Mo lu Kona ku Sepahalela Mwa Lifasi le li sa Sepahali

SINA moya o lu buyela ha u yambalakani, ku sa sepahala ni kona ku fumaneha kai ni kai. Batu ba bulelanga buhata, ba lifisanga mali a mañata hahulu, ba uzwanga, ha ba lifangi likoloti, mi ba ikuhumusezanga lipisinisi za bona ze ba eza ka bupumi. Kacwalo, ku kona ku lu bela taata ku zwelapili ku sepahala. Lu kona cwañi ku tokolomoha mukwa wa ku sa sepahala? Ha lu nyakisiseñi lika ze talu za butokwa ze ka lu tusa ku eza cwalo. Lika zeo ki ku saba Jehova, ku ba ni lizwalo le linde, ni ku kolwa ka ze lu na ni zona.

Ku Saba Jehova

Mupolofita Isaya naa ñozi kuli: “Muñaa Bupilo ki muatuli wa luna, Muñaa Bupilo ki mutomi wa luna wa mulao; Muñaa Bupilo ki Mulena wa luna.” (Isa. 33:22) Ku lemuha maata a na ni ona Jehova ku kona ku lu tusa ku mu saba, ili nto ye lu susumeza ku tokolomoha mukwa wa ku sa sepahala. Liñolo la Liproverbia 16:6 li li: “Mwa ku saba Muñaa Bupilo batu ba pima koto.” Sabo ye cwalo haki sabo ya ku saba kuli Mulimu u ka lu ota, kono ki sabo ya ku saba ku eza nto ye swabisa Ndataa luna wa kwa lihalimu ya lu tokomela.—1 Pit. 3:12.

Ze ne ezahezi mwa bupilo bwa bo Ricardo ni bakubona bo Fernanda li bonisa bunde bwa ku ba ni sabo ye cwalo. Bo Ricardo ni bo Fernanda ne ba ilo nga mali a bato eza K3,360,000 mwa akaunti ya bona ya kwa panga. * Bo Fernanda ba beya mali ao mwa sikwama sa bona ba si ka a bala. Bo Fernanda ni bakubona ba yo lifa likoloti za bona mi ha se ba fitile kwa ndu ba komoka kakuli mwa sikwama sa bona ne ku sa na ni mali a bato likana ni e ne ba ilo nga mwa akaunti ya bona. Ba nahana kuli: “Ku bonahala kuli mubeleki wa kwa panga naa lu file mali a fitelezi.” Pili ne ba batile ku ipulukela mali ao bakeñisa kuli ne ba na ni likoloti ze ñwi ze ñata ze ne ba si ka lifa. Bo Ricardo ba li: “Lwa lapela ku Jehova kuli a lu fe maata a kuli lu kutise mali ao. Bakeñisa kuli ne lu bata ku mu tabisa ku likana ni kupo ya hae ye kwa Liproverbia 27:11, lwa kutisa mali ao.”

Lizwalo le li Lutilwe ki Bibele

Lwa kona ku luta lizwalo la luna ka ku ituta Bibele ni ku ikataza ku sebelisa ze lu ituta. Kamukwaocwalo, ‘linzwi la Mulimu le li pila ni le li na ni maata,’ li ka lu tusa ku ba ni kutwisiso mi li ka lu fita kwa lipilu. Nto yeo i ka lu susumeza “ku eza se si lukela” mwa lika kaufela.—Maheb. 4:12; 13:18.

Ha mu nyake mutala wa bo João. Ne ba bile ni sikoloti se si bato eza K24,000,000. Ba tutela mwa tolopo ye ñwi ba si ka lifa sikoloti seo. Hamulaho wa lilimo ze 8, bo João ba ituta niti, mi lizwalo la bona le ne li lutilwe ki Bibele la ba susumeza ku kutisa sikoloti seo se ne ba kolotezi kampani ye ñwi! Bakeñisa kuli bo João ne ba tokwa ku babalela bakubona ni bana ba bona ba bane mi ne ba hola mali a manyinyani, kampani yeo ya ba lumeleza ku lifanga sikoloti hanyinyani-hanyinyani ka kweli ni kweli.

