“Ni Inzi Ni Mina”

“Ba bañata ba ka be ba matela kafa ni kafa, mi zibo i ka ekezeha.”—DAN. 12:4.

MU KONA KU ALABA CWAÑI?

Batu ba konile cwañi ku fumana “zibo” ya niti mwa linako za luna?

Batu ba ba amuhezi niti ba bile cwañi ba “bañata”?

Zibo ye nepahezi i ekezehile cwañi?

1, 2. (a) Lu ziba cwañi kuli Jesu u inzi ni luna mi u ka ba ni luna kwapili? (b) Ka ku ya ka Daniele 12:4, ki nto mañi ye kona ku ezahala haiba mutu a ituta Mañolo ka tokomelo?

MU NAHANE kuli mu mwa paradaisi. Kakusasana ni kakusasana ha mu zuha, mu ikutwa hande mi mu na ni tabo ya ku kalisa lizazi. Mubili wa mina ha ku na ko utwa butuku. Ha mu sa na mapongo. Mi lilama za mubili wa mina za sebeza hande. Mu na ni maata a mañata, mwa ikola musebezi wa mina, mu na ni balikani ba bañata, mi lipilaelo za mina kaufela li felile. Zeo ki zona limbuyoti ze mu kona ku ikola Mubuso wa Mulimu ha u ka busa lifasi. Jesu Kreste, Mulenaa luna u ka fa batu limbuyoti zeo ni ku bona teñi kuli batu kaufela ba ituta za Jehova.

² Ka nako yeo, Mulimu ni Mwanaa hae ba ka tusa batu ba ba sepahala kuli ba lute ba bañwi za Jehova. Mane Jehova ni Jesu ba zwezipili ku tusa Bakreste ba ba sepahala kuli ba lute ba bañwi. Pili a si ka ya kale kwa lihalimu, Jesu naa bulelezi balutiwa ba hae kuli: “Ni inzi ni mina.” Kamukwaocwalo naa ka zwelapili ku ba tusa. (Mu bale Mateu 28:19, 20.) Kuli lu tiise tumelo ya luna mwa sepiso ya Jesu, ha lu nyakisiseñi bupolofita bwa naa ñozi Daniele mwa Babilona lilimo ze fitelela 2,500 kwamulaho. Naa ñozi cwana ka za linako za luna: “Ba bañata ba ka be ba matela kafa ni kafa, mi zibo i ka ekezeha.” (Dan. 12:4) Ka nako ya cwale lwa utwisisa kuli mwa timana ye, pulelo ya ku “matela kafa ni kafa” i talusa ku ituta ka tokomelo. Bupolofita bo, bu bonisa kuli batu ba ba ituta Mañolo ka tokomelo ne ba ka fuyaulwa hahulu ka ku fumana niti kamba zibo ye nepahezi ya mwa Linzwi la Mulimu. Bupolofita bo hape bu bonisa kuli “zibo i ka ekezeha.” Batu ba ba fumana zibo yeo ne ba ka i amuhela ni ku luta ba bañwi litaba za niti zeo. Mi hape batu kaufela ne ba ka kona ku ituta litaba za niti zeo. Lu ka nyakisisa mo bu talelelizwe bupolofita bo. Ku eza cwalo ku ka tiisa tumelo  ya luna ya kuli Jesu u inzi ni balutiwa ba hae kacenu ni kuli Jehova u ka taleleza lisepiso za hae kaufela za kwapili.

BAKRESTE BA NITI BA FUMANA ‘ZIBO YE NEPAHEZI’

3. Ne ku ezaheziñi hamulaho wa ku shwa kwa baapositola?

³ Bakwenuheli ba naa bulezi muapositola Paulusi ne ba kalile ku ba teñi hamulaho wa ku shwa kwa baapositola mi ba yanduluka kapili-pili sina mulilo wa lubya. (Lik. 20:28-30; 2 Mates. 2:1-3) Ka lilimo ze mianda-nda, nihaiba batu be ne ba ipiza kuli ki Bakreste ne ba sina ‘zibo ye nepahezi.’ Ba bahulu ba bulapeli ne ba bulezi kuli ba lumela mwa Mañolo kono ne ba luta batu “lituto za madimona,” ili lituto za buhata ze ne nyefulisa Mulimu. (1 Tim. 4:1) Kabakaleo, batu ba bañata ne ba sa zibi niti ka za Mulimu. Batu bao ne ba lutilwe litaba za buhata ze cwale ka za kuli Mulimu ki Silalu, moyo ha u shwi, ni kuli mioyo ya batu ba bañwi i yo canga mwa lihele.

