Mu Amuhele Moya Wa Mulimu, Isiñi Wa Lifasi

“Ha lu si ka amuhela moya wa lifasi, kono lu amuhezi Moya o zwa ku Mulimu; kuli lu zibe limpo za lu file Mulimu ka sishemo.” —1 MAKOR. 2:12.

1, 2. (a) Bakreste ba niti ba mwa ndwa ye cwañi? (b) Ki lipuzo lifi ze lu ka nyakisisa?

BAKRESTE ba niti ba mwa ndwa! Sila sa luna si maata, si na ni mano a maswe, mi si twaezi ku lwana. Si na ni silwaniso se si buanyu se si konile ku koma batu ba bañata. Kono ha lu swaneli ku ikutwa kuli ha lu na maata kamba kuli ha lu koni ku tula mwa ndwa yeo. (Isa. 41:10) Lu na ni sisilelezo se si tiile ili se si kona ku tiyela twaniso ifi kamba ifi.

² Ndwa ya luna haki ya nama kono ki ya swanisezo. Sila sa luna ki Satani Diabulosi mi silwaniso sa hae se situna sa sebelisanga ki “moya wa lifasi.” (1 Makor. 2:12) Sisilelezo sa luna se situna ki moya wa Mulimu. Kuli lu tule mwa ndwa yeo ni ku zwelapili ku ba balikani ba Jehova ba batuna, lu tokwa ku kupa moya wa Mulimu ni ku bonisa muselo wa ona mwa bupilo bwa luna. (Magal. 5:22, 23) Kono moya wa lifasi ki nto mañi, mi ne ku tahile cwañi kuli u yaulule batu? Lu kona ku ziba cwañi kuli moya wa lifasi u sweli wa lu yaulula? Mi lu kona ku itutañi ku Jesu ka mwa naa amuhelezi moya wa Mulimu ni mwa naa hanezi moya wa lifasi?

Ki Kabakalañi Moya wa Lifasi ha U Fumaneha Kai ni Kai?

3. Moya wa lifasi ki nto mañi?

³ Moya wa lifasi u zwa ku Satani, yena “mulena wa lifasi le,” mi u lwanisana ni moya o kenile wa Mulimu. (Joa. 12:31; 14:30; 1 Joa. 5:19) Moya wo ki munahanelo wa lifasi o susumeza batu ku eza lika ze lwanisana ni tato ya Mulimu ni mulelo wa hae.

4, 5. Moya wa o zwa ku Satani ne u yambile cwañi lifasi?

⁴ Moya o zwa ku Satani wo, ne u yambile cwañi lifasi? Pili, Satani naa pumile Eva mwa simu ya Edeni. Naa kolwisize Eva kuli naa ka pila hande ha naa ka hana zamaiso ya Mulimu. (Gen. 3:13) Bo ne li buhata bo bu bunsu luli! (Joa. 8:44) Ku zwa fo, a itusisa musali ilikuli a kukueze Adama kuli a si ke a utwa Jehova. Kabakala keto ya Adama, batu ne ba lekisizwe ku ba batanga ba sibi, mi ba yambula mukwa wa ku latelela moya wa Satani wa ku sa utwa.—Mu bale Maefese 2:1-3.

⁵ Satani hape naa yembuluzi mangeloi a mañata, mi a ba madimona. (Sin. 12:3, 4) Mangeloi ao naa kwenuhezi Mulimu pili Munda  wa mwa lizazi la Nuwe u si ka taha kale. Mangeloi ao naa kozwi kuli naa ka pila hande ka ku siya litulo za ona za kwa lihalimu ni ku taha fa lifasi ku to eza lika ze swabisa ze si za ka taho za naa lakaza. (Juda 6) Ka tuso ya madimona ao a sa tubuzi mibili ya butu, Satani u sweli ku ‘puma lifasi kamukana.’ (Sin. 12:9) Ka bumai, batu ba bañata-ñata ha ba zibi kuli ba sweli ku kukuezwa ki madimona.—2 Makor. 4:4.

