1

 Ki Kabakalañi ha lu Swanela ku Lapelanga?

TAPELO. Mwa Bibele ku na ni litaba li sikai ze lu tahisezanga takazo ye tuna ya ku bata ku ziba lika. Mu nyakisise lipuzo ze 7 ze buziwanga hañata ka za tapelo, mi ha lu nyakisiseñi hamoho likalabo za Bibele. Litaba ze, li lukiselizwe ku mi tusa ku lapelanga—ku kalisa ku lapelanga kamba kuli litapelo za mina li alabiwange.

MWA lifasi kaufela, batu ba lizo ze shutana-shutana ni ba bulapeli kaufela ba lapelanga. Ba lapelanga ba nosi kamba ka likwata. Ba lapelelanga mwa likeleke. Ba kana ba itusisa masila a ku yala fafasi fa ku lapelela, lifaha za rozari, litapelo ze ñozwi fa tusipi, maswaniso a bulapeli, libuka za litapelo, kamba litapelo ze ñozwi fa tubala to tu pahekiwa fa limota.

Batu ba shutana ni libupiwa ze ñwi za fa lifasi bakeñisa kuli bona ba lapelanga. Kono lwa swana ni lifolofolo mwa linzila ze ñwi. Ka ku swana ni lifolofolo, lu tokwa lico, moya, ni mezi. Lwa pepiwanga, ku pila, ni ku shwa. (Muekelesia 3:19) Kono ki batu feela ba ba lapelanga. Kabakalañi?

Mwendi kalabo ye bunolo ki ya kuli lu tokwa ku lapelanga. Esi mane tapelo i ngiwa ku ba nzila yeo batu ba ambolisananga ka yona ni milimu ya bona. Bibele i bonisa kuli ne lu bupilwe ni takazo ya lika ze cwalo. (Muekelesia 3:11) Jesu Kreste nako ye ñwi na bulezi kuli: “Mbuyoti ki ya ba ba ikutwa bubotana mwa pilu.”—Mateu 5:3.

Miyaho ya bulapeli ni lika ze pangilwe ze ba itusisa mwa bulapeli ni nako ye ba tandanga ku lapela li bonisa kuli batu ba “ikutwa bubotana mwa pilu” kamba kuli ba tokwa manzwi a Mulimu. Batu ba bañwi ba itinganga ku bona beñi kamba kwa batu ba bañwi kuli ba kolwise takazo ya bona ya za bulapeli. Kana ha mu ikutwangi kuli batu ha ba koni ku mi tusa? Ha lu na maata, lu pilanga nako ye kuswani, mi ha lu koni ku ziba ze ka ezahala kwapili. Ki mutu feela ya na ni butali hahulu, ya maata ka ku fitisisa, ya pila kamita ya kona ku lu tusa. Ki butokwi mañi luli bwa za Mulimu bo bu lu susuezanga ku lapela?

Mu nahanisise taba ye: Kana mu kile mwa nyolelwa ku fumana ketelelo, butali, kamba likalabo kwa lipuzo ze bonahala kuli ha ku na mutu ya kona ku li alaba? Kana mu kile mwa ikutwa kuli mu tokwa ku omba-ombiwa ha mu utwiswa butuku ki nto ye ñwi ye ezahezi, ha mu tokwa ketelelo kuli mu eze katulo ye taata hahulu, kamba ha mu tokwa ku swalelwa bakeñisa kuli mu ikutwa bufosi?

Ka ku ya ka Bibele, ao kaufela ki mabaka a utwahala ha lu swanela ku lapelanga. Bibele ki buka ye itingwa ha lu ama kwa taba ya tapelo, mi i na ni litapelo ze ñata za baana ni basali ba bañata ba ba sepahala. Ne ba kupanga ku tiiswa, ku etelelwa, ku swalelwa lifoso, ni kuli ba fumane likalabo kwa lipuzo ze taata hahulu.—Samu 23:3; 71:21; Daniele 9:4, 5, 19; Habakuki 1:3.

Litapelo za mwa Bibele ne li shutana-shutana kono ne li swana ka nzila ye ñwi. Kuli litapelo za bona li alabiwe, batu ba ne ba lapelanga ne ba na ni nto ya butokwa, ili yona ye ba si na kamba ye ba sa kuteki batu ba mwa lifasi la kacenu. Ne ba ziba ye ne ba swanela ku lapela.