Kana ku na ni Bulapeli bo bu Kona ku Sepiwa?

Haiba ne mu kile mwa swabiswa ki bulapeli bo buñwi, mu kana mwa fumana taata ku sepa bulapeli bufi kamba bufi. Kono mu zibe kuli ku na ni bulapeli bo mu kona ku sepa. Jesu ha naa li fa lifasi, naa onga-ongile sikwata sa balateleli ba ba sepahala ni ku ba luta ku pila ka ku lumelelana ni likuka za Mulimu. Ni kacenu, ku sa na ni batu ba ba lika ka taata ku pila ka ku lumelelana ni likuka za mwa Bibele. Mu kona ku ba fumana kai?

Bo Estelle, ba ba bulezwi mwa taba ye ñwi ya kwa makalelo, ba bulela kuli: “Ne ni kalile ku utwisisa ze i luta Bibele, ha ni kala ku ituta ni Lipaki za Jehova. Hamulaho wa nakonyana, ne ni fitile fa ku utwisisa liñolo la Joani 8:32 le li bulela kuli: ‘Mu ka ziba niti, mi niti i ka mi lukulula.’”

Bo Ray ba ba bulezwi mwa taba ye ñwi ya kwa makalelo ni bona ba bulela kuli: “Ku ituta Bibele ni Lipaki za Jehova, ne ku ni tusize ku ziba kuli Mulimu haki yena ya tahiseza batu manyando. Ne ni tabile hahulu ku ziba kuli nihaike kuli Mulimu u na ni libaka le linde ha tuhelela bumaswe ku ba teñi ka nako ya cwale, u sepisa ku bu felisa hona cwale-cwale fa.”

Ku taata ku eza ze lukile bakeñisa kuli buñata bwa batu mwa lifasi ba eza lika ze maswe. Nihakulicwalo, kwa konahala ku eza ze lukile. Batu ba bañata ba tabela hahulu ku tusiwa kuli ba utwisise ze i luta Bibele ilikuli ba kone ku pila ka ku lumelelana ni zona. Ki lona libaka Lipaki za Jehova ha ba zamaisanga lituto za Bibele za mwa ndu kwa batu ba bañata-ñata mwa lifasi kaufela ku si na ku ba lifisa. Sunda ni sunda, batu ba bañata-ñata ba sweli ku ituta ze i luta Bibele luli, mi ku eza cwalo ku tahisa kuli ba sutelele ku Mubupi wa bona, ni ku ituta ku pila bupilo bo bunde bwa tabo. *

Ha mu ka kopana ni lipaki za Jehova, mu ba buze libaka ha ba sepile bulapeli bwa bona. Mu tatube lituto za bona ni mupilelo wa bona. Kihona mu ka ikatulela haiba ku na ni bulapeli bo mu kona ku sepa.

[Litaluso za kwatasi]

[Manzwi a fa likepe 7]

Mu buze Lipaki za Jehova libaka ha ba sepile bulapeli bwa bona