Kana Moya wa Lifasi U Sweli wa mi Zamaisa?

6. Moya wa lifasi u kona ku lu kena cwañi?

⁶ Batu ba bañata ha ba zibi ka mo Satani a kukueleza batu, kono Bakreste ba niti bona ba ziba ka ku likana ni ze ba itutile mwa Mañolo. (2 Makor. 2:11) Mane moya wa lifasi ha u koni ku lu zamaisa konji ha lu u lumeleza ku eza cwalo. Ha lu nyakeñi lipuzo zee ne ze ka lu tusa ku bona nji lu zamaiswa ki moya wa Mulimu kamba moya wa lifasi.

7. Ki ifi nzila ye ñwi ya likanga ka yona Satani ku lu zwisa ku Jehova?

⁷ Ze ni keta ku itabisa ka zona li patululañi ka za mo ni inezi? (Mu bale Jakobo 3:14-18.) Satani u likanga ku lu zwisa ku Mulimu ka ku lu susueza kuli lu late mifilifili. Diabulosi wa ziba kuli Jehova u toile mutu ufi kamba ufi ya lata situhu, kamba mifilifili. (Samu 11:5) Kamukwaocwalo, Satani u likanga ku lu kukueza kuli lu latelele litakazo za nama ka ku itusisa libuka, mafilimu, lipina, ni lipapali za fa kompyuta, mi ze ñwi za lipapali zeo li bonisanga babapali ba ba eza buhule bo bu swabisa ni situhu se si maswe. Satani wa tabanga haiba pilu ya luna i lata lika ze maswe ni ze nde ka nako i liñwi.—Samu 97:10.

8, 9. Ki lipuzo lifi ze lu swanela ku ipuza ze ama lika ze lu itabisanga ka zona?

⁸ Kwa neku le liñwi, moya wa Mulimu u susumezanga ba ba u amuhela kuli ba be ba ba kenile, ba ba lata kozo, ni ba ba tezi sishemo. Lu lukela ku ipuza kuli: ‘Kana ze ni keta ku itabisa ka zona li ni susumeza ku ba ni tulemeno to tunde?’ Butali bo bu zwa kwa lihalimu “ha bu na muipo.” Ba ba zamaiswa ki moya wa Mulimu ha ba kutazangi za mizamao ye kenile ni kozo kono inze ba lata ku buha mafilimu a mifilifili ni a buhule mwa mandu a bona.

⁹ Jehova u bata kuli lu lapele yena feela. Kono Satani yena u bata ku lapelwa nihaiba feela hañwi, sina mwa naa batezi kuli Jesu a eze cwalo. (Luka 4:7, 8) Lu kona ku ipuza kuli: ‘Kana ze ni keta ku itabisa ka zona li ni konisa ku lapela Mulimu a nosi feela? Kana za ni konisa ku hana moya wa lifasi kamba za ni palelwisa ku eza cwalo? Kana ni swanela ku eza licinceho ka mo ni ketelanga za ku itabisa ka zona?’

10, 11. (a) Moya wa lifasi u susueza batu ku ba ni mubonelo ufi ka za sifumu? (b) Linzwi la Mulimu le li tahile ka moya li lu susueza ku ba ni mubonelo o cwañi?

¹⁰ Ni nga cwañi bufumu? (Mu bale Luka 18:24-30.) Moya wa lifasi u ezisanga batu ku ba ni “takazo ya meeto” ka ku ba kukueza ku ba ni bulyangelino ni kuli ba late sifumu. (1 Joa. 2:16) U susuelize batu ba bañata kuli ba tukufalelwe ku fuma. (1 Tim. 6:9, 10) Moya wo u kona ku lu kukueza ku ba ni muhupulo wa kuli ha lu ikubukanyeza sifumu, si ka na si lu sileleza. (Liprov. 18:11) Kono haiba lu lata hahulu mali ku fita ku lata Mulimu, fohe Satani u ka be a tuzi. Lu lukela ku ipuza kuli: ‘Kana ni sweli ku ikataza ku bata bupilo bwa ku ca nala?’

