Mu Sutelele ku Mulimu

Ndatahe Lindiala Exoda 22:22-24

“K I NDATAHE likuzana . . . Ki yena Mulimu wa Ndu ya hae ye kenile.” (Samu 68:5) Manzwi a buyelezwi ao, a na ni tuto ye tuna hahulu ka za Jehova Mulimu ili ye kona ku lu tusa ku sutelela ku yena—wa ziba ze ba tokwa batu ba ba ziyelehile. Se si bonisa kuli Mulimu wa iyakatwa banana ba ba shwezwi ki mushemi wa bona ne si bonahezi hande mwa Mulao wa naa file Maisilaele. Ha lu nyakisiseñi timana ya pili ya mwa Bibele ye bulela za “lindiala,” ye fumaneha kwa Exoda 22:22-24.

Mulimu u lemusa kuli: “Mu si ke mwa swenya . . . ndiala.” (Timana 22) Ye, ne si kupo ya kuli batu ba kone ku tusa banana ba ne ba nyanda bakeñisa kuli ne ba shwezwi ki mushemi wa bona, kono nee li taelo ye nee zwa ku Mulimu. Mwanana ya naa shwezwi ki ndatahe naa si na mutu wa ku mu babalela ni ku mu batela ze tokwahala za kwa mubili, kacwalo naa kona ku nyandiswa ki ba bañwi. Ha ku na ya naa swanela ku “swenya” mwanana ya cwalo ka nzila ifi kamba ifi. Mwa litoloko ze ñwi za Bibele, linzwi la ku “swenya” li tolokilwe kuli ku “nyandisa,” ni ku “itusisa maswe.” Ku foseza mwanaa ndiala nee li taba ye tuna mwa meeto a Mulimu. Foso ye cwalo nee li ye tuna cwañi ku Mulimu?

Mulao u ekeza kuli: “Ha u ka ba swenya mi ba huweleza ku Na, ni ka utwa mihuwelezo ya bona.” (Timana 23) Mwa timana 22, taba yeo i itusisa linzwi le li talusa batu ba bañata la “mu”, mi mwa timana 23, i itusisa linzwi le li talusa mutu a li muñwi la “u.” Mutu a li muñwi hamohocwalo ni batu ba bañata ne ba tokwa ku kuteka mulao wa Mulimu wo. Jehova naa bona; naa teeleza lindiala, mi naa itukiselize ku ba tusa ka nako ye ne ba itilelela ku yena.—Samu 10:14; Liproverbia 23:10, 11.

Kono cwale ki nto mañi ye nee kona ku ezahala haiba mutu yo muñwi a foseza ndiala, ili ku ezisa mwanana yo kuli a itilelele ku Mulimu? Jehova u bulela kuli: “Buhali bwa ka bu ka tuka, mi ni ka mi bulaya ka lilumo.” (Timana 24) Buka ye ñwi ye talusa za Bibele i bulela kuli pulelo ya kuli: “Buhali bwa ka bu ka tuka, se i talusa luli kikuli ‘ngo ya ka i ka cisa,’ ili mubulelelo wa swanisezo o talusa buhali bo butuna.” Mu lemuhe kuli Jehova naa si ka fa baatuli ba butu ba mwa Isilaele maata a ku tiisa mulao wo. Mulimu yena ka sibili naa ka atula mutu kaufela ya naa nyandisa mwanana ya naa sa si na wa ku mu lwanela.—Deuteronoma 10:17, 18.

Jehova haa si ka cinca. (Malaki 3:6) U utwela makeke banana ba ba si na mushemi kamba bashemi. (Jakobo 1:27) Mu sa lika feela ku nyandisa lindiala, mu shemaeta ndataa zona kuli a bonise buhali bo bu lukile. Mutu kaufela ya ka lika ku nyandisa mwanana ya si na wa ku mu lwanela haa na ku banda “buhali bo bu cisa bwa Muñaa Bupilo.” (Zefania 2:2) Batu ba ba maswe ba ba cwalo ba ka ituta kuli “ku wela mwa mazoho a Mulimu-Ya-Pila, kwa sabisa.”—Maheberu 10:31.