Mu Late ku Luka ka Pilu ya Mina Kaufela

“U lata ku [luka, NW].”—SAMU 45:7.

1. Lu ka tusiwa kiñi ku zamaya mwa “linzila za ku luka”?

KA LINZWI la hae ni ka moya wa hae o kenile, Jehova u zamaisa batu ba hae mwa “linzila za ku luka.” (Samu 23:3) Kono kakuli ha lu si ka petahala, lu keluhanga mwa nzila yeo. Kuli lu kutele ku eza ze lukile, lu tokwa ku ikataza hahulu. Lu ka tusiwa kiñi kuli lu kondise? Ka ku swana ni Jesu, lu lukela ku lata ku eza ze lukile.—Mu bale Samu 45:7.

2. “Linzila za ku luka” ki lika mañi?

² “Linzila za ku luka” ki lika mañi? “Linzila” ze, li tomilwe ka sikuka sa Jehova sa ku luka. Mwa Siheberu ni Sigerike, “ku luka” ku ama muhupulo wa se si lukile, ili ku talusa ku latelela hahulu likuka za muzamao. Bakeñisa kuli Jehova ki “mapilelo a ku luka,” balapeli ba hae ba tabela ku libelela ku yena kuli a tome nzila ye lukile ye ba swanela ku zamaya ku yona.—Jer. 50:7, NW.

3. Lu kona ku ituta cwañi ze ñata ka za ku luka kwa Mulimu?

³ Ha lu ka lika ka pilu ya luna kaufela ku latelela likuka za Mulimu ze lukile, lu ka fumaneha ku ba ba ba tabisa Mulimu ka ku tala. (Deut. 32:4) Ku eza cwalo ku kala ka ku ituta ze lu kona kaufela ka za Jehova Mulimu mwa Linzwi la hae, yona Bibele. Mo lu itutela ka za hae, inze lu sutelela ku yena ka zazi, kona mo lu ka latela ku luka kwa hae. (Jak. 4:8) Hape lu lukela ku amuhela ketelelo ya Linzwi la Mulimu le li buyelezwi ha lu tokwa ku eza likatulo za butokwa mwa bupilo.

Mu Bate ku Luka Kwa Mulimu

4. Ki lifi ze amiwa mwa ku bata ku luka kwa Mulimu?

⁴ Mu bale Mateu 6:33. Ku bata ku luka kwa Mulimu ha ku ami feela ku fumana nako ya ku kutaza taba ye nde ya Mubuso. Kuli Jehova a amuhele sebelezo ya luna ye kenile, likezo za luna za ka zazi li lukela ku zamaelela ni likuka za hae ze pahami. Batu kaufela ba ba bata ku luka kwa Jehova ba na ni ku ezañi? Ba lukela ku “apala mutu yo munca ya bupwa ka siswaniso sa Mulimu mwa ku luka, ni mwa ku kena kwa niti.”—Maef. 4:24.

5. Ki lika mañi ze ka lu tusa ku tiyela ku zwafa?

⁵ Ha lu nze lu lika ku pila ka ku latelela likuka za Mulimu ze lukile, fokuñwi lu kana lwa zwafa kabakala bufokoli bwa luna. Lu kona ku tusiwa kiñi ku tula ku zwafa ko kutuna ni ku ituta ku lata ni ku eza ze lukile? (Liprov. 24:10) Lu lukela ku lapelanga kamita ku Jehova “ka lipilu ze na ni niti, ka tumelo ye tezi.” (Maheb. 10:19-22) Ibe kuli lu Bakreste ba ba tozizwe kamba lu na ni sepo ya ku pila fa lifasi, lu bonisa tumelo mwa sitabelo sa Jesu Kreste ni mwa sebelezo ya hae sina Muprisita wa luna ya Pahami ka ku fitisisa. (Maro. 5:8; Maheb. 4:14-16) Se a petile mali a Jesu a naa suluzwi ne si talusizwe mwa koranta ya pili ya yona magazini ye. (1 Joa. 1:6, 7) Taba yeo ne i ize: “Ki nto ye zibahala kuli ku talimela sika se sifubelu mwa ngilasi ye fubelu ha ku na ni liseli, sika seo si ka bonahala busweu; kacwalo, libi za luna niha li ka ba ze fubelu luli, ha lu ka taha fo  Mulimu a ka li talima ka mali a Jesu, li ka bonahala ku ba ze sweu.” (July 1879, like. 6) Yeo ki tukiso ye nde luli ya lu ezelize Jehova ka sitabelo sa tiululo sa Mwanaa hae ya latwa!—Isa. 1:18.

