mulimu. Ba zamaiswa ki Satani ni lifasi la hae le li maswe. Mu ikutwanga cwañi ha mu iponela ni ku ikutwela lika ze cwalo ha li nze li ezahala ka zazi ni zazi? Ka ku ba mutanga wa Jehova, kana ha mu susumezwangi ku kenisa libizo la Jehova ha mu nze mu bona mo ba li nyefulela batu? Ha mu bona batu ba lipilu ze na ni niti inze ba pumiwa ni ku bukulwa, kana ha mu susumezwangi  ku omba-omba batu ba ba hatelelwa cwalo? Jesu ha naa boni batu be ne ba “katezi, ba hasani, inge lingu ze si na mulisana,” naa si ka ba utwela feela butuku. Kono mane “a kala ku ba luta litaba ze ñata.” (Mat. 9:36; Mare. 6:34) Lu swanela ku tukufalelwa bulapeli bwa niti, sina mwa naa ezelize Jesu.

16, 17. (a) Ki nto mañi ye swanela ku lu susumeza ku ikataza mwa bukombwa? (b) Ki nto mañi ye lu ka nyakisisa mwa taba ye tatama?

¹⁶ Ha lu tukufalelwa bukombwa bwa luna, lu ka utwisisa hahulu se si taluswa ki manzwi a muapositola Paulusi a kwa 1 Timotea 2:3, 4. (Mu bale.) Lu sebezanga ka taata mwa bukombwa isi feela kabakala kuli lu pila mwa mazazi a maungulelo kono hape ni kabakala kuli lwa ziba kuli Mulimu u bata kuli lu eze cwalo. U bata kuli batu ba zibe niti, ilikuli ni bona ba kone ku mu lapela ni ku mu sebeleza, ni kuli ba fuyolwe. Se si lu susumeza hahulu ku ikataza mwa bukombwa haki kuli nako ye siyezi ki ye nyinyani, kono kikuli lu bata ku kuteka libizo la Mulimu ni ku tusa batu ku ziba tato ya hae. Lu tukufalelwa bulapeli bwa niti.—1 Tim. 4:16.

¹⁷ Ka ku ba batu ba Jehova, lu na ni tohonolo ya ku ziba niti ka za mulelo wa Mulimu kwa batu ni kwa lifasi. Lwa kona ku tusa batu ku fumana tabo ni ku ba ni sepo ye tiile. Lwa kona ku ba bonisa mo ba konwa ku silelelezwa lifasi la Satani ha li ka sinyiwa. (2 Mates. 1:7-9) Mwa sibaka sa ku filikana kamba ku zwafa kabakala kuli lizazi la Jehova li bonahala kuli la liyeha, lu swanela ku taba bakeñisa kuli lu sa na ni nako ya ku tukufalelwa bulapeli bwa niti. (Mika 7:7; Hab. 2:3) Lu kona cwañi ku ba ni tukufalelo ye cwalo? Lu ka nyakisisa puzo yeo mwa taba ye tatama.

Kana Mwa Kona ku Talusa?

• Ki lika mañi ze ne susumelize Jesu ku sebeza ka taata mwa musebezi wa hae wa fa lifasi?

• Ka ku ya ka Bibele, “ku tukufalelwa” ku talusañi?

• Ki lika mañi ze lu bona kacenu ili ze swanela ku lu susumeza ku tukufalelwa bulapeli bwa niti?

[Lipuzo za Tuto]

[Siswaniso se si fa likepe 8]

Jesu naa isize mamelelo ya hae kwa ku eza tato ya Ndatahe ni ku bonisa lilato kwa batu

[Siswaniso se si fa likepe 10]

Lu swanela ku tukufalelwa bulapeli bwa niti