Ze ba Buza Babali . . .

Kana Bakreste kaufela ba ba sepahala ba ka ya kwa lihalimu?

▪ Batu ba bañata se ba balile manzwi a omba-omba a Jesu a li: “Mulimu u latile lifasi hahulu, mane u li file Mwanaa hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Kana Jesu naa talusa kuli balapeli kaufela ba ba sepahala ku Ndatahe, yena Jehova Mulimu ba ka ya kwa lihalimu ku yo ikola bupilo bo bu sa feli ili bwa tabo?

Mu nahanisise manzwi a latelela a naa bulezi Jesu a li: “Ha ku na ya kambamezi kwa lihalimu, konji ya tulukile kwa lihalimu, yena Mwanaa mutu ya inzi mwa lihalimu.” (Joani 3:13) Manzwi ao a bonisa kuli balapeli ba ba sepahala ba mwa linako za kwamulaho ba ba cwale ka Nuwe, Abrahama, Mushe, ni Davida ne ba si ka ya kwa lihalimu. (Likezo 2:34) Haiba ki cwalo, kaufelaa bona ne ba ile kai? Ka bukuswani: Balapeli ba ba sepahala ba, ba inzi mwa mabita, ba itobalezi mwa lifu, mi ha ku na se ba ziba, ba libelela feela ku zusiwa.—Muekelesia 9:5, 6; Likezo 24:15.

Jesu ki yena wa pili ku bulela kuli batu ba bañwi ba ka yo pila mwa lihalimu ba sa shwa feela. Jesu naa bulelezi balutiwa ba hae kuli na ka yo ba lukiseza sibaka kwa lihalimu. (Joani 14:2, 3) Taba yeo ne i li ye sienyi kwa batu ba Mulimu. Muapositola Paulusi naa talusize kuli, Jesu ha saa shwile, ha saa zuhile, ni ha saa kambamezi kwa lihalimu, naa ‘kwalulezi balutiwa ba hae nzila ye nca, ye pila’ ili nzila yeo mutu ufi kamba ufi naa si ka zamaya kale ku yona.—Maheberu 10:19, 20.

Kana taba ye i talusa kuli ku zwa feela honafo, batu kaufela ba ba sepahala ba ka ya kwa lihalimu? Batili, kakuli ba ba zusiwa ni ku kambamela kwa lihalimu ba na ni musebezi wo ba swanela ku yo peta ili wo filwe feela kwa batu ba sikai. Busihu bwa mafelelezo ha na li ni baapositola ba hae, Jesu naa ba bulelezi kuli ba ka ‘ina fa litulo za bulena, ni ku atula’ mwa mubuso wa lihalimu. Kacwalo, musebezi wo ba ka peta ki wa ku busa ni Jesu mwa lihalimu.—Luka 22:28-30.

Kwandaa baapositola feela, batu ba bañwi hape ba ka fiwa musebezi wo munde wo. Mwa pono, muapositola Joani naa boni Jesu kwa lihalimu ni sikwata sa batu ba ba zusizwe ili ba ba taluswa sina ‘malena ni baprisita ba ba ka busa lifasi.’ (Sinulo 3:21; 5:10) Muapositola Joani naa boni batu ba bakai? Mwa mubuso ufi kamba ufi, ki batu ba sikai feela ba ba kona ku busa. Ki nto ye swana ni Mubuso wa kwa lihalimu. Jesu, ngunyana ya Mulimu, u ka busa ni ba 144,000 “ba ba liuluzwi mwahalaa batu.”—Sinulo 14:1, 4, 5.

Kaniti,144,000 ki palo ye nyinyani ha i bapanywa ni palo ya batu ba ba sepahala kaufela, ba mwa miteñi ya kale ni mwa miteñi ya cwale. Kono taba ye ya utwahala kakuli batu ba 144,000 ba zusezwa kwa bupilo bwa lihalimu ili ko ba fiwa musebezi wa butokwa hahulu. Lu nge kuli mu bata ku yaha ndu, kana ne mu ka biza bayahi ba ba cuukile kaufela ili ba ba fumaneha mwa silalanda sa mina? Kutokwa. Mu ka tokwa feela ba ba ka to eza musebezi wo. Ka ku swana, haki batu kaufela ba ba sepahala ba ba ketiwa ki Mulimu kuli ba fiwe tohonolo ye ipitezi ya ku busa ni Kreste mwa lihalimu.

Mulonga wo wa mwa lihalimu u ka taleleza lika zeo Mulimu naa lelile ku ezeza batu kwa makalelo. Jesu ni ba ka busa ni bona ba 144,000 ba ka etelela mwa ku fetula lifasi ku li bisa paradaisi, ili mo sikwata sa batu ba ba sepahala ba ka pila kamita ka tabo. (Isaya 45:18; Sinulo 21:3, 4) Ba ba ka pila kamita ba kopanyeleza batu ba ba hupulwa ki Mulimu, ili ba ba ka zusiwa.—Joani 5:28, 29.

Mulapeli kaufela ya sepahala wa Jehova—ibe kuli ki wa mwa miteñi ya kale kamba ki wa mwa miteñi ya cwale—wa kona ku amuhela mpo ya bupilo bo bu sa feli. (Maroma 6:23) Ki batu ba sikai feela ba ba ka amuhela mpo ya ku pila mwa lihalimu ilikuli ba pete musebezi wa butokwa, mi buñata bwa batu ba ka pila mwa paradaisi fa lifasi.