Mu Tatube Lilwaniso za Mina za Kwa Moya

6. Ki kabakalañi ha ku li kwa butokwa kuli lu tatube lilwaniso za luna za kwa moya?

⁶ Ka nako kaufela, lu tokwa ku apala “sisilelezo sa fa sifuba, ili ku luka,” kakuli ki kalulo ya butokwa hahulu ya lilwaniso za kwa moya ze zwa ku Mulimu. (Maef. 6:11, 14) Ibe kuli kihona lu sa zo ineela ku Jehova kamba se lu bile mwa sebelezo ye kenile ka lilimo-limo, ku butokwa hahulu kuli lu no tatubanga lilwaniso za luna za kwa moya ka zazi. Libaka? Kakuli Diabulosi ni badimona ba hae ba nepezwi fa lifasi. (Sin. 12:7-12) Satani u halifile mi wa ziba kuli nako ya hae ki ye nyinyani. Kacwalo u tukufalezwi mwa ku lwanisa batanga ba Mulimu. Kana lwa itebuha butokwa bwa ku apala “sisilelezo sa fa sifuba, ili ku luka”?

7. Ki sifi se lu ka eza haiba lu bona butokwa bwa ku apala ‘sisilelezo sa fa sifuba, ona ku luka’?

⁷ Sisilelezo sa fa sifuba si sileleza pilu. Kabakala ku sa petahala kwa luna, pilu ya luna ya swanisezo hañata ya pumanga mi ya sinyehanga ku feleleza. (Jer. 17:9) Bakeñisa kuli pilu ya luna i hanelela ku eza ze maswe, ku butokwa kuli i lutiwe ni ku kalimelwa. (Gen. 8:21) Haiba lwa bona butokwa bwa ku apala ‘sisilelezo sa fa sifuba, ona ku luka’ ha lu na ku si tubula nihaiba ka nakonyana feela ka ku itabisa ka lika za toile Mulimu; mi hape ha lu na ku ituhelela ku nahana za ku eza bufosi. Ha lu na ku sinyeza nako ye ñata kwa ku buha TV. Kono lu ka lika ka taata ku eza za tabela Jehova. Niha ne lu ka sitatala ka nakonyana ka ku kenelwa ki mihupulo ya nama ye si ka luka, lu ka tiya hape ka tuso ya Jehova.—Mu bale Liproverbia 24:16.

8. Ki kabakalañi ha lu tokwa “tebe ya tumelo”?

⁸ Kwa lilwaniso za luna za kwa moya ku na ni “tebe ya tumelo.” I lu konisa ku “tima masho kaufela a tuka, a ya maswe.” (Maef. 6:16) Hape tumelo ni ku lata Jehova ka pilu kaufela li lu tusa ku eza ze lukile ni ku zwelapili mwa nzila ye libisa kwa bupilo bo bu sa feli. Ka mo lu itutela ku lata Jehova, ki ka mo lu ka itebuhela butokwa bwa ku luka kwa hae. Kono lizwalo la luna bo? Li lu tusa cwañi mwa buikatazo bwa luna bwa ku lata ku luka?

