Kana Mwa Lemuha Kuli lu Zamaiswa ki Mulimu?

MAISILAELE ha ne ba zwa kwa Egepita, lilu le li yemi nonga la to zenga fahalimwaa bona mi la zwelapili ku ba etelela. Maisilaele ni Maegepita ne ba si ka bona kale nto ya mufuta o cwalo. Busihu ne li banga mulilo o yemi nonga. Yeo ne li nto ye makaza luli! Kono lilu leo ne li zwa kai? Mulelo wa lona ne li ufi? Kacenu le, ha se ku fitile lilimo ze bato eza 3,500 ku zwa fo i ezahalela kezahalo yeo, ki lika mañi ze lu kona ku ituta ka za mo Maisilaele ne ba ngela “lilu le li yemi nonga ni . . . mulilo”?—Ex. 14:24.

Linzwi la Mulimu li lu bulelela ko ne li zwa lilu leo ni mulelo wa lona. Li li: “Muñaa Bupilo naa ba etelezi kwapili musihali ka lilu le li yemi nonga ku ba bonisa nzila, mi busihu ka mulilo o yemi nonga ku ba fa liseli, kuli ba zamaye musihali ni busihu.” (Ex. 13:21, 22) Jehova Mulimu naa itusisize lilu le li yemi nonga ni mulilo o yemi nonga ku zamaisa batu ba hae ha ne ba zwa mwa Egepita ni ha ne ba zamaya mwa lihalaupa. Ne ba na ni ku itukiseza ku nanuha ni ku latelela lilu leo. Mpi ya Maegepita ye ne i ba manama ha ne i se i li bukaufi kuli i ba lwanise, lilu la to yema mwahalaa bona ni Maegepita, kuli li sileleze Maisilaele. (Ex. 14:19, 20) Nihaike kuli lilu leo ne li ba ngonjolokisa, ne ba swanela ku li latelela ilikuli ba yo fita mwa Naha ya Sepiso.

Ku ba teñi kwa lilu leo ne ku kolwisize batu ba Mulimu kuli Jehova naa li ni bona. Lilu leo ne li yemela Jehova, mi ka linako ze ñwi naa ambolanga ni bona ka ku itusisa lona. (Num. 14:14; Samu 99:7) Hape lilu ne li file bupaki bwa kuli Mushe ne li yena ya naa ketilwe ki Jehova kuli a etelele sicaba. (Ex. 33:9) Kamukwaoswana, lilu ha ne li bonahezi lwa mafelelezo ne li file bupaki bwa kuli Joshua naa ketilwe ki Jehova kuli a yole Mushe. (Deut. 31:14, 15) Kaniti, kuli musipili wa Maisilaele u konde ne ba tokwa ku lemuha bupaki bwa kuli Mulimu ki yena ya naa ba zamaisa mi ne ba tokwa ku latelela zamaiso ya hae.

Ne ba Libezi Sisupo sa Kuli ne ba Zamaiswa ki Mulimu

Maisilaele ha ne ba iponezi lilu le ne li yemi nonga lwa pili, mwendi ne ba sabile ni ku makala hahulu. Kono ka bumai, makazo yeo ye ne ba iponelanga Maisilaele ne i si ka ba susumeza ku sepa Jehova kamita. Ne ba lwanisize zamaiso ya Mulimu ka linako ze ñatanyana. Mpi ya Maegepita ha ne i ba manami, ne ba si ka bonisa kuli ne ba sepile maata a Jehova a pilisa. Kono ba tameleza mutangaa Mulimu, Mushe, kuli naa ba isize mwa lihalaupa kuli ba yo shwela mwateñi. (Ex. 14:10-12) Ha se ba pululelize mwa Liwate le li Fubelu, ba tongoka Mushe, Aruni, ni Jehova kabakala ku ikutwa kuli ne ba si na lico ni mezi. (Ex. 15:22-24; 16:1-3; 17:1-3, 7) Mi hasamulaho wa lisundanyana ku zwa fo, ba hapeleza Aruni kuli a ba ezeze namani ya gauda. Mu nahane feela ka za taba ye! Kwa lineku le liñwi la sibaka fo ne ba tibelezi Maisilaele, ne ba bona lilu le li yemi nonga ni mulilo o yemi nonga—ili sisupo se si makaza sa kuli Mulimu ki yena ya naa ba zwisize mwa Egepita—mi mwa sibaka se ne si li bukaufi ni sibaka fo ne ku na ni lilu ba kala ku lapela mulimu wa siswaniso, inze ba li: “Wena Isilaele, ki wo mulimu wa hao o ku zwisize mwa naha ya Egepita.” Kao ne li kashwau ka katuna!—Ex. 32:4; Neh. 9:18.

