Kwa Babali

LU TABILE ku mi zibisa kuli ku kala ka magazini ye, ku ka ba ni licinceho ze ñwi mwa magazini ya Tawala ya Mulibeleli. Pili lu si ka talusa kale za licinceho ze ka ba teñi, lu ka talusa lika ze si ke za cinca.

Libizo la magazini ye, Tawala ya Mulibeleli Ye Zibahaza Mubuso wa Jehova, ha li na ku cinca. Kacwalo Tawala ya Mulibeleli i ka zwelapili ku lumba Jehova sina yena Mulimu wa niti ni ku omba-omba batu ka taba ye nde ya Mubuso wa hae. Litaba ze fa makepe 5 ku isa 9 li talusa se u li sona Mubuso wo ni kuli u ka taha lili. Tawala ya Mulibeleli i ka zwelapili ku susueza batu ku ba ni tumelo ku Jesu Kreste, ku zibahaza niti ya Bibele, ni ku tusa batu ku ziba taluso ya ze ezahala mwa lifasi ku likana ni bupolofita bwa Bibele, sina mo se i ezelize ka lilimo-limo.

Kono cwale ki licinceho mañi ze ka ba teñi? Kashe lu taluse lika ze nca ze tabisa ze ka ba mwa magazini ye ka zwanga hañwi mwa likweli ze talu. *

Hatiso ye ka zwanga hañwi mwa likweli ze talu i ka banga ni litaba ze ka tusa batu ku nahana. Taba ye li “Kana Mwa Ziba?” i ka lwala litaba ze ka lu tusa ku utwisisa makande a mañwi a ñozwi mwa Bibele. Taba ye li “Mu Sutelele ku Mulimu” i ka lu tusa ku ziba ze lu kona ku ituta ka za Jehova mwa litaba ze ñwi ze ñozwi mwa Bibele. Taba ye li “Ze Ba Buza Babali” i ka ba ni likalabo kwa lipuzo ze ba buza batu ba bañata ka za Bibele. Ka mutala, batu ba bañata ba buzanga kuli, “Kana Mubuso wa Mulimu u mwa lipilu za batu?” Mu ka fumana kalabo fa likepe 13.

Ku ka banga ni litaba ze ñwi ze lukiselizwe ku tusa mabasi. Taba ye li “Mwa ku Fumanela Tabo mwa Lubasi” i ka bonisa matata e ba kopani ni ona mabasi a mañwi mi i ka ba ni likuka za Bibele ze bonisa mwa ku tatululela matata ao. Hape ku ka banga ni taba ye li, “Mu Lute Bana Ba Mina,” ye ba ka ikola ku bala bashemi ni bana ba bona. Mi taba ye li “Ku Ba Banca,” i ka bonisa mo ba kona ku balela Bibele ba banca.

Ku na ni litaba ze ñwi hape ze ka fumanehanga mwa hatiso ye ka zwanga hañwi mwa likweli ze talu. Taba ye li “Mu Likanyise Tumelo ya Bona” i ka lu susueza ku likanyisa batu ba ba bulezwi mwa Bibele. Ka mutala, fa makepe 18 ku isa 21, mu ka fumana taba ye susueza ya mupolofita Elia ni mo lu kona ku likanyiseza tumelo ya hae. Taba ye li “Liñolo Le Li Zwa kwa  . . . ” i ka talusa litaba za balumiwa ni ba bañwi ba ba pila mwa libaka ze ñwi za lifasi. Taba ya “Ze Lu Ituta ku Jesu” i ka nyakisisa lituto za matatekelo za Bibele ka nzila ye bunolo.

Lu na ni buikolwiso bwa kuli Tawala ya Mulibeleli i ka zwelapili ku tabelwa ki babali ba ba kuteka Bibele ni ba ba bata ku ziba ze i luta buka ye luli. Lu sepa kuli magazini ye i ka mi tusa ku feza linyolwa la mina la ku bata niti ya Bibele.

BAÑOLI

[Litaluso za kwatasi]