Kaizeli yomunca yabizwa Nicole yapila kwa Colombia, utalusa kuli: “Nalata Ndu yaluna ya Mubuso! Ki sona sibaka konikona kuba ni lubasi lwaka lwa kwa moya.” Kana ni mina ki mona momuikutwela cwalo?

 Mwa lifasi kaufela, Lipaki za Jehova bakopanelanga mwa Mandu A Mubuso abato ba 63,000. Miyaho ye ilutusanga kuli lulapele hande Mulimu. Kono hape ilutusanga mwa linzila zeñata. Muzwale David yali paina wa kamita yapila kwa Colombia, utalusa kuli: “Ndu yaluna ya Mubuso ikutekehisa Mulimu waluna. Batu babañata habatahanga lwapili kwa mikopano yaluna, bakomokanga kubona molubabalelelanga muyaho waluna kuli uzwelepili kuba mwa muinelo omunde.” Taba yeo haiikezahalelangi feela. Lubelekanga ka taata kukenisa ni kubabalela Mandu aluna a Mubuso. Luezanga cwañi cwalo?

 Batu babali mwa liputeho zeitusisa Ndu ya Mubuso yeo ki bona babanani buikalabelo bwa kuibabalela. Kuli musebezi wo upetiwe, mizwale ni likaizeli bakenisanga Ndu yabona ya Mubuso kamita. Hape baezanga lika zeñwi kuli basileleze muyaho wabona ni kulukisa lika zesinyehile feela hanyinyani.

 Ba Liluko Lelitalima za Musebezi wa Kuyaha baketanga mizwale kuli basebeze sina baluti babatalima za misebezi ya kubabalela miyaho, ilikuli batuse liputeho kuzwelapili kubabalela Mandu abona a Mubuso. Muzwale ni muzwale yali muluti yatalima za misebezi ya kubabalela miyaho ufiwanga kubabalela Mandu A Mubuso a 6 kuisa ku alishumi. Upotelanga liputeho ni kuluta bahasanyi mwakubabalelela Mandu abona a Mubuso. Hamulaho wa lilimo zetaalu, utatubanga muyaho ni muyaho kuli abone haiba u mwa muinelo omunde kamba kuli utokwa kulukiswa.

 Mizwale ni likaizeli baluna baitebuhanga lituto zebaamuhelanga kuzwelela kwa mizwale babali baluti babatalima za misebezi ya kubabalela miyaho. Kaizeli Indhumathi wa kwa India, utalusa kuli: “Lituto zene luamuhezi neli zende hahulu. Nelutabile hahulu kuituta mwakubabalelela Ndu yaluna ya Mubuso.” Muzwale Evans wa kwa Kenya, utalusa kuli: “Neluitutile mwakuitusiseza hande masheleñi ka kulukisanga nto ni nto yesinyeha kwa muyaho pili isika sinyehelela kale.”

 Lisinyehelo za ka silimo zakuitusisa ni kubabalela Ndu ya Mubuso, liitinganga kwa sibaka koiinzi Ndu ya Mubuso, nako yese itandile kuzwa foiyahelwa ni palo ya liputeho zeitusisa yona. Lisinyehelo zeo likwahelwanga cwañi?

 Masheleñi aitusiswanga kwa kubabalela Mandu a Mubuso azwa kwa linubu zebafanga batu. Muzwale Alexander yapila kwa Kazakhstan, utalusa kuli: “Linubu zeñwi liitusiswanga kwa kukwahela lisinyehelo za Intaneti ni za lika zeñwi zecwale ka mezi ni malaiti. Linubu zeñwi liitusiswanga kwa kuleka lika zecwale ka mapepa aitusiswanga kwa kuipukuta hamulaho wa kutapa kwa mazoho, magulovu, lika zeitusiswanga kwa kukenisa, ni penti.” Masheleñi asiyalanga afiwanga sina nubu kwa musebezi wa mwa lifasi kaufela kuli atuse mwa misebezi yemituna ni yetokwa hahulu masheleñi amañata.

