Mutu yo Muñwi u Kutelwa ki Mwangalwa Hamulaho wa ku Boniswa Sishemo

MUSALI muhulu yo muñwi naa si ka amuhela taba ye nde ka nako ya naa potezwi ki bo George ni bo Manon ili Lipaki ba ba pila kwa naha ya Netherlands. Lipaki ba, ne ba bulelezwi kuli musali yo naa latehezwi ki muuna hae wa pili ni wa bubeli ku beya cwalo ni mwanaa hae wa mushimani mi hape musali yo na kula butuku bwa ku luluha lingongo. Nihaike kuli musali yo na kutumani ka nakonyana ha na ambolisana ni lipaki, na si ka amuhela taba ye nde.

Bo George ba akaleza kuli bona ni bo Manon ba yo kuta ku musali yo kuli ba mu iseze sishañata sa mapalisa bakeñisa kuli musali yo naa bonahala hahulu bulutu mi naa si na mwangalwa. Bo George ni bo Manon ha ne ba isize lipalisa zeo, bo Rie ne ba komokile hahulu bakeñisa kezo ye nde yeo. Ka bumai, bo Rie ne ba patehile ka nako yeo, kamukwaocwalo ba lukisa kuli ite ba to potelwa ka nako ye ñwi. Bo George ni bo Manon ha ne ba kutezi kwateñi, ne ba si ka fumana mutu kwa ndu. Nihaike kuli lipaki ba, ne ba kuta-kutezi ku musali yo ka linako ze shutana, ne ba sa mu fumanangi fa lapa. Lipaki ba, ba kalisa ku nahana kuli mwendi musali yo naa ba picaukanga feela.

Zazi le liñwi bo George ba to fumana bo Rie fa lapa. Bo Rie ba kupa swalelo bakeñisa ku sa fumaneha fa ndu, mi ba talusa kuli ne ba inzi mwa sipatela. Bo Rie ba bulelela lipaki kuli, “Kana mwa ziba ze ne ni ezize ku zwa fo ne mu ni siyezi?” Bo Rie ba zwelapili ku bulela kuli, “Ne ni kalisize ku balanga Bibele!” Lipaki bao ba kalisa tuto ya Bibele ni bona.

Ha ne ba nze ba ituta Bibele, bo Rie ba kalisa ku cinca mupilelo wa bona wa kale, ba ba ni tabo mi ba kala ku bonisa sishemo ku ba bañwi. Hamulaho wa nakonyana feela, bo Rie ba kalisa ku talusezanga batu ba ne ba to ba potelanga ka za tumelo ya bona ye nca yeo nihaike kuli ne ba pilanga feela mwa ndu bakeñisa buikangulo bwa bona. Bo Rie ne ba sa koni ku yo fumanehanga kwa mikopano ya puteho nako kaufela bakeñisa buikangulo bwa bona, kono ne ba banga ni tabo ha ne ba potelwanga ki mizwale ni likaizeli. Ka lizazi le ne ba kwanisize lilimo ze 82 za ku pepwa, bo Rie ba yo fumaneha kwa mukopano wa mupotoloho, mi ne ba kolobelizwe ili ku bonisa buineelo bwa bona ku Mulimu.

Hamulaho wa lifu la bo Rie ili likwelinyana ku zwa fa mukopano wo, batu ba fumana liñolo le ne li ñozwi ki bona. Mwa liñolo mo, bo Rie ne ba talusize bumaswe bwa ku ikutwa bulutu mwa busupali mi ne ba koñomekile bunde bwa ku ba mutu ya sishemo. Bo Manon ba bulela kuli, “Ku bala liñolo leo ne ku ni susuelize hahulu, mi ni ya tabile ku ziba kuli Jehova naa lu tusize kuli lu bonise sishemo ku kaizeli Rie.”

Bakeñisa kuli Jehova u bonisanga lilato ni sishemo kwa batu, nto yeo ni luna ya lu susueza ku latelela mutala wa hae. (Maef. 5:1, 2) Lu ka kondisa mwa bukombwa bwa luna ha lu nze lu zwelapili “ku ipaka ku ba likombwa za Mulimu . . . ka sishemo.”—2 Makor. 6:4, 6.