¹¹ Linzwi la Mulimu le li tahile ka moya li lu susueza ku ba ni mubonelo o lukile wa mali ni kuli lu belekange ka taata kuli lu ifepe ni ku fepa mabasi a luna. (1 Tim. 5:8) Moya wa Mulimu u tusanga ba ba u amuhela kuli ba likanyise bufani bwa Jehova. Batu ba ba cwalo ba tabelanga ku fana isi ku lata feela ku fiwa. Ba nga batu ku ba ba butokwa hahulu ku fita maluwo mi ba tabela ku ikabela ni ba bañwi ha ba kona ku eza cwalo. (Liprov. 3:27, 28) Mi ha ba ngi kuli ku bata mali ki kwa butokwa hahulu ku fita ku sebeleza Mulimu.

12, 13. Ka ku shutana ni moya wa lifasi, moya wa Mulimu u kona ku lu tusa cwañi?

 ¹² Ni ezanga cwañi ba bañwi? (Mu bale Makolose 3:8-10.) Moya wa lifasi u susueza batu ku eza misebezi ya nama. (Magal. 5:19-21) Nto ye bonisa moya o lu zamaisa kuli ki ufi, ki lika ha li sa lu zamaeli hande, inge cwalo haiba muzwale kamba kaizeli a sa lu isezi pilu kamba ha lu foseza. Hape mo lu ezeza be lu pila ni bona mwa mandu a luna, kwa kona ku bonisa kuli lu zamaiswa ki moya wa lifasi kamba moya wa Mulimu. Lu swanela ku itatubanga. Mu ipuze kuli: ‘Kana mwa likweli ze silezi ze felile, ni likile ku likanyisa hahulu Kreste kamba ni kutezi ku ezanga mikwa ye maswe ni ku itusisanga lipulelo ze maswe?’

¹³ Moya wa Mulimu wa kona ku lu tusa ku ‘tubula mutu wa kale ni misebezi ya hae’ ni ku apala ‘mutu yo munca.’ Ku eza cwalo ku ka lu tusa ku lata hahulu ba bañwi ni ku ba eza hahulu ka musa. Lu ka lata ku swalelananga niha ku na ni libaka la ku tongoka yo muñwi. Haiba lu ikutwa kuli lu ezizwe maswe, lu ka tokolomoha ‘ze baba, ku nyema, buhali, likomano, ni matapa.’ Mi lu ka ikataza ku ‘ba ni mukekecima.’—Maef. 4:31, 32.

14. Batu ba bañata mwa lifasi ba nga cwañi Linzwi la Mulimu?

¹⁴ Kana na kuteka likuka za mwa Bibele ze ama muzamao ni ku li lata? (Mu bale Liproverbia 3:5, 6.) Batu ba ba zamaiswa ki moya wa lifasi ha ba lati ku latelela Linzwi la Mulimu. Batu bao ba keshebisanga litaba za mwa Bibele ze nyaza mizamao ya bona, kono ba lata ku latelela lizo ni lituto za butu. (2 Tim. 4:3, 4) Ba bañwi bona mane ha ba isangi pilu kwa Linzwi la Mulimu. Batu ba ba cwalo ba hononanga ka za haiba Bibele i na ni tuso ni kuli i nepahezi, mi ba tiyelanga fa butali bwa bona. Ba keshebisanga likuka za mwa Bibele ze ama bubuki, kalombe, ni telekano. Ba lutanga kuli ‘bumaswe ki bona bunde, mi bunde ba li ki bumaswe.’ (Isa. 5:20) Kana lu kenwi ki moya wo? Kana ha lu talimananga ni butata lu itinganga fa butali bwa batu ni bwa luna beñi? Kamba kana lwa likanga ku latelela likelezo za mwa Bibele?

