Ne ba Bizwa Kuli “Bana ba Mushika”
Mu Lute Bana Ba Mina
Ne ba Bizwa Kuli “Bana ba Mushika”
KA NAKO ye ku nelanga pula ya simbwewewe, mwendi mwa utwanga mushika ha u palakata. Kana mu kile mwa sabiswa ki mushika?— * Jesu u biza ba babeli kwa balateleli ba hae kuli ki “Bana ba Mushika.” Ha lu nyakisiseñi libaka ha ba biza cwalo.
Balateleli ba babeli ba Jesu ba, ki Jakobo ni Joani. Ki mutu ni munyanaa hae, bana ba Zebedea ni musalaa hae Salome. Ku bonahala kuli Salome ki munyanaa Maria, mahe Jesu. Kona kuli Jesu ne li wahabo Jakobo ni Joani, mi mwendi ne ba li balikani ba bande ka nako ye ne ba hula.
Zebedea ki ndui, mi Jakobo ni Joani ni bona ki mandui. Jakobo ni Joani ki ba bañwi ba pili ba keta Jesu kuli ba be balutiwa ba hae. Jesu a ba mema, ba tuhela musebezi wa bona wa bundui ni ku latelela Jesu. Jesu hamulaho u keta ba 12 kwa balateleli ba hae kuli ba be baapositola ba hae. Jakobo ni Joani ki ba bañwi ba balateleli ba ba ketiwa.
Likwelinyana pili Jesu a si ka bulaiwa kale, yena ni baapositola ba hae ne ba zamaya mwa sibaka sa malundu se si kwa Samaria. Se ku ya ku unsufala mi kaufela bona ba topwezi. Kono batu ba mwa Samaria ba bulela kuli ha ba lati kuli Jesu ni baapositola ba hae ba lobale mwa Samaria. Kana mwa ziba libaka?— Ha lu boneñi libaka.
Jesu ni baapositola ba hae ki Majuda, mi buñata bwa Majuda ha ba na sishemo kwa Masamaria. Jesu yena wa shutana ni Majuda ba bañwi. Jesu u sebelisana ni Masamaria ka sishemo, ili mutala o ba swanela ku likanyisa bo Jakobo ni Joani. Kono Jakobo ni Joani ba nyemela Masamaria ba ne ba si ka ba amuhela hande, mi ba buza Jesu kuli: ‘Kana wa lata kuli lu bulelele mulilo ku zwa kwa lihalimu u to ba bulaya?’ Mu nahana kuli Jesu naa alabile cwañi?— Jesu a ba taluseza kuli taba ye ba bulela i fosahalile hahulu! Honafo Jesu ni balutiwa ba hae ba funduka. Jakobo ni Joani ne ba tokwa ku ituta ze ñata ka za sishemo.
Butata bo buñwi bo butuna bo ba na ni bona bo Jakobo ni Joani ki bwa ku bata ku ba ba pili, ba bata ku ba ba butokwa hahulu. Nakonyana pili Jesu a si ka shwa kale, Jakobo ni Joani ba luma bo ma bona kuli ba yo bulelela Jesu kuli: “U bulele kuli bana ba ka ba babeli ba, ba ku ine yo muñwi ku la bulyo ni yo muñwi ku la nzohoto, mwa Mubuso wa hao.” Baapositola ba bañwi ba 10 ba filikana ha ba utwa ze ba ezize bo Jakobo ni Joani. Kana ni mina ne mu ka filikana?—
Mwendi ne mu ka filikana. Ha lu tabelangi batu ha ba bata ku ba ba pili kamba ku lika ku bonisa kuli bona ki ba butokwa hahulu. Hamulaho, Jakobo ni Joani ba lemuha kuli ze ba ezize li fosahalile, mi ba cinca mubonelo wa bona. Ba fetuha ku ba baapositola ba ba lilato ni ba ba sishemo. Lu kona ku itutañi fa taba ye?—
Mutala wa Jesu u lu luta kuli lu swanela ku bonisa ba bañwi sishemo. Jesu naa sebelisana hande ni batu, ibe kuli ki baana, basali, ni banana. Kana mu ka zwelapili ku lika ka mo mu konela kaufela ku hupula ni ku latelela mutala wa Jesu?—
Mu bale mwa Bibele ya mina
Mateu 27:55, 56; Mareka 15:40, 41
Joani 4:4-15, 21-26; Luka 9:51-55
Mateu 20:20-24; Mareka 10:35-37, 41
[Litaluso za kwatasi]
^ para. 3 Haiba mu sweli ku bala ni mwanana, mutila o mu ka fumana hamulaho wa puzo ni puzo, u mi hupulisa kuli mu yeme ni ku susueza mwanana ku alaba.
