Moya O Kenile Maata E mu Tokwa Mwa Bupilo Bwa Mina

“U SI ke wa ni lelekela kwahule ni pata ya hao; mi u si ke wa ni amuha Moya wa hao o kenile.” (Samu 51:11) Ye nee li yona tapelo ya naa lapezi Mulena Davida hamulaho wa ku eza foso ye tuna.

Davida naa iponelanga maata a moya o kenile mwa bupilo bwa hae. Ha naa sa li mutangana, ne u mu tusize ku bita Goliati, lisole le li sabisa. (1 Samuele 17:45-50) Hape ne u mu konisize ku ñola ze ñwi za lisamu ze nde ka ku fitisisa. Davida naa talusize kuli: “Moya wa Muñaa Bupilo u bulela ka na, Linzwi la hae li fa lilimi la ka.”—2 Samuele 23:2.

Jesu Kreste naa bonisize kuli moya o kenile ne u tusanga Davida. Ka zazi le liñwi, Jesu naa taluselize be ne ba mu teeleza kuli: “Isali yena Davida, ki yena ya bulezi ka Moya o Kenile, a li: Mulena u ize ku Mulenaa ka; U ni ine ku la ka la bulyo, ku isa ha ni ka eza lila za hao sipula sa faa hatela mautu a hao.” (Mareka 12:36; Samu 110:1) Jesu naa ziba kuli Davida naa etelezwi ki moya o kenile ha naa ñola lisamu za hae. Kana moya o kenile wo wa kona ku lu tusa ni luna?

“Mu Kupe, mi mu ka Fiwa”

Mwendi ha mu na ku ñola samu. Kono mu kona ku talimana ni matata a sabisa sina mwa naa sabiseza Goliati. Mu nyakisise mutala wa bo Nasilele. * Bo muunaa bona ne ba ba yubekile ni ku nyala musali wa mwanana. Ne ba ba siyezi likoloti ze ñata, mi ne ba sa ba fangi mali a ku ba tusa ku uta bana ba bona ba basizana ba babeli. Bo Nasilele ba li: “Ne ni swabisizwe hahulu ni ku tompololwa  maswe. Nihakulicwalo, ni ikutwa kuli ku zwa fo ne ba ni siyezi, moya o kenile wa Mulimu u ni tiisize.”

Kana bo Nasilele ne ba libelela ku fiwa moya o kenile ba sa ezi se siñwi? Batili. Ne ba kupanga Mulimu ka zazi ni zazi kuli a ba fe moya wa hae. Ne ba ziba kuli ne ba tokwa ku tiiswa ki Mulimu kuli ba si ke ba saba za kwapili, kuli ba kone ku babalela bana ba bona, ni kuli ba kone ku ikutwa kuli ki ba butokwa. Ne ba mamezi manzwi a Jesu, aa li: “Mu kupe, mi mu ka fiwa; mu bate, mi mu ka fumana; mu ngongote, mi mu ka kwalulelwa.”—Mateu 7:7.

Bo Ngenda ni bona ne ba ikutwa kuli ne ba tokwa moya wa Mulimu kono ili ka mabaka a sili. Ne ba na ni mukwa wa ku zuba kwai ni matokwani. Ne ba ikatalize ku tuhela mukwa wo ka lilimo ze peli, kono ka linako ze ñwi ne ba kutelanga ku zuba. Ba talusa kuli: “Ha mu lisela ku itusisa milyani ye kola, mu katazwa ki minahano. Mi mu utwa mambengo ka zazi ni zazi.”

Bo Ngenda ba zwelapili, ba li: “Kono ne ni bata ku cinca bupilo bwa ka luli kuli ni kone ku sebeleza Mulimu ka nzila ya tokwa. Ne ni likile ku nahananga lika ze nde ze mwa Bibele. Ne ni lapelanga ka taata zazi ni zazi, ku kupa Mulimu kuli a ni fe maata kuli ni pile ka ku lumelelana ni Bibele. Ne ni ziba kuli ne ni sa koni ku tuhela ku zuba ka ili na. Mi ne ni iponezi mwa naa alabezi litapelo za ka Jehova, sihulu ha ne ni ikutwanga ku zwafa hamulaho wa ku kutela ku zuba. Ni lumela kuli moya o kenile wa Mulimu ne u ni file maata a manca; kabesi moya wa hae kabe ne ni si ka kona ku tuhela mukwa wa ka.”—Mafilipi 4:6-8.

