Ku Ituta Niti ka za Lihele ku mi Tusa Cwañi?

BATU ba ba luta kuli lihele ki sibaka sa tukufazo, ba zwelapili ku sinya libizo la Jehova Mulimu ni tulemeno twa hae. Kono niti kikuli, Bibele i bulela kuli Mulimu u ka sinya batu ba ba maswe. (2 Matesalonika 1:6-9) Kono buhali bo bu lukile haki kona kalemeno ka Mulimu ka katuna.

Mulimu ha tamangi batu litaba za buhata mi ha yolisangi misuha. Mane u buza kuli: “Kikuli ni ka tabela lifu ya maswe?” (Ezekiele 18:23) Haiba Mulimu ha tabeli lifu la ya maswe, u kona cwañi ku tabela ku bona batu ba ba maswe ha ba tukufazwa musihali ni busihu ku ya ku ile?

Kalemeno ka katuna ka Mulimu ki lilato. (1 Joani 4:8) Kaniti, “[Muñ’a] Bupilo u na ni musa kwa batu kamukana, za lilato la hae li bonahala kwa misebezi ya hae kamukana.” (Samu 145:9) Mi sa bata Mulimu ku luna kikuli lu mu late ka moyo kaufela.—Mateu 22:35-38.

Se mu Sebeleza Mulimu—Kana ki Sabo ya Lihele Kamba ki Lilato la ku mu Lata?

Tuto ya kuli mioyo ya nyandanga mwa lihele i tahisezanga batu ku saba Mulimu. Ka ku shutana ni mubonelo wo, mutu ya ituta niti ka za Mulimu ni ku mu lata u fitanga fa ku ba ni sabo ye nde ya ku saba Mulimu. Samu 111:10 i bulela kuli: “Makalelo a butali ki ku saba [Muñ’a] Bupilo; ba ba ya ka milao ya hae ba na ni kutwisiso ye nde.” Sabo ye ya ku saba Mulimu haki sabo ya ku ngangama, kono ki sabo ya ku bata ku kuteka Mubupi. I lu tahiseza ku ba ni sabo ye nde ya ku saba ku eza lika ze sa mu tabisi.

Ha mu nyakisise mo ku ituta niti ka za lihele ne ku konezi ku tusa bo Kathleen ba lilimo ze 32 ba ne ba ngongwezi ki milyani ye kola. Ne ba pila bupilo bwa ku lata hahulu mikiti, mifilifili, ku ikolofaza, ni bwa muzamao o maswe. Ne ba itumelezi kuli: “Ne ni talimanga mwanaka wa silimo si li siñwi ni ku nahana kuli, ‘Kono mo ni sweli ku mu nyandiseza! Lika ze ni sweli ku mu eza ni ka yo li cela mwa lihele.’” Bo Kathleen ne ba likile ku tuhela ku itusisa milyani ye kola, kono ne ku palile. Ne ba bulezi kuli: “Ne ni batanga ku ba mutu yo munde, kono lika kaufela mwa bupilo ni mwa lifasi ne li ni tatafalezi hahulu. Ne ni sa boni butokwa bwa ku ba mutu yo munde.”

Cwale bo Kathleen ba kopana ni Lipaki za Jehova. Ba talusa kuli: “Ne ni itutile kuli ne ku si na lihele. Bupaki bwa mwa Mañolo ne bu ni kolwisize cwalo. Ne ni imuluzwi hahulu ki ku ziba kuli ha ni na ku yo cisiwa mwa lihele.” Kono hape ne ba itutile sepiso ya Mulimu ya kuli batu ba ka pila ku ya ku ile fa lifasi le li kenisizwe kwa bumaswe kaufela. (Samu 37:10, 11, 29; Luka 23:43) Ne ba bulezi ka ku makala kuli: “Cwale ni na ni sepo ya luli—ya ku pila ku ya ku ile mwa Paradaisi!”

Kana bo Kathleen ne ba ka kona ku tuhela  ku itusisa milyani ye kola kambe ne ba sa sabi ku cisiwa mwa lihele? Ne ba bulezi kuli: “Ha ne ni utwanga hahulu mambengo a ku itusisa milyani ye kola, ne ni lapelanga ni ku kupa Jehova Mulimu kuli a ni tuse. Ne ni nahananga hahulu mwa ngela likezo ze cwalo ze silafaza, mi ne ni sa lati ku mu swabisa. Na alabile litapelo za ka.” (2 Makorinte 7:1) Sabo ya ku saba ku eza lika za sa tabeli Mulimu ne i konisize bo Kathleen ku tuhela mukwa wa bona wa ku itusisa milyani ye kola.

Kaniti, ku ba ni lilato la ku lata Mulimu ni ku ba ni sabo ye nde ku yena—isiñi sabo ya ku saba ku tukufazwa mwa lihele—ku kona ku lu tusa ku eza tato ya Mulimu kuli lu kone ku ikola tabo ye sa feli. Walisamu na ñozi kuli: “Mbuyoti i fiwa mutu ya saba [Muñ’a] Bupilo, ya zamaya mwa linzila za hae.”—Samu 128:1.

[Mbokisi/Siswaniso se si fa likepe 9]

KI BOMAÑI BA BA KA LUKULULWA MWA LIHELE?

Litoloko ze ñwi za Bibele za lyanganisa ka mo li tolokezi manzwi a mabeli a Sigerike a shutana a Geʹen·na ni Haiʹdes kuli ki linzwi li li liñwi la “lihele.” Mwa Bibele, linzwi la Geʹen·na li ama kwa lifu la ku shwa ku shwelela, ku sina sepo ya zuho. Haili ba ba mwa Haiʹdes, kamba Hades, ba na ni sepo ya ku zusiwa kwa bafu.

Kacwalo, Jesu ha sa shwile ni ku zusiwa, muapositola Pitrosi na kolwisize bateelezi ba hae kuli Jesu na si ka tuhelelwa “mwa sibaka sa ba ba shwile” kamba lihele. (Likezo 2:27, 31, 32; Samu 16:10) Linzwi le li tolokilwe kuli “sibaka sa ba ba shwile” mwa timana ye, ki linzwi la Sigerike la Haiʹdes. Jesu na si ka ya mwa sibaka sa mulilo. Hades, kamba “lihele,” ne li libita. Kono Jesu haki yena a nosi yo Mulimu a lukulula mwa Hades.

Ha i ambola ka za zuho, Bibele i bulela kuli: “Lifu ni lihele za kutisa bafu ba ba ku zona.” (Sinulo 20:13, 14, Bibele ya King James Version) Ku siya “lihele” mukungulu ku ka talusa ku kutiseza bupilo batu kaufela bao Mulimu a atula kuli ba swanela ku zusiwa kwa bafu. (Joani 5:28, 29; Likezo 24:15) Yeo ki sepo ye makalisa luli ya kwapili, ha lu ka bona balatiwa ba luna ha ba zusiwa ku zwa mwa mabita! Jehova, yena Mulimu ya lilato ki yena ya ka ba zusa.