4. Sikwata sa Bakreste se ne si bile teñi hamulaho wa 1870 ne si kalile cwañi ku batisisa niti ya mwa Bibele?

⁴ Hamulaho wa silimo sa 1870, lika za cinca ibata iba lilimo ze 40 pili “mazazi a maungulelo” a si ka kalisa kale. Sikwatanyana sa Bakreste ba niti ba mwa Pennsylvania, kwa America ne si kopani ili ku ituta Bibele ka tokomelo ni ku batisisa zibo ye nepahezi. (2 Tim. 3:1) Batu ba mwa sikwata seo ne ba ipiza kuli ki Baituti ba Bibele. Ne li batu ba ba ikokobeza ili ba ne ba bata luli ku eza tato ya Mulimu. Ne si batu “ba ba butali ni ba ba itutile” ili ba naa bulezi Jesu kuli ne ba si ke ba fumana zibo ye nepahezi. (Mat. 11:25) Baituti ba Bibele ne ba balile ka tokomelo, ku buisana, ni ku kengeyela ze ne ba balanga mwa mañolo mi ne ba lapelanga ku Mulimu kuli a ba etelele. Ne ba bapanyanga litimana za mwa Bibele ze shutana-shutana ni ku ituta ze ne ba ñolanga batu ba bañwi ba ne ba batisisanga niti ya mwa Bibele. Hanyinyani-hanyinyani, Baituti ba Bibele ba ituta litaba za niti zeo batu ba bañata ne ba si ka li ziba ka lilimo ze ñata-ñata.

5. Ki kabakalañi Baituti ba Bibele ha ne ba hatisize trakiti ye bizwa The Old Theology?

⁵ Baituti ba Bibele ne ba tabile hahulu, kono ne ba sa ikuhumusi. Ne ba utwisisize kuli litaba za niti zeo li bile teñi mwa Bibele ka nako kaufela. Kamukwaocwalo, ne ba si ka bulelela ba bañwi kuli ba fumani litaba ze nca. (1 Makor. 8:1) Baituti ba Bibele ba, ne ba hatisize matrakiti a naa bizwa The Old Theology kuli ba tuse ba bañwi ku ituta niti ya mwa Bibele. Matrakiti a pili naa tusize batu ku ituta Bibele ilikuli ba hane “lizo kaufela za buhata za batu” ni kuli ba amuhele lituto za niti za Jesu ni baapositola ba hae.—Trakiti ya The Old Theology, No. 1, April 1889, likepe 32.

6, 7. (a) Ki litaba mañi za niti ze ba itutile Lipaki za Jehova ku zwa feela hamulaho wa silimo sa 1870? (b) Ki litaba mañi za niti ze ne mi tabisize ha ne mu itutile zona?

⁶ Ku zwa feela hamulaho wa silimo sa 1870, Lipaki za Jehova ba itutile litaba za niti. * Haiba lu ituta litaba zeo za niti, lu ka fumana lituso ze ñata. Lu ituta lika ze nde ze tabisa ili ze lu tusa mwa bupilo bwa luna. Litaba za niti li lu fa tabo ni ku lu fa sepo ya lika za kwapili. Litaba zeo li lu tusa ku ziba Mulimu wa luna ya lilato, Jehova, ni ku lu tusa ku utwisisa tato ya hae. Litaba zeo li talusa kuli Jesu ki mañi, ni kuli ki kabakalañi ha naa tile fa lifasi ni ku to shwa, mi hape litaba zeo li talusa musebezi wa eza Jesu ka nako ya cwale. Litaba za niti za butokwa zeo li lu tusa ku utwisisa libaka Mulimu ha tuhelela lika ze maswe ku ezahala, libaka ha lu shwa, mi li lu bonisa mo lu swanela ku lapelela, ni mo lu kona ku bela ni tabo sakata.