Ku Kolwa ka ze lu na ni Zona

Muapositola Paulusi naa ñozi kuli: “Bulapeli ni ku kolwa kwa pilu, ki bufumu bo butuna. . . . Ha lu na ni lico ni liapalo, lu kolwe ki zona.” (1 Tim. 6:6-8) Ku mamela kelezo yeo ku ka lu tusa ku sa eza lipisinisi za buñwanyama ze sa swalehi hande kamba ku ba ni milelo ya ku fumana mali a mañata ka nako ye nyinyani. (Liprov.  28:20) Hape ku mamela kelezo ya Paulusi ku ka lu tusa ku bata pili Mubuso wa Mulimu inze lu na ni sepo ya kuli lu ka fiwa ze lu tokwa.—Mat. 6:25-34.

Kono bakeñisa kuli “takazo ya bufumu” i na ni maata a ku puma, ha lu swaneli ku nahana kuli ha lu konwi ku komiwa ki mukwañuli kamba bumbakofumu. (Mat. 13:22) Mu hupule sa naa ezize Akani. Naa iponezi Maisilaele ha ne ba silile Nuka ya Jordani ka makazo. Nihakulicwalo, kabakala ku komiwa ki mukwañuli, naa uzwize silivera ni gauda ni siapalo se si tula kwa lika ze ne hapiwa mwa munzi wa Jeriko. Kezo yeo ne i mu bulaisize. (Josh. 7:1, 20-26) Ki lona libaka Jesu ha naa file kelezo ye, hamulaho wa lilimo-limo: “Mu tokomele, mi mu ipuluke kwa takazo kaufela ya bufumu”!—Luka 12:15.

Mu Sepahale Kwa Mubeleko

Ha lu nyakeñi miinelo ye kona ku tahisa kuli lu si ke lwa zwelapili ku sepahala mwa lika kaufela. Ku sepahala kwa mubeleko wa luna ku kopanyeleza ku sa “uzwa” nihaike kuli ba bañwi ba nga kuli ku lukile ku eza cwalo. (Tite 2:9, 10) Bo Jurandir ba ba beleka mwa liluko le liñwi la muuso, ne ba bonisanga busepahali ha ne bihanga mali e ne ba itusisize mwa misipili. Kono babeleki ba bañwi bona ne ba batanga ku fiwa mali a fitelela e ne ba itusisize. Babeleki bao ne ba ezanga cwalo bakeñisa kuli yo muhulu wa bona naa ba lumelezanga ku eza ka ku sa sepahala. Mane mubelekisi yo naa nyazize bo Jurandir bakeñisa busepahali bwa bona mi a tuhela ku ba lumanga mwa misipili. Kono ha ku se ku fitile nako, liluko leo la nyakiwa kuli ku bonwe mo ne li itusiseza mali, mi bo Jurandir ba babazwa kabakala busepahali bwa bona. Mi hape ba huliswa fa musebezi.

Bo André, ba ba li balekisi, ne ba bulelezwi ki mubelekisi wa bona kuli ba lifisange baleki mali a fitelela habeli teko ye ne tomilwe. Muzwale wa luna naa lapezi ku Jehova kuli a mu fe bundume ilikuli a kumalele likuka za mwa Bibele. (Samu 145:18-20) Hape ba lika ku taluseza mubelekisi wa bona libaka ha ne ba sa koni ku latelela litaelo za hae—kono kwa pala ku mu kolwisa. Kabakaleo, bo André ba tuhela mubeleko o no ba fumanisanga mali a mañata wo. Kono hasamulaho wa likweli, mubelekisi wa bona yani a ba kupa kuli ba kutele fa mubeleko, mi a ba kolwisa kuli baleki cwale ha ba sa lifiswa hahulu. Bo André ne ba hulisizwe fa musebezi mi ba fa bazamaisi.

Mu Kutisange Likoloti

Muapositola Paulusi naa elelize Bakreste kuli: “Mu si ke mwa ba ni sikoloti ku mutu.” (Maro. 13:8) Mwendi lu kana lwa nahana kuli ku lukile ku sa kutisa sikoloti kakuli mutu ya lu  kolotisize ki sifumi mi ha tokwi mali e lu kolotile. Kono Bibele i lemusa kuli: “Ya maswe wa kolota mi ha kutisi.”—Samu 37:21.

Kono lu swanela ku eza cwañi haiba “bushiko kamba bumai” bu lu palelwisa ku kutisa sikoloti? (Muek. 9:11) Bo Francisco ne ba kolotile mali a bato eza K33,600,000 ku bo Alfredo kuli ba kutise mali e ne ba kolotile kwa kampani ye ñwi. Kono bakeñisa kuli pisinisi ya bona ne i sa zamayi hande, ne ba palezwi ku kutisa sikoloti ka lizazi le ne li tomilwe. Bo Francisco ba atumela bo Alfredo kuli ba ikambote ka za taba yeo, mi bo Alfredo ba lumela kuli bo Francisco ba kutisange sikoloti seo hanyinyani-hanyinyani.

