Ka lilimo zefitelela 130, Lipaki za Jehova sebakopani hamoho kwa mikopano yemituna silimo ni silimo. Kwa mikopano ye ka nako ya cwale, sekufiwanga lingambolo zefitelela 40 kukopanyeleza cwalo ni lipina, lipuhisano ni mavidio. Kuli mukopano ukone kutusa ni kususueza batu babafumanehile ku ona, tukiso kaufela iswanela ‘kuutwahala ni kubonahala’ hande. (Luka 2:20) Linubu zamina liitusiswanga cwañi kuli likone kutusa batu kaufela babafumanehanga kwa mikopano yemituna ye, kusina taba ni kobapila?

 Buñata bwa masitediyamu ni maarena a cwanoñufa, afumaneha mwa linaha zeñwi, anani lipangaliko za mulumo ni mavidio. Kacwalo, halutelela muyaho ocwalo kuli luezeze mwateñi mukopano omutuna, ki kabakalañi haluipehelanga lipangaliko zaluna za mulumo ni mavidio? Muzwale yabizwa David, ili yasebeleza mwa Liluko la Broadcasting Kwa Ofisi Yetuna Yezamaisa Musebezi Waluna Mwa Lifasi Kaufela utalusa kuli: “Buñata bwa miyaho yelutelelanga haisika yahiwa ka nzila yekonahalisa kuli batu babafumanehile kwa tukiso yeezahalela mwateñi bakone kuutwa hande zebulelwa, ka lihora zefitelela 6 kusina filikanyo ni yekana. Ka mutala, mwa libaka mokuezezwanga lipapali kunani lipangaliko za mulumo zelelezwi kuitusiswa hababata kufa lizibiso zekuswani ni kuliza lipina. Fa masikilini afumanehanga mwateñi, babuhisanga feela fateñi papali ya mbola, hakufiwa zibiso yeñwi, ni hababata kukutela kubuhisa tukiso ya mbola. Kono luna lubatanga kuli batu babafumanehile kwa mukopano babuhe mavidio a matelele, kuutwa hande zebulelwa, ni kuutwisisa litaba kaufela zebulelwa kwa libulelelo.”

 Libaka mokuezezwanga mukopano omutuna zashutana; kacwalo, kutokwahalanga kuba ni lipangaliko za mulumo ni mavidio zeswanela kulikana ni miinelo ya sibaka mokuka ezezwa mukopano. Libaka mokuka ezezwa mukopano hase liketilwe, Maluko a Broadcasting afumaneha fa liofisi za mutai aketalanga cimo kobaka ina batu babaka fumaneha kwa mukopano kulikana ni palo ya batu babaakalezwa kuli ki bona babaka fumaneha kwa mukopano wo ni palo ya batu babakona kukwana mwa sibaka seo. Hasamulaho, mizwale kihona bakabona kobaka beela masipika ni masikilini fa kubuhela mavidio, mobaka beela lika zeo, ni kuñola lika kaufela zekatokwahala kuli batu kaufela babaka fumaneha kwa mukopano babuhe hande mavidio ni kuutwa hande mulumo.

 Kwa sibaka kokuezezwa mukopano mwa lipuo zeñata, lipangaliko za mulumo ni mavidio libanga zeñata. Haiba tukiso ya mukopano ikatolokiwa mwa puo yeñwi, batoloki baswanela kubona hande mavidio ni kuutwa hande mulumo kihona cwale litaba zebatoloka likautwahala fa radio kwa batu babautwa puo yeo. Bakeñisa kuli mazazi a sekunani lipangaliko zeñwi zeipitezi, mavidio akona kubuhiswa ka nako yeswana kwa batu kaufela babafumanehile kwa mukopano nihaikaba kuli bautwa litaba zebulelwa mwa lipuo ze 8. Muzwale David utalusa kuli: “Lipangaliko ze linani likalulo zeñata mi kutaata hahulu kuutwisisa molisebeleza; kacwalo, batu baba lisebelisanga batokwanga kulutiwa hande luli.”

 Buñata bwa liofisi za mutai, linani lipangaliko za mulumo ni mavidio zeitusiswanga silimo ni silimo. Mwa miinelo yecwalo, mizwale balukisanga kuli lipangaliko zeo lishimbululwe kuzwa kwa mukopano oezizwe kale ni kuisiwa ku otatama. Mutai wa United States uitusisanga masheleñi afitelela madola a 200,000 a silimo ni silimo kwa kushimbululula feela lipangaliko za mulumo ni mavidio. Nihakulicwalo, kueza cwalo kulutusa kusaitusisa masheleñi amañata hahulu kwa kuleka lipangaliko zeñwi ni kulibabalela. Muzwale yabizwa Steven yanaatusize mwa musebezi wa kuokamela lipangaliko za mulumo ni mavidio kwa mukopano omuñwi omutuna mwa Canada, utalusa kuli: “Mizwale bane babona za lipangaliko za mulumo ni mavidio nebaezize mone bakonela kaufela kubala lika kaufela za kwa lipangaliko, kulibabalela, ni kulibeya hande kuli liyo itusiswa fa mukopano one ukatatama.”