⁷ Cwale lwa kona ku utwisisa bupolofita  bo ne bu “patilwe” ka lilimo ze ñata ili bo bu sweli ku talelezwa mwa nako ye ya mafelelezo. (Dan. 12:9) Buñata bwa bupolofita bo, bu fumaneha mwa libuka za Evangeli ni mwa buka ya Sinulo. Sina ka mutala, Jehova u lu tusize ku ziba lika ze ne ezahezi mwa lihalimu ze lu sa koni ku bona ka meeto. Lwa ziba kuli Jesu u bile Mulena, ni kuli mwa lihalimu ne ku naa ni ndwa, mi Satani naa nepezwi fa lifasi. (Sin. 12:7-12) Mulimu hape u lu tusize ku utwisisa taluso ya litaba ze lu kona ku bona. Lwa utwisisa libaka ha ku na ni lindwa, lizikinyeho, matuku, lukupwe, ni libaka batu ha ba eza lika ze maswe ze tahisa kuli linako ze lu pila ku zona li be “ze taata.”—2 Tim. 3:1-5; Luka 21:10, 11.

8. Ki mañi ya lu tusize ku utwisisa litaba za niti?

⁸ Jesu naa bulelezi baapositola ba hae kuli: “Tabo ki ya ba ba bona lika ze mu bona. Kakuli na mi bulelela ni li: Bapolofita ni malena ba bañata ne ba nyolezwi ku bona lika ze mu bona, kono ne ba si ka li bona, ni ku utwa lika ze mu utwa, kono ne ba si ka li utwa.” (Luka 10:23, 24) Ki mona mo lu ikutwela kacenu. Jehova Mulimu ki yena ya lu tusize kuli lu “bone” ni ku “utwa,” kamba ku utwisisa litaba za niti. Lwa itebuha hahulu kuli Mulimu u itusisa moya o kenile, “mutusi” kuli u lu tuse ku utwisisa litaba za niti! (Mu bale Joani 16:7, 13.) Ni kamuta ha lu swaneli ku libala kuli litaba za niti ki za butokwa ni kuli lu swanela ku tusa ba bañwi ku ituta litaba za niti zeo.

“BA BAÑATA” BA AMUHELA ZIBO YE NEPAHEZI

9. Ki memo mañi ye ne i hatisizwe mwa magazini ya Watch Tower ya April 1881?

⁹ Mwa magazini ya Watch Tower ya April 1881, ili lilimo ze peli ku zwa fo ne i kalezi ku hatiswa magazini yeo, ne ku na ni taba ye ne na ni toho ya taba ye li “Lu tokwa bakutazi ba 1,000.” Mwa taba yeo, ne ku memiwa batu ba ne ba kona ku tusa mwa musebezi wa ku kutaza kamba ku ba bakutazi ba ka nako kaufela, kamba kuli ba be mapaina. Batu bao ne ba kupilwe ku ya mwa libaka kaufela ko ne ba kona ku fumana Bakreste ba ba sepahala ba ne ba lata Mulimu ili bao ne ba si na zibo ye nepahezi ni ku ba luta niti ka za Mulimu ni Bibele.

10. Kiñi ze ne ba bata ku eza batu ba bañata ha se ba balile memo ya kuli ne ku tokwahala bakutazi ba 1,000?

¹⁰ Baituti ba Bibele ne ba susuezanga ba bañwi kuli ba kutaze bakeñisa kuli ne ba lumela kuli Bakreste ba niti ba swanela ku kutazanga taba ye nde. Ka nako yeo ne ku na ni feela sikwatanyana sa batu ba ne ba fumanehile kwa mikopano ya Baituti ba Bibele, batu ne ba si ka taha ka buñata sina mo ne ba sepiselize ka nako ye ne ba memiwa. Kono batu kaufela ba ne ba balile trakiti kamba magazini yeo ne ba lemuhile kuli ne ba fumani niti, mi ne ba bata ku tusa batu ba bañwi. Ka mutala, mwa silimo sa 1882, mutu yo muñwi ya naa zwa kwa London ili mwa England ya naa balile magazini ya Watch Tower ni kabukanyana ka Baituti ba Bibele naa ñozi kuli: “Shangwe mu ni lute mwa ku kutaleza ni ku ni bonisa ze ni swanela ku kutaza kuli ni kone ku peta musebezi o tahisa limbuyoti sina mwa batela Mulimu.”

11, 12. (a) Mulelo wa bakutazi ba ka nako kaufela ne li ufi? (b) Bakutazi ba ka nako kaufela ne ba tomile cwañi liputeho ze nca?

