Kana Mwa Hupula?

Kana mu ikozi ku bala limagazini za cwanoñu fa za Tawala ya Mulibeleli? Ha mu bone nji mwa kona ku alaba lipuzo ze tatama:

• Kana Bakreste ba niti ba itusisanga libizo la Mulimu sina muulu?

Batu ba bañwi ba nganga linto kamba lisupo ze ñwi sina muulu o kona ku ba sileleza ka mabibo, kono batu ba Mulimu ha ba ngangi libizo la hae sina muulu. Ba bonisanga tumelo ku Jehova mi ba ikatazanga ku eza tato ya hae, mi ka ku eza cwalo ba nga libizo la hae sina masabelo a bona. (Zef. 3:12, 13)—1/15, makepe 5-6.

• Ki kabakalañi Jehova ha naa hanile Mulena Saule?

Saule naa swanela ku litela mupolofita wa Mulimu kuli a to cisa sitabelo. Kono a tokwa ku ipeya ku utwa mi a cisa sitabelo ka ili yena. Hasamulaho, naa si ka mamela taelo ya naa filwe ya kuli a yundise lila za Maisilaele.—2/15, makepe 22-23.

• Lu kona ku bonisa cwañi kuli lu toile bumaswe?

Ha lu na ku itusisa maswe bucwala, lu ka ambuka litaba za mioya, mi lu ka mamela temuso ya Jesu ka za mwa ku ambukela buhule. Ka mutala, lu ka tokolomoha ku buha maswaniso a mapunu ni mihupulo ye konwa ku tahiswa maswaniso ao. (Mat. 5:27, 28) Hape, ha lu na ku swalisana ni batu ba ba zwisizwe mwa puteho.—2/15, makepe 29-32.

• Jeremia naa swana cwañi sina kota “ye calilwe kwatuko ni mezi, ye namela mibisi ya yona kwa nuka”? (Jer. 17:7, 8)

Naa si ka tuhela ku beya miselo, mi naa hanile ku kukuezwa ki basomi. Naa kumalezi Musimululi wa “mezi” a pilisa mi naa mamezi manzwi kaufela a naa mu bulelezi Mulimu.—3/15, likepe 14.

• Ki bufi “bufumu” bo bu zwa mwa macaba kamukana? (Hag. 2:7)

“Bufumu” bo ki batu ba ba sebeleza Jehova kabakala ku mu lata, ku si na taba kuli ha ba si ka petahala. (Liprov. 27:11) Batu bao ba kanyisa Mulimu, mi yena wa ba katelwa bakeñisa lilato le lituna le ba bonisa ku yena ni sebelezo ye ba eza ka tukufalelo.—4/1, likepe 11.

• Ki kabakalañi Daniele ha naa li “muuna ya latwa hahulu” ki Jehova? (Dan. 10:11, 19)

Daniele naa ikatazanga hahulu ku ituta Mañolo. (Dan. 9:2) Naa lapelanga kamita. (Dan. 2:17, 18) Naa bata hahulu kuli libizo la Jehova li lumbekwe. (Dan. 2:20, 28; 9:19.)—4/1, makepe 12-13.

• Bashemi ba kona ku tusa cwañi bana ba bona kuli ba ezange liketo ze ka ba tusa ku ba ni mizamao ye minde?

Bashemi ba swanela ku taluseza hande bana ba bona likuka ze ba bata kuli ba pile ka zona. Ba swanela ku ba luta niti ka za somano. Hape ba swanela ku ba tusa ku nyakisisa ze kona ku ezahala ku bona haiba ba loba likuka za Jehova ka za muzamao.—4/1, makepe 19-20.

• Ki lifi ze ñwi za likuka za mwa Bibele ze lu tusa ku lemuha ka mo Jehova a ngela lipapali za ku wina mali? (Maef. 5:17)

Mulimu u nga mutu ya lumela mwa litohonolo kuli u lapela mulimu wa siswaniso. (Isa. 65:11) Jehova u eleza balapeli ba hae kuli ba si ke ba lakaza za ba bañwi. (Ex. 20:17; Maro. 7:7) Batanga ba Mulimu ba fumananga mali ka ku sebeza ka busepahali. (Maef. 4:28; 2 Mates. 3:10, 12)—4/1, makepe 22-23.

• Mupolofita Samuele naa “sebelelize niti” ka mukwa ufi? (Maheb. 11:32, 33)

Samuele naa tusize batu ku eza ze nde ni ze lukile mwa meeto a Mulimu. Naa zwezipili ku tukufalelwa bakeñisa kuli naa libelezi ka pilutelele kuli Jehova naa ka mu tusa, mi naa sebelize ka busepahali ku si na taba ni ze zwafisa.—4/1, likepe 27.

• Lu itutañi ka za Jehova kwa manzwi a Jobo a ñozwi mwa liñolo la Jobo 14:13-15?

Jehova u lata hahulu batu ba ba lata ku zamaiswa ki yena, ili ba ba mu lumeleza ku ba bupa ni ku ba shemuna ka mulelo wa kuli ba be batu ba ba kateleha mwa meeto a hae. (Isa. 64:8)—4/1, likepe 31.