Butata bo bu Tahisa Kuli lu be ni Sepo

“Mwa mazazi a maungulelo, ku ka taha linako ze taata.”—2 TIMOTEA 3:1.

KANA mu kile mwa utwa kamba ku bona kezahalo ye ñwi kwa likezahalo ze maswe ze latelela?

● Butuku bo bu bulaya bu yundisa batu ba bañata-ñata.

● Lukupwe lu bulaya mianda-nda ya batu.

● Zikinyeho i bulaya batu ba ba eza bolule-lule, mane ni ku sinya mandu a batu ba bañata.

Fa makepe a tatama, mu ka bona litaba za niti ze lu tokwa ku nahanisisa ili ze sweli ku ezahala mwa lifasi, ze swana ni ze bonisizwe kwa makalelo a taba ye. Hape, mu ka lemuha kuli Bibele ne i polofitile kuli miinelo ye cwalo ne i ka bonahala mwa nako ye bizwa kuli “mazazi a maungulelo.” *

Mulelo wa litaba ze, haki ku mi kolwisa kuli lu pila mwa lifasi mo ku na ni butata bo bu shutana-shutana. Mwendi mu sweli mwa iponela butata bo. Kono li lukiselizwe ku mi fa sepo. Li ka mi bonisa kuli bupolofita bo bu 6 bo bu sweli ku talelezwa ki sisupo sa kuli “mazazi a maungulelo” a tuha a fela. Mwa litaba ze hape ku ka nyakisiswa mibonelo ya batu ye atile ya ku hana bupaki bwa kuli mazazi a maungulelo a tuha a fela; mi hape mu ka fumana mabaka a utwahala ha mu swanela ku ba ni sepo ya kuli lika li ka ba hande kwapili.

[Litaluso za kwatasi]