Mu Lute Bana ba Mina Kana mu na ni Muna? Bahulwani ba Josefa ne ba na ni Muna

HA LU nyakisiseñi se ku talusa ku ba ni muna. Kana ku na ni mutu yo muñwi ye mu sa lati bakeñisa kuli ba bañwi ne ba bulezi kuli ki yo munde, wa buheha, kamba u kenile? *— Kona mo ku kona ku bela cwalo haiba mu shwela yo muñwi muna.

Mwa lubasi ku kona ku ba ni muna haiba bashemi ba olisa mwana yo muñwi ku fita yo muñwi. Bibele i bulela za lubasi lo luñwi lo ne lu tahezwi ki butata bo butuna bakeñisa muna. Ha lu nyakisiseñi butata bo ne bu tisizwe ki muna wo ni tuto ye lu kona ku ituta ku ze ne ezahezi.

Josefa ne li mwana wa bu-11 wa Jakobo, mi bahulwani ba Josefa ku bo ndatahe ne ba mu shwela muna. Kana mwa ziba libaka?— Ne li bakeñisa kuli ndat’a bona Jakobo, na olisa Josefa. Ka mutala, Jakobo na ezelize Josefa siapalo se sinde sa mibala-bala. Jakobo na lata hahulu Josefa “kakuli ne li yena mwana wa mwa bucembele bwa hae” mi ne li yena fela ya na pepile ku musali ya na lata hahulu, Rahele.

Bibele i bulela kuli: ‘Bahulwani ba Josefa ha ne ba lemuhile kuli ndat’a bona na lata hahulu Josefa, ba mu toya.’ Mi zazi le liñwi, Josefa a taluseza banabahabo yena kuli, mwa tolo ya hae na lolile kuli kaufela bona, ku kopanyeleza cwalo ni bo ndatahe, ne ba kubami fapil’a hae. Bibele i bulela kuli: “Bahulwani ba hae ba mu nyemela,” mi nihaiba ndatahe na mu omanyize bakeñisa ku talusa za tolo ye cwalo.—Genese 37:1-11.

Nako ye ñwi hamulaho wa fo, Josefa ha na li wa lilimo ze 17, bahulwani ba hae ne ba li kwa sibaka sa kwahule inze ba babalela lingu ni lipuli za lubasi lwa bona. Kacwalo Jakobo a luma Josefa kuli a yo lekula bahulwani ba hae. Kana mwa ziba ze ne  ba lela ku eza buñata bwa bahulwani ba hae ha ba mu bona inz’a taha?— Ne ba lela ku mu bulaya! Kono bahulwani ba hae ba babeli, bo Rubeni ni Juda, ne ba sa lati ku mu bulaya.

Ha ne ku fitile balekisi mwa nzila ku liba kwa Egepita, Juda a li: “Lu mu lekise.” Mi ba eza cwalo. Hamulaho ba bulaya puli ni ku cupwa siapalo sa Josefa mwa mali a yona. Mi hamulaho, ha ne ba izo bonisa siapalo seo ku ndat’a bona, a lila kuli: ‘Sibatana si cile Josefa!’—Genese 37:12-36.

Hamulaho wa nako, Josefa a fita fa ku oliswa ki Faro, mulena wa Egepita. Libaka la na olisezwa kikuli na konile ku talusa litolo ze peli za Faro ka tuso ya Mulimu. Tolo ya pili ne li ya likomu za litole ze 7 ze nde ili ze nunile ze ne latelezwi ki likomu za litole ze 7 za miketa ze otile. Tolo ya bubeli ne li ya makunka a 7 a buloto a mande ni ya makunka a 7 a’ nyanine. Josefa na ize, litolo ze peli zeo ne li talusa kuli, ne ku ka ba ni lilimo ze 7 za kutulo ye nde ili ze ne ka latelelwa ki lilimo ze 7 za tala. Faro a fa Josefa musebezi wa ku kubukanya lico mwa myaha ye 7 ya lico ze ñata ilikuli ba itukiseze myaha ya tala.

Lilimo za tala ha ne li fitile, lubasi lwa Josefa lo ne lu pila kwa sibaka sa kwahule-hule, ne lu tokwa lico. Jakobo a luma bana ba hae ba bahulu ba 10 kuli ba ye kwa Egepita ku yo nga lico. Ne ba izo yema fapil’a Josefa, kono ne ba si ka mu ziba. Ku si na ku itibahaza, Josefa a lika bahulwani ba hae ku bona haiba ne ba sa mu toile, mi a lemuha kuli ne ba inyazize hahulu ka za mo ne ba mu ezelize maswe. Kihona cwale Josefa a itibahaza ku bona. Ku si na ku kakanya, ne ba tabile hahulu ku kopana hamoho hape!—Genese, kauhanyo 40 ku isa kauhanyo 45.

Mu kona ku itutañi ka za muna mwa taba ya mwa Bibele ye?— Muna u kona ku isa kwa matata a matuna, mane nihaiba ku tahisa kuli mutu a holofaze muhabo yena! Ha lu baleñi Likezo 5:17, 18 ni Likezo 7:54-59 ni ku bona muna ze ne u tahisize kuli batu ba eze kwa balutiwa ba Jesu.— Hamulaho wa ku bala taba ye, kana mwa lemuha libaka ha lu swanela ku tokomela kuli lu si ke lwa ba ni muna?—

Josefa na pilile ku fitela a ba wa buhulu bwa lilimo ze 110. Na pepile ni ku uta bana, ba ne ba mu pepezi baikulu, mi hamulaho a ba ni bana ba baikulu. Lwa kona ku kolwa kuli hañata Josefa na ba lutanga kuli ba latane ni kuli ba ambuke muna.—Genese 50:22, 23, 26.

[Litaluso za kwatasi]

Lipuzo:

○ Ku ba ni muna ku talusañi?

○ Muna ne u tahisize kuli bahulwani ba Josefa ba ezeñi?

○ Ki kabakalañi Josefa ha na swalezi bahulwani ba hae?

○ Lu kona ku itutañi kwa likande le?