Mu be ni Lizwalo le Linde

9. Lu tusiwa cwañi ki ku ba ni lizwalo le linde?

⁹ Ka nako ye ne lu kolobezwa, ne lu kupile Jehova kuli a lu fe “lizwalo le linde.” (1 Pit. 3:21) Kakuli lu bonisa tumelo mwa tiululo, mali a Jesu a felisa libi za luna mi kacwalo lu na ni mayemo a kenile fapilaa Mulimu. Kono kuli lu zwelepili mwa muinelo wo, lu tokwa ku zwelapili ku ba ni lizwalo le linde. Haiba lizwalo la luna fokuñwi li lu tamanga milatu ni ku lu fa litemuso, lu swanela ku  itumela kuli la sebeza hande. Ku sisitwa ko ku cwalo ku bonisa kuli lizwalo la luna ha li si ka cinela ha ku taha kwa linzila ze lukile za Jehova. (1 Tim. 4:2) Kono ku na ni ze ñwi hape ze li kona ku eza lizwalo ku ba ba bata ku luka.

10, 11. (a) Mu kandeke mutala o bonisa libaka ha lu swanela ku utwa lizwalo la luna le li lutilwe ka Bibele. (b) Ki kabakalañi ku lata ku luka ha ku kona ku lu tahiseza tabo ye tuna?

¹⁰ Ha lu fosa, lizwalo la luna li kana la lu nyaza kamba ku lu sisita. Mukulwani yo muñwi naa keluhile mwa “linzila za ku luka.” A hapiwa ki mukwa wa ku buhanga maswaniso a mapunu mi a kala ku zuba matokwani. Ha naa yanga kwa mikopano, naa ikutwanga kuli ki sifosi, mi ha naa abananga mwa sebelezo ya mwa simu naa ikutwa ku ba muipumisi, kacwalo a tuhela ku abananga mwa misebezi ya Sikreste ye. Naa ize: “Kono ne ni si ka ziba kuli lizwalo la ka ne li ka ni sisita kabakala likezo za ka.” Naa ekelize kuli: “Ne ni zwezipili mwa butoto cwalo ka lilimo zee ne.” Mi cwale a kala ku nahana za ku kutela mwa niti. Niha naa nahanile kuli Jehova naa si ke a utwa tapelo ya hae, kono a lapela ni ku kupa swalelo. Ku si ka fita nihaiba mizuzu ye lishumi, bo mahe ba to mu potela mi ba mu susueza kuli a kutele kwa mikopano. A ya kwa Ndu ya Mubuso mi a kupa eluda yo muñwi kuli a itute ni yena. Hasamulaho a kolobezwa, mi u itumela ku Jehova kwa ku mu pulusa.

¹¹ Kana ha lu si ka bona bunde bo butuna bo bu zwa mwa ku eza ze lukile? Ha lu nze lu ituta ku lata ze lukile ni ku li eza ka ku tala, lu ka ba ni tabo ye tuna ka ku eza ze tabisa Ndataa luna wa kwa lihalimu. Mi mu nahane! Lizazi li ka taha fo batu kaufela ba ka ba feela ni maikuto a mande ka za lizwalo la bona; ba ka likanyisa Mulimu ka ku petahala. Kacwalo haike lu suñe honafa lilato la ze lukile mwa pilu ya luna mi lu tabise Jehova.—Liprov. 23:15, 16.

12, 13. Lu kona ku luta cwañi lizwalo la luna?

¹² Lu kona ku eza cwañi kuli lu lute lizwalo la luna? Ha lu ituta Mañolo ni lihatiso za luna ze tomile fa Bibele, ku butokwa ku hupula kuli “pilu ya mutu ya lukile i ikupula kalabo.” (Liprov. 15:28, NW) Mu nahane taba yeo mo i tusezanga ha lu talimana ni lipuzo ze ama misebezi. Haiba mufuta o muñwi wa musebezi u iponahaza hande kuli u lwanisana ni Mañolo, buñata bwa luna ka ku sa kata-kata lu latelelanga ketelelo ye filwe ki sitopa sa mutanga ya sepahala, ya na ni kutwisiso. Kono haiba kalabo kwa puzo ye ñwi ye ama za musebezi ha i bonahali hande, likuka za Bibele ze ama muinelo wo li tokwa ku lemuhiwa ni ku nyakisiswa ka tapelo. * Likuka zeo ki ze swana sina butokwa bwa ku ambuka ku sitatalisa ba ba na ni mazwalo a fokola. (1 Makor. 10:31-33) Sihulu lu tokwa ku iyakatwa likuka ze ama silikani sa luna ni Mulimu. Haiba Jehova ki wa luli ku luna, lu ka ipuza kuli, ‘Kana ku eza musebezi wo ku  ka swabisa Jehova, ku mu utwisa butuku?’—Samu 78:40, 41.