15. Ku fita ku tiyela fa butali bwa luna, lu swanela ku ezañi?

¹⁵ Moya wa Mulimu u lu susumeza ku kuteka Bibele. Ka ku swana ni walisamu, lu nga Linzwi la Mulimu sina lumonyi lwa kwa mahutu a luna ni sina liseli la mwa nzila ya luna. (Samu 119:105) Ku fita ku tiyela fa butali bwa luna, lu sepanga kuli Linzwi la Mulimu le li ñozwi li ka lu tusa ku lemuha se sinde ni se si maswe. Lu itutanga ku kuteka Bibele ni ku lata mulao wa Mulimu.—Samu 119:97.

Mu Itute ku Jesu

16. Lu tokwa ku ezañi kuli lu be ni “muhupulo wa Kreste”?

¹⁶ Kuli lu amuhele moya wa Mulimu, lu  swanela ku ba ni “muhupulo wa Kreste.” (1 Makor. 2:16) Kuli lu be ni “maikuto a li mañwi ka ku ya ka Jesu Kreste,” lu tokwa ku ziba mwa naa nahanelanga ni mwa naa ezanga lika mi kihona lu ka mu likanyisa. (Maro. 15:5; 1 Pit. 2:21) Ha lu nyakisiseñi mo lu kona ku ezeza cwalo.

17, 18. (a) Lu itutañi ku Jesu ka za tapelo? (b) Ki kabakalañi ha lu swanela ‘ku tundamena ku kupa’?

¹⁷ Mu kupe moya wa Mulimu. Pili Jesu a si ka likwa kale, naa kupile moya wa Mulimu kuli u mu tuse. (Luka 22:40, 41) Ni luna lu tokwa ku kupa moya o kenile wa Mulimu. Jehova u fanga moya wa hae kwa batu kaufela ba ba u kupa ka tumelo. (Luka 11:13) Jesu naa ize: “Mu tundamene ku kupa, mi mu ka fiwa; mu tundamene ku bata, mi mu ka fumana; mu tundamene ku ngongota, mi mu ka kwalulelwa. Kakuli mutu kaufela ya kupa wa fiwanga, mi mutu kaufela ya bata wa fumananga, mi mutu kaufela ya ngongota wa kwalulelwanga.”—Mat. 7:7, 8, NW.

¹⁸ Ha mu bata moya wa Jehova ni tuso ya hae, mu si ke mwa tuhela kapili ku mu kupa. Mwendi mu ka tokwa ku tundamena ku lapela ni ku lapelanga ka nako ye telele. Fokuñwi Jehova ha alabangi kapili litapelo za ba ba mu kupa kono u libelelanga kuli ba bonise nji ba tokwa luli nto ye ba kupa ni kuli ba bonise haiba ba na ni tumelo luli. *

19. Jesu naa ezangañi kamita, mi ki kabakalañi ha lu swanela ku mu likanyisa?

¹⁹ Mu utwe Jehova ka ku tala. Kamita Jesu naa ezanga lika ze tabisa Ndatahe. Ka nako ye ñwi, nto ye ñwi ya naa bata Jesu kuli i ezahale ne i shutana ni tato ya Ndatahe. Kono naa bulelezi Ndatahe ka sepo, a li: “Ku si ke kwa ezwa se si latwa ki na, ku ezwe se si latwa ki Wena.” (Luka 22:42) Mu ipuze kuli: ‘Kana naa utwanga Mulimu niha ku li taata ku eza cwalo?’ Lu tokwa ku utwa Mulimu kuli lu pile. Lu swanela ku mu utwa ka ku tala kakuli ki yena Mubupi wa luna, ki Yena ya lu file bupilo bwa luna, mi ki yena Mupilisi wa luna. (Samu 95:6, 7) Ha ku na nto ye fita ku utwa Mulimu. Ha lu konwi ku shemubiwa ki yena haiba lu sa mu utwi.

