Mwa silimo sa 2022 mibuso mwa lifasi kaufela iitusisize masheleñi afita fa madola a kwa America a 2.24 trilioni mwa lindwa, sihulu mwa ndwa ye mwahalaa Russia ni Ukraine, mi hakusika itusiswa kale masheleñi amañata hahulu cwalo mwa lindwa. Ka kuya ka piho yenefilwe mwa April 2023 ki ba katengo ka Stockholm International Peace Research Institute (SIPRI), mwa silimo sa 2022:

•   Masheleñi anaaitusisizwe mwa lindwa za kwa Europe “naaekezehile ka 13 pesenti mwahalaa silimo seo, mi yeo ki kekezeho yetuna hahulu yeitusisizwe ki mibuso ya kwa Europe mwa silimo silisiñwi kuzwa feela mwa 1991.”

•   “Kwa Russia…nekubile ni kekezeho ya 9.2 pesenti kwa masheleñi aitusiswangwa, mi nto yeo itahisize kuli naha ya Russia ibe yabulaalu kwa linaha zeitusisanga masheleñi amañata mwa lifasi kaufela.”

•   Naha ya United States izwezipili kuba yona yapili kwa kuitusisanga masheleñi amañata mwa lindwa, bakeñisa kuli neiitusisize 39 pesenti kwa masheleñi kaufela anaaitusisizwe kwa lindwa mwa lifasi kaufela.

 Bo Dr. Nan Tian, bañoli ba lipiho za katengo ka Stockholm International Peace Research Institute (SIPRI) batalusa kuli: “Taba ya kuli mibuso izwezipili kuekeza kwa masheleñi aitusiswanga kwa lindwa mwa lilimo zefelile, ibonisa kuli lupila mwa lifasi ili mo lika zemaswe lizwelapili kuekezeha.”

 Bibele neipolofitile kuli mibuso yemaata ika lwanisana mi hape ilubulelela ka za lika zekona feela kutahisa kozo ya luli.

•   Bibele italusa mazazi elupila ku ona kuli ki “nako . . . ya mafelelezo.”—Daniele 8:19.

•   Buka ya Daniele neipolofitile kuli ka nako yeo, kukaba ni mibuso yemaata yeka lwanisana. Mibuso yemaata ye ‘ika lwanisana’, kabakala kuli mubuso ni mubuso ubata kuli ube feela ona unosi onani maata. Kueza cwalo kukatahisa kuli mibuso ye iitusise “maluwo,” kamba masheleñi amañata.—Daniele 11:40, 42, 43.

 Kuli muitute zeñata ka za bupolofita bwa mwa Bibele bo, mubuhe vidio yeli, Bupolofita Bobutalelelizwe kwa Daniele Kauhanyo 11.

•   Bibele ibulela kuli Mulimu ukafelisa mibuso ya batu. “Ukatoma mubuso osike wasinyiwa nikamuta. Mi mubuso wo hauna kushimbulukela kwa sicaba sisili. Ukatuba ni kufelisa mibuso ye kaufela, mi ki ona feela okaba teñi kuya kuile.”—Daniele 2:44.

•   Honacwale-cwale fa, Jehova a Mulimu ukaeza lika zeipalelwa kueza mibuso ya batu, ili kutahisa kozo ya kuya kuile. Ka mukwa ufi? Mubuso wahae wa kwa lihalimu ukasinya lilwaniso ni kufelisa lindwa kaufela.—Samu 46:8, 9.

 Kuli muitute zeñata ka za ze ukapeta Mubuso wa Mulimu, mubale taba yeli, “Mwa Mubuso wa Mulimu ‘Kozo Ikaekezeha.’”