Bibele neipolofitile kuli “sicaba [nesika lwanisa] sicaba sesiñwi” mi nekukaba ni likozi za ka taho ka “nako ya kufela kwa lifasi.” (Mateu 24:3, 7) Luiponezi litaba za bupolofita ze halinze litalelezwa mwa silimo sa sebelezo sa 2023. a Kono ka nako yene kusweli kuezahala likozi za ka taho ni lindwa mwa linaha ze 100, Lipaki za Jehova babonisize kuli balikanyisa lilato la Jehova. Ka mukwa ufi?

 Mwa silimo sa sebelezo sa 2023, mizwale baluna nebaamilwe ki likozi za ka taho zeikezahalelanga feela kamba zetahiswanga ki batu ze 200. Likopano za muuso zene iitusiswa ki Lipaki za Jehova neliitusisize madola afitelela 10 milioni b azwa kwa linubu zefiwanga mwa lifasi kaufela kuli lituse mwa musebezi wa kutusa babatahezwi ki likozi. Masheleñi a aekeza kwa masheleñi ebaitusisanga mizwale ni likaizeli kwa kutusa mizwale ni likaizeli bobapila ni bona mwa silalanda babali mwa butokwi. Munyakisise mo linubu zamina neliitusiselizwe kwa kutusa mizwale ni likaizeli bane baamilwe mwa likozi za ka taho zepeli kwa likozi zeñata zene tahezi mizwale baluna.

 Mwa libaka zeñwi za mwa Nigeria hañata kubanga ni muunda ka nako ya litabula. Nihakulicwalo, miunda yenebile teñi mwa kweli ya October 2022 neli yemituna hahulu kufita yeezahezi mwa lilimo zelishumi zefelile. Sibaka sa masimu sesieza lihekele zefitelela 676,000 nesisinyizwe ki muunda, mi batu babafitelela 2 milioni nebazwile mwa libaka zabona kabakala muunda wo. Mutai wa Nigeria kapili-pili waketa Tutengo Totutalima za Kutusa Batu Babatahezwi ki Likozi kuli tutalime za musebezi wa kutusa mizwale ni likaizeli kwa mubili ni kubatusa kutiisa tumelo yabona.

•   Bahasanyi ba 7,505 nebazwile fa mandu abona

•   Mandu a 860 naasinyehile

•   Mandu a Mubuso a 90 ni Sibaka sa Mikopano silisiñwi neli tibisizwe ki muunda

 Masheleñi afitelela madola a 250,000 naaitusisizwe mwa musebezi wa kutusa babatahezwi ki likozi, ili one uama:

•   Kuleka lico zecwale ka laisi, manawa, ni lico zeñwi

•   Kuleka lika za kuitusisa fa lapa zecwale ka ma matilesi ni misikito

•   Kulukisa kamba kuyaha sinca mandu anaasinyehile

 Mizwale baluna nebaboni teñi cwañi kuli linubu zene lifilwe neliitusiswa hande? Nzila yeñwi yene batusize neli kutatuba muyaho ni muyaho ka tokomelo kuli bakone kuziba haiba wakona kulukiswa. Haiba muyaho neutokwa kuyahiwa sinca, mizwale nebayahanga mufuta wa mandu abunolo ili afumaneha mwa sibaka seo.

 Mizwale ni likaizeli baluna bane baamuhezi tuso baitumela hahulu. Kaizeli yomuñwi naabulezi kuli: “Muunda neutahisize kuli bupilo bwaluna butatafale kakuli neusinyize masimu aluna ni mandu aluna. Neluimuluzwi mizwale ni likaizeli hane batile kuto lutusa fa lizazi leliswana leo ni kululukiseza malobalo amande. Hape neluikutwile kuimuluha hahulu hane luamuhezi lico zene balumile ba ofisi ya mutai. Nelukomokile hahulu hane luiponezi manzwi a kwa liñolo la Joani 13:34, 35 hatalelezwa mwa bupilo bwaluna. . . . Lilato la niti liteñi luli. Na ni lubasi lwaka, lufitisa buitumelo bobutuna hahulu kuzwelela kwatasaa lipilu zaluna kwa mizwale bane batile ka nako yeswanela kuto lufa tuso yene lutokwa luli.”