Mu si ke Mwa Ipumisanga

Ha mu hupule mutala o maswe wa naa tomile Ananiasi ni musalaa hae Safira, ili be ne ba li mwa puteho ya Sikreste ya mwa miteñi ya baapositola. Ha se ba lekisize simu ya bona, ne ba isize kalulo ye ñwi ya mali kwa baapositola ni ku ba bulelela kuli ki ona mali kaufela e ne ba fumani ha ne ba lekisize simu. Ne ba bata ku bonisa batu ba bañwi inge kuli ne ba na ni hahulu bufani. Kono muapositola Pitrosi ya naa ukamwi ki moya o kenile wa Mulimu a patulula bupumi bwa bona, mi Jehova a ba bulaya.—Lik. 5:1-11.

Ka ku shutana ni bo Ananiasi ni Safira be ne ba sa sepahali, bañoli ba Bibele bona ne ba sepahala. Mushe naa bulezi ka za bunyemi bwa hae bo ne bu tahisize kuli a palelwe ku yo kena mwa Naha ya Sepiso. (Num. 20:7-13) Kamukwaoswana, Jonasi naa si ka pata bufokoli bwa naa bonisize a si ka kutaza kale batu ba mwa Ninive ni hasamulaho wa ku ba kutaza. Kono naa ñozi ka za bufokoli bo.—Jona. 1:1-3; 4:1-3.

Ku bulela niti ku tokwa kuli mu be ni bundume, niha mu ziba kuli ku eza cwalo ku ka mi kenya mwa butata sina mo u boniseza mutala wa Nathalia wa lilimo ze 14 za buhulu ha naa li kwa sikolo. Ha naa nzaa fita-fita mwa litatubo za naa ñozi, a lemuha kuli ye ñwi ya likalabo ze ne ba mu laitezi bo muluti ne i fosahalile. Kapili-pili Nathalia a yo bulelela bo muluti ka za taba yeo, niha naa ziba kuli ku eza cwalo ne ku ka fukuza hahulu kwa linepo za hae. Naa ize: “Bashemi ba ka ba ni lutile kuli ni swanela ku sepahala kuli ni tabise Jehova. Lizwalo la ka ne li ka ni kataza hahulu kambe ne ni si ka bulelela bo muluti.” Bo muluti ne ba itumezi hahulu ku Nathalia bakeñisa busepahali bwa hae.

Ku Sepahala ku Kutekisa Jehova

Giselle, musizana wa lilimo ze 17, naa fumani sikwama se ne si na ni mapampili ni mali a bato eza K168,000. Naa ambozi ni ba bahulu ba fa sikolo kuli ba mu tuse ku kutiseza sikwama seo ku muñaa sona. Mubakweli wa yo muhulu wa fa sikolo seo a balela sitopa mukatumbi liñolo le ne li lumba Giselle kabakala busepahali bwa hae ni ku babaza lubasi lwa hae bakeñisa ku mu hulisa hande ni ku mu luta za Mulimu. “Misebezi ya [hae] ye minde” ne i lumbekisize Jehova.—Mat. 5:14-16.

Lu tokwa ku ikataza kuli lu be ba ba sepahala ha lu nze lu pila ni batu ba ba li ‘baitati, ba ba lata mali, ba ba itumbaeta, ba ba ikuhumusa, ni ba ba hana za Mulimu,’ kamba ba ba sa sepahali. (2 Tim. 3:2) Nihakulicwalo, ku saba Jehova, ku ba ni lizwalo le li lutilwe ki Bibele, ni ku kolwa ka ze lu na ni zona ku lu tusa ku zwelapili ku sepahala mwa lifasi le li sa sepahali. Mi hape lu sutelela hahulu ku Jehova, ‘ya na ni niti, ni ya lata buniti.’—Samu 11:7.

[Litaluso za kwatasi]

[Maswaniso a fa likepe]

Ku saba Jehova ku lu tusa ku tundamena ku ba ba ba sepahala

[Siswaniso se si fa likepe 8]

Ku sepahala kwa luna ku lumbekisa Jehova