Ku Pahama “Inze ba Fufa Sina Mbande”

Sina bo Nasilele ni bo Ngenda, Lipaki za Jehova ba bañata-ñata ba iponezi maata a moya o kenile mwa bupilo bwa bona. Moya o kenile wa Jehova—wa naa itusisize kwa ku bupa lika kaufela—wa kona ku mi fa ona haiba mwa lata. Mulimu wa tabela mi u lakaza hahulu ku mi fa moya wa hae haiba mu u kupa ka taata. Kono kuli mu fiwe moya wo, mu tokwa ku ituta niti ka za hae ni ku eza tato ya hae ka pilu ye na ni niti.—Isaya 55:6; Maheberu 11:6.

Ka tuso ya moya o kenile, mwa kona ku ba ni maata a ku sebeleza Mulimu hande ni ku talimana ni matata a kona ku zuha mwa bupilo bwa mina. Bibele i lu sepisa kuli: “[Jehova] u fa ya katezi maata; mi ya fokola wa mu tiisa. . . . Ba ba sepa Muñaa Bupilo ba fiwa maata a manca; ba pahama inze ba fufa sina mbande; ba mata, mi ha ba katali; ba zamaya, mi ha ba fokoli.”—Isaya 40:28-31.

[Litaluso za kwatasi]

[Manzwi a fa likepe 8]

‘Ne ni lapelanga ka taata zazi ni zazi, ku kupa Mulimu kuli a ni fe maata. Ne ni ziba kuli ne ni sa koni ku tuhela ku zuba ka ili na. Mi ne ni iponezi mwa naa alabezi litapelo za ka’

 [Mbokisi/Maswaniso a fa likepe 7]

ZE NE U PETILE MOYA O KENILE

Mulimu naa itusisize moya o kenile kwa ku bupa lifasi ni lika ze ñwi kaufela. Wa lisamu naa ize: “Muñaa Bupilo, misebezi ya hao ki ye miñata cwañi! Kaufelaa yona i bonahala ku ezwa ka butali; lifasi li tezi maluwo a hao. Ha u li kutiseza moya wa hao, za pila hape.”—Samu 104:24, 30; Genese 1:2; Jobo 33:4.

Moya o kenile ne u susumelize batu be ne ba saba Mulimu ku ñola Bibele. Muapositola Paulusi naa ñozi kuli: “Liñolo kamukana li tahile ka Moya wa Mulimu.” (2 Timotea 3:16) Moya wa Jehova ne u susumelize bañoli ba Bibele kuli ba ñole “Linzwi la Mulimu.”—1 Matesalonika 2:13.

Moya o kenile ne u tusize batanga ba Mulimu ku polofita ze ka ezahala kwapili ka ku nepahala. Muapositola Pitrosi naa talusize cwana: “Bupolofita ha bu si ka bonahala ka ku lata kwa mutu; kono batu ne ba bulela ka taelo ya Mulimu inze ba susumezwa ki Moya o Kenile.”—2 Pitrosi 1:20, 21; Joele 2:28.

Moya o kenile ne u tusize Jesu ni batu ba bañwi be ne ba na ni tumelo ku kutaza taba ye nde ya Mubuso wa Mulimu ni ku eza limakazo. Jesu naa ize: “Moya wa Mulena u fahalimwaa ka, kakuli u ni tozize, kuli ni bulelele babotana Evangeli; u ni lumile ku folisa ba ba lobehile lipilu, ku zibisa ba ba hapilwe kuli ba lukuluhile, ni ba ba shwile meeto kuli ba filwe ku bona, ba ba nyandiswa, ni ba kutise ba lukuluhile.”—Luka 4:18, 19; Mateu 12:28.

 [Mbokisi/Maswaniso a fa likepe 9]

LINZILA ZEO MOYA O KENILE U KONA KU LU TUSA KA ZONA

Moya o kenile wa kona ku mi fa maata kuli mu kone ku hanyeza miliko ni ku tuhela mikwa ye maswe. Muapositola Paulusi naa bulezi kuli: “Mulimu wa sepahala, mi haa na ku lumela kuli mu likwe ki ze mi fita; kono hamoho ni muliko u ka mi fa nzila ya ku zwa ku ona, kuli mu kone ku itiisa ku ona.”—1 Makorinte 10:13.

Moya o kenile wa kona ku mi tusa ku ba ni tulemeno to tu tabisa Mulimu. “Muselo wa Moya ki lilato, ni tabo, ni kozo, ki pilu-telele, ni musa, ni bunde, ki busepahali, ni ku ishuwa, ni buiswalo.”—Magalata 5:22, 23.

Moya o kenile wa kona ku mi fa maata a ku tiyela miliko. “Mwa linto kamukana ni na ni maata kabakala kuli ku na ni ya ni tiisa.”—Mafilipi 4:13, NW.