Buipanguli bwa Maisilaele ne bu bonisize kuli ne ba keshebisa hahulu zamaiso ya Jehova.  Butata bo ne ba na ni bona ne si bwa kuli ne ba palelwa ku bona bupaki, kono ne li bwa kuli ne ba sa utwisisi mwa naa ba zamaiseza Jehova mi ne ba sa lateleli zamaiso ya hae. Ne ba boni lilu kono ne ba itibalize kuli lilu leo ne li yemela zamaiso ya Jehova. Nihaike kuli likezo za bona ne li bonisa kuli ne ba ‘sa kolwi Ya Kenile wa Isilaele,’ Jehova ka sishemo naa zwezipili ku ba zamaisa ka lilu ku fitela ba kena mwa Naha ya Sepiso.—Samu 78:40-42, 52-54; Neh. 9:19.

Mu Bone Bupaki Bwa Kuli lu Zamaiswa ki Mulimu

Kamukwaoswana, ni la kacenu le Jehova u zwezipili ku zamaisa batu ba hae. Sina ha naa si ka tuhelela Maisilaele kuli ba ipatele nzila ya ku zamaya ku yona, ni luna kacenu ha si ka lu tuhelela kuli lu ipatele nzila ye lu ka kena ka yona mwa lifasi le linca. Jesu Kreste ki yena ya ketilwe kuli a be Mueteleli wa puteho. (Mat. 23:10; Maef. 5:23) Sitopa sa mutanga ya sepahala sa Bakreste ba ba tozizwe ka moya si filwe maata-nyana ki yena. Sitopa sa mutanga seo ni sona si ketanga baokameli mwa puteho ya Sikreste.—Mat. 24:45-47; Tite 1:5-9.

Lu kona ku ziba cwañi sitopa seo sa mutanga ya sepahala kamba sa sikombwa se si sepahala? Mu lemuhe ka mo Jesu naa taluselize sitopa seo, ha naa ize: “Ki mañi sikombwa se si sepahala, se si na ni kutwisiso, sa beile mulenaa sona fahalimu a batanga ba hae, ku ba holisa lico ka nako ya teñi? Mutanga yo u na ni mbuyoti, mulenaa hae ha fita, a mu fumana a eza cwalo.”—Luka 12:42, 43.

Kamukwaocwalo, sitopa sa sikombwa sa “sepahala,” kakuli ha si si ka siya Jehova, Jesu, lituto za mwa Bibele, kamba batu ba Mulimu. Bakeñisa kuli sitopa sa sikombwa seo si na ni “kutwisiso,” si etelela hande musebezi wa butokwa hahulu wa ku kutaza “Evangeli ye ya mubuso” ni ku ‘luta macaba kaufela.’ (Mat. 24:14; 28:19, 20) Sitopa sa sikombwa si fanga lico za moya ze yahisa “ka nako ya teñi.” Jehova wa katelwa sitopa sa mutanga kakuli u fuyozi batu ba hae ka ku tahisa kuli palo ya bona i ekezehe, u ba fa zamaiso ha ba eza liketo za butokwa, u ba tusa kuli ba utwisise hande lituto za mwa Bibele, u ba sileleza kuli ba si ke ba yundiswa ki lila za bona, mi u ba fa kozo ni mombecima.—Isa. 54:17; Mafil. 4:7.

Mu Latelele Zamaiso ya Mulimu

Lu kona ku bonisa cwañi kuli lwa itebuha zamaiso ya Mulimu? Muapositola Paulusi naa ize: “Mu utwe bazamaisi ba mina, mi mu ipeye kwatasaa bona.” (Maheb. 13:17) Ku eza cwalo ku kona ku ba taata. Ka mutala, mu nge kuli mu Muisilaele ya pila mwa miteñi ya Mushe. Mu nahane kuli ha se mu zamaile ka nako ye telele, lilu la yema kulo kulikuñwi. Li ka yema nako ye kuma kai? Kana ikaba lizazi li li liñwi, kamba sunda i liñwi, kamba likweli li sikai? Mwa ipulelisa, mu li: ‘Kana na swanela ku longola libyana za ka kaufela?’ Mwendi pili mu ka longola feela libyana za butokwa hahulu. Kono hamulaho wa mazazi a sikai, bakeñisa ku katala ku alunguta mwa libyana za mina, mu kalisa ku longola lika kaufela. Kono cwale mu sa feza feela ku longola libyana, lilu li kalisa ku zamaya, mi mu ka tokwa ku longa libyana za mina hape! Ku eza cwalo ne ku si ke kwa ba ko ku bunolo. Nihakulicwalo, Maisilaele ne ba na ni ku “funduka” honafo.—Num. 9:17-22.

