Ze Zwa Mwa Sifalana Sa Luna

‘Lo Luli ne li Lushango lo Lunde lo ne lu Filwe Haisali’

BO GEORGE NAISH ba supa kwa libunda la likota ze tuna le ne li eza limita ze 18 kwa butelele ili le ne li li kwa sibaka se ne ba bulukelanga liitusiso za mwa Ndwa ya Lifasi ya Pili kwa Saskatoon, mwa Saskatchewan, ili kwa Canada. Mi ba buza kuli: “Lika ze kaufela ki zañi?” Batu ba alaba muzwale yo kuli likota ze tuna zeo ne li itusisizwe kwa ku yaha litawala ze ne ka tusa kuli batu ba utwe ze ne ka bulelwanga kwa wayalesi ka nako ya Ndwa ya Lifasi ya Pili. Muzwale Naish hamulaho a bulela kuli: “Ha se ba ni taluselize za likota ze tuna zeo, naa lemuha kuli ne lu ka kona ku itusisa likota zeo kuli lu yahe litawala ze ka lu tusa ku ba ni ndu ya moya, mi ku zwa feela honafo lwa kalisa ku hupula za ku ba ni ndu ya moya ye hasanya taba ye nde.” Hasamulaho wa silimo feela ili ka 1924, Ndu ya luna ya moya ya CHUC ya kala ku sebeza. Ndu ya moya ya CHUC ne li ye ñwi ya mandu a moya a pili a na itusiswa kwa ku kutaza taba ye nde mwa Canada.

Ka ku swana ni naha ya Yurope, naha ya Canada ni yona ki ye tuna mi ki lona libaka ha ne kuli ko kunde ku kutaza ka ku itusisa wayalesi. Kaizeli Florence Johnson ya naa sebeleza kwa Ndu ya moya yeo ili ye ne li kwa Saskatoon naa bulezi kuli: “Lu itumela hahulu kwa wayalesi ye ne i lu tusa ku hasanya taba ye nde, mi niti ne i fitile kwa batu ba bañata ili bao ne lu si ke lwa kona ku kutaza ku bona ka ku ya kwa mandu a bona. Mi bakeñisa kuli mandu a moya nee li a sikai feela ka nako yani, batu ne ba tabela hahulu ku teeleza kwa nto kaufela ye ne bulelwa fa wayalesi.” Ka silimo sa 1926, Baituti ba Bibele (mo ne ba bizezwanga Lipaki za Jehova ka nako yeo) ne ba zamaisa mandu a moya a bona mwa libaka zee ne za mwa Canada. *

Ki lika mañi ze ne patalazwanga fa liwayalesi zeo? Baopeli ba mwa liputeho za mwa silalanda hañata ne ba opelanga lipina ni balizi ba lipina ni sikwata sa balizi ba bañwi ba sikai. Hape mizwale ne ba fanga lingambolo ni ku zamaisa lituto za Bibele. Muzwale Amy Jones ya naa li yo muñwi wa batu ba ne ba li mwa sikwata seo naa bulezi kuli: “Ha ne ni banga mwa bukombwa, ne ni izibahazanga ku muñaa ndu mi yena naa bulelanga kuli ‘Ne ni mi utwile ha ne mu nze mu bulela fa wayalesi.’”

Baituti ba Bibele ba mwa Halifax, ili mwa Nova Scotia, ne ba kalisize ku itusisa mukutalezo o munca wa fa wayalesi. Muezezo wo ne li wa kuli bateelezi ne ba kona ku liza luwaile ni ku buza lipuzo ka za Bibele. Muzwale yo muñwi naa ñozi kuli: “Batu ne ba tabezi hahulu muezezo wo. Ne lu  palelwanga ku alaba mawaile a bona kaufela bakeñisa kuli batu be ne ba lizanga ne li ba bañata hahulu.”

