Batu Ba Bañwi Ba Li Armagedoni Ki Nto Mañi?

“Mi za ba kubukanyeza hamoho kwa sibaka se si bizwa Armagedoni ka Siheberu.”—SINULO 16:16.

MU NAHANANGAÑI ha mu utwa linzwi la “Armagedoni”? Mwendi linzwi leo li mi tahisezanga ku nahana ka za kozi ye tuna. Linzwi leo niha li fumaneha feela hañwi mwa Bibele, li itusiswanga hahulu ki babihi ba makande ni ba bahulu ba bulapeli.

Kana mihupulo ye tumile ka za Armagedoni ya swalisana ni ze i luta Bibele? Ki kwa butokwa ku ziba kalabo kwa puzo yeo. Kabakalañi? Kakuli ku ziba niti ka za Armagedoni ku ka mi lukulula kwa sabo ye sa swalehi hande, ni ku mi tusa ku ba ni mubonelo o munde ka za kwapili, mi ku ka ama mo mu ngela Mulimu.

Mu nyakisise lipuzo ze taalu ze latelela mi mu bapanye mihupulo ye atile ye ba na ni yona batu ka za Armagedoni ni ze i luta Bibele luli ka za teñi.

  1. KANA ARMAGEDONI KI KOZI YE KONA KU TAHISWA KI BATU?

Babihi ba makande ni babatisisi ba litaba hañata ba itusisanga linzwi la “Armagedoni” ku talusa likozi ze tahisizwe ki batu. Ka mutala, Ndwa ya Lifasi Kaufela ya Pili ni ya Bubeli li taluswanga sina Armagedoni. Hamulaho wa lindwa ze peli zeo, batu kaufela mwa lifasi ne ba ikalezwi kuli naha ya America ni naha ya Soviet Union ne li ka itwanisa ka ku itusisa lilwaniso za nyukiliya. Mitai ya makande ne i bizize ndwa ye ne libelelwa yeo kuli “Armagedoni ya nyukiliya.” Mazazi a, babatisisi ba ba ikalezwi kuli ku silafala kwa lifasi ku ka tahisa kuli lifasi li cise hahulu, ba sweli ku zibahaza ka za “Armagedoni ya ku cisa kwa lifasi.”

Se ba talusa ka muhupulo wa bona: Batu ba nahana kuli ba na ni maata a ku zamaisa lika kaufela ze pila fa lifasi ni ze ka ezahala mwa lifasi kwapili. Haiba mibuso i palelwa ku nga mihato ye butali, lifasi le, li ka sinyeha ku ya ku ile.

Ze i luta Bibele: Mulimu haa na ku lumeleza batu ku sinya lifasi. Bibele i lu sepisa kuli Jehova * naa si ka “bupa fela” lifasi. Kono naa li bupezi kuli “li yahiwe.” (Isaya 45:18) Mwa sibaka sa ku lumeleza batu ku sinya lifasi, Mulimu u ka “yundisa ba ba sinya lifasi.”—Sinulo 11:18.

2. KANA ARMAGEDONI KI KOZI YA KA TAHO?

Babihi ba makande fokuñwi ba itusisanga linzwi la Armagedoni ha ba talusa likozi za ka taho. Ka mutala, mwa silimo sa 2010 piho ye ñwi ne i bulezi ka za “‘Armagedoni’ ya mwa Haiti.” Ne i talusa ka za manyando, ku sinyeha kwa lika ni batu ba bañata ba ne ba bulailwe ki zikinyeho ye ne ezahezi mwa naha yeo. Babihi ba makande ni bapangi ba mafilimu ba itusisanga linzwi le li swana leo ku talusa likezahalo ze se ezahezi kale kamba ze ba ikalezwi kuli li ka ezahala kwapili. Ka mutala, ba itusisize linzwi la “Armagedoni” ku talusa sinyeho ye kona ku ba teñi haiba sika se si zwelela kwa lihalimu si wela fa lifasi.

Se ba talusa ka muhupulo wa bona: Armagedoni ki kezahalo ya ka sipundumukela ye bulaya batu ba ba si na mulatu. Ibato ba kuli hakuna se mu kona ku eza ilikuli mu kone ku isileleza ku yona.

Ze i luta Bibele: Armagedoni haki kozi ya ka sipundumukela ye ka bulaya batu ka ku sa keta. Kono fa Armagedoni ku ka yundiswa feela batu ba ba maswe. Bibele i sepisa kuli ona cwale-cwale fa, “ya maswe haa sa na ku ba teñi.”—Samu 37:10.

3. KANA MULIMU U KA SINYA LIFASI FA ARMAGEDONI?

Buñata bwa balapeli ba lumela kuli ku ka ba ni ndwa ya mafelelezo ya mwahalaa bunde ni bumaswe ili ye ka sinya lifasi. Patisiso ye ne ezizwe mwa naha ya United States ki katengo ka Princeton Survey Research Associates ne i bonisize kuli 40 pesenti ya ba bahulu ne ba lumela kuli lifasi li ka fela ka “ndwa ya Armagedoni.”

Se ba talusa ka tuto ya bona: Batu ne ba si ka bupelwa ku pila ku ya ku ile, mi lifasi ne li si ka bupelwa ku ba teñi ku ya ku ile. Mulimu naa bupile batu ka mulelo wa kuli nako ye ñwi ba shwe.

Ze i luta Bibele: Bibele i bulela ka ku utwahala hande kuli Mulimu naa “tiisize mitomo ya lifasi, kuli li si ke la zikinyeha ni hanyinyani.”  (Samu 104:5) Bibele i bulela ka za bayahi ba lifasi kuli: “Ba ba na ni niti ba ka yola sanda sa naha, ni ku yaha mwateñi ku ya ku ile.”—Samu 37:29.

Kwa iponahalela hande kuli Bibele ha i lumelelani ni mihupulo ye atile ye ba na ni yona batu ka za Armagedoni. Kamukwaocwalo, niti ka za Armagedoni ki ifi?

[Litaluso za kwatasi]