Munyakisise litaba zelatelela zebonisa zebaeza babahulu ba bulapeli mwa ndwa yeezahala kwa Ukraine:

•   “Mueteleli wa Keleke ya Orthodox kwa Russia, yabizwa Patriarch Kirill, hasikanyaza ba Russia kabakala kutaseza naha ya Ukraine. . . . Keleke yahae izwezipili kuhasanya litaba za buhata ka za naha ya Ukraine, mi Putin yena mubusi wa naha ya Russia, uitusisize litaba zeo sina libaka naha ya Russia hailwanisa naha ya Ukraine.”—Mutende wa EUobserver, March 7, 2022.

•   “Patriarch Kirill . . . ubulezi kuli kulukile hahulu masole ba naha ya Russia habataselize naha ya Ukraine, mi utalusize kuli ndwa yeezahala kwa Ukraine itusa kuli bafelise bumaswe.”—Mutai wa makande wa AP News, March 8, 2022.

•   “Mueteleli wa Keleke ya Orthodox mwa Kyiv kwa Ukraine, yena Epiphanius I, la Mande naalapelezi masole ba naha ya Ukraine kuli ‘bakone kulwanisa masole ba Russia babatilo bataseza’ . . . Hape naatalusize kuli kubulaya masole ba Russia haki kueza sibi.”—Mutende wa Jerusalem Post, March 16, 2022.

•   “Luna ba Katengo ka Likeleke ni Likopano za Bulapeli za Mwa Ukraine (UCCRO) luyemela masole ba naha yaluna ka kutala, kubeya cwalo ni batu kaufela baba luyemela mwa ndwa ye, mi luzwelapili kubalapelela kuli batule masole ba naha ya Russia.”—Katengo ka UCCRO, a February 24, 2022.

 Mubona cwañi? Kana bulapeli bobuipapata kuli bulatelela Jesu Kreste bwaswanela kususueza batu kuya kwa ndwa? Bibele ibulelañi?

Litaba zeezahezi kwamulaho libonisa kuli ba bulapeli baikenyanga mwa ndwa

 Litaba zeezahezi kwamulaho libonisa kuli ba bulapeli bayemelanga ndwa mane ni kususueza batu kuli baye kwa ndwa, kono inze baipumisa kuli babata kutahisa kozo. Ka lilimo-limo, Lipaki za Jehova batusize batu kulemuha kuli balapeli babacwalo ki baipumisi. Munyakisise mitala yelatelela yefumaneha mwa lihatiso zaluna.

•   Taba yeli “The Crusades—A ‘Tragic Illusion’” italusa ka za lipulao za batu babañata zenetahisizwe ki ba Keleke ya Katolika ka kuipumisa kuli nebaeza cwalo ka libizo la Mulimu ni la Kreste.

•   Taba yeli “The Catholic Church in Africa” italusa ka mo bulapeli nebupalezwi kutibela ndwa ya mukowa, yenelwanwa ka mulelo wa kubulaya batu ba mushobo omuñwi kamba bababulela puo yeñwi.

•   Litaba zeli “Is Religion to Blame?,” “Religion’s Role in Man’s Wars,” ni “Religion Takes Sides” litalusa ka mo babahulu ba bulapeli bwa Katolika, bwa Orthodox, ni bwa Protestanti nebaikenyelize mwa lindwa zeñata ka kuyemela maneku amabeli alwanisana.

Kana Bulapeli bwa Sikreste bwaswanela kuyemela ndwa?

 Zanaalutile Jesu: “Ulukela kulata wahenu mouitatela.” (Mateu 22:39) “Muzwelepili kulata lila zamina.”—Mateu 5:44-47.

 Zanaabulezi Jesu: “Mubuso waka haki wa lifasi le. Kambe Mubuso waka ki wa lifasi le, likombwa zaka nelika nilwanela kuli nisike nafiwa kwa Majuda.” (Joani 18:36) “Kaufela babaitusisa mukwale bakabulaiwa ka mukwale.”—Mateu 26:47-52.

 Munyakisise taba ye: Haiba Bakreste ba mwa linako za kwamulaho nebasa swaneli kulwana kuli basileleze Jesu, kana Bakreste kacenu baswanela kulwana ka mabaka amañwi feela? Mubale taba yeli “Is War Compatible With Christianity?” kuli mulemuhe ka mo Bakreste ba mwa linako za kwamulaho nebalatelezi mutala wa Jesu ni lituto zahae ka busepahali.

Kukaezahalañi kwa bulapeli bobuyemela lindwa?

 Bibele iluta kuli Mulimu haatabeli bulapeli bobuipapata kuli bueza misebezi ka libizo la Jesu kono inze busalateleli lituto zahae.—Mateu 7:21-23; Tite 1:16.

•   Buka ya Sinulo ibonisa kuli Mulimu ukafa koto bulapeli bobucwalo kabakala mali “a batu kaufela bababulailwe mwa lifasi.” (Sinulo 18:21, 24) Kuli muzibe libaka Mulimu hakaeza cwalo, mubale taba yeli, “Babilona Yomutuna ki Mañi?”

•   Jesu naabonisize kuli bulapeli kaufela bobusa tabisi Mulimu bukayundiswa kabakala misebezi yabona yemaswe, sina feela kota yebolile yebeya miselo yebolile ‘hailemiwa ni kunepelwa mwa mulilo.’ (Mateu 7:15-20) Kuli muzibe moika ezahalela taba yeo, mubale taba yeli, “The End of False Religion Is Near!”

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images