LIKALABO KWA LIPUZO ZA BIBELE

Ki bo mañi ba ba ka ya kwa lihalimu, mi ki kabakalañi?

Batu ba bañata-ñata ba nyolelwa ku ya kwa lihalimu. Jesu naa bulezi kuli baapositola ba hae ba ba sepahala ne ba ka yo pila kwa lihalimu. Pili Jesu a si ka shwa kale, naa ba sepisize kuli yena ni Ndatahe wa kwa lihalimu, ne ba ka ba lukiseza sibaka.—Mu bale Joani 14:2.

Ki kabakalañi batu ba bañwi ha ba zusezwa ku yo pila kwa lihalimu? Ba ka yo ezañi kwateñi? Jesu naa bulelezi baapositola ba hae kuli ba ka yo ba malena mi ba ka busa lifasi.—Mu bale Luka 22:28-30; Sinulo 5:10.

Kana batu ba bande kaufela ba yanga kwa lihalimu?

Mwa linaha ze ñata ki batu ba sikai feela ba ba busanga. Bakeñisa kuli Jesu u zusa batu kuli ba ye kwa lihalimu kuli ba yo busa lifasi, lu libelela kuli palo ya batu bao i ka ba feela ye likani. (Luka 12:32) Bibele i bonisa palo luli ya batu ba ba ka busa ni Jesu.—Mu bale Sinulo 14:1.

Batu ba ba ya kwa lihalimu haki bona feela ba ba ka fiwa mupuzo. Ku na ni batu ba bañwi hape ba ba sepahala ba ba ka busiwa ki Mubuso wa Jesu, mi ni bona ba ka ikola bupilo bo bu sa feli fa lifasi le li li paradaisi. (Joani 3:16) Ba bañwi kwa batu bao ba ka kena mwa Paradaisi ka ku punyuha sinyeho ya muinelo wa lifasi le. Ba bañwi bona ba ka kena mwa paradaisi ka ku zusiwa kwa bafu.—Mu bale Samu 37:29; 72:6.

Kuli mu bale litaba ze ñata, mu bone kauhanyo 8 ya buka ye, Bibele i Lutañi Luli?, ye hatisizwe ki Lipaki za Jehova

Mwa kona ku ikungela yona fa Webusaiti ya www.dan124.com

[Siswaniso se si fa likepe 16]

Jesu u lukisize sibaka kwa lihalimu kuli ba bañwi kwa balateleli ba hae ba yo pila kwateñi. Kana mwa ziba ze ba ka yo eza teñi ko?