20. Ki nto mañi ye ne li ya butokwa mwa bupilo bwa Jesu, mi lu kona ku mu likanyisa cwañi?

²⁰ Mu zibe hande Bibele. Jesu ha naa hanyeza Satani ya naa lwanisa tumelo ya hae, naa bulezi manzwi a mwa Mañolo. (Luka 4:1-13) Jesu ha naa nyazanga baeteleli ba bulapeli be ne ba mu hanyeza, naa itusisanga Linzwi la Mulimu. (Mat. 15:3-6) Nto ye ne li ya butokwa hahulu mwa bupilo bwa Jesu ne li ku ziba ni ku peta mulao wa Mulimu. (Mat. 5:17) Ni luna lu tokwa ku zwelapili ku ituta ni ku nahanisisa Linzwi la Mulimu le li tiisa tumelo. (Mafil. 4:8, 9) Ba bañwi ku luna ku kona ku ba bela taata ku fumana nako ya ku ezanga tuto ya ka butu ni ya lubasi. Mwa sibaka sa ku libelela kuli lu ka ba ni nako, lu swanela ku toma nako ya ku eza cwalo.—Maef. 5:15-17.

21. Ki tukiso ifi ye kona ku lu tusa ku ziba hande Linzwi la Mulimu ni ku li sebelisa?

²¹ “Mutanga ya sepahala, ya na ni kutwisiso” u lu tusize ku fumana nako ya ku ezanga tuto ya ka butu ni ya lubasi ka ku lukisa kuli lu bange ni Nako ya ku Lapela Sina Lubasi sunda ni sunda. (Mat. 24:45) Kana mwa itusisa hande tukiso yeo? Kuli mu tusiwe ku ba ni muhupulo wa Kreste, ku cwañi ha ne mu ka nyakisisanga za naa lutile Jesu ka za litaba ze ñwi ze mu iketezi ku ituta ka nako ya tuto ya mina?  Ka mutala, mwa kona ku itusisa litaba ze li “Ze lu Ituta ku Jesu” ze mwa Tawala ya Mulibeleli ya October–December, 2008, ni ya January–March, 2010. Mi ku kala ka 2008, magazini ya Mu Zuhe! i bile ni taba ye li “Mu Kona ku Alaba Cwañi?” Taba yeo ya lipuzo i lukiselizwe ku mi tusa ku ekeza kwa zibo ya mina ya Linzwi la Mulimu. Mwa kona ku itusisanga litaba zeo ka Nako ya ku Lapela Sina Lubasi.

Lwa Kona ku Tula Lifasi

22, 23. Lu swanela ku ezañi kuli lu tule lifasi?

²² Kuli lu zamaiswe ki moya wa Mulimu, lu swanela ku hana moya wa lifasi. Ku eza cwalo haki nto ye bunolo. Ku kona ku tokwa kuli lu lwane ka taata. (Juda 3) Kono lwa kona ku tula! Jesu naa bulelezi balutiwa ba hae, a li: “Mu ka ba ni manyando mwa lifasi; kono mu tiye lipilu, ni tuzi lifasi.”—Joa. 16:33.

²³ Ni luna lwa kona ku tula lifasi haiba lu hana moya wa lona ni ku eza ka mo lu konela kaufela kuli lu amuhele moya wa Mulimu. Kaniti, “Mulimu ha lu yemela, ki mañi ya ka lu lwanisa?” (Maro. 8:31) Ka ku amuhela moya wa Mulimu ni ku latelela zamaiso ya ona ye fumaneha mwa Bibele, lu ka ba ni buiketo, kozo, tabo, ni sepiso ya bupilo bo bu sa feli mwa lifasi le linca, le li li fa ngo ni mulomo.

[Litaluso za kwatasi]

Kana Mwa Hupula?

• Ki kabakalañi moya wa lifasi ha u fumaneha kai ni kai?

• Ki lipuzo lifi zee ne ze lu swanela ku ipuza?

• Ki lika mañi ze talu ze lu ituta ku Jesu ka za mwa ku amuhelela moya wa Mulimu?

[Lipuzo za Tuto]

[Siswaniso se si fa likepe 8]

Ne ku tahile cwañi kuli mangeloi a mañwi a be madimona?

[Siswaniso se si fa likepe 10]

Satani u itusisa moya wa lifasi kuli a zamaise batu, kono lwa kona ku ikayutula ku ona kuli u si ke wa lu kukueza