Bamata ka lubilo lolukomokisa, mi kuutwahala mulumo wa lipizi zetakisa! Lipizi zeene zemaata ni bapahami bazona litaluswa ka kuutwahala hande mwa Bibele kuli limata ka lubilo lolutuna luli! Pizi yapili ki yesweu—mupahami wayona ufilwe kanya, ili mulena yomunca yaapesizwe kuwani ya bulena. Mwamulaho wahae kutaha pizi yefubelu sina mulilo, ili yeo mupahami wayona ufilwe maata a kuzwisa kozo mwa lifasi kaufela. Cwale kwataha pizi yabulaalu, yensu sina busihu, ili yeo mupahami wayona unanulezi likala mwahalimu sina yona zibahazo yetomohisa pilu ya kutaela kwa lico. Pizi yabune ki yeseta, mi iswaniseza matuku ni lika zeñwi zekona kutahisa butata, ili lifu. Mi libita, sibaka mokuyanga batu kaufela habashwa, litaha ka bubebe hahulu, mi lisweli kufeza batu babañata luli!—Sinulo 6:1-8.

“Lwapili hanibala ka za bapahami babane balipizi, nenisabile hahulu! Neniikutwile kuli Lizazi la Katulo nelisutelezi ni kuli bakeñisa kuli nenisika itukisa, nenisike napunyuha.”—Bo Crystal.

“Nenikomokisizwe hahulu ki bapahami babaipitezi balipizi za mibala yeshutana-shutana. Hase niutwisisize taluso ya pono yeo, nakala kuutwisisa lika kaufela.”—Bo Ed.

Kana mwalemuha mone baikutwezi bo Crystal ka za bapahami babane ba lipizi babatalusizwe mwa buka ya Sinulo? Kamba kana muikutwa sina mone baikutwezi bo Ed? Kusina taba ni momuikutwela, likezahalo zekomokisa za bapahami babane ba lipizi, ki yeñwi ya likezahalo zezibahala hahulu zetalusizwe mwa buka ya Sinulo, yona buka ya mafelelezo mwa Bibele. Kana mwaziba kuli mwakona kutusiwa hamuutwisisa pono yeo? Ka mukwa ufi? Mulimu usepisa kuli mwakona kufumana tabo ka kubala, kuituta, ni kupila ka kulumelelana ni lika zeñozwi mwa buka yeo ya bupolofita.—Sinulo 1:1-3.

Babañwi niha basabiswa ki pono ya bapahami babane ba lipizi, mina hamutokwi kusabiswa ki yona. Niti kikuli, batu babañata balemuhile kuli pono ye, itiisa tumelo yabona mi mane ibafa sepo yende ya zekaezahala kwapili. Mwendi ni mina yakona kumitusa! Shangwe muzwelepili kubalanga ka za pono ye.