¹³ Ha lu itukiseza Tuto ya Tawala ya Mulibeleli kamba Tuto ya Bibele ya Puteho, lu tokwa ku hupula butokwa bwa ku yeya litaba ze filwe. Kana kamita lu ipumananga inze lu lala kalabo kwa puzo ye mwa tuto ni ku shimbulukela feela mwa paragilafu ye tatama? Lituto ze cwalo ha li na ku ekeza kwa lilato la luna la ze lukile kamba ku hulisa lizwalo le li tiile ku luna. Kuli lu fite fa ku lata ku luka, lu tokwa ku ituta ka tukufalelo ni ku yeya ze lu bala mwa Linzwi la Mulimu le li ñozwi. Ku ituta ku lata ze lukile ka pilu ya luna kaufela ku tokwa buikatazo.

Mu be ni Linyolwa ni Tala ya ze Lukile

14. Jehova Mulimu ni Jesu Kreste ba bata kuli lu ikutwe cwañi ka za sebelezo ya luna ye kenile?

¹⁴ Jehova Mulimu ni Jesu Kreste ba bata kuli lu be ni tabo ha lu nze lu peta sebelezo ya luna ye kenile. Ki lika mañi ze ka ekeza kwa tabo ya luna? Ki ku lata ze lukile. Mwa ngambolo ya hae ya fa lilundu Jesu na ize: “Tabo ki ya ba ba utwa tala ya ku luka, ni linyolwa la kona, kakuli ba ka kuliswa.” (Mat. 5:6, NW) Manzwi ao a talusañi ku ba ba na ni takazo ya ku lata ze lukile?

15, 16. Tala ni linyolwa za kwa moya li kona ku feliswa cwañi?

¹⁵ Lifasi le lu pila ku lona li busiwa ki ya maswe. (1 Joa. 5:19) Haiba lu bala mutende mwa naha ifi kamba ifi, lu ka fumana lipiho za likezo ze situhu ni mifilifili ye mituna ze si ka bonwa kale. Ku mutu ya lukile, ku nahana za situhu sa batu kwa batu ba bañwi kwa bilaeza. (Muek. 8:9) Ka ku ba ba ba lata Jehova, lwa ziba kuli ki yena feela ya kona ku felisa linyolwa ni tala ya kwa moya ya batu ba ba lakaza ku ituta ku luka. Batu ba ba maswe ba tuha ba zwisiwa, mi ba ba lata ku luka ha ba sa na ku utwa maswabi a tahiswa ki ba ba sa lateleli mulao ni likezo za bona ze maswe. (2 Pit. 2:7, 8) Yeo ikaba nto ye katulusa luli!

¹⁶ Ka ku ba batanga ba Jehova ni balateleli ba Jesu Kreste, lwa ziba kuli bote ba ba utwa tala ni linyolwa la ku luka “ba ka kuliswa.” Ba ka kolwiswa ka ku tala ki tukiso ya Mulimu ya mahalimu a manca ni lifasi le linca “mo ku yahile ku luka.” (2 Pit. 3:13) Kacwalo lu si ke lwa zwafiswa kamba ku komokiswa ki taba ya kuli buhateleli ni mifilifili li felisize ku luka mwa lifasi le la Satani. (Muek. 5:8) Jehova, yena Muambakani-ya-Pahami, wa ziba ze sweli ku ezahala mi a tuha a lukulula ba ba lata ku luka.