 Batu babañwi mwa silalanda nebalemuhile musebezi wa kutusa babatahezwi ki likozi one lueza. Nduna wa mwa silalanda sa Sabagreia, mwa tolopo ya Bayelsa, naabulezi kuli: “Kunani likopano kamba likeleke zeñata mwa lifasi, kono ki Lipaki za Jehova feela babaezize musebezi wa kutusa babatahezwi ki likozi. . . . Kopano [yamina] ki yeñwi ya likopano zende hahulu mwa lifasi.”

 Mwa kweli ya February 2023, likozi za mulilo zefitelela 400 nelisinyize lika zeñata mwa Chile. Sibaka sesieza lihekele zefitelela 430,000, hamoho cwalo ni libaka zeñwi mone kunani maluwo a butokwa mwa Chile nelisinyehile. Ibato ba batu ba 8,000 nebaisizwe kwa libaka zesilelelizwe. Nakonyana feela kuzwa foiezahalela kozi yeo, ofisi ya mutai yakala kulukisa kuli kube ni musebezi wa kutusa babatahezwi ki likozi.

•   Bahasanyi ba 222 neba tutiselizwe kwa sibaka sesisilelelizwe

•   Mandu a 20 naasinyizwe

 Masheleñi afitelela madola a 200,000 naaitusisizwe mwa musebezi wa kutusa babatahezwi ki likozi, ili one uama:

•   Kuleka lico ni mezi

•   Kuleka mafula a mwa limota, lika za kuitusisa kwa kukenisa, ni milyani

•   Kuyaha sinca mandu anaasinyehile

 Lubasi loluñwi nelukomokile hahulu kufumana kuli lika kaufela zene banani neli sinyehile kukopanyeleza cwalo ni ndu ni pisinisi yabona. Taba yeo neitahisize kuli kubele taata lubasi lo kufumana fa kuipiliseza. Kwa makalelo, neli nto yene utwisa hahulu bumaswe kwa lubasi kubona sibaka fone kubanga ndu yabona kwamulaho kuli sesili mukungulu. Kono hane baboni ndu yabona inze iyahiwa sinca, bakalisa kuikutwa hande hape. Kubona mo baitateli neba baboniselize kuli babalata ni kuli babaisa pilu neku batusize kuitiisa. Taba yeo neisusuelize hahulu lubasi lo kuli mane lwaitatela kuswalisana ni baitateli bao mwa musebezi wa kuyaha sinca ndu ya muzwale yomuñwi.

 Buñata bwa mizwale ni likaizeli baluna nebatabile hahulu kabakala musebezi wo wa kutusa babatahezwi ki likozi. Muzwale yomuñwi naabulezi kuli: “Tukiso ya Jehova ya kuba ni Tutengo Totutalima Babatahezwi ki Likozi ki yende luli. Mizwale ba mwa tutengo to, nebatile fa lizazi lene litatamiwa ki lizazi lene kuezahezi kozi mi bakalisa kulufa lika zene lutokwa. Kubala litaba ka za musebezi wa kutusa babatahezwi ki likozi mwa libaka zeñwi za lifasi, kwasusueza luli. Kono haiba ki mina babatusizwe, kwashutana feela. Kakuli mukafita fa kuitebuha hahulu kopano ya Jehova; mukaitebuha mo mizwale balikanyiseza tulemeno twa Jehova; ni mobaboniseza kuli baluisa pilu ka kulufa lika zelutokwa kuli luzwelepili kupila, kutiisa tumelo yaluna ni kulutusa kuba ni kozo ya mwa munahano. Lusweli lwaiponela lilato la Jehova ka likezo.”

 Lifasi le halinze lifela, lukazwelapili kubona likozi za ka taho zeñata haliezahala. (Luka 21:10, 11) Nihakulicwalo, Mulenaa luna yalilato, yena Jesu Kreste, uitusisa puteho ya Sikreste kulubonisa kuli uinzi ni luna “mazazi kaufela kuisa nako ya kufela kwa lifasi.” (Mateu 28:20) Linubu zamina zemufanga kuli mutuse mwa musebezi wa mwa lifasi kaufela, ka kuitusisa donate.dan124.com ni linzila zeñwi, ni ka kufana nako ni maata amina, libonisa kuli muyemela Mubuso wa Mulimu ni Mulena waona yalilato. Lwaitumela hahulu kwa moya wamina wa bufani omuzwelapili kubonisa.