Sina mo ne ku inezi mwa linako za muapositola Paulusi, ba bañwi ne ba amuhezi niti ye ne ba lutiwa ki Baituti ba Bibele mi ba bañwi ne ba si ka i amuhela. (Lik. 17:1-5) Bateelezi ba bañwi ne ba tabela ku teeleza kwa lushango. Ka mutala, bo Hector Marshall ha ne ba utwile kuli Baituti ba Bibele ne ba zibahalize libuka ze ne biziwanga kuli Lituto za mwa Mañolo fa wayalesi, ba ikupela kwateñi livolyumu ze silezi za libuka zeo. Mi hasamulaho ne ba ñozi kuli: “Ne ni nahana kuli libuka zeo ne li ka ni tusa ku ba muluti yo munde kwa bulapeli bwa ka ko ne ni lutanga la Sunda ni la Sunda.” Kono ha se ba felize ku bala feela volyumu i liñwi ya libuka zeo, bo Hector ba zwa mwa bulapeli bwa bona. Bo Hector ne ba sebelelize Jehova ka busepahali mi ne ba zwezipili ku kutaza ka tukufalelo ku fitela ba timela ka silimo sa 1998. Hasamulaho wa lizazi li li liñwi ku zwa fo ne i fezwi ngambolo ya fa wayalesi kwa upa wa Nova Scotia ye ne i na ni toho ya taba ye li: “Sepo ya Lifasi ki Mubuso wa Mulimu,” bo J. A. MacDonald ne ba bulelezi muzwale yo muñwi ya naa pila mwa silalanda seo kuli: “Batu ba mwa sioli sa Cape Breton mabani ne ba utwile taba ye nde ye ba si ka utwa kale batu ba ba pila mwa sibaka se.”

Kono baeteleli ba bulapeli ne ba filikani maswe. Makatolika ba ba pila mwa Halifax ne ba bulezi kuli ne ba ka cisa ndu ya moya ye ne ba itusisa Baituti ba Bibele. Ka ku susuezwa ki baeteleli ba bulapeli, muuso ka silimo sa 1928 wa zibisa kuli ha u na ku yolisa mapepa a mulao a naa lumeleza Baituti ba Bibele ku zwelepili ku itusisa mandu a bona a moya. Mizwale ni likaizeli ha se ba utwile taba yeo, ba abela batu mapampili a naa na ni toho ya taba ye li Ki Mañi Muñaa Moya O Konisa Batu ku Utwa Litaba ze Bulelwa Mwa Mandu A Moya? ili mapampili a naa bonisa kuli ne ba bilaezwa ki kezo yeo ye ne i si ka luka. Nihakulicwalo, muuso ne u hanile ku yolisa mapepa a mulao a naa lumeleza Baituti ba Bibele ku zwelepili ku itusisa mandu a bona a moya.

Kana nto yeo ne i zwafisize sikwatanyana sa batanga ba Jehova ba mwa naha ya Canada? Bo Isabel Wainwright ba li: “Kwa makalelo ne ku bonahala inge kuli lila za luna ne li winile taba yeo. Kono ne ni ziba kuli haiba Jehova naa bata kuli lu zwelepili ku kutaza ka ku itusisa wayalesi, naa si ke a tuhelela muuso ku lu palelwisa. Kamukwaocwalo, ne lu tokwa ku bata nzila ye ñwi ye ne ka lu tusa ku zwisezepili taba ye nde ya Mubuso.” Mwa sibaka sa ku itinga feela fa liwayalesi kuli ba kone ku fa bupaki, Baituti ba Bibele mwa naha ya Canada ba kalisa ku kutaza ka ku yanga fa mandu a batu. Nihakulicwalo, ku kutaza ka ku itusisa liwayalesi ne ku tahisize kuli ‘lushango lo lunde lu fiwe ka nako ye swanela.’—Litaba Ze zwa mwa sifalana sa luna mwa Canada.

[Litaluso za kwatasi]

[Manzwi a fa likepe 32]

“Ne lu palelwanga ku alaba mawaile a bona kaufela bakeñisa kuli batu be ne ba lizanga ne li ba bañata hahulu”

[Maswaniso a fa likepe 32]

(1) Ndu ya moya ya mwa Edmonton, Alberta (2) Muzwale ya sweli mihala ye zamaisa malaiti a limeshini za Ndu ya moya mwa tolopo ya Toronto, ili kwa Ontario (3) Ndu ya moya ya CHUC ya mwa sibaka sa Saskatoon kwa Saskatchewan