Mu Sutelele ku Mulimu

Ndate Yo Munde ka ku Fitisisa Mateu 3:16, 17

LINZWI la “Ndate” ki le liñwi la manzwi a sikai a hupulisa batu lika ze ñata. Ndate ya lata bana ba hae luli u ba tusa ku hula hande. Ku swanezi Bibele ha i talusa kuli Jehova Mulimu ki ‘Ndate.’ (Mateu 6:9) Kono Jehova ki Ndate ya cwañi? Kuli lu alabe puzo ye, ha lu nyakisiseñi manzwi a na bulezi Jehova ku Jesu ka nako ya kolobezwa. Esi mane manzwi a itusisa ndate kwa bana ba hae a bonisa kuli ki mushemi ya cwañi.

Ibat’o ba mwa October ka 29 C.E., Jesu a ya kwa Nuka ya Jordani kuli a yo kolobezwa. Bibele i lu taluseza ze ne ezahezi, i li: “Jesu h’a kolobelizwe, a pakisa ku zwa mwa mezi; mi ka nako i liñwi, lihalimu la kwaluluhela yena; a bona Moya o swana sina nkwilimba u t’o ina fahalimw’a hae. Mi kwa utwahala linzwi le li zwa kwa lihalimu, le li li: Yo ki mwan’a ka ya latiwa, ye ni katelwa.” * (Mateu 3:16, 17) Manzwi a pabazo ao a na bulezwi ki Jehova ka sibili a lu tusa ku ziba kuli Jehova ki Ndate ya cwañi. Mu lemuhe lika ze talu za na bulezi Jehova ku Mwan’a hae.

Sa pili, Jehova ha na ize “Yo ki mwan’a ka,” ne ku swana inge ya na bulela kuli ‘Ni tabezi hahulu ku ba ni mwana ya cwana.’ Ndate ya lilato u lemuhanga kuli bana ba tokwa ku isezwa mamelelo. Bana ba tokwa ku talusezwa kuli ba ngiwa ku ba ba butokwa mwa lubasi. Mu nahane fela mwa na ikutwezi Jesu, ha na taluselizwe kuli na isezwa pilu ki Ndat’ahe, ku si na taba kuli na sa hulile ka nako yeo!

Sa bubeli, Jehova ha na taluselize Mwan’a hae kuli ki “ya latwa,” na bonisize hande-ndende kuli na lata Jesu. Ndate fo na bulelela mwan’a hae kuli, ‘Na ku lata.’ Ndate yo munde u talusezanga bana ba hae kuli wa ba lata luli. Ku bulelela bana manzwi a cwalo ni ku ba olisa ku ba tusa ku hula hande. Jesu u swanela ku ba ya na tabile luli ku utwa Ndat’ahe ha mu bulelela kuli wa mu lata!

Sa bulalu, Jehova ha na bulezi manzwi a li “ye ni katelwa,” na bonisa kuli na tabela Mwan’a hae. Ku swana fela inge kuli Jehova na bulelela Mwan’a hae kuli, ‘Mwan’a ka, ni tabezi hahulu kuli u ngile muhato wo.’ Ndate ya lilato u talusezanga bana ba hae kuli wa tabela lika ze ba bulela ni ze ba eza. Bana ba ikutwanga ku tiiswa luli ha ba talusezwa ki bashemi ba bona kuli ba katelwa. Ni Jesu na susuelizwe luli ha na utwile kuli Ndat’ahe wa mu katelwa!

Kaniti luli, ha ku na Ndate ya kona ku bapanywa ni Jehova. Kana mwa tabela ku ba ni ndate ya cwalo? Mu zibe kuli mwa kona ku itama silikani ni Jehova. Haiba mu lika ka t’ata ku ituta za hae ni ku eza tato ya hae, u ka nga muhato ni yena. Bibele i bulela kuli: “Mu sutelele ku Mulimu mi u ka sutelela ku mina.” (Jakobo 4:8) Ha ku na nto ni ye kana ye tiisa inge ku ba ni silikani se sinde ni Jehova Mulimu, yena Ndate yo munde ka ku fitisisa!

[Litaluso za kwatasi]