 Haiba nto yeñwi yetokwa kulukiswa kwa Ndu ya Mubuso ifitelela masheleñi aitusiswanga ki puteho mwa likweli zepeli kamba zetaalu, baana-bahulu baikambotanga ni muluti wa ba LDC yatalima za kubabalela miyaho. Haiba ba Liluko Lelitalima za Musebezi wa Kuyaha bafa tumelezo ya kuli musebezi wo ueziwe, kuka itusiswa linubu zefiwanga mwa musebezi wa mwa lifasi kaufela. Mwa silimo sa sebelezo sa 2023, misebezi yecwalo yefita fa palo ya 8,793 neiezizwe ka kuitusisa masheleñi afita fa madola a a 76.6 milioni. Halunyakisiseñi misebezi yemibeli kwa misebezi yeneezizwe.

 Mwa Angola, Ndu ya Mubuso yesebile teñi ka lilimo ze 15, neinani butata bobushutana-shutana. Malaiti naaswanela kulukiswa, nekunani miandala fa mamota a Ndu ya Mubuso, mi batu bane bayahile bukaufi ni yona nebabilaela kuli mezi a pula naangongelanga mwa malapa abona. Ba Liluko Lelitalima za Musebezi wa Kuyaha nebalukisize kuli batatulule butata bo. Nekuitusisizwe masheleñi afita fa madola a 9,285 mwa musebezi wo. Batu bane bayahile bukaufi ni Ndu ya Mubuso nebaitumezi hahulu, mi nebatabisizwe ki mone uezelizwe musebezi wo.

 Mwa Poland, situwa sa Ndu ya Mubuso nesilotisanga mezi, mi kapeti neisinyehile hahulu kuli mane neisa koni kulukiswa. Ba Liluko Lelitalima za Musebezi wa Kuyaha nebalumelelize kuli situwa sa Ndu ya Mubuso yeo silukiswe kuli sisike safitisa mezi mi sebabeya mwateñi kapeti yenca. Masheleñi anaaitusisizwe mwa musebezi wo, naaafita fa madola aeza 9,757. Kabakaleo, hakuna kuba ni musebezi omutuna wa kulukisa sinca Ndu ya Mubuso ye ka lilimo zeñata.

 Musebezi wa kubabalela Mandu a Mubuso ubukelezanga linubu mi hape utisanga tumbo ku Jehova. Muzwale Shaun, wa kwa Tonga, ubulela kuli: “Bakeñisa musebezi wa kubabalela Mandu aluna a Mubuso, lwakona kulapela Jehova mwa Ndu ya Mubuso yekenile, ni yenani lisebeliso zesebeza hande, ili nto yetahisanga kuli batu bakuteke Jehova. Lwalukuluhanga kumemela batu kwa Ndu ya Mubuso.”

 Kaufelaa luna lwakona kutusa mwa musebezi wo ka kukenisanga ni kubabalela libaka zaluna za kulapelela. Muzwale Marino yapila kwa Australia yali muluti yatalima za misebezi ya kubabalela miyaho, ubulela kuli: “Kaufelaa luna lwakona kutusa mwa musebezi wa kubabalela Mandu A Mubuso. Haiba lueza cwalo, lukatusa kuli linubu liitusiswe hande, ili nto yekatusa kuli linubu zeo likone kuitusiswa kolitokwahala hahulu.”

 Muzwale Joel wa kwa India, waikolanga kubabalela Ndu yabona ya Mubuso. Utalusa kuli: “Kusebeza hamoho ni mizwale baka kunitusanga kunahana mobuka bela bupilo mwa lifasi lelinca.” Kaizeli Nicole yabulezwi kwamulaho utalusa kuli: “Cwanoñu fa, nenitusize kukolopa mwa Ndu ya Mubuso mizwale bona hane banze batiba lisuba mwa kalimba-limba ka mwahali lene lifitisa mezi. Kono nihaike kuli nenisika tusa mwa musebezi wa kutiba lisuba leo, nenitusize kuli kusike kwaba ni kozi.”

 Haiba mwatabela kutusa mwa musebezi wa kubabalela Ndu yamina ya Mubuso, muambole ni baana-bahulu mwa puteho yamina. Hape linubu zamina zatusanga mwa musebezi wa kubabalela Ndu yamina ya Mubuso ni Mandu A Mubuso amañwi mwa lifasi kaufela. Mwakona kufa nubu ka kuitusisa mbokisi ya linubu ye mwa Ndu yamina ya Mubuso kamba ka kuitusisa donate.dan124.com. Lwaitumela hahulu kwa moya wamina wa bufani.