Silimo ni silimo, mizwale ni likaizeli babazwa mwa linaha zeshutana-shutana, ili baba mwa sebelezo yeipitezi ya nako kaufela bamemiwanga kukena Sikolo sa Giliadi sa Bibele sa Watchtower, sesiezezwanga kwa Sibaka sa Tuto sa Watchtower mwa Patterson, kwa New York. a Mizwale ni likaizeli babakenanga sikolo se, balutiwanga mobakona kuezeza hande misebezi yebafilwe mwa kopano ya Jehova. Lituto zebaitutanga kwa sikolo seo libatusa kutusa ni kutiisa liputeho ni batu babasebeleza fa mitai mwa lifasi kaufela.

 Sikolo sa Giliadi sibanga ni baituti babazwa mwa lifasi kaufela. Ka mutala, mwa sitopa sabu 147 sa Sikolo sa Giliadi sene sibile teñi mwa 2019, nekunani baituti ba 56, ili bane bazwa mwa linaha ze 29. Mizwale ni likaizeli babamemiwanga kukena sikolo seo ki baba mwa sebelezo yeipitezi ya nako kaufela, babañwi ku bona basebeleza fa Betele, babañwi ki baokameli ba mupotoloho, babañwi ki balumiwa, mi babañwi bona ki mapaina babaipitezi.

 Mizwale baitukisezanga ka nako yetelele pili bana ba sikolo basika kalisa kale kuituta. Ba Liluko Lelitalima za Linzila Leli Kwa Ofisi Yetuna ya Zamaiso balukisanga za nzila ya mizwale ni likaizeli babamemilwe kwa Giliadi, ili babaitusisanga lifulai. Ka mutala, muituti ni muituti wa mwa sitopa sabu 147 sa Giliadi yanaazwa mwa naha isili naanani kulifelwa masheleñi aeza K22,585 ka avareji kuli ayo fita kwa Patterson ni kukutela kwa naha yahabo. Baituti bane bazwa kwa naha ya Solomon Islands nebatokwa kukwela lifulai zeene kuli bayo fita kwa Patterson, mi nebatokwa kukwela lifulai zetaalu hane bakutela kwa naha yahabo. Musipili one bazamaile ka fulai neufitelela likilomita ze 35,400! Muituti ni muituti naanani kulifelwa masheleñi afita fa K48,323. Kuli kopano isike yasinyehelwa hahulu, ba Liluko Lelitalima za Linzila Leli Kwa Ofisi Yetuna ya Zamaiso baitusisanga progilamu ya fa Intaneti yetusanga kubata lifulai zecipile ni kubulukisa matikiti. Mi mane tikiti niha seibulukisizwe, progilamu yeo izwelangapili kubata lifulai zeñwi zecipile ka lisunda kamba mane ka likweli kubona haiba teko ya lifulai ikutezi mwatasi. Likampani za lifulai zeñwi lifanga makasitoma pampili ya mupuzo bakeñisa kuitusisa fulai yazona. Makasitoma bakona kuitusisa pampili yeo kwapili kulifela tikiti mwa sibaka sa kulifa masheleñi. Ba Liluko Lelitalima za Linzila baitusisanga mapampili acwalo afilwe sina nubu kuli baleke matikiti.

 Baituti babañata batokwa kuba ni pampili ya tumelezo kuli balumelezwe kukena mwa naha ya America. Kacwalo, ba Liluko Lelitalima za Mulao Leli Kwa Ofisi Yetuna ya Zamaiso batusanga baituti kufumana pampili ya tumelezo yebonisa kuli ki bana ba sikolo. Muituti ni muituti ulifelwanga masheleñi aeza K10,715 ka avareji kuli añoliswe ni kufiwa pampili ya tumelezo.

 Lituto zebafilwe baituti bao lilutusa cwañi? Muzwale yabizwa Hendra Gunawan ki muuna-muhulu mwa puteho yeñwi kwa mboela-upa wa Asia. Muzwale yo, u mwa puteho yeswana ni bo mutu ni musalaa hae babakwazize Sikolo sa Giliadi. Utalusa kuli: “Kwamulaho, puteho yaluna neisina mapaina ba kamita. Kono bo mutu ni musalaa hae bao hase bakalile kuswalisana ni puteho yaluna, mizwale ni likaizeli nebasusuelizwe hahulu kubona tukufalelo yabona mwa bukombwa ni moya wa kulata kusebeleza babañwi one babonisa, mi babañwi ku bona bakala kueza bupaina. Mane hamulaho wa nako, kaizeli yomuñwi mwa puteho yaluna naaizo kena Sikolo sa Bakutazi ba Mubuso!”

 Muzwale yabizwa Sergio Panjaitan usebeza hamoho ni muzwale ni likaizeli babakwazize Sikolo sa Giliadi fa Betele yeñwi yefumaneha kwa mboela-upa wa Asia. Utalusa kuli: “Lituto zebalutilwe halisika tusa feela bona, kono mane ni luna zalutusa. Baitutile lika zeñata luli! Mwa sibaka sa kuiponahalisa kuli baziba zeñata hahulu, batalusezanga babañwi zebaitutile. Taba yeo yalususuezanga, mi ni luna lususuezanga babañwi.”

 Lisinyehelo za sikolo se zebanga teñi lilifelwanga cwañi? Lilifelwanga ka linubu zefiwanga kuli lituse mwa musebezi wa mwa lifasi kaufela, mi buñata bwa linubu zeo lifiwanga ka kuitusisa yeñwi ya linzila zefumaneha fa donate.dan124.com. Lwaitumela ku mina kabakala linubu zeñata zemufanga, ili zetusa kuzwisezapili sikolo se sesibanga ni baituti babazwa mwa linaha zeshutana-shutana.