Mu Fumane Tuso ka ku Lata ku Luka

17. Ki lifi ze ñwi za lituso ze tahiswa ki ku lata ku luka?

¹⁷ Liñolo la Samu 146:8 li koñomeka butokwa bo butuna bwa ku zamaya mwa nzila ya ku luka. Walisamu naa opezi kuli: “Muñaa Bupilo u lata ba ba na ni niti” kamba ba ba lata ku luka. Mu nahane! Muambakani wa pupo kaufela wa lu lata kakuli lu lata ku luka! Kabakala lilato la Jehova, lu na ni sepo ye tiile ya kuli u ka lu babalela ha lu nze lu cisehela Mubuso pili mwa bupilo bwa luna. (Mu bale Samu 37:25; Liproverbia 10:3.) Kwa mafelelezo, fa lifasi fa kaufela ku ka pila feela batu ba ba lata ku luka. (Liprov. 13:22)  Kwa batu ba Mulimu ba bañata, mupuzo wa bona ikaba tabo ye tuna ni bupilo bo bu sa feli mwa lifasi le linde le li li paradaisi. Nihaiba honafa, ba ba lata ku luka kwa Mulimu ba pila mwa kozo ya munahano ye ekeza kwa swalisano mwa mabasi a bona ni mwa liputeho za bona.—Mafil. 4:6, 7.

18. Ki lika mañi ze nde ze lu kona ku eza ha lu nze lu libelela lizazi la Jehova?

¹⁸ Ha lu nze lu libelela lizazi la Jehova le lituna, lu lukela ku zwelapili ku bata ku luka. (Zef. 2:2, 3) Kacwalo, haike lu bonise kuli lwa lata haa buniti linzila za Jehova Mulimu ze lukile. Ku eza cwalo ku kopanyeleza ku apala “sisilelezo sa fa sifuba, ili ku luka” ilikuli si bukeleze pilu ya luna ya swanisezo. Hape lu tokwa ku ba ni lizwalo le linde, ili le li ka lu tahiseza tabo ni ku tabisa pilu ya Mulimu wa luna.—Liprov. 27:11.

19. Lu swanela ku ikatulela ku ezañi, mi mwa taba ye tatama ku ka buhisanwañi?

¹⁹ “Meeto a [Jehova] a talimisisa lifasi kaufela, kuli a tahise maata a hae ku tusa ba ba mu file lipilu za bona, kaufela zona.” (2 Makol. 16:9) Manzwi ao a lu omba-omba luli ha lu eza ze lukile, niha lu kopana ni ku sa iketa kwa lika, mifilifili ni bumaswe mwa lifasi le li taata le. Ki niti kuli linzila za luna ze lukile li kana za komokisa buñata bwa batu ba ba kauhani ni Mulimu. Kono lu fumana tuso ye tuna ka ku latelela ku luka kwa Jehova. (Isa. 48:17; 1 Pit. 4:4) Kacwalo haike lu tundamene ku fumana tabo ka ku lata ni ku eza ze lukile ka pilu ya luna kaufela. Kono ku eza ze lukile ka pilu ya luna kaufela ku kopanyeleza ni ku toya bumaswe. Taba ye tatama i ka lu bonisa taluso ya taba yeo.

[Litaluso za kwatasi]

Mu Kona ku Alaba Cwañi?

• Ki kabakalañi ku itebuha tiululo ha ku li kwa butokwa kuli lu kone ku lata ku luka?

• Ki kabakalañi ha ku li kwa butokwa kuli lu apale “sisilelezo sa fa sifuba, ili lu luka”?

• Lu kona ku luta cwañi lizwalo la luna?

[Lipuzo za Tuto]

[Siswaniso se si fa likepe 26]

Lizwalo le li lutilwe li lu tusa ku alaba lipuzo ze ama misebezi