¹¹ Ka silimo sa 1885, ne ku na ni bakutazi ba ba bato eza 300. Bakutazi bao ne ba na ni mulelo wo swana ni o lu na ni ona kacenu. Ne ba bata ku tusa batu kuli ba be balutiwa ba Jesu Kreste. Kono mo ne ba kutalezanga ka nako yani kwa shutana ni mo lu kutalezanga kacenu. Hañata lu itutanga Bibele ni mutu a li muñwi. Mi hamulaho lu memanga muituti wa Bibele kuli a yo fumaneha kwa mikopano ya puteho. Kono mwa linako za kwamulaho, bakutazi ba ka nako kaufela ne ba itutanga ni likwata za batu. Ne ba file batu libuka ni  ku mema batu be ne ba tabela kuli ba to kopana hamoho ni ku ituta Bibele. Ka ku itusisa nzila yeo, bakutazi ba ka nako kaufela ne ba tomanga liputeho ze nca, ili ze ne ba bizanga kuli litopa.

¹² Ka mutala, ka silimo sa 1907, sikwata sa bakutazi ba ka nako kaufela ne si batisisize mwa tolopo ye ñwi ilikuli si fumane batu ba ne ba na ni lihatiso za Millennial Dawn (ili libuka ze ne biziwanga hape kuli Lituto za mwa Mañolo). Mi bakutazi ba ka nako kaufela ne ba memelanga batu bao kwa mikopano ya la Sunda ye ne ezezwanga mwa ndu ya mutu yo muñwi ya naa tabela ku ituta. Fa lizazi leo la Sunda, mukutazi wa ka nako kaufela naa file ngambolo ye ne bulela ka za Mulelo wa Mulimu lizazi mukatumbi. La Sunda le ne li tatami, mubuleli yo naa susuelize ba ne ba fumanehile kuli ba zwelepili ku kopananga kamita. Ka 1911, mizwale ne ba likile ku bata mukwa o muñwi kuli ba tuse batu ku ba balutiwa. Mizwale ba 58 ne ba ile kwa libaka ze shutana-shutana za mwa United States ni za mwa Canada kuli ba yo fa lingambolo za nyangela. Mizwale bao ne ba ñolanga mabizo ni likeyala za batu ba ne ba tabela bao ili ba ne ba fumanehanga kwa mikopano yeo. Ne ba konile ku toma liputeho ze nca ka ku itusisa muezezo wo. Ka silimo sa 1914, ne ku na ni liputeho ze 1,200 za Baituti ba Bibele mwa lifasi kaufela.

13. Ki lika mañi ze mi tabisa ka za musebezi wa ku kutaza?

¹³ Kacenu, se ku na ni liputeho ze bato eza 109,400 mwa lifasi kaufela, mi mizwale ni likaizeli ba ba bato eza 895,800 ba eza bupaina. Mi batu ba ba bato eza 8 milioni ba amuhela “zibo ya niti” mi ba itusisa yona mwa bupilo bwa bona. (Mu bale Isaya 60:22.) * Kekezeho yeo ya makaza luli, kakuli Jesu naa polofitile kuli batu ba bañata ba ka toya balutiwa ba hae. Naa bulezi kuli batu ba ka nyandisa balutiwa ba hae, ku ba lenga mwa tolongo, mane nihaiba ku ba bulaya. (Luka 21:12-17) Nihaike kuli Satani, badimona ba hae, ni batu ba bañwi ba sweli ba lika ku palelwisa musebezi wa ku kutaza, batu ba Jehova ba sweli ku zwelapili ku tusa batu ku ba balutiwa mi ku na ni ze nde ze zwa mwa musebezi wo. Ka nako ya cwale ba sweli ba kutaza mwa “lifasi kaufela” ku kala mwa libaka ze cisa hahulu ku isa ku ze bata hahulu, mwa malundu, mwa mahalaupa, mwa mileneñi, ni mwa libaka ze ñwi mo ku pila batu ba banyinyani. (Mat. 24:14) Ba peta musebezi kaufela ka tuso ya Jehova.