 Kutelela lipangaliko za mulumo ni mavidio kutula hahulu, mi lipangaliko zeo hañata halibangi mwa muinelo omunde kamba kubabalelwa hande. Kabakaleo, hañata lwalekanga lipangaliko zelutokwa. Ka nako ya cwale, sikilini iliñwi ya butelele bobufita fa limita zeketalizoho ni bupala bobufita fa limita zetaalu ileka masheleñi abato ba madola a 24,000, mi muhala wa maikrofoni iliñwi feela ya limita ze 15 ileka madola abato fita fa 20. Kacwalo, Liluko la Broadcasting lisebelisanga hamoho ni Liluko Lelitalima za Kuleka Lika fa Mutai “kubala lisinyehelo” pili basika leka kale sipangaliko sesiñwi. (Luka 14:28) Ka mutala, baipuzanga kuli: Ki batu babakai babaka tuseha haiba kulekiwa lipangaliko zenca? Kana kuleka lipangaliko zenca ki yona nzila yende hahulu yeka lutusa kutatulula butata? Kana lunani sibaka molukona kubuluka lipangaliko zeo mi kana lunani lika zeka lutusa kubabalela hande lipangaliko zeo ni batu babalutilwe hande, ili babaka kona kulibabalela?

 Kuli lipangaliko za mulumo ni mavidio liitusiswe ka nako yetelele ni kuli lubukeleze linubu, kamita lwalukisanga lipangaliko zeo lisaba feela ni butata. Hape lushimbelanga lipangaliko ze mwa mambokisi atiile ilikuli lisike za sinyeha ka bunolo mi mambokisi a ni ona alukiswanga haiba asinyeha.

 Batu babasi Lipaki batabisizwe hahulu ki moabonahalelanga ni mwautwahalelanga mavidio aluna kwa mikopano yaluna yemituna. Ka mutala, kwa mukopano omuñwi omutuna, mutu yomuñwi yabeleka ku omuñwi wa mitai ya makande yemituna mwa lifasi kaufela, naabulezi nto yeñwi ka za mulumo ni ponahalo ya mavidio aluna. Muzwale Jonathan yatusanga kwa kulukisa ni kubabalela lipangaliko za mulumo ni mavidio kwa mikopano yemituna utalusa kuli: “Mubeleki yo naakomokile hahulu hanaautwile kuli kaufelaa luna mwa sikwata neluli feela baitateli mi hakuna yanaaile kwa sikolo sesipahami kuli ayo lutiwa mwakuezeza musebezi wo. Naabulezi kuli kampani kwa naabeleka neikona kutanda mazazi a ketalizoho kueza musebezi one luezize mwa lizazi lililiñwi feela ni licika.” Kwa mukopano omuñwi omutuna, muzamaisi wa sibaka kone uezezwa mukopano wo naabulezi kuli, “Fa sibaka se, sekutile batu babañata babaitutile hahulu ka za lipangaliko zeitusiswanga kwa kuliza lipina ni kubuhisa mavidio; niteñi, hanisika bona kale batu babaziba kueza hande musebezi sina momuezeza!”

 Mutusehile cwañi kabakala kuitusisa lipangaliko za mulumo ni mavidio kwa mikopano yemituna? Mwendi ni mina muikutwa sina mobaikutwela bo David babapila kwa England. Babulela kuli: “Ninani lilimo ze 88 mi senifumanehile kwa mikopano yemituna mwa bupilo bwaka kaufela. Kono ka nako ya cwale kubunolo hahulu kuisa pilu kwa tukiso ya mukopano kaufela. Bakeñisa kuli mavidio abonahalanga hande, tukiso ya mukopano ifelanga kapili mi litaba zebulelwanga zautwahalanga hande.” Bo Micheal babapila kwa Nigeria, babulela kuli, “Bakeñisa kuli mizwale baluna habasa tokwa kuikataza hahulu kuli bautwe zabulela mubuleli kamba kubona hande mavidio, sebakona kuisa mamelelo kwa tukiso kaufela ni kuikola yona.”

 Hamuka fumaneha kwa Mukopano Omutuna kamba kwa Mukopano Oipitezi wa silimo se wa, ‘Mushaele Taba Yende!’ mukutumane hanyinyani mi munahanisise musebezi kaufela one upetilwe kuli mukone kuutwa hande ni kubuha mavidio a tukiso ya mukopano kaufela. Lwaitumela hahulu kuli linubu zamina kukopanyeleza cwalo ni linubu zefilwe ka kuitusisa donate.dan124.com litusize kuli musebezi wo upetiwe. Luitumezi.