Kacwalo, lu ezanga cwañi ha lu fiwa zamaiso ye zwa ku Mulimu? Kana lwa ikatazanga ku i latelela honafo? Kamba kana lu zwelangapili ku eza lika sina mo lu twaelezi ku li ezanga? Kana lu tekelezi litaelo ze nca, ze ama lika ze cwale ka ku zamaisa lituto za Bibele, ku kutaza batu ba ba bulela puo i sili, ku banga ni Nako ya ku Lapela Sina Lubasi, ku sebelisana ni ba Tutengo Twa Kutwano ni ba Sipatela, ni ku ikutekanga ha lu li kwa mikopano ya likiliti? Hape lu bonisa kuli lu latelela zamaiso ya Mulimu ha lu amuhela likelezo. Ha lu bata ku eza liketo za butokwa, ha lu swaneli ku tiyela fa butali bwa luna kono lu swanela ku itinga ku Jehova ni kwa kopano ya hae kuli lu fiwe zamaiso. Sina mwanana ha matelanga kwa bashemi ba hae  kuli ba mu sileleze ha ku taha kakundukundu, ni luna lu sabelanga kwa kopano ya Jehova ha lu tahelwa ki butata.

Kaniti, ba ba etelela mwa kalulo ya fa lifasi ya kopano ya Mulimu ha ba si ka petahala, sina Mushe ha naa li ya si ka petahala. Nihakulicwalo, lilu ne li zwezipili ku fa sisupo sa kuli Mushe naa ketilwe ki Mulimu ni kuli naa lumelelwa ki yena. Hape mu lemuhe kuli Muisilaele ufi kamba ufi naa si na swanelo ya ku funduka fa naa latela kaufela. Kono batu ne ba fundukanga “ka taelo ya Muñaa Bupilo ye [ne] bulelwa ki Mushe.” (Num. 9:23) Kacwalo, ku bonahala kuli Mushe, ya naa itusiswa ki Mulimu, naa fanga batu sisupo sa kuli ba funduke.

Ni la kacenu le, sitopa sa sikombwa sa Jehova si lu supezanga ze lu swanela ku eza nako ha i fitile. Sikombwa si ezanga cwañi cwalo? Si itusisanga litaba za mwa Tawala ya Mulibeleli ni mwa Bukombwa Bwa Luna Bwa Mubuso, lihatiso ze nca, ni lingambolo ze fiwanga kwa mikopano ya mwa mupotoloho ni ya likiliti. Hape litaelo li fiwanga kwa liputeho ka baokameli ba maeto kamba ka mañolo kamba ka lituto ze ba fiwanga mizwale ba ba na ni buikalabelo mwa puteho.

Kana mwa lemuha hande sisupo se si bonisa kuli lu zamaiswa ki Mulimu? Jehova u itusisa kopano ya hae kuli a zamaise luna batu ha hae mwa mazazi a maungulelo a lifasi la Satani le li maswe le, le li swana sina lihalaupa. Kabakaleo, lu pila mwa buñwi, mwa lilato, ni mwa buiketo.

Maisilaele ha ne ba fitile mwa Naha ya Sepiso, Joshua naa ize: “Mwa lipilu za mina kaufela, ni mwa maikuto a mina kamukana, mu ziba kuli kwa linto ze nde kaufela za mi sepisize Muñaa Bupilo Mulimu wa mina, ha ku na niheba i li ñwi ye tokwahezi; kamukana li bonahalile ku mina.” (Josh. 23:14) Kamukwaoswana, batu ba Mulimu kacenu ha ba na ku palelwa ku kena mwa lifasi le linca le li sepisizwe. Kono mañi ni mañi wa luna u swanela ku latelela zamaiso ya Mulimu kuli a kone ku kena mwa lifasi le linca. Kacwalo, ha lu zweleñipili ku lemuha bupaki bwa kuli lu zamaiswa ki Jehova!

[Maswaniso a fa likepe 5]

Lu zamaiswa ki kopano ya Jehova kacenu

Lihatiso ze zwisiwa fa mukopano wa sikiliti

Lituto ze fiwa ba ba na ni buikalabelo mwa puteho

Lwa lutiwanga kwa mikopano ya ku zwela mwa simu