ZIBO YA NITI YA EKEZEHA

14. Zibo ya niti i ekezehile cwañi ka ku itusisa libuka?

¹⁴ Zibo ya niti i sweli ya ekezeha kakuli batu ba bañata ba sweli ku kutaza taba ye nde. Mi hape se i fumaneha ka buñata ni mwa lihatiso ze cwale ka libuka ni limagazini. Mwa kweli ya July ka silimo sa 1879, Baituti ba Bibele ne ba hatisize  magazini ya Watchtower ya pili. Mi ka nako yeo, ne i bizwa Zion’s Watch Tower ni Herald of Christ’s Presence. Baituti ba Bibele ne ba kupile kampani ye ñwi kuli i ba hatiseze libuka za pili ze 6,000 za magazini yeo mwa puo ya Sikuwa. Muzwale Charles Taze Russell ili ya naa na ni lilimo ze 27 ka nako yeo, naa ketilwe kuli a etelele mwa musebezi wo, mi mizwale ba bañwi baketalizoho ne ba ñolanga litaba za mwa magazini yeo ka nako kaufela. Kacenu likopi ze 42,182,000 za Tawala ya Mulibeleli li hatiswanga mwa lipuo ze 195. Magazini yeo ki yona ye abelwa hahulu mwa lifasi kaufela. Magazini ya Mu Zuhe! ni yona i abelwa hahulu mwa lifasi kuli mane ki yona ye tatama magazini ya Tawala ya Mulibeleli. Lu hatisanga limagazini za Mu Zuhe! ze 41,042,000 mwa lipuo ze 84. Ku zwa fo, libuka ze bato eza 100 milioni ni Libibele za hatiswanga ka zazi.

15. Lu fumananga kai masheleñi e lu itusisanga kwa ku hatisa libuka za luna?

¹⁵ Musebezi wa ku hatisa libuka u lifelwa ka linubu za ku itatela. (Mu bale Mateu 10:8.) Ba ba eza lipisinisi za ku hatisa ba tabelanga hahulu musebezi wa luna kakuli ba ziba kuli lika ze swana sina limeshini, mapampili, inki, ni lika ze ñwi za ku itusisa kwa ku hatisa li tula hahulu. Muzwale yo muñwi ya lekanga liitusiso za fa Betele u bulela kuli batu ba lipisinisi ha ba potanga fa Betele, ba komokiswanga ki mo lu itusisezanga linubu ze fiwanga ka ku itatela. Ba komokanga kuli kanti lwa kona ku hatisa lihatiso ze ñata cwalo ka ku itusisa feela linubu za ku itatela. Hape ba tabelanga ku bona ba banca ni ba bahulu ha ba nze ba beleka ka tabo fa Betele.

ZIBO YA MULIMU I KA TALA MWA LIFASI KAUFELA

16. Ki kabakalañi Jehova ha naa tahisize kuli “zibo” ya niti i ekezehe?

¹⁶ Jehova u zibahalize “zibo” ya niti kakuli tato ya hae ki kuli “batu ba mufuta kaufela ba piliswe mi ba fite fa zibo ye nepahezi ya ku ziba niti.” (1 Tim. 2:3 4) Jehova u bata kuli batu ba zibe niti ilikuli ba kone ku mu lapela hande ni kuli a ba fuyaule. Jehova u kopanyize sikwata sa Bakreste ba ba tozizwe ili ba ba sepahala ka ku ba luta niti. Hape u sweli wa kubukanya “buñata bo butuna” ku zwelela mwa “macaba kaufela ni mishobo ni batu ni malimi” ili ba ba na ni sepo ya ku pila fa lifasi ku ya ku ile.—Sin. 7:9.

17. Ku ekezeha kwa palo ya balapeli ba niti ku bonisañi?

¹⁷ Palo ya balapeli ba niti mwa lifasi kaufela i zwezipili ku ekezeha mwa lilimo ze 130 ze felile. Kekezeho yeo i bonisa kuli Mulimu ni Jesu Kreste, yena Mulena ya ketilwe ba zwezipili ku ba ni batanga ba Jehova ba fa lifasi ka ku ba etelela, ku ba sileleza, ku ba swalisanisa, ni ku ba luta. Jehova u talelelize sepiso ya hae ya ku tusa batu ku amuhela niti mwa linako za luna, mi nto yeo i lu kolwisa kuli Jehova u ka taleleza lisepiso za hae za kwapili. “Lifasi li ka tala zibo ya Muñaa Bupilo, sina mezi mwa kwahelezi liwate.” (Isa. 11:9) Batu ka nako yeo luli ba ka ikola limbuyoti ze nde ka ku fitisisa!

[Litaluso za kwatasi]

[Lipuzo za Tuto]

[Siswaniso se si fa likepe 6]

Baituti ba Bibele ne li batu ba ne ba ikokobeza ili ba ne ba bata luli ku eza tato ya Mulimu

[Siswaniso se si fa likepe 7]

Jehova wa itebuha buikatazo bo mu eza bwa ku taluseza ba bañwi zibo ya niti ya Mulimu