Usangedile bininge muntu wa ngitu ingi, kadi umona’mba nandi ukusangedile. Ne kadi, mwilembelanga misapu kyaba kyonso, mushikata pamo ku mafetyi . . . , kadi misapu imo ikutumina uno muntu i ya kwiselembeja.

 Penepo ubamwipangula kukafula bulunda bwenu, mwanda wa kuyuka shi banwe bonso mumwene bintu muswelo umo. Le walondolola namani? Amba “nkumwene’tu bu mulunda—kekudipo mwanda mukwabo.”

•  Mokeivwanina

•  Kyobifikilanga

•  Byobwanya kulonga

 “Nalobele bininge​—namulobela aye ne ami mwine! Twadi twilembela difuku ne difuku, kadi wadi umweka bu untele mutyima bya binebine. Na bubine, nadi kendi mumusanswe.”​—Jasmine.

 “Ami ne uno mwana-mukaji twadi bakakunku ba balunda netu babidi. Kyaba kimo, byadi bimweka bu netu ketwinangilanga. Batwe bonso bubidi twadi twisamba bivule, kupwa ketwilembela misapu bininge. Mutyima wamfwile bininge pawaunsapwidile amba umwene’tu bu mulunda ne ponayukile amba winangilanga na muntu mukwabo tamba kala.”​—Richard.

 “Nsongwalume umo wadi unembela difuku ne difuku, kadi kyaba kimo twadi ‘twiselembeja’ batwe bonso. Ino ami pa kumulombola’mba musenswe, wasepa kupwa wanena’mba ‘pano bidi kitatyi kyami kya kwinangila na muntu kekyabwene!’ Nadila kitatyi kilampe.”​—Tamara.

 Mu kīpi: Shi ulanga’mba upwene bininge na muntu ino ubayuka’mba abe kete ye umusenswe, i byendele’mo kuloba, kwivwana bumvu, nansha kwimona bu mwelwe. Nsongwalume umo witwa bu Steven unena’mba: “Naivwene bibi pobyamfikile, kadi byaunsense bininge. Byaunombele kitatyi pa kukulupila muntu mukwabo.”

 Kwilembela misapu ne kwisamba pa Entelenete kubwanya kulengeja upēlelwe kusanswa muntu ino aye papo kukusanswa mpika. Tala binena bankasampe bamobamo.

 “Muntu ubwanya kukulembela mwanda’tu wabulwe bya kulonga, ino abe walanga’mba i kilomboji kilombola’mba ukutele mutyima. Kadi shi ukulembelanga difuku ne difuku, ubwanya kwididika na kulanga’mba ukumwene bu muntu wa pa bula.”​—Jennifer.

 “Muntu ubwanya kukusanswa bya binebine, ino mukwabo nandi ukimba’tu muntu wa kwisamba nandi, muntu wa kwilombola nandi tufyame.”​—James.

 “Kutumina’tu muntu kamusapu amba ‘lāla biyampe,’ ubwanya kwikamona bu ka buswe, ino nanshi mwine utumine’ko kadi’kopo ne ‘mutyima’ mwine.”​—Hailey.

 “Tubifwatulo twa mu misapu tubwanya kushintulula’mba ‘ngidi biyampe’ nansha’mba ‘neselembejanga.’ Kyaba kimo muntu utambula musapu ubwanya kulanga’mba i kwiselembeja.”​—Alicia.

 Mu kīpi: Kokamona kukuta kobakutele mutyima bu kisanso.

 Le bipēla kunena ino bikomo kulonga? En-en! Bible unena’mba: “Mutyima i ñongojani kutabuka kintu kyo-kyonso kadi i mubimubi.” (Yelemia 17:9) Ao ubwanya kukulengeja utamije buswe bwa kitumbuzaji bubwanya kujimina kitatyi kyokayuka’mba i abe kete wadi wibifwatakanya.

•   Mona bintu mobikadile. Joka bidi kunyuma bityetye, ubandaule bulunda bwenu. Wiipangule’mba, ‘le kudi bubinga bwa binebine bomfwaninwe kulangila’mba uno muntu umwene kutabuka mwamwenine bantu bakwabo?’ Kokaleka mwiivwanino obe utādile ‘bukomo bobe bwa kulanguluka.’​—Bene Loma 12:1.

•   Ikala na bujinguludi. Kutentekela pa biyukeno bikulengeja ulange amba bulunda bwenu bubaenda kulampe, tá mutyima bininge ne ku biyukeno bikulengeja umone amba mwi balunda’tu bitupu. Kokalanga’mba shi umona muntu mu muswelo kampanda, nandi ye mwakumwena.

•   Tūkija mutyima. Shi muntu kakulombwele patōkelela’mba usakanga kukuyuka mwanda wakusanswa, kokiela kala bininge mu kipwano kibwanya kutyibika.

•   Ikala wa binebine. Bible unena’mba kudi “kitatyi kya kwisamba.” (Musapudi 3:7) Shi ukimba kuyuka shi muntu kakumwenepo bu mulunda bitupu, wisambe nandi. Nsongwakaji umo witwa bu Valerie unena’mba: “Shi kemumwenepo bintu muswelo umo, i biyampe’ko bikusanse pobikidi ku ngalwilo, kutabuka’ko papite myeji mivule kumeso kwa kujingulula’mba muntu’wa kakusenswepo.”

 Mu kīpi: Nkindi 4:23 unena’mba: “Lama mutyima obe.” Shi umona’mba usangedile muntu kampanda, tompa kuyuka shi nandi ukusangedile. Kubadikila kutamija buswe kudi pamo bwa kukuna mutyi pa dibwe dyumudyumu.

 Shi ubayuka’mba muntu’wa ukusenswe​—kadi shi kodi mufikile pa kitatyi kya kwinangila​—ke abe mwine wa kukwata butyibi shi mukendeleja na kipwano kyenu. Vuluka’mba, busongi buyampe i bwa ba mulume ne mukaji badi na bitungo bimo bya ku mushipiditu, besamba pampikwa kafinda ne kwilongela bintu pampikwa budimbidimbi. (1 Bene Kodinda 7:39) Na bubine, bashilwile bu balunda bayampe ne kwendelela kwikala bu balunda bayampe.​—Nkindi 5:18.